Matta 10 - Dadiya NT

Yesu A Jo Bɛtɔ Mɛlalɨ Gǝnɔ Kʊb Jeli Yo

¹ Nǝngɔ Yesu a jo bɛtɔ mɛlalɨ gǝnɔ kʊb jeli yoi, a nǝ ji fɔlɔn jǝgtǝm nǝblaam fitʌni, gɔ ya ja gung nǝb twɨlamɔ lɛ jǝbɔ nǝb nɨ mɨ kwamɨgǝnɨ.

² Dun bɛtɔ twamagɔ kʊb jeli yoi n wɔ: Na tɨkǝgagɔ nǝn Saminu wʊnɨ jǝ jo lɛ gɔ Bitrusi, jǝbɔ kɨla gɔ Andarawas, jǝbɔ Yakubu bʊla Zabadi, jǝbɔ kɨla gɔ Yohana,

³ jǝbɔ Filibus, jǝbɔ Bartalamawas, jǝbɔ Toma, jǝbɔ Matta wʊnɨ yo kemʌn tǝm lɛɨ, jǝbɔ Yakubu bʊla Halfaɨ, jǝbɔ Tadawus,

⁴ jǝbɔ Saminu nǝ swɨtǝm tǝm gǝn jǝbɔ Yahuza Iskariyoti wʊnɨ a lungto Yesui.

Yesu A Twam Kʊb Jeli Yo Nɨ

⁵ N kʊb jeli yo nɨ Yesu a twamɨ, a sʊwa ji gɔ, “Ka jǝ́ dɔ lɛ tǝm Bʌtʌbi jǝbɔ tuulɔ Samariyagɔ.

⁶ Bɛ jǝ́ yɔ a daa nǝbɔ Israilaɨ woi, a maa na kwamɨtɨn nɨ a lɛlaɨ.

⁷ Kanga jǝ́ yɔɨ, ya jǝ́ sʊwa jengɔ, ‘Fɔlɔn lɔ Kwaamaɨ a dwama.’

⁸ Jǝ́ gung nǝb nɨ mɨ kwamɨgǝnɨ, jǝ́ gung nǝb nɨ a bʊlalaɨ, jǝ́ gung nǝbɔ bʊtɔgɔ a mwata mwataɨ, jǝ́ jǝg nǝblaamɔ. Jǝ́ nya nǝn kwan, jǝ́ nǝ ji nǝn kwan.

⁹ Ka jǝ́ ta lɛ kemʌn mʊn jǝbɔ maalʊ, jǝbɔ kemʌn sǝlǝn a bǝlatɨn jenɔ gǝm.

¹⁰ Ka jǝ́ ta lɛ sʊwa a yɔm jenɔ gǝm, jǝbɔ bɛllɛ yo, jǝbɔ twam, jǝbɔ dwam. N dǝngdǝng nǝ maajɨ a ja mɨbam maajɨ gǝnɔ.

¹¹ “Tuulɔ nɨ gwam jǝbɔ bɛ tuulɔ nɨ jǝ́ dɔ woi, jǝ́ saa kwamɨ nǝlɨ jǝ́ shig wo, a yɔ nǝn a kum nɨ jǝ́ bǝla daa gɔ lɛɨ.

¹² Na ya jǝ́ dɔ lɔngɔ lɛɨ, jǝ́ sʊwa jengɔ, ‘Lǝmagɔ a bɛ a lɔ nɨ.’

¹³ Na lɔ gɔ n lɔ nyanɨ, bɛ jǝ́ maa keli sǝ Kwaama a nǝ ji lǝma. Na ke bɔ lɔ nyanɨ, bɛ bwili jenɔ a yǝla a dul jen.

¹⁴ Na kaa nǝl a kɔ a yo jen bɨɨ, a kɔ nyʊwatǝm kɛl jeni, jǝ́ bǝla lɔ gɔ jǝbɔ tuulɔ gɔ, jǝ́ buum kuulɔ a naa jeni.

