Markus 2 - Dadiya NT

Yesu A Gung Nʊ Nɨ Bʊtɔgɔ A Swam Swamɨ

¹ Kumtɨnɔ a gǝlala bɔ, nǝngɔ Yesu a yǝla a bɛ a Kafarnahumi, nǝbɔ a nyʊwa fulon gǝnɔ gɔ gǝ na a lɔ.

² Nǝbɔ ba mʊrka a lada nyɔ, mɨ daa wo a mʊgɔ lɔng jǝbɔ nyanga lɔng. Yesu kiyo jim fulon kɛl lǝmɨgɔ lɛ.

³ Nǝngɔ nǝbɔ naal a bɛ nǝn nʊ nɨ bʊtɔgɔ a swam swamɨ.

⁴ Ja kuwo mɨsɔ jǝ nya dɔtǝm lɛ a daa Yesu woi jʊ a bwɨɨ, nǝbɔ a lada, nǝngɔ ja gwi ja kwɨ dul kanɨ, ja shig gǝn jǝbɔ wɨlǝn gǝnɔ a kǝga Yesui.

⁵ Nǝn kwama Yesu a kuwo nǝtǝm bɨlǝngkɛl jini, nǝngɔ a sʊwa nʊ nɨ bʊtɔgɔ a swam swamɨ gɔ, “Bʊla mɨ, n kǝlǝm mʊn bwɨlangkɛl mʊnɔ.”

⁶ Nǝngɔ kaam nǝb mɛlalɨ diilɔ yǝmam woi a tǝl bʊʊlatǝmɔ a nǝl jin gɔ,

⁷ “N wɛ a bwɨ nʊ nɨ a sʊwa kɛl nɨ nyɨɨ? A kal dun Kwaamaɨ! Nuwo kǝlǝm bwɨlangkɛl lɛɨ na ke bɔ Kwaama kwaagɨɨ?”

⁸ Yesu a kwɛl a nyǝm jʊ jǝ bʊʊla lɛ a nǝl jini, nǝngɔ a bʌ ji gɔ, “N wɛ a bwɨ jǝ́ maa bʊʊlalɨ nɨ lɛ nyɔ a nǝl jeni?

⁹ Nʊ won a laa jǝlɨ, ja sʊwa nǝ twɨla gɔ, ‘Ja kǝlǝm mʊn bwɨlangkɛl mʊnɔ’ jǝbɔ a wʊnɨ ja sʊwa gǝn gɔ, ‘Gun do wɨlǝn mʊnɔ yiloi?’

¹⁰ Mǝ swɨ lɛ jǝ́ nyǝm gɔ, Bʊla Nǝlɨ nǝngǝn nǝn fɔlɔn kǝlǝmtǝm bwɨlangkɛl a tǝm nɨɨ.” Nǝngɔ a sʊwa balɨ nɨ bʊtɔgɔ a swam swamɨ gɔ,

¹¹ “Gun do wɨlǝn mʊnɔ shu a lɔ.”

¹² Nǝngɔ a gun tʌgo a kang dangǝn a do wɨlǝn gǝnɔ a jeli. Nǝbɔ woi dʌng gǝn nɛɨ, ja ta kang a nyiyo, jǝ bǝlá Kwaama lɛ jǝ sʊwa lɛ gɔ, “Bǝ kuwo bɔ kaa jǝl wo na jʊ nɨ a bwɨɨ.”

Yesu A Jo Lawi

¹³ Nǝngɔ Yesu a yǝla a jel a shu a kʌng wɨma Galilii, nǝbɔ a lada nyɔ a mʊrka a daa gǝ woi, nǝngɔ mɛla jim lɛɨ.

¹⁴ Kwamagɔ shum lɛɨ, nǝngɔ a kuwo Lawii, bʊla Halfaɨ, yǝm a daa yotǝm kemʌn tǝm. Nǝngɔ Yesu a sʊwa gǝn gɔ, “Bwang mɨ.” Nǝngɔ a gun a bwang gǝmɨ.

¹⁵ Kaa di Yesu jǝbɔ bɛtɔ mɛlalɨ gǝnɔ jǝ ja jǝjalǝn nɛ a lɔ Lawii. Kaam nǝb yotǝm kemʌn tǝmɔ jǝbɔ nǝb bwɨlangkɛlɔ a lada jǝ ja jǝjalǝnɔ lɛ jǝbɔ gɔ jǝbɔ bɛtɔ mɛlalɨ gǝnɔ. Nǝbɔ a lada a mʊgɔ jin ja bwang gǝmɨ.

