Matta 11 - Dadiya NT

Nǝb Twama Yohanaɨ Nǝ Yʊtǝm Mwɛ Sagsagɔ

¹ Yesu a dɨ mɛlatǝm bɛtɔ mɛlalɨ gǝnɔ kʊb jeli yoi gǝm kɛl nɨɨ, nǝngɔ a gun a daa gɔ a shu ya mɛla nǝbɔ gǝm lɛɨ, kiyo jim kɛl Kwaamaɨ lɛ a tuulɔtɨn jini.

² Kwama gɔ Yohana nǝ Yʊtǝm mwɛ Sagsagɔ gǝ na a lɔsomi, nǝngɔ a nyʊwa kanjǝl nɨ Kiristi maa lɛɨ, nǝngɔ a twam bɛtɔ mɛlalɨ gǝnɔ a daa gǝ woi,

³ gɔ ya ja bʌ gǝn gɔ, “Nǝmɔ wʊnɨ ja sʊwa gɔ bɛ lɛɨ ka? Nǝ dʌng kaa nǝl ka?”

⁴ Yesu a jǝla ji gɔ, “Ya jǝ́ sʊwa Yohana jʊ jǝ́ kuwo, jǝ́ nyʊwaɨ.

⁵ Kululʌmɔ kuwo daagɔ lɛ, nǝbɔ bʊtɔgɔ a swam swamɨ, yɔ yɔm lɛ, nǝbɔ a mwata mwataɨ a nya lǝma, nǝb nɨ mɨ jǝ nyʊwa lɔl lɛɨ, jǝ nyʊwa kɛlɔ lɛ, nǝbɔ a bʊlaɨ, ja gun, ja kiyo nǝb bʊnǝnɔ gǝm fulon kɛl lǝmɨgɔ.

⁶ Bwiligɔ na a nǝb nɨ a kɨɨ bɔ nǝl a dul mɨɨ.”

⁷ Nǝn kwama ja shumi, nǝngɔ Yesu a tǝl sʊwa nǝbɔ kɛlɔ lɛ a dul Yohanaɨ gɔ, “N wɛ jǝ́ jel sǝ jǝ́ kuwo a mʊgɔ kuuli? N yayiligɔ yʊwagɔ mǝg lɛɨ ka? Ɔ ɔ!

⁸ Na mɨ nyɨɨ, n wɛ jǝ́ yɔ dʌngtǝmɨ? Jǝ́ yɔ dʌngtǝm nʊ nɨ a mal bɛllɛ nyantɨnɨ ka? Ɔ ɔ! N nǝbɔ a lɔ fɔlɔɨ gǝ mal bɛllɛ nyantɨn nɛɨ.

⁹ N wɛ jǝ́ yɔ dʌngtǝmɨ? N nǝkuwotǝmkǝga ka? N bɨlǝngǝn mǝ sʊwa jen nɛɨ, a laa nǝkuwotǝmkǝga.

¹⁰ Nʊ nɨ nǝn gɔ ja mʊla a dul gǝn gɔ, “ ‘Mǝ twam bwɛ twama mǝndɨ a kǝga mʊn, wʊnɨ fɛka mʊn golagɔ lɛɨ dɨsɔ la ń bɛɨ.’

¹¹ N bɨlǝngǝn mǝ sʊwa jen nɛɨ, ja lǝga bɔ ja bʌ kaa nǝl a yooli nɨ, wʊnɨ a laa Yohana nǝ Yʊtǝm mwɛ Sagsagɨɨ. N sʊwa jen, nʊ nɨ a dwal a fɔlɔn lɔ Kwaamaɨ, a laa gǝn.

¹² A kwama Yohana nǝ Yʊtǝm mwɛ Sagsagɔ a bɛ nǝn a dwiyeni, fɔlɔn lɔ Kwaamaɨ nyʊwa gaalan nɛ, nǝb nɨ nǝ ji gaalan nɛɨ, nǝji jǝ swɨ lɛ ja yem fɔlɔn lɔ Kwaamaɨ nǝn kwaanɨ.

¹³ Diil Musaɨ jǝbɔ langǝn bwangǝn nǝbkuwotǝmkǝgagɨɨ ja sʊwa kɛl a fɔlɔn lɔ Kwaamaɨ, nǝngɔ la Yohana a bɛɨ.

¹⁴ Na jǝ́ jǝla nǝn twama jini, Yohana nǝn gɔ n nʊ ja sʊwa kɛl a dul gǝn gɔ Iliya bɛ bɛɨ.

¹⁵ Nʊ nɨ nǝn lɔl nyʊwatǝmɨ, bɛ ga nyʊwa.

¹⁶ “Mǝ mʊrka kal nɨ nǝn wɛ? Maa na bɛtɔ nɨ yǝm a gamdʌbo jǝ jo fatǝm gaan jinɔ lɛ jǝ sʊwa lɛ gɔ,

¹⁷ “ ‘Nǝ guu jem jwalɔ, jǝ́ kɔ yegɔ! Nǝ ma nafɨ bwaagɔ, jǝ́ kɔ jitǝm wigɔ!’