¹⁵ N bɨlǝngǝn mǝ sʊwa jen nɛɨ, nǝn di borang Kwaamaɨ, jʊ bwɨ lɛ nǝn tuulɔ gɨɨ, bwɨla laa laa jʊ a bwɨ nǝn Sadumagɔ jǝbɔ Gwamratagɨɨ.

Gaalan Nɨ Bɛ Lɛɨ

¹⁶ “N wɔ mǝ twam jen nɛ na kwamɨ a kʊm bangashɨtɨn. A dul kɛl nɨɨ, jǝ́ yǝlam nǝb yʊlan na sɔɔtɨn, na kumfiyotɨn wʊnɨ mɨ maa fanyal lɛɨ.

¹⁷ “Bɛ jǝ́ kɨla nǝbɔ, jǝ yɔ yɔ nǝn jen a kǝga nǝb dʊʊm koteregɨɨ, ja tʊm jen nǝn banjangɨ a kan mɛlalɨ jin.

¹⁸ A kɛl dul mɨ, jǝ yɔ yɔ nǝn jen a kǝga nǝb dʊʊmɨ jǝbɔ kǝga fɔlɔlɔmɨ, sǝ jǝ́ nǝ nyiyo a kǝga jin, jǝbɔ kǝga Bʌtʌbi.

¹⁹ Kwama ja lungto jen, ja yɔ nǝn jen a kan borangɨ, ka jǝ́ kom lɛ dul jenɔ a jʊ nɨ jǝ́ sʊwa lɛɨ. Yʊwa Kwaamaɨ nǝ jen nǝ jʊ nɨ jǝ́ sʊwa lɛ a kwama gɨɨ.

²⁰ N ke bɔ jen jǝ́ sʊwa kɛl lɛɨ. N Yʊwa Tɨya jeni sʊwa kɛl lɛ a daa jen woi.

²¹ “Kɛ lungto lungto kɨla gɔ ja jʌ, tɛ lungto lungto bʊla gɔ, bɛtɨ gun gun tʌgo a tɛtǝlam jinɔ gǝm, ja jʌ ji.

²² Nǝbɔ kɔ jen kɔ a kɛl dul mɨ. Nʊ nɨ a kʊ nǝl a yɔ nǝn a dɨltǝmɨ, bʊʊ bʊʊ.

²³ Na jǝ nǝ jen gaalan nɛ a kaa tuulɔɨ, jǝ́ mwal jǝ́ shu a kaa tuulɔ. N bɨlǝngǝn mǝ sʊwa jen nɛɨ, mɨsɔ jǝ́ dɨɨ kɛlatǝm tuulɔtɨn Israilagɔ lɛ gwam, sǝ Bʊla Nǝlɨ a bɛ.

²⁴ “Bwɛ mɛlalɨ mɨsɔ laa feyi gǝnɔ lɛ. Bwɛ jwaalɛ mɨsɔ laa tɛlalɔ gǝnɔ lɛ.

²⁵ A la nyɔ bwɛ mɛlalɨ a yǝlam na feyi gǝnɔ, bwɛ jwaalɛ na tɛlalɔ gǝnɔ. Na ja jo nǝ lɔngɔ gɔ, Baalzabuli, nǝbɔ a mʊgɔ lɔngɨɨ jǝ jo ji nǝn dun won?

Nʊ Nɨ Jǝ́ Nyʊwa Taal Gǝnɔ Lɛɨ

²⁶ “Ka jǝ́ nyʊwa lɛ taal jinɔ. Mɨ jʊ nɨ wo ja sum sumi mɨsɔ jǝ wum lɛɨ. Mɨ jʊ nɨ wo ja yʊ yʊɨ mɨsɔ jǝ nyǝm lɛɨ.

²⁷ Jʊ nɨ mǝ sʊwa jen a kumtojilii, jǝ́ sʊwa a nyalǝm. Jʊ nɨ mǝ sʊwa jen daddadɨ, jǝ́ sʊwa gǝn a talɨ.

