Markus 16 - Dadiya NT

Guntǝm Yesui A Bwaa

¹ Kwama Kum Fǝbtǝm Yahudawagɨɨ a shui, Maryamu bwɛn Magadaliyaɨ, jǝbɔ Maryamu nɛnɛ Yakubui, jǝbɔ Salomi, ja ten nwang nɨ nǝn kunʌn lǝmɨ sǝ ya jǝ waa bʊtɔ Yesui gǝm.

² Nǝn dibɨlɨ nǝn kumsʌl, kwama nu kwamagɔ gwim lɛɨ, nǝngɔ ja shu a tuui.

³ Jǝ shu lɛ a gola, nǝngɔ jǝ sʊwaka lɛ a bʊtɔ jii gɔ, “Nuwo bʌlʌm bǝm tɛlɔ lɛ a nyanga tuui?”

⁴ Nǝn kwama ya ja la daa tuugɔ ja dʌngi, nǝngɔ ja nya ja kwɛl ja bʌlʌm dalɨ tɛlɔ a nyanga tuugɔ gǝmɨ.

⁵ Ja dɔ mʊgɔ tuugɨɨ, ja nya kaa bwayǝlɨ yǝm a gwanga kang jajǝng, nǝn bɛllɛ fulo a bʊtɔ gǝn, taalɔ a ta ji.

⁶ Nǝngɔ bwayǝlɨ nɨ a sʊwa ji gɔ, “Ka yal jem lɛ kuli. N nyǝm jǝ́ saa Yesu bwɛ Nazarat wʊnɨ ja kʊʊɨ. A gun. Mɨ fɔ. Jǝ́ dʌng daagɔ wɔ ja yam gǝnɨ.

⁷ Jǝ́ shu kǝngkɔ, jǝ́ sʊwa bɛtɔ mɛlalɨ gǝnɔ, jǝbɔ Bitrus jengɔ Yesu ya laa jen laa a Galili, n daa gɔ jǝ́ kuwom gǝn nɛ wo kanga a sʊwam jeni.”

⁸ Nɔɔtǝm nɨ ja yǝla wo a kalfʌto nǝn sʊgɔl, nǝn komtǝm jǝbɔ katǝm bʊtɔ kʌbkʌb. Ja sʊwa bɔ kɛl, jʊ a bwɨɨ jǝ nyʊwa taal lɛ.

Yesu A Nʊng Maryamu Bwɛn Magadaliyaɨ Dul Gǝnɔ

⁹ Guntǝm Yesui a bwaa nǝn kumsʌl nǝn kɔkɔ dibɨlɨɨ, a tǝl a nʊng Maryamu bwɛn Magadaliyaɨ dul gǝnɔ, nɔɔlɨ nɨ Yesu a jǝg gǝm nǝblaamɔ nʌbʌli.

¹⁰ Nǝngɔ a shu ya sʊwa nǝb nɨ jǝbɔ gɨɨ, a kumtɨn gɔ, jǝ maa fitǝm nǝl lɛ jǝbɔ jitǝm wi.

¹¹ Kwama a sʊwa ji gɔ Yesu nǝn kʊlɨɨ, gǝ kuwo gǝnɨ, ja kɔ ja jǝla bɔ nǝn kɛl nɨ.

Yesu A Nʊng Dul Gǝnɔ A Daagɔ Bɛtɔ Mɛlalɨ Gǝnɔ Woi

¹² Nǝn kwama Yesu a fʌto bʊtɔ gǝnɨ, nǝngɔ a nʊng dul gǝnɔ a daagɔ bɛtɔ mɛlalɨ gǝnɔ woi yoi, a kwama nɨ jǝ shum lɛ a kaa bɛ tuulɔɨ.

¹³ Nǝngɔ yo nɨ ja yǝla ya ja sʊwa tangǝnɔ fulon kɛl nɨɨ. Ja kɔ ja jǝla bɔ nǝn kɛl nɨ.

Maajɨgɔ Yesu A Nǝ Bɛtɔ Mɛlalɨ Gǝnɨ

¹⁴ Nǝn gul Yesu a nʊng dul gǝnɔ a daagɔ bɛtɔ mɛlalɨ gǝnɔ woi kʊb jeli wini, a kwama jǝ jam jǝjalǝn nɛɨ. A ga ji a dul nǝtǝm bɨlǝngkɛlɔ mɨ ji nǝnɨ jǝbɔ bǝngɨ lɔl jinɔ ja kɔ jǝlatǝm nǝn nǝbɔ a kuwo gǝnɨ a gul guntǝm gǝnɔ a bwaaɨ.

¹⁵ Nǝngɔ a sʊwa ji gɔ, “Jǝ́ dɔ mʊgɔ yooligɔ gwam, jǝ́ kiyo nǝbɔ gǝm gwam fulon kɛl lǝmɨ nɨɨ.

¹⁶ Na nʊ nɨ a nǝ bɨlǝngkɛl ja yʊ gǝn mwɛ sagsagɨ, gǝ bʊʊ bʊʊ. Na nʊ nɨ a kɔ nǝtǝm bɨlǝngkɛlɨ, jǝ mwatɨ gǝm mwatɨ borang.

¹⁷ Nǝb bwangtǝm mǝndɨ maa maa kanjǝl nɨ sǝ a nʊng bɨlǝngkɛl jinɔ. Kanjǝl nɨ nǝn gɔ: A mʊgɔ dun mɨ, jǝ jǝg jǝg nǝblaamɔ. Jǝ sʊwa sʊwa kɛl nǝn ben fɨntɨn.

¹⁸ Jǝ do do sɔɔ nǝn kang jin. Na ja nɔɔ twalǝmɨ, mɨsɔ maa jim kaa jǝl lɛ. Jǝ ya ya nǝb nɨ mɨ kwamɨgǝnɨ gǝm kang gǝ ja gun, jǝ gun gun.”

Yesu A Shu A Dʌbʌl

¹⁹ Kwama Tɛlalɔ Yesu a mal jim nyiyogɨɨ, nǝngɔ Kwaama a do gǝn a shu nǝn gɔ a dʌbʌli, yǝm a kang jajǝng Kwaamaɨ.

²⁰ Bɛtɔ mɛlalɨ gǝnɔ ja jel ja shu, jǝ kiyo fulon kɛl lǝmɨ gǝnɔ lɛ a daatɨnɔ gǝm gwam. Tɛlalɔ maa maajɨ lɛ jǝbɔ ji, nʊng bɨlǝngkɛl jinɔ lɛ a kanjǝl jǝ laatǝm kang nɨ sǝ a nʊng jʊ ja sʊwaɨ, n bɨlǝngkɛl.