¹⁸ Yohana a bɛ do diil mwɛmɔ lɛ, mɨ nɔɔ bʊgɛ lɛ, nǝngɔ ja sʊwa gɔ, ‘Nǝngǝn nǝn nǝblaam!’

¹⁹ Bʊla Nǝlɨ a bɛ, ja lɛ, nɔɔ lɛ, jǝ́ sʊwa lɛ gɔ, ‘Jǝ́ kuwo nǝ jam nɨ jǝbɔ nǝ nɔɔtǝm nɨ jǝbɔ fatǝm nǝb yotǝm kemʌn tǝmɔ, jǝbɔ nǝb bwɨlangkɛlɔ!’ Yʊlan Kwaamaɨ gǝ nʊng dǝngdǝng gǝnɔ a gola nǝb nɨ a bwangtǝnɨ.”

Gʊtǝm Lɔl A Tuulɔtɨn Nɨ Ja Yǝla Bɔ Ja Bǝla Bwɨlangkɛl Jini

²⁰ Nǝngɔ a tǝl gʊtǝm lɔl tuulɔtɨn nɨ ga maa kɔrɔ kanjǝl laatǝm kang a kʊm jini, jʊ a bwɨɨ ja yǝla bɔ ja bǝla bwɨlangkɛl jinɔ.

²¹ “N mwɛ mʊn, Korasinu! N mwɛ mʊn, Betsaida! Na na kanjǝl laatǝm kang nɨ mǝ maa a tuulɔ mʊnɨ, na na mǝ maa a Taya jǝbɔ Sidoni, na ja yǝla ja bǝla bwɨlangkɛl jinɔ kǝnǝn, jǝ yǝm nǝn bwɨlang tulong dwang a mʊgɔ bugom.

²² Mǝ sʊwa jen nɛ, gaalan nɨ jǝ nǝ jen nɛ nǝn kɔkɔ borangɨ, laa laa gaalan nɨ ja nǝ Tayagɔ jǝbɔ Sidoni.

²³ “Jǝ́ nǝbɔ Kafarnahumi jǝ́ kuwo lɛ jǝ gung jen a dʌbʌl ka? Ɔ ɔ, jǝ gǝla nǝn jen a daa yamtǝm borang. Kanjǝl laatǝm kang nɨ mǝ maa a tuulɔ jeni, na na mǝ maa a Sadumaɨ, na tuulɔ nɨ wo dwiyen.

²⁴ Mǝ sʊwa jen nɛ, nǝn kɔkɔ borangɔ gaalan nɨ jǝ nǝ ń nɛɨ, laa laa gaalan nɨ ja nǝ tuulɔ Sadumagɨɨ.”

Jǝ́ Bɛ A Daa Mɨ Woi Jǝ́ Nya Nya Fǝbtǝm

²⁵ A kwama gɔ nǝngɔ Yesu a sʊwa gɔ, “Tɛtɛ, Tɛlalɔ dʌbʌlɔ jǝbɔ tǝmɔ, n buu mʊn kang mʊ yʊ nǝb yʊlanɔ jǝbɔ nǝb nyǝmtǝmɔ kanjǝl nɨɨ, mʊ nʊng bɛtɔ dwalǝnɨ.

²⁶ Tɛtɛ, n jʊ mʊ swɨ maatǝmɨ.

²⁷ “Kanjǝlɔ gwam Tɛtɛ mɨ a nɨ ɨ nɨ ɨɨ. Mɨ nǝn nʊ nɨ a nyǝm Bwɛɨ, na ke bɔ Tɛ bwɛɨ. Mɨ nǝn nʊ nɨ a nyǝm Tɛ bwɛɨ, na ke bɔ Bwɛɨ jǝbɔ nʊ nɨ Bwɛ swɨ lɛ a fɛta ji ja nyǝm Tɛ bwɛɨ.

²⁸ “Jǝ́ bɛ a daa mɨ woi gwam jǝ́ nǝb nɨ jǝ́ dɔta lɛ, jǝ́ gʌ lɛ nǝn kʊlǝn nɨ a tuu tuui a dul jeni, mǝ nǝ jen nǝ fǝbtǝm.

²⁹ Jǝ́ do maajɨ mǝndɨ kanga nɛɛgɔ a do tɨya kwɨlɔ sǝ a maa maajɨɨ. Jǝ́ mɛla a daa mǝ woi. Mǝ nǝ shig shig, mɨ mǝ nǝn gungtǝm dul, jǝ́ nya nya fǝbtǝm a nǝl jen.

³⁰ Tɨya kwɨl mǝndɨ a bwa bɔ. Kʊlǝn mǝndɨ a tuu bɔ.”