²⁸ Ka jǝ́ nyʊwa lɛ taal nǝb nɨ jʌ bʊtɔgɔ lɛ, mɨ ji nǝn kwaan nɨ jǝ jʌ dʊʊmɨgɔ lɛɨ. Jǝ́ nyʊwa taal nʊ nɨ nǝn kwaan jʌtǝm bʊtɔgɔ jǝbɔ dʊʊmɨgɔ a mʊgɔ lɔ kǝlaɨ.

²⁹ Nǝbɔ gǝ miyo bandwɨnɛgɔ yo a kemʌn sǝlǝnɔ win, mɨ nʊ nɨ wo win yal lɛ a tǝmɨ, Tɨya jen a nyǝm bɨɨ.

³⁰ Yitʌn dul jenɔ, Kwaama a nyǝm ladatǝm jinɔ.

³¹ Ka jǝ́ nyʊwa lɛ taal, bwayǝlǝn jenɔ a laa a bandwɨnɛtɨnɨ.

Nʊngtǝm Jǝlatǝm Nǝn Nǝbʊʊlɨ A Kǝga Nǝbɨɨ

³² “Gwam nʊ nɨ a jǝla gɔ gǝ na a mɨɨ a kǝga nǝbɨɨ, mǝ tǝmɨ mǝ jǝla jǝla mǝʊ gǝ na a mɨ a kǝga Tɨya mɨɨ nɨ a dʌbʌli.

³³ Nʊ nɨ a kana nyǝmtǝm mǝndɨ a kǝga nǝbɨɨ, mǝ kana kana nyǝmtǝm gǝnɔ a kǝga Tɨya mɨ nɨ a dʌbʌli.

Mǝ Bɛ Bɔ Nǝn Yɨm Kwamɨgǝn Mǝ Bɛ Nǝn Gulʌn

³⁴ “Ka jǝ́ bʊʊla lɛ jengɔ mǝ bɛ nǝn yɨm kwamɨgǝn a yooli nɨ. Ke bɔ yɨm kwamɨgǝn mǝ bɛ nǝnɨ, mǝ bɛ nǝn gulʌn.

³⁵ Mǝ bɛ sǝ ba n mʊrka kɨlan “ ‘a kʊm bwɛɨ jǝbɔ tɨya gɔ, bwɛnɔɔlɨ jǝbɔ nyɨya gɔ, nɔɔlɨ jǝbɔ yul gɔ.

³⁶ Nǝbɔ lɔ gɨɨ, yǝlam nǝb kiim gǝn.’

³⁷ “Nʊ nɨ a swɨ nyɨya gɔ jǝbɔ tɨya gɔ a laa ɨ, a la bɔ a yǝlam a mɨ. Nʊ nɨ a swɨ bʊla gɔ jǝbɔ bwɛnɔɔlɨ gǝnɔ a laa ɨ, a la bɔ a yǝlam a mɨ.

³⁸ Nʊ nɨ a do bɔ tɨya kʊʊtǝm gǝnɔ a bwang mɨɨ, a la bɔ a yǝlam a mɨ.

³⁹ Nʊ nɨ a nya kʊlɨ gǝnɨ, jʊ jʊ. Nʊ nɨ a jʊ kʊlɨ gǝnɔ a kɛl dul mɨɨ, nya nya.

Maajɨ Bwili

⁴⁰ “Nʊ nɨ a yo jeni, a yo i. Nʊ nɨ a yo ii, a yo nʊ nɨ a twam ɨɨ.

⁴¹ Nʊ nɨ a yo nǝkuwotǝmkǝga jʊ a bwɨɨ n nǝkuwotǝmkǝgaɨ, nya nya lǝma nǝkuwotǝmkǝgagɨɨ. Nʊ nɨ a yo nǝ dǝngdǝngɔ jʊ a bwɨɨ n nǝ dǝngdǝngɨ, nya nya lǝma nǝ dǝngdǝngɨ.

⁴² Nʊ nɨ a nǝ win a kʊm bɛtɔ twama nɨ mwɛ yʌbʌm nǝn bɛ kʌshii, jʊ a bwɨɨ n bwɛ mɛlalɨ mɨɨ, n bɨlǝngǝn mǝ sʊwa jen nɛɨ, mɨsɔ lɛ lǝma gǝnɔ lɛ wo.”