Markus 9 - Dadiya NT

¹ Nǝngɔ a sʊwa ji gɔ, “Bɨlǝngkɛl mǝ sʊwa jen nɛɨ, kaam nǝb nɨ tɨlam fǝɨ, mɨsɔ jǝ bʊla lɛ na ja kuwo bɔ fɔlɔn lɔ Kwaamaɨ a bɛ nǝn kwaanɨ.”

Kǝga Yesui A Fʌto

² Kumɔ nukun a shui, nǝngɔ Yesu a do Bitrus jǝbɔ Yakubu jǝbɔ Yohana, a yɔ nǝn ji a kaa dʌbʌl yem nɨ a deba debaɨ. Jǝ wo kwaaji, nǝngɔ kǝga gǝnɔ a fʌto a kǝga jini.

³ Dʊʊl gǝnɔ a fulo nǝn fǝbfǝb nyɔ beta lɛ, wʊnɨ mɨ nʊ nɨ wo nyǝm lɛ a ga a jel nyɔ a yooli nɨɨ.

⁴ Nǝngɔ Iliya jǝbɔ Musa a jel tɨm a kǝga jii, jǝ sʊwa kɛlɔ lɛ jǝbɔ Yesui.

⁵ Nǝngɔ Bitrus a sʊwa Yesu gɔ, “Feyi, a bʊm nyɔ nǝn nɨ fɔ a daa nɨɨ, nǝn ma gushigɔ taal, win na a mɔ, win na a Musaɨ, win na a Iliyaɨ.”

⁶ A nyǝm bɔ jʊ sʊwa lɛɨ, jʊ a bwɨɨ ja nyʊwa taal dangǝn.

⁷ Nǝngɔ lulɔ ba sum jii, nǝngɔ ja nyʊwa kaa diil a mʊgɔ lul sʊwa lɛ gɔ, “Wʊnɨ nǝn Bʊla mɨ nɨ mǝ swɨ lɛɨ. Jǝ́ nyʊwa gǝn.”

⁸ Tʌgo a daa gɔ ja dʌngi, ja kuwo bɔ kaa nǝl wo, nǝn Yesu kwaagɔ jǝbɔ jii.

⁹ Kwama nɨ jǝ gǝlam lɛ a dʌbʌl yemi, nǝngɔ a gʊ lɔl jini gɔ, “Ka jǝ́ sʊwa lɛ kaa nǝl jʊ jǝ́ kuwoi, ba jǝ́ sʊwa nǝn kwama Bʊla Nǝlɨ a gun a bwaaɨ.”

¹⁰ Nǝngɔ ja ta kɛl nɨ a nǝl jini, jǝ bʌbko lɛ gɔ, “Guntǝm bwaa nɨ gǝ nʊng wɛ?”

¹¹ Nǝngɔ ja bʌ gǝn gɔ, “N wɛ a bwɨ nǝb mɛlalɨ diilɔ a sʊwa gɔ nǝn Iliya tǝl bɛtǝmɔ lɛɨ, sǝla Kiristi a bɛɨ?”

¹² Nǝngɔ Yesu a jǝla ji gɔ, “Bɨlǝngkɛl, Iliya tǝl bɛ bɛ, ba fɛka kanjǝlɔ tʌgo dǝngdǝng gwam. N wɛ a bwɨ ja mʊla tag gɔ, Bʊla Nǝlɨ, nɔɔ nɔɔ gaalan a gǝlala, jǝ kɔ gǝn kɔ tagɨ?

¹³ Mǝ sʊwa jen nɛ Iliya a kwɛl a bɛ. Ja maa gǝm jʊ nɨ jǝ swɨ lɛ ja maa gǝmɨ, kanga ja mʊla gɔ bwɨ bwɨ nǝn gɨɨ.”

Yesu A Gung Bwɛ Nɨ Nǝn Yʊwa Bwɨlaɨ Mɨ Sʊwa Kɛl Lɛɨ

¹⁴ Nǝn kwama Yesu jǝbɔ bɛtɔ mɛlalɨ gǝnɔ taal ja gǝla ja bɛɨ, nǝngɔ ba ja nya nǝbɔ a lada nyɔ a kang tangǝn bɛtɔ mɛlalɨgɨɨ. Nǝb mɛlalɨ diil Musaɨ gʊbka kɛl lɛ jǝbɔ ji.

¹⁵ Nǝn kuwotǝm Yesui, nǝngɔ nǝbɔ a ta kang a nyiyoi, nǝngɔ ja yɔ dǝbǝr dǝbǝr ya ja yal gǝnɨ.

¹⁶ Nǝngɔ a bʌ ji gɔ, “Kɛl wɛ jǝ́ bǝngka lɛɨ?”

¹⁷ Nǝngɔ kaa nǝl a mʊgɔ nǝb nɨ a mʊrkaɨ a jǝla gǝn gɔ, “Feyi, wɔ n bɛ mʊn nǝn bʊla mɨ nɨ yʊwa bwɨlagɔ a kaa gǝn a sʊwatǝm kɛlɨ.

