Markus 14 - Dadiya NT

Nǝb Dʊʊmɔ A Fɛka Sǝ Jǝ Jʌ Yesu

¹ A bǝla kumɔ yo jǝ maa Dikulom Yabtǝmɔ lɛ jǝbɔ jatǝm Dikulom Kʊkkʊm nɨ mɨ Yisti woi, nǝngɔ dʊʊm nǝbkǝlamɔ jǝbɔ nǝb mɛlalɨ diilɔ, ja saa gola nɨ jǝ tam Yesu lɛɨ nǝn yʊlan sǝ jǝ jʌm gǝnɨ.

² Ja sʊwa gɔ, “Ke bɔ nǝn kwama dikulom bǝ ta gǝn nɛɨ, kage nǝbɔ a gung kutʌm.”

Ja Tal Yesu Gǝm Nwang Lǝmɨ A Betanya

³ Yesu yǝm a Betanya a lɔ Saminui, wʊnɨ a mwata mwataɨ, jǝ ja jǝjalǝn nɛ. Nǝngɔ kaa nɔɔlɨ a bɛ nǝn nwangɔ a kwallangǝnɨ. Ja fɛ nwangɔ nǝn nardi sagsag, kemʌnɔ a kwam nyɔ. Nǝngɔ a kǝl kwallangǝnɔ a tal gǝm nwangɔ gwam a duli.

⁴ Tangǝn jinɔ a nyʊwa fitǝm nǝl. Jǝ bʌbko lɛ a kang bʊtɔ jin gɔ, “N wɛ a bɛ nǝn kaltǝm nwang nɨ nyɨɨ?

⁵ Na na jǝ miyo miyo nwang nɨɨ, na shu shu kemʌn sǝlǝnɔ fʊlkʊb taal, ja nǝ nǝb bʊnǝnɔ.” Nǝngɔ ja wɛla nɔɔlɨ nɨ gǝm bwɨlangǝnɨ.

⁶ Nǝngɔ Yesu a sʊwa gɔ, “Jǝ́ bǝla gǝn wo. Wɛ a bwɨ jǝ́ kom gǝn nɛɨ? N dǝngdǝng a maa mɨɨ. A maa mɨ jǝ nyan.

⁷ Nǝb bʊnǝnɔ jǝ na jǝbɔ jen kwangkwang. Na jǝ́ swɨ lɛ jǝ́ maa jim jǝ nyaɨ, jǝ́ maa jim maa. N ke bɔ kwangkwang nǝbɔ jeni.

⁸ A maa jʊ dwal lɛ a maaɨ. A tal mɨ nwang a bʊtɔ sǝ a fɛka fʌltǝm mǝndɨ.

⁹ Bɨlǝngkɛl mǝ sʊwa jen nɛɨ, daa nɨ jǝ kiyom fulon kɛl lǝmɨ nɨ lɛ a tǝmɔ gǝm gwamɨ, jǝ sʊwa sʊwa jʊ nɔɔlɨ nɨ a maaɨ, sǝ a yǝlam jʊ ya jǝ bʊʊla lɛ nǝn gɨɨ.”

Yahuza A Jǝla Gɔ Gǝ Lungto Lungto Yesu

¹⁰ Nǝngɔ Yahuza Iskariyoti, win a mʊgɔ bɛtɔ mɛlalɨ gǝnɔ kʊb jeli yoi, a yɔ a daa dʊʊm nǝbkǝlamɔ woi gɔ gǝ lungto jim lungto Yesui.

¹¹ Ja nyʊwa lǝma nǝn kɛl nɨ ga sʊwa jii, ja jǝla gɔ jǝ nǝ gǝn kemʌn. Nǝngɔ Yahuza a tǝl saatǝm gola gɔ gǝ lungtom Yesu lɛɨ.

Yesu A Ja Dikulom Yabtǝmɔ Jǝbɔ Bɛtɔ Mɛlalɨ Gǝnɔ

¹² Nǝn kum tǝltǝm a Dikulom Kʊkkʊm nɨ mɨ Yisti woi, wʊnɨ jǝ biyom bɛ gal Dikulom Yabtǝm lɛɨ, nǝngɔ bɛtɔ mɛlalɨ gǝnɔ a bʌ gǝn gɔ, “A fee mʊ swɨ lɛ ya nǝ fɛka mʊn daa jatǝm Dikulom Yabtǝmɔ woi?”