¹⁶ Kaam nǝb mɛlalɨ diilɔ a kʊm jini n nǝbɔ Farisaɨ. Ja kuwo gǝn ja jǝjalǝn nɛ jǝbɔ nǝb bwɨlangkɛlɔ jǝbɔ nǝb yotǝm kemʌn tǝmɨ, nǝngɔ ja bʌ bɛtɔ mɛlalɨ gǝnɨ gɔ, “N wɛ a bwɨ gǝ ja lɛ jǝbɔ nǝb yotǝm kemʌn tǝmɔ jǝbɔ nǝb bwɨlangkɛlɨ?”

¹⁷ Yesu a nyʊwa nyɨɨ, nǝngɔ a sʊwa ji gɔ, “Nǝb nɨ kwamɨgǝnɨ mɨ jǝ yɔ lɛ a daa nǝ bʊʊ woi, n nǝbɔ mɨ kwamɨgǝnɨ gǝ yɔ lɛ woi. Mǝ bɛ bɔ sǝ ba n jo nǝb dǝngdǝng. Mǝ bɛ jotǝm nǝb bwɨlangkɛl.”

Bʌtʌm Kɛl A Dul Dotǝm Diil Mwɛ

¹⁸ Bɛtɔ mɛlalɨ Yohanaɨ nǝ Yʊtǝm mwɛ Sagsag jǝbɔ a nǝbɔ Farisaɨ jǝ do diil mwɛ lɛ. Nǝngɔ kaam nǝbɔ a bʌ Yesu gɔ, “N wɛ a bwɨ bɛtɔ mɛlalɨ Yohanaɨ jǝbɔ a nǝbɔ Farisaɨ jǝ do diil mwɛ lɛ, a mʊnɔ mɨ jǝ do lɛɨ?”

¹⁹ Nǝngɔ Yesu a jǝla ji gɔ, “Fatǝm balɨgɨɨ jǝ do do diil mwɛ na jǝ dakini jǝbɔ gɔ a daa bwatǝm naakanɨ ka? Kwamagɔ jǝ dakini jǝbɔ balɨgɨɨ, mɨsɔ jǝ do diil mwɛ lɛ.

²⁰ Kwamagɔ bɛ lɛ wo wʊnɨ ba jǝ dem jim balɨgɔ lɛɨ, nǝngɔ kwama gɔ jǝ dem diil mwɛ lɛɨ.

²¹ “Mɨ nǝn nʊ nɨ baka bɛllɛ galɨ lɛ nǝn mwan dwang fɨɨ. Na ga maa nyɨɨ, mwan dwang fɨgɔ wʊl wʊl bɛllɛ galɨgɔ. Wʊlatǝm gǝnɔ laa laa a galɨgɔ bwɨlatǝmɔ.

²² Mɨ nǝn nʊ nɨ tal bʊgɛ fɨ lɛ a sʊwa galɨɨ. Na ga maa nyɨɨ, sʊwagɔ fɛ fɛ, bʊgɛmɔ tǝlam tǝlam, sʊwagɔ kala kala. Bʊgɛ fɨgɔ jǝ tal a sʊwa fɨ.”

Bʌtʌm Kɛl A Dul Kɨlatǝm Kum Fǝbtǝm

²³ Nǝn Kum Fǝbtǝm Yahudawagɨɨ, nǝngɔ Yesu jǝbɔ bɛtɔ mɛlalɨ gǝnɔ jǝ shu lɛ a twam jaamɨ. Ji a mʊgɔ yɔmɔ gǝm nǝngɔ kaam bɛtɔ mɛlalɨ gǝnɔ a tǝl kwɛltǝm dul jaamɨ.

²⁴ Nǝngɔ nǝbɔ Farisaɨ a sʊwa Yesu gɔ, “Dʌng jʊ bɛtɔ mɛlalɨ mʊnɔ maa lɛɨ. N wɛ a bwɨ jǝ maa jʊ nɨ lɛ diilɔ a sʊwa gɔ ka ja maa lɛ nǝn Kum Fǝbtǝmɨ?”

²⁵ Nǝngɔ Yesu a jǝla ji gɔ, “Jǝ́ kiyo bɔ jʊ nɨ Dauda a maa kwama nɨ nǝngǝn nǝn komʌn, a nyʊwam jʊwan jǝbɔ fatǝm yɔm gǝnɨ ka?

²⁶ Nǝn kwama Abiyataɨ dalɨ nǝkǝlagɔ, Dauda a dɔ lɔ Kwaamaɨ, a ja kʊkkʊm nɨ diilɔ a sʊwa gɔ n nǝbkǝlam kwaaji maa lɛ nyɨɨ. Jǝ́ kuwo bɔ Dauda a ja, a nǝ fatǝm yɔm gǝnɨ ka?”

²⁷ Nǝngɔ a sʊwa ji gɔ, “Kum Fǝbtǝmɔ ja maam nǝfili, nǝfili ja maam bɔ Kum Fǝbtǝm.

²⁸ A na nyɔ Bʊla Nǝlɨ nǝn gɔ Tɛlalɔ a dul Kum Fǝbtǝmɨ.”