Markus 7 - Dadiya NT

Sagsag Jǝbɔ Duto

¹ Kaam nǝbɔ Farisaɨ jǝbɔ kaam nǝb mɛlalɨ diil Musaɨ, ja jel a Urushalima nǝngɔ ba ja mʊrka a daagɔ Yesu woi.

² Ja kuwo kaam bɛtɔ mɛlalɨ gǝnɔ jǝ ja jǝjalǝnɔ lɛ nǝn kang duto, ja saal bɔ saalɨ.

³ Nǝbɔ Farisaɨ jǝbɔ Yahudawagɔ gwam mɨ jǝ ja jǝjalǝn nɛ na ja saal bɔ kangɨ. Jǝ bwangtǝn mɛlalɨ jǝfʊlǝn nǝb dʊʊm jini, jǝ saal saal kang jinɔ sǝla ja ja jǝjalǝnɔ.

⁴ Na ja yǝla ja bɛ a gamdʌboi, mɨ jǝ ja jǝjalǝn nɛ dɨn na ja saal bɔ bʊtɔ jini. Jǝ bwangtǝn bwang kaam mɛlalɨgɔ, bǝ saaltǝm bɛl kʌshi nɔɔmwɛn, jǝbɔ kʌshifǝlatɨn, jǝbɔ gobʌl.

⁵ Nǝngɔ nǝbɔ Farisaɨ jǝbɔ nǝb mɛlalɨ diilɔ ja bʌ gǝn gɔ, “Wɛ a bwɨ bɛtɔ mɛlalɨ mʊnɔ mɨ jǝ bwangtǝn jǝfʊlǝn nǝb dʊʊmɨ lɛɨ, jǝ ja jǝjalǝnɔ nǝn kang dutoi?”

⁶ Yesu a jǝla ji gɔ, “N dǝngdǝng Ishaya a maa kuwotǝmkǝga a dul jeni, nǝb fento nǝn kwan, kanga a mʊla mʊlaɨ gɔ, “ ‘Nǝb nɨ jǝ nɨ ɨ dʊʊnɔ a nyiyo kwaagɔ. Mʊgɔ nǝl jinɔ a kʊta jǝbɔ mǝ.

⁷ Jǝ jʊng jǝ nɨ ɨ dʊʊn nǝn kwan, jǝ maa mɛlalɨ diil nǝfitʌmi maamɔ n mɛlalɨ diil Kwaamaɨ jǝ maa lɛɨ.’

⁸ Jǝ́ bǝla diil Kwaamaɨ, jǝ́ bwangtǝn jǝfʊlǝn nǝbɨɨ.”

⁹ Nǝngɔ a sʊwa ji gɔ, “Jǝ́ nya yʊlan kɔtǝm diil Kwaamaɨ, jǝ́ bwangtǝn jǝfʊlǝn jen!

¹⁰ Musa a sʊwa gɔ, ‘Nǝ tɛtɛ mɔ jǝbɔ nɛnɛ mɔ dʊʊn.’ A sʊwa gɔ, ‘Na nʊ nɨ a sʊwa kɛl bwɨla a dul tɛtɛ gɨɨ jǝbɔ nɛnɛ gɨɨ, bɛ ja jʌ gǝn.’

¹¹ A jenɔ jǝ́ sʊwa jengɔ, na nǝl a sʊwa tɛtɛ gɔ jǝbɔ nɛnɛ gǝ gɔ, ‘Kanjǝl nɨ na mǝ tɨka jen nɛ nǝnɨ, n kwɛl n swa swaɨ Kwaama gǝm yaa nǝngǝn.’

¹² Na jǝ́ maa nyɨɨ, jǝ́ bǝla bɔ nǝb nɨ a tɨka tɛtǝlam jinɔ.

¹³ N gola nɨ jǝ́ bǝla bwangtǝm diil Kwaamaɨ, jǝ́ bwangtǝn mɛlalɨ jen. Jǝ́ bwangtǝn jǝfʊlǝn nǝbɨɨ, jʊ a bwɨɨ jǝ́ bwangtǝn bɔ diil Kwaamaɨ. Jǝ́ maa kaam kanjǝlɔ a lada na gɔ nyɔ.”

Kanjǝl Nɨ Gǝ Dǝg Nǝbɔ Lɛ Mɨ Yɨ Yɨm Sagsag Lɛɨ

¹⁴ Yesu a jo nǝbɔ a bɛ a daa gǝ woi tag, nǝngɔ a sʊwa ji gɔ, “Jǝ́ nyʊwa ɨ gwam jenɔ, sǝ jǝ́ nyǝm jʊ mǝ sʊwa lɛɨ.

^15-16 Jǝjalǝn nɨ mʊ dǝg lɛ a nyiyoi, mɨsɔ kal ń nɛ a kɛl bwangtǝm Kwaamaɨ gǝm. Kanjǝl bwɨlan nɨ jel lɛ a mʊgɔ nǝl mʊnɨ, nǝn gɔ kal ń nɛɨ.”

¹⁷ Nǝn kwama Yesu jǝbɔ bɛtɔ mɛlalɨ gǝnɔ a bǝla nǝbɔ a shu a mʊgɔ lɔngɨ, nǝngɔ ja bʌ gǝn gɔ mʊsǝn kɛl nɨ gǝ nʊng wɛ?

¹⁸ Nǝngɔ a sʊwa ji gɔ, “Jǝ́ nyǝm bɔ kɛlɔ mǝ sʊwa jen nɛ kǝngkǝnɨ ka? Jǝ́ nyǝm bɔ jǝjalǝn nɨ jǝ́ dǝg a nyiyoi mɨsɔ kal jen nɛ.

