Markus 15 - Dadiya NT

Yesu A Kǝga Bilatusi

¹ Tǝmɔ sɛl lɛ nyɔ nǝn kumsʌl, nǝngɔ dʊʊm nǝbkǝlamɔ, jǝbɔ nǝb dʊʊm nǝbɨɨ, jǝbɔ nǝb mɛlalɨ diilɔ, jǝbɔ nǝb dʊʊm koteregɔ gwam ja mʊrkam nyiyoi. Nǝngɔ ja bwa Yesu ja shu nǝn ya ja nǝ Bilatusi.

² Bilatus a bʌ gǝn gɔ, “Nǝmɔ mʊ fɔlɔ Yahudawagɨɨ ka?” Nǝngɔ Yesu a jǝla gǝn gɔ, “Kanga mʊ sʊwaɨ.”

³ Nǝngɔ dʊʊm nǝbkǝlamɔ a tuwo gǝn nǝn kanjǝlɔ a gǝlalaɨ.

⁴ Bilatus a yǝla a bʌ gǝn gɔ, “Mɨ mʊ nǝn kɛl nɨ mʊ gar lɛɨ ka? Dʌng bwɨ kɛl nɨ jǝ sʊwala lɛ a dul mʊnɨ.”

⁵ Yesu a gar jim bɔ kaa kɛl. Yɨtǝm shig nɨ a kom Bilatus.

Ja Maa Yesu Gǝm Borang Bwaa

⁶ Nǝn kwama Dikulom Yabtǝmɔ, Bilatus a mɛ demtǝm kang a nǝl gǝm win a nǝb nɨ a lɔsomii, wʊnɨ nǝbɔ a kelaɨ.

⁷ Kaa nǝl wo dunɔ nǝn Barabas, wo a mʊgɔ nǝb nɨ ja bwaba ja tal a lɔsomi a kɛl jʌtǝm dul a kutʌm nɨ ja maa a kwama gɨɨ.

⁸ Nǝngɔ nǝbɔ a tǝl kelatǝm Bilatusi gɔ, ga maa jim jʊ kanga gǝ maam lɛɨ.

⁹ Nǝngɔ Bilatus a jǝla ji gɔ, “Jǝ́ swɨ lɛ n dem jem kang a fɔlɔ Yahudawagɨɨ ka?”

¹⁰ A kwɛl a nyǝm nyǝmɨ n kɛl nungon a dǝg dʊʊm nǝbkǝlamɔ ja bwa Yesu ja nǝ gǝnɨ.

¹¹ Ja jǝla bɔ, nǝngɔ dʊʊm nǝbkǝlamɔ a fǝ dul nǝbɨɨ gɔ, ja sʊwa gɔ ja dem kang a Barabas gǝm.

¹² Nǝngɔ Bilatus a bʌ ji tag gɔ, “N wɛ mǝ maa lɛ nǝn nʊ nɨ jǝ jo lɛ gɔ Fɔlɔ Yahudawagɨɨ?”

¹³ Nǝngɔ ja ma bwaalɨgɨɨ gɔ, “Ja kʊʊ gǝn!”

¹⁴ Bilatus a bʌ ji gɔ, “N bwɨlangkɛl wɛ a maaɨ?” Nǝngɔ ja tɨtǝn sʊwatǝmɔ nǝn diil gɔ, “Ja kʊʊ gǝn!”

¹⁵ Bilatus swɨ lɛ a maa jʊ nǝl nǝbɨɨ swɨ lɛɨ, nǝngɔ a dem jim kang a Barabas gǝmɨ. A maa Yesu gǝm banjangɨ, nǝngɔ a nǝ ji gɔ ya ja kʊʊ gǝnɨ.

Sʊwajaamɔ A Mog Yesu

¹⁶ Nǝngɔ sʊwajaamɔ a shu nǝn gɔ a mʊgɔ lɔ gwamnaɨ ja mʊr nya sʊwajaamɔ gwamɨ.

