Markus 3 - Dadiya NT

Yesu A Gung Nʊ Nɨ Kangɔ A Swam Swamɨ Nǝn Kum Fǝbtǝm

¹ Kaa di tag Yesu ba dɔ kan mɛlalɨgɨɨ, nǝngɔ a kuwo kaa nǝl wʊnɨ kangɔ a swam swamɨ yɨm woi.

² Kaam nǝbɔ saa gola sǝ jǝ ka kɛl Yesui. Nǝngɔ ja ya Yesu gǝm nu kɛna gung nʊ nɨ lɛ nǝn Kum Fǝbtǝmɨ.

³ Nǝngɔ Yesu a jo nʊ nɨ kangɔ a swam swamɨ gɔ, “Bɛ ba tɨ fɔ a kǝga nǝbɨɨ.”

⁴ Nǝngɔ a bʌ ji gɔ, “N wɛ diilɔ a nʊng gɔ a bʊm ja maa nǝn Kum Fǝbtǝmɨ? Ja maa jǝ nya ka? Ja maa jǝ bwɨla ka? Ja bʊʊ nǝn kʊlɨ ka? Ja jʌ kʊlɨ ka?” Nǝbɔ a gar gǝm bɔ kɛl.

⁵ Nǝngɔ Yesu a dʌng ji a mʊgɔ kaltǝm nǝlɨ, a maa fitǝm nǝl a dul bǝngɨ lɔl jinɔ gǝm. Nǝngɔ a sʊwa nʊ nɨ kangɔ a swam swamɨ gɔ, “Mal kang mʊnɔ.” Nǝngɔ a mal kang gǝnɨ, nǝngɔ kang gǝnɔ a yǝla a bɛ tʌgo dǝngdǝngɨ.

⁶ Kuwotǝm jʊ nɨ nyɨɨ, nǝngɔ nǝbɔ Farisaɨ a jel a mʊgɔ kan mɛlalɨɨ. Nǝngɔ ja nǝbka nyiyo jǝbɔ nǝb maajɨ Hiridusi, golagɔ jǝ jʌm Yesu lɛɨ.

Kʌm Nǝbɨɨ A Nyiyo Wɨma Galili

⁷ Nǝngɔ Yesu a gun jǝbɔ bɛtɔ mɛlalɨ gǝnɔ, ja bǝla tuulɔngɔ ja shu a nyiyo wɨma Galilii. Kʌm nǝbɨɨ a lada na a bwang gǝmɨ. Nǝbɔ Galilii, jǝbɔ nǝbɔ Yahudiyaɨ,

⁸ jǝbɔ nǝbɔ Urushalimaɨ, jǝbɔ nǝbɔ a Edomi, jǝbɔ nǝbɔ dʌng tiyo Urduni, jǝbɔ nǝbɔ Tayaɨ, jǝbɔ Sidoni. Nǝbɔ a lada a mʊgɔ jin ja bɛ sǝ ba jǝ kuwo kanjǝl nɨ ja nyʊwa gǝ maa lɛɨ.

⁹ A swɨ bɔ nǝbɔ a mǝmsa gǝn, nǝngɔ a sʊwa bɛtɔ mɛlalɨ gǝnɨ gɔ ja bɛ gǝm nǝn bɛ tɨyamwɛngɔ win.

¹⁰ Nǝbɔ a bɛ a daa gǝ woi a lada, jʊ a bwɨɨ a kwɛl a gung nǝbɔ a lada. Nǝb twɨlamɔ a bɛ ba mǝmsa gǝn nɛ sǝ jǝ ke gǝn.

¹¹ Nǝn kwama nɨ nǝblaamɔ a kuwo gǝnɨ, ja gǝla ja yal a kǝga gǝn, jǝ ga kwaalɨgɔ lɛ gɔ, “Mʊ nǝn Bʊla Kwaamaɨ.”

¹² A gʊ lɔl jinɔ dangǝn gɔ ka ja sʊwa lɛ nǝbɔ gɔ gǝ nǝn nuwo.

Yesu A Jǝgam Bɛtɔ Mɛlalɨgɔ Kʊb Jeli Yo

¹³ Nǝngɔ Yesu a gwi dʌbʌl yemi, nǝngɔ a jo nǝbɔ gǝ swɨ lɛɨ, nǝngɔ ja bɛ a daa gǝ woi.

¹⁴ Nǝngɔ a jǝgam nǝbɔ kʊb jeli yo a kʊm jin sǝ ja yǝlam bɛtɔ mɛlalɨ gǝnɨ, sǝ ja yɨ jǝbɔ gɔ, sǝ a twam ji a daa kiyotǝm kɛl Kwaamaɨ,

¹⁵ sǝ a nǝ ji fɔlɔn jǝgtǝm nǝblaamɔ.