¹⁹ A dɔ bɔ a mʊgɔ nǝl, a dɔ mʊgɔ fʌl, jel nyɔ tag a bʊtɔ jen a daa tɛltǝm fʌl.” (A dul kɛl nɨɨ, Yesu a jǝla nǝn jǝjalǝnɔ gwam.)

²⁰ Nǝngɔ Yesu a sʊwa gɔ, “Jʊ nɨ jel lɛ a mʊgɔ nǝlɨ, n jʊ kal jen nɛɨ.

²¹ Bʊʊlalɨ bwɨlagɔ gǝ jel a mʊgɔ nǝl nǝlɨ, bwɨlan, jǝbɔ kuul, jǝbɔ jʌtǝm dul, jǝbɔ bulon,

²² jǝbɔ wɛl, jǝbɔ shil, jǝbɔ swagkatǝm, jǝbɔ katǝm dagdag, jǝbɔ kulkotǝm, jǝbɔ kalkatǝm dun, jǝbɔ dʊʊlǝn dul, jǝbɔ fʌmʌn.

²³ Kanjǝl bwɨlantɨn nɨ gwam gǝ jel a mʊgɔ nǝl, na ji jǝ kal nǝl lɛɨ.”

Nǝtǝm Bɨlǝngkɛl Kaa Nɔɔlɨɨ

²⁴ Yesu a gun nǝngɔ a shu a tǝm Taya jǝbɔ Sidoni. A yɔ ya dɔ kaa lɔɨ. A swɨ bɔ nǝbɔ a nyǝm daa gǝ woi, maatǝmɔ nyɨɨ a kaa bɔ nǝbɔ nyǝmtǝm daa gǝ woi.

²⁵ Kaa nɔɔlɨ wo wʊnɨ bwɛnɔɔlɨ gǝnɔ nǝn yʊwa bwɨlaɨ, a nyʊwa daagɔ Yesu woi, nǝngɔ a bɛ dangǝn a daa gǝ woi ba gǝla a jʊng a kǝga gǝnɔ gǝmɨ.

²⁶ Nɔɔlɨ nɨ n bwɛn Girika, ja bʌ gǝn a tǝm Suriya a daa nɨ jǝ jo lɛ gɔ Finikiyaɨ. Nǝngɔ a kela Yesu gɔ a jǝgǝm bwɛnɔɔlɨ gǝnɔ gǝm yʊwa bwɨla nɨɨ.

²⁷ Nǝngɔ a sʊwa gǝn gɔ, “Nǝn nǝ bɛtɨ jǝjalǝnɔ dɨn! A bʊm bɔ nyɔ ja do jǝjalǝn bɛtɨɨ ja nǝ sǝgantɨnɔ.”

²⁸ Nǝngɔ nɔɔlɨ nɨ a jǝla gǝn gɔ, “Ɔɔ, Tɛlalɔ, gǝ maa maa nyɔ, sǝgantɨnɔ gǝ ja ja fʌtʌlogi gǝnɔ nɨ a tǝla bɛtɨ gǝm a tǝmɨ.”

²⁹ Nǝngɔ Yesu a sʊwa nɔɔlɨ nɨ gɔ, “Kɛl mʊnɔ n dǝngdǝng! Yǝla yɔ a lɔ. Yʊwa bwɨlagɔ a bǝla bwɛnɔɔlɨ mʊnɔ.”

³⁰ A yǝla a lɔɨ, ya nya bwɛnɔɔlɨ gǝnɔ daam a wɨlǝn. Bwɛlaagɔ a jelʌm a bʊtɔ gǝn.

Yesu A Gung Nʊ Nɨ Benɔ A Ta Taɨ

³¹ Nǝngɔ Yesu a bǝla tuulɔ Tayagɨɨ, a bwangtǝn a Sidon a yɔ a wɨma Galilii, a shu a tǝm Dikafolisi.

³² Ja bɛ gǝm nǝn nʊ nɨ mɨ nǝn lɔlɨ, benɔ a ta taɨ, nǝngɔ ja kela gǝn gɔ ga ke gǝn.

³³ Nǝngɔ Yesu a do gǝn ja yǝla gwanga win a daa nɨ mɨ nǝb woi, a dǝga bawulitɨn kang gǝnɔ a mʊgɔ lɔl nʊ nɨ gǝmɨ, nǝngɔ a tɛɛ tuumi, a ke ben nʊ nɨɨ.

³⁴ Nǝngɔ a gung dul gǝnɔ a dʌbʌl kwamaɨ, a sʊwa fǝbǝmɔ a sʊwa gǝn gɔ, “Iffata!” Gǝ nʊng gɔ, “Wumo!”

³⁵ A tʌgo a kang lɔl nʊ nɨ a wumo a tǝl nyʊwatǝmɔ, ben gǝnɔ a kwɨya a tǝl kiyo kɛlɔ lɛ dǝngdǝng.

³⁶ Yesu a gʊ lɔl jinɔ gɔ ka ja sʊwa lɛ kaa nǝl kanjǝl nɨ gǝ maaɨ. Gʊtǝm lɔl jinɔ maamɔ ga sʊ jim sʊwatǝm kɛltɨn nɨɨ.

³⁷ Ja ta kang a nyiyo dangǝn, jǝ sʊwa lɛ gɔ, “A maa kanjǝlɔ gwam a bʊm! A gung nǝb nɨ mɨ nyʊwa lɛɨ, ja nyʊwa, nǝb nɨ mɨ sʊwa kɛl lɛɨ, ja sʊwa kɛl.”