Matta 1 - Dadiya NT

Guu Dʊʊm Yesui

¹ Wʊnɨ nǝn gɔ mʊlalɨgɔ a dul guu dʊʊm Yesu Kiristii, bʊla Daudaɨ, bʊla Ibrahimi:

² Ibrahim nǝn tɨya Ishakui, Ishaku nǝn tɨya Yakubui, Yakubu nǝn tɨya Yahudaɨ jǝbɔ kɛtǝlam gǝnɔ.

³ Yahuda nǝn tɨya Feresaɨ jǝbɔ Zera, wʊnɨ nyɨya ji nǝn Tamarɨ, Feresa nǝn tɨya Hesrunaɨ, Hesruna nǝn tɨya Aramɨ.

⁴ Aram nǝn tɨya Amminadabɨ, Amminadab nǝn tɨya Nashoni, Nashon nǝn tɨya Salmoni.

⁵ Salmon nǝn tɨya Boazaɨ, wʊnɨ nyɨya gɔ nǝn Rahabɨ. Boaza nǝn tɨya Obidaɨ, nyɨya gǝ nǝn Rut, Obida nǝn tɨya Yessei.

⁶ Yesse nǝn tɨya Daudaɨ, fɔlɔgɔ. Dauda nǝn tɨya Sulemanui, nyɨya gǝ nǝn nwala Uriyaɨ.

⁷ Sulemanu nǝn tɨya Rehobowamɨ, Rehobowam nǝn tɨya Abiyaɨ, Abiya nǝn tɨya Asaɨ.

⁸ Asa nǝn tɨya Yehoshafatɨ, Yehoshafat nǝn tɨya Yoramɨ, Yoram nǝn tɨya Azariyaɨ.

⁹ Azariya nǝn tɨya Yotamɨ, Yotam nǝn tɨya Ahazɨ, Ahaz nǝn tɨya Hezekiyaɨ.

¹⁰ Hezekiya nǝn tɨya Manassaɨ, Manassa nǝn tɨya Amoni, Amon nǝn tɨya Yosiyaɨ.

¹¹ Yosiya nǝn tɨya Yekoniyaɨ jǝbɔ kɛtǝlam gǝnɔ, a bʌ gǝn nǝn kwama ja wɔɔ ji jwaalɛn a Babilaɨ.

¹² Nǝn kwama ja wɔɔ ji jwaalɛn a Babilaɨ, Yekoniya nǝn tɨya Sheyaltiyeli, Sheyaltiyel nǝn tɨya Zarubabeli.

¹³ Zarubabel nǝn tɨya Abihudui, Abihudu nǝn tɨya Eliyakimi, Eliyakim nǝn tɨya Azuroi.

¹⁴ Azuro nǝn tɨya Sadukui, Saduku nǝn tɨya Akimui, Akimu nǝn tɨya Aliyudui.

¹⁵ Aliyudu nǝn tɨya Eleyazarɨ, Eleyazar nǝn tɨya Matanaɨ, Matana nǝn tɨya Yakubui.

¹⁶ Yakubu nǝn tɨya Yusufui, bwɨla Maryamui, wʊnɨ a bʌ Yesui, wʊnɨ jǝ jo lɛ gɔ Kiristii.

¹⁷ Dʊʊmɔ a la kʊb jeli naal gwam, jʊ a tǝl a daa Ibrahim woi, ba la nǝn a Dauda gǝmɨ, jǝbɔ kaa kʊb jeli naal a tǝl a daa Dauda woi, ba la nǝn kwama ja wɔɔ ji jwaalɛn a tǝm Babilaɨ. Jǝbɔ kaa kʊb jeli naal nǝn kwama yɨm jinɔ a Babilaɨ ba la nǝn bʌtʌm Kiristii.

Bʌtʌm Yesu Kiristii

¹⁸ Bʌtʌm Yesu Kiristii a na nyɔ: Nyɨya gǝ Maryamu nǝn gɔ na bwa naakan nɛ jǝbɔ Yusufu bwayǝlɨ gǝnɨ. A la bɔ kum bwatǝm naakan jinɔ, Yʊwa Kwaamaɨ a dǝg gǝn a do fʌl.

¹⁹ Yusufu bwɨla gɔ n nǝ dǝngdǝng. A swɨ bɔ jʊ nɨ nǝ bwɛnɔɔlɨ nɨ gunidul lɛɨ. Nǝngɔ swɨ lɛ a bǝla naakan nɨ daddadɨ.

²⁰ Nǝn kwama maam bʊʊlalɨ jʊ nɨ lɛ a nǝl gǝnɨ, nǝngɔ bwɛ twama Tɛlalɔɨ a bɛ a daa gǝ woi a mʊgɔ dʊgamɨ. Nǝngɔ a sʊwa gǝn gɔ, “Yusufu bʊla Daudaɨ, ka ń nyʊwa lɛ taal naatǝm nwala mɔ Maryamui, jʊ a bwɨɨ, fʌl nɨ gǝ nǝngǝnɨ, a bɛ a daagɔ Yʊwa Kwaamaɨ woi.

²¹ Bʌ mʊn bʌ bwɛ, mʊ ja gǝm dunɔ gɔ Yesu, jʊ a bwɨɨ nǝn gɔ bʊʊ lɛ nǝn nǝbam gǝnɔ a bwɨlangkɛl jinɔ gǝmɨ.”

²² Kanjǝl nɨ a bwɨ sǝ a yii jʊ Tɛlalɔ a sʊwa a nyiyo nǝkuwotǝmkǝgagɨɨ gɔ,

²³ “Bwɛnɔɔlɨgɔ do do fʌl, bʌ bʌ bwɛ balɨ, jǝ ja gǝm dunɔ gɔ Immanuwel,” wʊnɨ nʊng lɛ gɔ, “Kwaama jǝbɔ bǝn.”

²⁴ Nǝn kwama Yusufu a kǝla a nu dumi, nǝngɔ a bwangtǝn jʊ bwɛ twama Tɛlalɔɨ a sʊwa gǝnɨ, nǝngɔ a naa Maryamu nwala gɨɨ.

²⁵ A nyǝm gǝn bɔ, ba la nǝn kwama a bʌm bʊla gɨɨ, nǝngɔ a ja gǝm dunɔ gɔ Yesui.