¹⁶ Nǝb nɨ kʊb jeli yo ga jǝgamɨ nǝn Saminu wʊnɨ Yesu a jo dun gǝnɔ gɔ Bitrusi,

¹⁷ jǝbɔ Yakubu bʊla Zabadii, jǝbɔ kɨla gǝ Yohana wʊnɨ Yesu a nǝ gǝn dunɔ gɔ Buwanarjisi, gɔ jǝ bɛtɔ kunnyiyo,

¹⁸ jǝbɔ Andarawas, jǝbɔ Filibus, jǝbɔ Bartalamawas, jǝbɔ Matta, jǝbɔ Toma, jǝbɔ Yakubu bʊla Halfaɨ, jǝbɔ Tadawus, jǝbɔ Saminu nǝ swɨtǝm tǝm gǝn,

¹⁹ jǝbɔ Yahuza Iskariyoti wʊnɨ a lungto gǝnɨ.

Yesu Jǝbɔ Baalzabul

²⁰ Nǝn kwama Yesu a dɔ kaa lɔɨ, nǝbɔ a yǝla a mʊrka tʌgo tag. Gɔ jǝbɔ bɛtɔ mɛlalɨ gǝnɔ, ja ke bɔ kang jatǝm jǝjalǝn.

²¹ Kwama nǝbɔ lɔ gɨɨ a nyʊwa nyɨɨ, nǝngɔ ja yɔ sǝ ya jǝ ta gǝnɨ, jʊ a bwɨɨ nǝbɔ sʊwa lɛ gɔ, “Wabɨgɔ a ta gǝn!”

²² Nǝb mɛlalɨ diil nɨ a jel a Urushalimaɨ ja sʊwa gɔ, “Nǝn Baalzabul fɔlɔ nǝblaamɨ a dɔ bʊtɔ gǝnɨ! Gǝ jǝg nǝblaamɔ nǝn kwaan Baalzabuli.”

²³ Nǝngɔ Yesu a jo ji, a sʊwa ji mʊsǝn kɛlɔ gɔ, “Mammɔ nǝn kwaan jǝg Mamm lɛɨ ka?

²⁴ Na fɔlɔnɔ a bel yoi, a kɛl kii, fɔlɔn gɔ mɨsɔ tɨ lɛ.

²⁵ Na lɔngɔ a bel yoi, a kɛl kii, lɔ gɔ mɨsɔ tɨɨ lɛ.

²⁶ Na Mammɔ kɔ dul gǝnɔ lɛɨ, nǝngɔ dul gǝnɔ a bel yoi, mɨsɔ tɨɨ lɛ. Dɨltǝm gǝnɔ a bɛ.

²⁷ Mɨ nǝn nʊ nɨ dɔ lɔ nǝ kwaan nɛ ga wɔɔ kanjǝl gǝnɨ, na ga tǝl bɔ ga bwa gǝn dɨnɨ, sǝla ga wɔɔ kanjǝl lɔ gǝnɨ.

²⁸ “N bɨlǝngkɛl mǝ sʊwa jen nɛɨ, Kwaama kǝlǝm kǝlǝm nǝbɔ gǝm bwɨlangkɛlɔ gwam jǝbɔ kaltǝm dun Kwaamaɨ ja maaɨ.

²⁹ Na nʊ nɨ a kal dun Yʊwa Kwaamaɨ, mɨsɔ Kwaama kǝlǝm gǝm lɛ wo. Ga maa bwɨlangkɛl nɨ mɨ dɨtǝm woi.”

³⁰ Yesu a sʊwa ji kɛl nɨ jʊ a bwɨɨ ja sʊwa a dul gǝn gɔ, “Gǝ nǝngǝn nǝn yʊwa bwɨla.”

Nɛnɛ Yesui Jǝbɔ Kɛtǝlam Gǝnɔ

³¹ Nɛnɛ Yesui jǝbɔ kɛtǝlam gǝnɔ ba ja tɨ a yooli, nǝngɔ ja twam jǝl gɔ ja jo gǝnɨ.

³² Nǝbɔ a kang gǝn, jǝ yǝm jǝbɔ gɔ. Nǝngɔ ja sʊwa gǝn gɔ, “Nɛnɛ mɔ jǝbɔ kɛtǝlam mʊnɔ jǝ saa ń nɛ a yooli.”

³³ Nǝngɔ a bʌ ji gɔ, “Nɛnɛ mɨ jǝbɔ kɛtǝlam mǝndɨ na bǝ wo?”

³⁴ A dʌng nǝbɔ yǝmam jǝbɔ gɨɨ, nǝngɔ a sʊwa ji gɔ, “Nɛnɛ mɨ n wɔ jǝbɔ kɛtǝlam mǝndɨ.

³⁵ Nʊ nɨ a maa jʊ Kwaama swɨ lɛɨ, nǝn gɔ nǝn kɨla mɨ balɨɨ, jǝbɔ kɨla mɨ nɔɔlɨɨ, jǝbɔ nɛnɛ mɨɨ.”