Markus 6 - Dadiya NT

Ja Kɔ Yesu A Nazarat

¹ A gun a daa gɔ nǝngɔ a yǝla a tǝm gǝn dakini jǝbɔ bɛtɔ mɛlalɨ gǝnɨ.

² Nǝn Kum Fǝbtǝm, nǝngɔ a tǝl mɛlalɨgɔ a Kan mɛlalɨɨ. Nǝbɔ a lada na nyʊwa gǝn nɛɨ, ja ta kang a nyiyo, jǝ sʊwa lɛ gɔ, “Nʊ nɨ a nya yʊlan nɨ a fee gwam? Nyǝmtǝm wɛ ja nǝ gǝn nyɨɨ? Ga nya kwaan maatǝm jǝ laatǝm kang nɨ a fee?

³ Bwɛ nɨ ke bɔ bʊla Maryamui ka? Kɨla bǝ Yakubui, jǝbɔ Yusufu, jǝbɔ Yahuza, jǝbɔ Saminu nǝ fɛlatǝm kanjǝl nɨ ka? Kɛtǝlam gǝnɔ nɔɔtǝnɔ bǝ yǝm dakinii ka?” Ja kal nǝl nǝn kanjǝl nɨ gǝ maa lɛɨ.

⁴ Nǝngɔ Yesu a sʊwa ji gɔ, “Nǝbɔ gwam jǝ nǝ nǝ nǝkuwotǝmkǝga dʊʊn, na ke bɔ a tǝm gǝn, jǝbɔ nanǝgam gǝnɔ jǝbɔ lɔ gɨɨ.”

⁵ A nya bɔ maatǝm jǝ laatǝm kang fʌlen, na ke bɔ nǝb nɨ nǝn dǝm nyɔ ga ya jim kang, ga gung ji a twɨla jinɔ gǝmɨ.

⁶ A ta kang a nyiyo a kɔtǝm nǝtǝm bɨlǝngkɛl jinɔ gǝm. Nǝngɔ kɛla bɛl tuulɔtɨnɔ lɛ kiyo jim kɛl Kwaamaɨ lɛɨ.

Yesu A Twam Kʊb Jeli Yo Nɨɨ

⁷ Nǝngɔ Yesu a jo kʊb jeli yo nɨ a tǝl twamtǝm jinɔ yo yoi, a nǝ ji fɔlɔn jǝgtǝm yʊwa bwɨlantɨnɨ.

⁸ Nǝngɔ a sʊwa ji gɔ, “Ka jǝ́ do lɛ kaa jǝ yɔm. Ka jǝ́ do lɛ kʊkkʊm, jǝbɔ sʊwa, jǝbɔ kemʌn a bǝlatɨn jenɔ gǝm. Jǝ́ dem ka bɛ dwam.

⁹ Bɛ jǝ́ dǝga twam. Bɛ ka jǝ́ do lɛ kaa bɛllɛ tag.

¹⁰ Na lɔ nɨ jǝ́ shig wo ja yo jeni, jǝ́ yɨ wo ba la kum nɨ jǝ́ bǝlam daa gɔ lɛɨ, sǝ jǝ́ jel wo.

¹¹ Daa nɨ gwam ja kɔ jen, ja yo bɔ kɛl jeni, bɛ jǝ́ buum kuulɔ a naa jeni sǝ a yǝlam jim jǝ nǝtǝm nyiyo a dul jin.”

¹² Nǝngɔ ja jel jǝ kiyo nǝbɔ gǝm lɛ gɔ ja yǝla ja bǝla bwɨlangkɛl jinɔ.

¹³ Ja jǝg nǝblaamɔ a lada, ja ya nǝb twɨlamɔ gǝm nwang, ja gung ji.

Bwaa Yohanaɨ Nǝ Yʊtǝm Mwɛ Sagsag

¹⁴ Hiridus fɔlɔgɔ a nyʊwa fulon Yesui, jʊ a bwɨɨ dun gǝnɔ a kwɛl a wa tǝmɔ gwam. Kaamɨ gɔ, “Nʊ nɨ nǝn Yohana nǝ Yʊtǝm mwɛ Sagsagɔ, wʊnɨ a bʊla, a gun nǝn kʊlɨɨ. N jʊ a bwɨ a nya kwaan maatǝm kanjǝl laatǝm kangɨ.”