¹⁷ Nǝngɔ ja dʊʊ gǝm bɛllɛ feli na fɔlɔnɨ, ja fɛ gǝm dwang dulɔ nǝn shola, ja bwa gǝmɨ.

¹⁸ Nǝngɔ ja tǝl jǝ yal gǝn nɛ gɔ, “Bɛ kʊlɨ mʊnɔ a kʌl, fɔlɔ Yahudawagɨɨ!”

¹⁹ Nǝngɔ ja ga gǝn nǝn dwam a duli, ja tɛɛ gǝm tuumi, nǝngɔ jǝ jʊng gɔ jǝ nǝ gǝn dʊʊn.

²⁰ Ja dɨ mogtǝm gǝnɨ, nǝngɔ ja jǝgǝm bɛllɛ fɔlɔnɔ ja mal gǝmɨ, ja mal gǝm bɛllɛ gǝnɨ, jǝ shu nǝn gɔ a yooli sǝ ya jǝ kʊʊ gǝnɨ.

Ja Kʊʊ Yesu

²¹ Nǝngɔ kaa nǝl shu lɛɨ, dunɔ nǝn Saminu bwɛ Kuranei, tɨya Iskandarii jǝbɔ Rufas, a jel a bɛ tuulɔ. Nǝngɔ ja dǝg gǝn a do tɨya kʊʊtǝm Yesui.

²² Nǝngɔ ja yɔ nǝn Yesu a kaa daa nɨ jǝ jo lɛ gɔ, Golgotaɨ, wʊnɨ nʊng lɛ gɔ, n daa kwasɨ duli.

²³ Ja nǝ gǝn bʊgɛ nɨ ja shɛka nǝn mʊngɨ, sǝ a dem gǝm bɔɔla bʊtɔgɔ, a kɔ nɔɔtǝmɔ.

²⁴ Nǝngɔ ja kʊʊ gǝnɨ. Ja wɔɔ dwang dʊʊl gǝnɔ ja gam kwannya nǝn sǝ ja kuwo nʊ nɨ a kʊm jin nya lɛɨ.

²⁵ Kemʌnɔ tʊlkʊb na kumsʌl, ja kʊʊ gǝnɨ.

²⁶ Ja mʊla bwɨlangkɛlɔ a dul gǝn gɔ, “nən gɔ fɔlɔ yahudawagɨɨ.”

²⁷ Ja kʊʊ nǝbkuumɔ yo jǝbɔ gɔ, win a gwanga kang jajǝng, win a gwanga kang fɔlɔng. [

²⁸ Wʊnɨ yiitǝm mʊlalɨ nɨ a sʊwa gɔ, “Ja kiyo gǝn a mʊgɔ nǝb bwɨlangkɛlɨ.”]

²⁹ Nǝb nɨ shu lɛɨ, jǝ sʊwala gǝn bwɨlang katɨ lɛ, jǝ mǝg dul jinɔ lɛ jǝ sʊwa lɛ gɔ, “A dɨ ka! Mʊ nɨ mʊ kʌb Kan Kwaamanɔ lɛ ń yǝla ń mɔ tʌgo a mʊgɔ kumɔ taalɨ.

³⁰ Bʊʊ nǝn dul mʊnɔ, gǝla a dʌbʌl tɨya kʊʊtǝm!”

³¹ Dʊʊm nǝbkǝlamɔ jǝbɔ nǝb mɛlalɨ diilɔ ja mog gǝn a kʊm jin, jǝ sʊwa lɛ gɔ, “A bʊʊ nǝn kaam nǝbɔ, mɨ nǝn kwaan bʊʊtǝm nǝn dul gǝnɔ.

³² Na gǝ nǝn Kiristii, fɔlɔ Israilagɔ, ga gǝla a dʌbʌl tɨya kʊʊtǝm nɨ kǝngkɔ, bǝ kuwo, sǝ bǝ nǝ bɨlǝngkɛl.” Nǝb nɨ ja kʊʊ ji dakinii, ja tuwo gǝn tʌji.

Bwaa Yesui

³³ Dǝngdǝng kemʌnɔ kʊb jeli yo, kumtojiligɔ a sumʌm tǝmɔ gwam, a yɔ nǝn a kemʌnɔ taal na kwaamɨ.