¹³ Nǝngɔ a twam bɛtɔ mɛlalɨ gǝnɔ yoi, a sʊwa ji gɔ, “Na jǝ́ yɔ a mʊgɔ tuulɔ gɨɨ, jǝ́ tǝga tǝga kaa balɨ a do suul mwɛ, jǝ́ bwang gǝm.

¹⁴ Jǝ́ sʊwa tɛlalɔ nɨ a dɔɨ, jengɔ, ‘Nǝn feyi a twam nǝn, gɔ, kan shigtǝm faabǝmɨ ba gǝ jam jǝjalǝn Dikulom Yabtǝm lɛ jǝbɔ bɛtɔ mɛlalɨ gǝnɨ, gǝ na a fee?’

¹⁵ Nʊng jen nʊng dalɨ kan dʌbʌl wʊnɨ a kwɛl a fɛka fɛkaɨ mʊgɔ gǝnɨ, jǝ́ fɛka bǝm daa jatǝm Dikulomɔ wo.”

¹⁶ Nǝngɔ bɛtɔ mɛlalɨ gǝnɔ a shui, nǝngɔ ba ja dɔ tuulɔngɨ, ba ja nya kanjǝl nɨ kanga Yesu a sʊwa jii. Nǝngɔ ja fɛka jǝjalǝn Dikulom Yabtǝmɔ woi.

¹⁷ Nǝn kwaamɨ, nǝngɔ Yesu a bɛ dakini jǝbɔ bɛtɔ mɛlalɨ gǝnɔ kʊb jeli yoi.

¹⁸ Jǝ ja jǝjalǝnɔ lɛ dangǝnɨ, nǝngɔ Yesu a sʊwa gɔ, “N bɨlǝngkɛl mǝ sʊwa jen nɛɨ, win a kʊm jen lungto i lungto i, nʊ nɨ nǝn ja jǝjalǝnɔ lɛ dakinii.”

¹⁹ Ja maa fitǝm nǝl, nǝngɔ ja tǝl jǝ bʌ gǝn nɛ win win gɔ, “Nǝn nǝmǝ ka?”

²⁰ Nǝngɔ a jǝla ji gɔ, “Nʊ win a kʊm jen, jǝ́ kʊb jeli yo nɨ, nʊ a lungto i, n nʊ nɨ nǝn dǝg kangɔ lɛ dakini a mʊgɔ kʌshii.

²¹ Bʊla Nǝlɨ shu shu kanga ja mʊla a dul gǝnɨ. N mwɛ nʊ nɨ a lungto Bʊla Nǝlɨ! Na a bʊm nyɔ ja bʌ gǝn bɔ.”

Nɔɔtǝm Mwɛ Fogfogi Sagsag Tɛlalɔɨ

²² Kwama jǝ jam jǝjalǝnɔ lɛɨ, nǝngɔ a do kʊkkʊmɔ, a maa keligɨɨ, a tǝga bɛtɔ mɛlalɨ gǝnɨ. Sʊwa ji lɛ gɔ, “Jǝ́ yo, wʊnɨ n bʊtɔ mɨ.”

²³ Nǝngɔ a do bɛ kʌshi nɔɔmwɛnɨ, a maa keligɨɨ, nǝngɔ a nǝ jii, nǝngɔ pʌd jinɔ ja nɔɔɨ.

²⁴ Nǝngɔ a sʊwa ji gɔ, “Wʊnɨ nǝn gɔ tʊʊm swatǝm yaa mǝndɨ, wʊnɨ mǝ tǝla lɛ a kɛl dul nǝbɨɨ a ladaɨ.

²⁵ Bɨlǝngǝn mǝ sʊwa jen nɛɨ, mɨsɔ mǝ yǝla lɛ n nɔɔ mwɛ tʊʊl fogfogi nɨ wo tag, na ke bɔ kɔkɔ nɨ mǝ nɔɔ a fɨ lɛ a fɔlɔn lɔ Kwaamaɨ.”

²⁶ Nǝn kwama ja mam nafɨgɨɨ, nǝngɔ ja jel ja shu a Yem Zaituni.

Bitrus Kana Kana Nyǝmtǝm Yesui

²⁷ Nǝngɔ Yesu a sʊwa ji gɔ, “Jǝ́ mwala mwala jǝ́ bǝla ɨ, a mʊla mʊlaɨ gɔ, “ ‘Mǝ ga ga nǝ tɔɔtǝm kwamɨgɔ, sǝ kwamɨtɨnɔ a kwɨya tǝmɔ nǝn kwan.’