¹⁵ Kaamɨ gɔ, “Nǝn Iliya nǝkuwotǝmkǝgagɔ.” Kaamɨ gɔ, “Na kaa nǝkuwotǝmkǝga a jelka win a mʊgɔ nǝbkuwotǝmkǝga galɨgɨɨ.”

¹⁶ Nǝn kwama nɨ Hiridus a nyʊwa fuloni, nǝngɔ a sʊwa gɔ, “Nǝn Yohana wʊnɨ mǝ kam kamɨ duli, a yǝla a gun nǝn kʊlɨɨ.”

¹⁷ Hiridus a kwɛl a nǝ nǝɨ diil gɔ ja ta Yohana, nǝngɔ a bwa gǝn a tʊng gǝn a lɔsomii. Hiridus a maa nyɔ sǝ a yʌb Hirudiya gǝm nǝl, nwala kɨla gɔ Filibusi, wʊnɨ ga naaɨ.

¹⁸ Hiridus a maa jʊ nɨ jʊ a bwɨɨ Yohana galɨgǝn a sʊwa Hiridus gɔ, “Kanga diilɔ a nʊngɨ, a bʊm bɔ ń naa nwala kɨla mʊɨ.”

¹⁹ Hirudiya a ta Yohana a nǝl gǝn, swɨ lɛ a jʌ gǝn, a nya bɔ gola.

²⁰ Jʊ a bwɨɨ, Hiridus nyʊwa taal Yohanaɨ lɛ, kɨla gǝn nɛ dangǝn. A nyǝm gɔ Yohana n nǝfili dǝngdǝng, n nǝ sagsag. Na kwama nɨ Yohana a sʊwa Hiridus kɛlɨ, gǝ kom gǝn kom sul, gǝ nyʊwa nyʊwa lǝma nyʊwatǝm kɛl Yohanaɨ kwangkwang.

²¹ A kɛla ba la kum bʌtʌm Hiridusi, nǝngɔ Hirudiya a nya gola a dikulom nɨ Hiridus a maa fɔlɔlɔmɔ gǝm jǝbɔ dʊʊm sʊwajaamɔ jǝbɔ dʊʊm nǝbɔ Galilii.

²² Kwama bwɛnɔɔlɨ Hirudiyaɨ a dɔ a ye yegɨɨ, Hiridus jǝbɔ faabǝm gǝnɔ ja nyʊwa lǝma dangǝn. Nǝngɔ fɔlɔgɔ a sʊwa bwɛnɔɔlɨ nɨ gɔ, “Wɛ mʊ swɨ lɛɨ? Jʊ gwam mʊ kela ɨ, mǝ nǝ ń nǝ ń.

²³ N wɛɛl mʊn, jʊ mʊ kela gwamɨ, mǝ nǝ ń nǝ ń, na mɔ n bel tǝm mǝndɨ yo mǝ maam fɔlɔn nɛɨ n nǝ ńɨ, mǝ nǝ ń nǝ ń.”

²⁴ Nǝngɔ a jel, ya sʊwa nɛnɛ gǝ gɔ, “N wɛ mǝ bʌ lɛɨ?” Nǝngɔ nɛnɛ gǝ gɔ, “Bʌ dul Yohanaɨ nǝ Yʊtǝm mwɛ Sagsagɔ.”

²⁵ Nǝngɔ bwɛnɔɔlɨgɔ a yǝla dǝbǝr dǝbǝr ya kela fɔlɔgɔ gɔ, “Mǝ swɨ lɛ kǝngkǝnɨ, ń ya mɨ dul Yohanaɨ nǝ Yʊtǝm mwɛ Sagsagɔ a bashɛ nɨ kǝngkɔ.”

²⁶ Nǝl fɔlɔgɨɨ a kala dangǝn nǝn wɛɛlɨ nɨ gǝ kwɛl gǝ maaɨ, a swɨ bɔ a kǝl swatǝm yaa nɨ ga maa a kǝga faabǝm gǝnɔ gǝmɨ.

²⁷ Nǝngɔ fɔlɔgɔ a dǝg nǝ dʌngtǝm lɔsomigɔ gɔ a yɔ ya mwatɨ dul Yohanaɨ a lɔsomi a bɛ nǝn. Nǝngɔ a yɔ ya mwatɨ dul Yohanaɨ a lɔsomii.