³⁴ Kemʌnɔ taal, nǝngɔ Yesu a gung diilɔ nǝn kwaan a sʊwa gɔ, “Eloi, Eloi, lama sabaktani?” Wʊnɨ gǝ nʊng gɔ, “Kwaama mɨ Kwaama mɨ, n wɛ a bwɨ mʊ bǝla ɨɨ?”

³⁵ Kaam nǝb nɨ tɨlam wo ja nyʊwa nyɨɨ, nǝngɔ ja sʊwa gɔ, “Jǝ́ nyʊwa, jo Iliya lɛ.”

³⁶ Kaa win a kʊm jin a mwal ya dǝg fʊgɔgɔ a mwɛ fwalɨ, a dǝg a dwam a nǝ gǝn gɔ a nɔɔ. A sʊwa gɔ, “Jǝ́ bǝla gǝn wo kɛna Iliya bɛ ba shig gǝn nɛɨ.”

³⁷ Nǝngɔ Yesu a gung diilɔ nǝn kwaan, nǝngɔ a bʊlaɨ.

³⁸ Nǝngɔ dwang Kan Kwaamanɔ a bel yo a dʌbʌl a gǝla nǝn a tǝmɨ.

³⁹ Dʊʊ sʊwajaam nɨ tɨm wo dʌng Yesu lɛɨ, a kuwo kanga a bʊlaɨ, nǝngɔ a sʊwa gɔ, “Bɨlǝngǝn nʊ nɨ nǝn Bʊla Kwaamaɨ.”

⁴⁰ Kaam nɔɔtǝm tʌji tɨlam wo a kʊta, ja kuwo. A kʊm jin Maryamu bwɛn Magadaliyaɨ jǝbɔ Maryamu nyɨya Yakubu dwalɨgɨɨ, kɨla Yusufui, jǝbɔ Salomi,

⁴¹ nǝji ja bwang gǝmɨ, kwama nɨ gǝ a tǝm Galilii, jǝ maa gǝm maajɨ lɛ, jǝbɔ kaam nɔɔtǝmɔ a lada wʊnɨ ya ja ywa gǝn a Urushalimaɨ.

Fʌltǝm Yesui

⁴² Nǝn kwaamɨ kɔkɔ fɛkalɨ, tǝmsɛlɨ n disʊgalɨ,

⁴³ Yusufu bwɛ Arimatiya nɨ, wʊnɨ n nǝ dʊʊ a mʊgɔ mʊrkalɨ nǝb dʊʊm kotere Yahudawagɨɨ, wʊnɨ yam bɛtǝm fɔlɔn lɔ Kwaamaɨ lɛɨ, a bɨ nǝl, nǝngɔ a yɔ a daa Bilatus woi, a kela gɔ ga nǝ gǝn bʌlʌn Yesui.

⁴⁴ Bilatus a ta kang a nyiyo, a nyʊwa gɔ a kwɛl a bʊlaɨ. Nǝngɔ a jo nǝ dʊʊ sʊwajaamɔ a bʌ gǝn gɔ kɛna bɨlǝngǝn Yesu a kwɛl a bʊlaɨ.

⁴⁵ A nyʊwa a daa nǝ dʊʊ sʊwajaam nɨ woi gɔ Yesu a bʊlaɨ, nǝngɔ a nǝ Yusufui.

⁴⁶ Nǝngɔ Yusufu a ten dwang lilin fʌltǝm bʌlʌn Yesui, nǝngɔ a shig bʌlʌni, a kʊlʊm gǝn a dwang lilini, a ya gǝn a kaa tuu a bʊwa gam nɨ ja kʊʊ kʊʊɨ, nǝngɔ a bʌl kaa tɛl a swa tʌgo a nyanga tuugɔ gǝmɨ.

⁴⁷ Maryamu bwɛn Magadaliyaɨ jǝbɔ Maryamu nyɨya Yusufui ja kuwo daagɔ ja yam gǝnɨ.