²⁸ Na kwama mǝ gun a bwaagɔ gǝmɨ, ya mǝ laa jen laa a Galili.”

²⁹ Nǝngɔ Bitrus a sʊwa gǝn gɔ, “Na pʌd jinɔ jǝ mwala mwala ja bǝla ńɨ, a mǝndɨ mɨsɔ mǝ mwal lɛ.”

³⁰ Nǝngɔ Yesu a sʊwa gǝn gɔ, “N bɨlǝngǝn mǝ sʊwa ń nɛɨ, a mʊgɔ kum nɨ, mʊ kana kana nyǝmtǝm mǝndɨ naagɔ taal, dɨsɔ la kwalɨ jangagɔ a ma kamɨ yogɔ.”

³¹ Nǝngɔ Bitrus a tɨtǝn sʊwatǝmɔ nǝn diili gɔ, “Na jǝ jʌ i jʌ i jǝbɔ mʊɨ, mɨsɔ mǝ kana nyǝmtǝm mʊnɔ lɛ wo.” Nǝngɔ tangǝn bɛtɔ mɛlalɨ gǝnɔ gwam ja sʊwa nyɔ tʌjii.

Yesu A Maa Keli A Gatsemani

³² Nǝngɔ ja la kaa daa nɨ jǝ jo lɛ gɔ Gatsemanii, nǝngɔ Yesu a sʊwa bɛtɔ mɛlalɨ gǝnɨ gɔ, “Jǝ́ yɨ fɔ, ya mǝ maa keli.”

³³ Nǝngɔ a do Bitrus jǝbɔ Yakubu jǝbɔ Yohana dakini jǝbɔ gɨɨ. Bʊʊlalɨgɔ jǝbɔ komtǝmɔ a la gǝm daa.

³⁴ Nǝngɔ a sʊwa ji gɔ, “Fitǝm nǝl nɨ mǝ nyʊwa lɛ nǝnɨ, maamɔ jʌ i jʌ i. Jǝ́ yɨ fɔ, jǝ́ maa tɔɔtǝm jǝbɔ mǝ.”

³⁵ A yɔ a kǝga dǝmɨ, nǝngɔ a jʊng a tǝmɨ, a maa keligɨɨ gɔ, na na maa maaɨ, na ja dem gǝm gaalan nɨ a dul gǝnɨ.

³⁶ Sʊwa lɛ gɔ, “Tɛtɛ, Tɛtɛ, kanjǝlɔ gwam yǝlam nyɔ a daa mʊ woi. Dem mɨ gaalan nɨ. Maa jʊ mʊ swɨ lɛ ń maaɨ, ke bɔ jʊ mǝ swɨ lɛɨ, maa jʊ mʊ swɨ lɛɨ.”

³⁷ Kwama a yǝla bɛm a daagɔ bɛtɔ mɛlalɨ gǝnɔ nɨ wo taalɨ, ba nya jǝ daa dum lɛ. Nǝngɔ a sʊwa Bitrus gɔ, “Bitrus, mʊ daa dum ka? Bitrus, mɨsɔ mʊ dwal lɛ ń yɨɨ kʊlɨgǝn dǝm ka?

³⁸ Jǝ́ tɔɔ tǝmɔ, jǝ́ maa keli kage jǝ́ yal a mʊgɔ tɛltǝm. Nǝlɔ swɨ maatǝmɔ lɛ, bʊtɔgɔ a gɨya.”

³⁹ Nǝngɔ a yǝla a shu ya maa keli kanga a maam nǝn tɨkǝgaɨ.

⁴⁰ Nǝn kwama a yǝla a bɛ tagɨ, ba nya ji jǝ daa dum lɛ, dumɔ a kwɛl a wɔɔ ji. Ja nyǝm bɔ jʊ jǝ sʊwa gǝn nɛɨ.

⁴¹ A yǝla a bɛ na taalɨ, nǝngɔ a sʊwa ji gɔ, “Jǝ́ daa dum lɛ jǝ́ fǝb lɛ dwal ka? A wʊlam, kwamagɔ a yii. Ja lungto Bʊla Nǝlɨ a kang nǝb bwɨlangkɛlɨ.

⁴² Jǝ́ gun, bǝ ya. Nʊ a lungto ii n wɔ bɛ lɛ!”