²⁸ A bɛ nǝn dul Yohanaɨ a bashɛ ba nǝ bwɛnɔɔlɨgɨɨ, nǝngɔ bwɛnɔɔlɨgɔ a yɔ ya nɨ nɛnɛ gɨɨ.

²⁹ Nǝn kwama bɛtɔ mɛlalɨ Yohanaɨ a nyʊwa jʊ a bwɨ nǝn tɛlalɔ jii, nǝngɔ ba jǝ do bʌlʌn gǝnɔ ya ja fʌli.

Jatǝm Nǝn Nǝbɔ Fʊlkʊblǝn Nʊ

³⁰ Kwama bɛtɔ twama nɨ a yǝla ba nya Yesui, nǝngɔ ja sʊwa gǝn kanjǝl nɨ gwam jǝ maaɨ, jǝbɔ kanjǝl nɨ jǝ mɛlaɨ.

³¹ Nǝngɔ a sʊwa ji gɔ, “Bǝ ya a daa nɨ mɨ nǝb woi, sǝ jǝ́ fǝb dǝm.” Nǝbɔ a lada na shu lɛ kaamɨ bɛ lɛɨ. Yesu jǝbɔ bɛtɔ twama gǝnɔ a ke bɔ kang ja ja jǝjalǝn.

³² Nǝngɔ jǝ dɔ mʊgɔ tɨyamwɛngɔ ja shu a daa nɨ mɨ nǝb woi.

³³ Nǝbɔ a lada na a kuwo ji ja bǝla daagɨɨ, ja kwɛl ja nyǝm jii, nǝngɔ ja mwal ja kɛla nǝn naa ja bwangtǝn tuulɔtɨnɔ ya ja laa ji woi.

³⁴ A jel a tɨyamwɛng a kuwo kʌm nǝbɨɨ a mʊrka a lada nyɨɨ, nǝbɔ a bʊna gǝn, jʊ a bwɨɨ ja maa na kwamɨ nɨ mɨ nǝ tɔɔtǝm woi. Nǝngɔ a tǝl mɛla jim kanjǝlɔ lɛ a ladaɨ.

³⁵ Kwama ya lɛ lɛɨ, nǝngɔ bɛtɔ mɛlalɨ gǝnɔ a bɛ a daa gǝ woi, ja sʊwa gǝn gɔ, “Daa nɨ bǝ woi, gǝ na na kuul mɨ nǝb wo, kwama wɔ ya lɛ lɛ.

³⁶ Ywa ji sǝ ja dɔ gol lɔntɨn, jǝbɔ bɛl tuulɔtɨn nɨ nǝn dɔɔmɨ, sǝ ja ten jǝjalǝnɔ ja ja.”

³⁷ Yesu a jǝla ji gɔ, “Jǝ́ nǝ ji jǝjalǝnɔ.” Nǝngɔ ja bʌ gǝn gɔ, “Mʊ nyǝm bɔ bwɨ nǝb nɨ, nǝn jʌ kemʌnɔ nyǝn sǝla nǝn ja nǝn ji?”

³⁸ Nǝngɔ Yesu a bʌ ji gɔ, “Kʊkkʊmɔ nyǝn jǝ́ nǝngǝnɨ? Jǝ́ yɔ ya jǝ́ dʌng!” Ya ja dʌng nǝngɔ ja sʊwa gǝn gɔ, “Bǝ na nǝn bɛlɨ kʊkkʊmɔ nʊ jǝbɔ jʌngitɨnɔ yo.”

³⁹ Nǝngɔ Yesu a sʊwa bɛtɔ mɛlalɨ gǝnɨ gɔ ja dǝg nǝbɔ a yɨ nya nǝn nya a yǝla yʌbigɔ gǝm.

⁴⁰ Ja yɨɨ nya nǝn nya, kaamɨ fʊltǝnʊ fʊltǝnʊ, kaamɨ fʊlkʊb fʊlkʊb.

⁴¹ Nǝngɔ a do kʊkkʊm nɨ nʊɨ, jǝbɔ jʌngitɨn nɨ yoi, a gung dul gǝnɔ a dʌbʌli, a buu Kwaama gǝm kangɨ, nǝngɔ a kǝlsa kʊkkʊmɨ. Nǝngɔ a nǝ bɛtɔ mɛlalɨ gǝnɔ gɔ ja nǝ nǝbɔ. Nǝngɔ a tǝga ji jʌngitɨn nɨ yoi, gwam jinɔ ja nyaɨ.