¹⁸ Na daa nɨ a gun gǝm woi, gǝ ga gǝn sǝ a yal a tǝm, fʊnɨgɔ jel lɛ a nyiyo, kʊʊ nungʌnɔ lɛ, swam lɛ. N sʊwa bɛtɔ mɛlalɨ mʊnɔ mǝʊ ja jǝg yʊwa nɨɨ, a gaa ji.”

¹⁹ Nǝngɔ Yesu a jǝla ji gɔ, “Jǝ́ nǝbɔ kal nɨɨ, mɨ jen nǝn nǝtǝm bɨlǝngkɛl, naa nyǝn mǝ yɨ lɛ nǝbɔ jeni, naa nyǝn mǝ kʊ nǝl lɛ nǝn jeni? Jǝ́ bɛ mɨ nǝn bwɛgɔ.”

²⁰ Nǝngɔ ja bɛ nǝn gɨɨ. Nǝn kwama yʊwa bwɨlagɔ a kuwo Yesui, nǝngɔ a mǝg bwɛ a mǝla a tǝmɨ, swam lɛ, bʌlto lɛ, fʊnɨgɔ jel lɛ a nyiyo.

²¹ Nǝngɔ Yesu a bʌ tɛ bwɛɨ gɔ, “Fɨyang jʊ nɨ a nya gǝnɨ?” Tɛ bwɛ a jǝla gǝn gɔ, “A tǝl gǝm a lɔ bwɛsǝn.

²² Gǝ ga gǝn ga, a mal a kǝla jǝbɔ mwɛ, swɨ lɛ a jʌ gǝn. Na mʊ dwal dwal ń gung gǝnɨ, ji bʊnǝn nǝnɔ, tɨka nǝn.”

²³ Nǝngɔ Yesu a bʌ gǝn gɔ, “Mɔ na mǝ dwal dwalɨ nɔɔ? Kanjǝlɔ gwam maa maa a daagɔ nʊ nɨ a nǝ bɨlǝngkɛlɨ.”

²⁴ Nǝngɔ tɛ bwɛ a ga kwaalɨ gɔ, “N nǝ bɨlǝngkɛl! N kela ń, tɨka ɨ sǝ n sʊtǝn nǝtǝm bɨlǝngkɛlɔ.”

²⁵ Nǝn kwama Yesu a kuwo nǝbɔ a tǝl mʊrka lɛɨ, nǝngɔ Yesu a ga yʊwa bwɨla nɨ gɔ, “Mɔ yʊwa nɨ mʊ kaa bwɛ nɨ a sʊwatǝm kɛl jǝbɔ nyʊwatǝmɨ, mǝ sʊwa ń nɛ, jelʌm a bʊtɔ bwɛɨ! Ka ń kom gǝn nɛ tag.”

²⁶ Nǝngɔ yʊwa bwɨlagɔ a ga kwaalɨgɨɨ, a mǝg bʊtɔ bwɛɨ, nǝngɔ la a jelʌm gǝmɨ, nǝngɔ bwɛ a daa maamɔ a bʊla bʊlaɨ. Nǝbɔ woi sʊwa lɛ gɔ, “A bʊla.”

²⁷ Nǝngɔ Yesu a ta kang gǝnɔ a tɨka gǝn a gun a tɨ tɨɨ.

²⁸ Nǝn kwama Yesu a dɔ mʊgɔ lɔngɨ, nǝngɔ bɛtɔ mɛlalɨ gǝnɔ a bʌ gǝn daddad gɔ, “N wɛ a bwɨ nǝn dwal bɔ nǝn jǝg yʊwa nɨɨ?”

²⁹ Nǝngɔ a jǝla ji gɔ, “A yʊwa nɨɨ, n keli kwaagɔ gǝ jǝg lɛɨ.”

Yesu A Yǝla A Sʊwa Bwaagɔ Gǝ Bʊla Lɛɨ

³⁰ Nǝngɔ ja gun a daa gɔ, ba ja shu a tǝm Galilii. A swɨ bɔ nǝbɔ a nyǝm daa nɨ ji woi,

³¹ jʊ a bwɨɨ, mɛla bɛtɔ mɛlalɨ gǝnɔ gǝm lɛ. A sʊwa ji gɔ, “Jǝ nǝ nǝ Bʊla Nǝlɨ a kang nǝfitʌmi. Jǝ jʌ gǝn jʌ. Na ja jʌ gǝnɨ, a kum na taalɔ gǝm, gun gun.”

³² Ja nyǝm bɔ jʊ sʊwa ji lɛɨ, jǝ nyʊwa taal bʌtʌm gǝnɔ lɛ.

Nuwo Nyɨ Gʌleng Dʊʊgɨɨ?

³³ Ja bɛ a Kafarnahum. A dɔ lɔngɨ, nǝngɔ a bʌ ji gɔ, “Kɛl wɛ jǝ́ bǝngka lɛ a golaɨ?”