Ja Ta Yesu

⁴³ Sʊwa kɛlɔ lɛ wo dɨn, nǝngɔ Yahuza win a mʊgɔ kʊb jeli yo nɨ a bɛɨ. Nǝbɔ a lada bwang gǝm lɛ nǝn gulʌntɨn jǝbɔ dwamtɨn. N dʊʊm nǝbkǝlamɔ, jǝbɔ nǝb mɛlalɨ diilɔ, jǝbɔ nǝb dʊʊm nǝbɨɨ a twam jii.

⁴⁴ Nǝngɔ nʊ nɨ a lungto gǝnɨ a kwɛl a nʊng ji gɔ, “Nʊ nɨ mǝ kwal gǝn nɛɨ, n nʊgɔ, bɛ jǝ́ ta gǝn jǝ́ shu nǝn.”

⁴⁵ Bɛtǝm Yahuzaɨ, nǝngɔ a swatǝn kǝga tʌgo a daa Yesu woi. Nǝngɔ a sʊwa gɔ, “Nǝ mɛlalɨ.” Nǝngɔ a kwal gǝnɨ.

⁴⁶ Nǝngɔ nǝbɔ a kang Yesui, ja ta gǝnɨ.

⁴⁷ Nǝngɔ win a mʊgɔ nǝb nɨ tɨlam woi, a ku gulʌn gǝnɔ a kam lɔl bwɛ jwaalɛ dalɨ nǝkǝla nɨ nǝnɨ.

⁴⁸ Nǝngɔ Yesu a bʌ ji gɔ, “Mǝ nǝ bwɨlangkɛl ka, jǝ́ jela nǝn gulʌntɨn jǝbɔ dwamtɨn sǝ jǝ́ ta ɨɨ?

⁴⁹ Kwangkwang mǝ dakini nǝbɔ jen a talɨ Kan Kwaaman mǝ maa mɛlalɨ lɛ, jǝ́ ta ɨ bɔ. Jʊ a bwɨ ja maa jʊ nɨ nyɨɨ, sǝ ja yii jʊ mʊlalɨ kɛl Kwaamaɨ a sʊwaɨ.”

⁵⁰ Nǝngɔ bɛtɔ mɛlalɨ gǝnɔ gwam a mwala a bǝla gǝn kwaagɨɨ.

⁵¹ Kaa bwayǝlɨ wo bwang jim lɛ a gul. A dʊʊ kaa dwang kwabtǝm. Kwama jǝ saa tatǝm bwayǝlɨ nɨ lɛɨ,

⁵² nǝngɔ a kwɨ dwang kwabtǝm gǝnɔ a bǝla jimi, a mwal a shu guu kʊnkʊnɨ.

Ja Yɔ Nǝn Yesu A Kǝga Nǝb Dʊʊmɨ

⁵³ Nǝngɔ ja shu nǝn Yesu a kǝga dalɨ nǝkǝlagɨɨ, nǝngɔ dʊʊm nǝbkǝlamɔ jǝbɔ nǝb dʊʊm nǝbɨɨ jǝbɔ nǝb mɛlalɨ diilɔ ja mʊrka gwamɨ.

⁵⁴ Bitrus bwang Yesu gǝm lɛ a kʊta, a dɔ mʊgɔ talɨ lɔng dalɨ nǝkǝlagɨɨ, nǝngɔ a yɨ jǝbɔ nǝb tɔɔtǝm Kan Kwaamanɔ, gʌ kǝla lɛɨ.

⁵⁵ Dʊʊm nǝbkǝlamɔ jǝbɔ nǝb dʊʊm koteregɔ pʌd jǝ saa gola nɨ lɛ jǝ nya Yesu lɛ nǝn bwɨlangkɛlɨ, sǝ jǝ saa gola nɨ jǝ jʌ gǝn nɛɨ, ja nya bɔ gola.

⁵⁶ Nǝbɔ a lada na a nǝ nyiyo gabakɛl a dul gǝnɨ, kɛl jinɔ a bɛ bɔ win.

⁵⁷ Nǝngɔ kaam nǝbɔ a gun a tɨɨ, ja gabakɛl a dul Yesui gɔ,

⁵⁸ “Nǝn nyʊwa gǝn sʊwa lɛ gɔ gǝ kʌb kʌb Kan Kwaaman nɨ nǝbɔ a mɔɨ, sǝ gǝ mɔ kaa tag a mʊgɔ kumɔ taal, wʊnɨ ke bɔ mɔtǝm nǝfilii.”

⁵⁹ Nǝtǝm nyiyo jinɔ ja maaɨ, a bɛ bɔ win.