⁴² Gwam jinɔ ja ja, ja boba.

⁴³ Bɛtɔ mɛlalɨgɔ a mʊr fʌtʌlogi kʊkkʊmɔ jǝbɔ a jʌngitɨnɔ a bǝlaɨ, a yiilo tunɔ kʊb jeli yo.

⁴⁴ Nǝbɔ a jaɨ, batǝmɔ fʊlkʊblǝn nʊ.

Yesu A Yɔ Yɔm A Dʌbʌl Mwɛ

⁴⁵ Tʌgo a kang Yesu a dǝg bɛtɔ mɛlalɨ gǝnɔ ja dɔ mʊgɔ tɨyamwɛngɔ yɔ lɛ nǝn ji a dʌng wini a Betsaidaɨ, nǝngɔ a tɨ a ywa nǝbɔ gwamɨ.

⁴⁶ A ywa jii, nǝngɔ a gwi kaa yem sǝ a maa keli woi.

⁴⁷ Nǝn kwaamɨ, tɨyamwɛngɔ gǝ na a tɨbǝl wɨma. Yesu gǝ na kwaagɔ a don.

⁴⁸ A kuwo bɛtɔ mɛlalɨ gǝnɔ jǝ gʌ lɛ nǝn mǝgtǝm tɨyamwɛngɔ, yʊwagɔ a ya ji a kǝga. Nǝn kemʌnɔ taal na kum nǝngɔ a jel bɛ lɛ a daa ji woi, yɔ lɛ a dʌbʌl mwɛ wɨma maamɔ gǝ shu shu tɨyamwɛngɔ.

⁴⁹ Bɛtɔ mɛlalɨ gǝnɔ a kuwo gǝn yɔ lɛ a dʌbʌl mwɛɨ, jǝ dʌng lɛ gɔ kɛna n bʊtɔ, nǝngɔ ja tǝl gatǝm kwaalɨgɨɨ.

⁵⁰ Gwam jinɔ ja kuwo gǝnɨ, taalɔ a ta ji. Nǝngɔ a sʊwa ji tʌgo a kang gɔ, “Nǝmǝ, ka jǝ́ nyʊwa lɛ taal.”

⁵¹ Nǝngɔ a dɔ mʊgɔ tɨyamwɛngɔ jǝbɔ jii, nǝngɔ yʊwa ga tɨɨ. Bɛtɔ mɛlalɨ gǝnɔ a ta kang a nyiyo.

⁵² Ja nyǝm bɔ kɛl jǝ laatǝm kwaan nɨ ga maa nǝn kʊkkʊmɨ, jʊ a bwɨɨ jǝ nǝngǝn nǝn bǝngɨ lɔl.

Yesu A Gung Nǝb Nɨ Mɨ Kwamɨgǝnɨ A Janisarata

⁵³ Ja yab wɨmagɨɨ, nǝngɔ ja bɛ a kʌng wɨmagɔ gǝm a tǝm Janisarataɨ, ja kwa tɨyamwɛngɔ woi.

⁵⁴ Jeltǝm jinɔ a mʊgɔ tɨyamwɛngɨ, nǝbɔ a nyǝm gɔ nǝn Yesu.

⁵⁵ Nǝngɔ ja mwala a mʊgɔ tuulɔtɨnɔ gǝm jǝ bɛ gǝm lɛ nǝn nǝb bɔɔlamɔ a wɨlǝn jinɔ gǝmɨ. Jǝ bɛ lɛ nǝn ji a daa nɨ gwam ja nyʊwam fulon gɔ Yesu woi.

⁵⁶ Daa nɨ a dɔ wo gwamɨ, bɛlɨ tuulɔngɔ jǝbɔ daltɔ tuulɔngɔ, jǝbɔ bǝlǝntǝmɔ, ja bɛ nǝn nǝb bɔɔlamɔ a daa gǝ woi. Ja kela gǝn gɔ na ga jǝlaɨ, ga bǝla nǝb nɨ a ke nyiyo dwang malǝng gǝnɔ. Nǝb nɨ a maa nyɨɨ, ja nya gungtǝm a twɨla jinɔ gǝm.