³⁴ Nǝngɔ ja yɨ shigi, jʊ a bwɨɨ jǝ bǝngka a gola gɔ nuwo nyɨ n gʌleng dʊʊgɔ a kʊm jii.

³⁵ Nǝngɔ Yesu a yɨ, a sʊwa bɛtɔ mɛlalɨ gǝnɔ nɨ kʊb jeli yoi gɔ, “Nʊ nɨ swɨ lɛ a yǝlam na tɨkǝgaɨ, bɛ ga yǝlam na gul, ga yǝlam bwɛ jwaalɛ tangǝnɨ.”

³⁶ Nǝngɔ a gung kaa bwɛsǝn a tɨ nǝn gɔ a kʊm jini. Nǝngɔ a do gǝn a kwal gǝnɨ, nǝngɔ a sʊwa ji gɔ,

³⁷ “Mǝ sʊwa jen nɛ na nʊ nɨ a yo win a mʊgɔ bɛtɔ dwalǝn nɨ na wʊnɨ a mʊgɔ dun mɨɨ, a yo i. Na nʊ nɨ a yo i, a yo bɔ mǝ, a yo nʊ nɨ a twam ɨɨ.”

Nʊ Nɨ Mɨ Maa Kii Lɛ Jǝbɔ Bǝnɨ Na A Bǝn

³⁸ Jǝ yǝmɨ, nǝngɔ Yohana a sʊwa gǝn gɔ, “Feyi, nǝn kuwo kaa nǝl jǝg nǝblaamɔ lɛ nǝn dun mʊn, nǝngɔ nǝn kaa gǝnɨ, jʊ a bwɨɨ, mɨ a kʊm bǝn.”

³⁹ Nǝngɔ Yesu a sʊwa bɛtɔ mɛlalɨ gǝnɨ gɔ, “Ka jǝ́ kaa gǝn nɛ! Mɨ nǝl maa jǝ laatǝm kang lɛ nǝn dun mɨ sǝ a yǝla a sʊwa bwɨlangkɛl nǝn dun mɨ.

⁴⁰ Nʊ nɨ ke bɔ nǝ kii bǝnɨ, na a bǝn.

⁴¹ N bɨlǝngkɛl mǝ sʊwa jen nɛɨ, nʊ nɨ a nǝ jen mwɛ nǝn kʌshi nɔɔmwɛnɔ win a kɛl dun mɨɨ gɔ, jǝ́ na a Kiristii, n bɨlǝngkɛl mǝ sʊwa jen nɛɨ, nya nya lǝma gǝnɔ.

Kanjǝl Nɨ Dǝg Nǝl Yalatǝm Lɛɨ

⁴² “Na nʊ nɨ a dǝg kaa win a kʊm bɛtɔ dwalǝn nɨ a nǝ bɨlǝngkɛl a daa mɨ woi a maa bwɨlangkɛlɨ, a laa jǝl ja kwa gǝm nɛl kʊwalɨ a kwɨl, ja mal gǝn a mʊgɔ wɨma.

^43-44 Na kang mʊnɔ dǝg ń dǝg ń maatǝm bwɨlangkɛlɨ, bɛ ń mwatɨm gǝn. A laa jǝl ń dɔ kʊlɨ nɨ mɨsɔ dɨ lɛ woi nǝn kangɔ win, na mʊ dɔ dɔ kǝla nǝn kangɔ yo a lɔ kǝla nɨ mɨsɔ dumo lɛ woi.

^45-46 Na naa mʊnɔ dǝg ń dǝg ń maatǝm bwɨlangkɛlɨ, bɛ ń mwatɨm gǝn. A laa jǝl ń dɔ kʊlɨ nɨ mɨsɔ dɨ lɛ woi nǝn naagɔ win, na jǝ mal ń mal ń a mʊgɔ lɔ kǝla nǝn naagɔ yoi.

⁴⁷ Na nu mʊnɔ dǝg ń dǝg ń maatǝm bwɨlangkɛlɨ, kʊʊtam gǝn. A laa jǝl ń dɔ fɔlɔn lɔ Kwaamaɨ nǝn nugɔ win, na jǝ mal ń mal ń a mʊgɔ lɔ kǝla nǝn nugɔ yoi.

⁴⁸ A daa gɔ, “ ‘Ywɛtɨnɔ ja ji lɛ mɨsɔ jǝ bʊla lɛɨ, kǝlagɔ mɨsɔ dumo lɛ woi.’

⁴⁹ Jǝ buti nǝbɔ gwam nǝn kǝla.

⁵⁰ “Mamɔ n jǝ nyan. Na denden gǝnɔ a kalaɨ, jǝ́ fɛ denden gǝnɔ nǝn wɛ? Jǝ́ yǝlam na mam a kʊm jen, jǝ́ yɨ yɨm kwamɨgǝn dakini.”