⁶⁰ Nǝngɔ dalɨ nǝkǝlagɔ a gun a tɨ tɨɨ a tɨbǝl jini, a bʌ Yesu gɔ, “Mɨ mɔ nǝn jʊ nɨ mʊ gar lɛɨ ka? N nǝtǝm nyiyo wɛ nyɔ nǝb nɨ bɛla lɛ nǝn a dul mʊnɨ?”

⁶¹ Nǝngɔ Yesu a yɨ shigi, a gar bɔ kɛl. Dalɨ nǝkǝlagɔ a bʌ gǝn tag gɔ, “Nǝmɔ mʊ Kiristi Bʊla Kwaama nǝ Bwilii ka?”

⁶² Yesu a jǝla gɔ, “Nǝmǝ. Jǝ́ kuwo kuwo Bʊla Nǝlɨ yǝm a kang jajǝng Kwaamaɨ, Nǝ kwaan, bɛ lɛ a mʊgɔ lul a dʌbʌl kwama.”

⁶³ Nǝngɔ dalɨ nǝkǝlagɔ a wʊlalam bɛllɛtɨn gǝnɨ, a sʊwa gɔ, “N nǝb nǝtǝm nyiyo wɛ bǝ saa lɛ tagɨ?

⁶⁴ Jǝ́ nyʊwa kanga a kal dun Kwaamaɨ. N wɛ jǝ́ kuwoi?” Pʌd jinɔ ja biyo gǝm borang jʌtǝm.

⁶⁵ Kaamɨ a tǝl tɛɛka gǝn nɛ nǝn tuum. Nǝngɔ ja bwam nu gǝnɨ, ja jǝga gǝnɨ, jǝ sʊwa gǝn nɛ gɔ, “Sʊwa nǝn nuwo a jǝga ńɨ!” Nǝbɔ tɔɔ Kan Kwaamanɔ lɛɨ a ta gǝn a tʊm gǝn.

Bitrus A Kana Nyǝmtǝm Yesui

⁶⁶ Kwama Bitrus yǝm a talɨ lɔngɔ gǝmɨ, nǝngɔ kaa bwɛnɔɔlɨ nɨ maa maajɨ lɛ a lɔ dalɨ nǝkǝla nɨ a bɛ a daa gǝ woi.

⁶⁷ A kuwo Bitrus gʌ kǝla lɛɨ, nǝngɔ a sǝb gǝnɨ, nǝngɔ a sʊwa gǝn gɔ, “Mʊ tǝmʊn mʊ na jǝbɔ Yesu bwɛ Nazarat nɨɨ!”

⁶⁸ A kana. Sʊwa lɛ gɔ, “Mǝ nyǝm bɔ jʊ mʊ sʊwa lɛɨ. Kɛl mʊnɔ nɨ mɨ nyɔ.” Gǝ jel lɛ nyɔ a gol lɔngɔ gǝmɨ, nǝngɔ kwalɨ jangagɔ a ma kamɨ.

⁶⁹ Nǝngɔ bwɛnɔɔlɨ nɨ maa maajɨ lɛ a lɔ dalɨ nǝkǝla nɨ a yǝla a kuwo gǝn tagɨ, nǝngɔ a yǝla a sʊwa nǝb nɨ tɨm woi gɔ, “Balɨ nɨ gǝ na a kʊm jin tǝgǝn.”

⁷⁰ Nǝngɔ Bitrus a yǝla a kana tagɨ gɔ, “Ke bɔ mǝ.” A ta bɔ bʊtɔ, nǝb nɨ tɨlam jǝbɔ Bitrusi ja sʊwa gǝn gɔ, “Bɨlǝngǝn mʊ tǝmʊn mʊ na a kʊm jin, jʊ a bwɨɨ mʊ bwɛ Galilii.”

⁷¹ Nǝngɔ Bitrus a tǝl lagtǝm dul gǝnɨ, wɛɛla wɛɛlɨgɔ lɛ, sʊwa lɛ gɔ, “Mǝ nyǝm bɔ nʊ nɨ jǝ́ sʊwa kɛl lɛ a dul gǝnɨ!”

⁷² A kʊta bɔ nǝngɔ kwalɨ jangagɔ a ma kamɨ na yogɨɨ. Bitrus a bʊʊla kɛl nɨ Yesu a sʊwa gǝnɨ gɔ, “Mʊ kana kana nyǝmtǝm mǝndɨ naagɔ taal sǝla kwalɨ jangagɔ a ma kamɨ na yogɔ.” Kwama a bʊʊlam kɛl nɨɨ, nǝngɔ a dem nyiyo nǝn wii.