Markus 13 - Dadiya NT

Yesu A Sʊwa Kʌbotǝm Nɨ Nya Kan Kwaamanɔ Lɛɨ

¹ Yesu jel lɛ a mʊgɔ Kan Kwaaman, nǝngɔ kaa win a mʊgɔ bɛtɔ mɛlalɨ gǝnɔ gǝm a sʊwa gǝn gɔ, “Feyi, dʌng daltɔ tatǝn nɨ jǝbɔ lɔtɨn nɨ a bʊma nyɔ nǝbɔ a mɔbaɨ!”

² Nǝngɔ Yesu a sʊwa gǝn gɔ, “Ń kuwo daltɔ lɔtɨn nɨ ja mɔbaɨ? Mɨsɔ jǝ bǝla kaa tɛl lɛ win a dʌbʌl kaa tɛl. Jǝ kʌbʌm kʌbʌm gwam!”

Tǝltǝm Nɔɔtǝm Gaalantɨnɔ

³ Yesu a bǝla Kan Kwaamanɔ ba yǝm a dʌbʌl tuli Yem Zaitun wʊnɨ dʌng kǝga Kan Kwaamanɔ lɛɨ. Nǝngɔ Bitrus jǝbɔ Yakubu jǝbɔ Yohana jǝbɔ Andarawas ba ja bʌ gǝn daddad gɔ,

⁴ “Sʊwa nǝn, kanjǝl nɨ bwɨ fɨyang? N wɛ yǝlam jǝ nʊngtǝm lɛ gɔ kanjǝl nɨ bwɨ bwɨ mɨsɔ kʊta lɛɨ?”

⁵ Nǝngɔ Yesu a tǝl sʊwa ji lɛ gɔ, “Bɛ jǝ́ nyǝm, kage kaa nǝl a swag jen.

⁶ Nǝbɔ a lada na bɛ lɛ a mʊgɔ dun mɨɨ, sʊwa lɛ gɔ, ‘Mǝ nǝn gɔ.’ Jǝ swag swag nǝbɔ a lada.

⁷ Na jǝ́ nyʊwa kɛl tatǝm kun jǝbɔ fulon kuni, ka jǝ́ nyʊwa lɛ taal. Kanjǝl nɨ bwɨ bwɨ nyɔ, dɨltǝmɔ lǝga bɔ a la dɨn.

⁸ Bǝlǝntǝmɔ tabka tabka kun. Fɔlɔntɨnɔ gabka gabka kɨlan. Jǝ maa maa jʊwan bwɨla jǝbɔ mǝgatǝm tǝm a daatɨnɔ gǝm a lada. Wʊnɨ nǝn gɔ tǝltǝm gaalanɔ dɨnɨ.

⁹ “Bɛ jǝ́ ta dul jenɔ. Jǝ yɔ yɔ nǝn jen a kǝga nǝb dʊʊm koteregɨɨ. Jǝ bʊg jen bʊg a kantɨn mɛlalɨ. Jǝ yɔ yɔ nǝn jen a kǝga bǝ gwamnaɨ jǝbɔ fɔlɔlɔmɔ a kɛl dul mɨ, sǝ jǝ́ nǝ nyiyo a dul mɨ a kǝga jin.

¹⁰ Dɨltǝm tǝmɔ mɨsɔ bwɨ lɛ, na ja kiyo bɔ bǝlǝntǝmɔ gǝm gwam fulon kɛl lǝmɨgɨɨ.

¹¹ Na ja ta jen ja yɔ nǝn jen a kan borangɨ, ka jǝ́ kom lɛ dul jenɔ jengɔ n wɛ jǝ́ gar jim lɛɨ, gwam jʊ nɨ Kwaama a nʊng jeni n jʊ jǝ́ sʊwa lɛ a kwama gɨɨ. N ke bɔ jen jǝ́ gar kɛlɔ lɛɨ, n Yʊwa Kwaamaɨ gar lɛɨ.

¹² “Kɛ lungto lungto kɨla gɔ ja jʌ, tɛ lungto lungto bʊla gɔ, bɛtɨ gun gun tʌgo a tɛtǝlam jinɔ gǝm, ja jʌ ji.

¹³ Nǝbɔ kɔ jen kɔ a kɛl dul mɨ. Nʊ nɨ a kʊ nǝl a yɔ nǝn a dɨltǝmɨ, bʊʊ bʊʊ.

Gʌtǝm Bwɨla

¹⁴ “Kwama jǝ́ kuwo ‘ja maa jǝ bwɨla wʊnɨ a bʊm bɔ kuwotǝmɨ’ tɨm a daa nɨ a bʊm bɔ ja kuwo gǝn woi, wʊnɨ bɛ lɛ nǝn kaltǝmɨ, (nǝ kiyotǝmɔ bɛ ga nyǝm), bɛ nǝb nɨ a mʊgɔ Yahudiyaɨ ja mwal ja yɔ a mʊgɔ yemtɨn.

¹⁵ Nʊ nɨ a dul kanɨ ka ga gǝla lɛ gɔ gǝ do kaa jǝl a mʊgɔ lɔ.

¹⁶ Nʊ nɨ a mʊgɔ tɔtwamɨ ka ga yǝla lɛ gɔ gǝ do dwang kwabtǝm gǝn.

¹⁷ N mwɛ jen jǝ́ nɔɔtǝm nɨ nǝn fʌli jǝbɔ nɔɔtǝm nabwɛmɔ nǝn kwama gɔ.

¹⁸ Bɛ jǝ́ maa keli ka jʊ nɨ ya bwɨ lɛ nǝn shena.

¹⁹ Nǝn kwama gɔ, jǝ maa maa gaalan bwɨla wʊnɨ nǝbɔ a kuwo bɔ woi nǝn jʊ a ta nǝn kwama Kwaama a fwalǝm yooligɔ ba la nǝn kǝngkɨɨ. Kanjǝl bwɨla nɨ a jelka a wʊnɨ mɨsɔ bwɨ lɛ wo tag.

²⁰ Na na Tɛlalɔ a biyom bɔ kumtɨnɨ, na mɨ nǝfili nɨ wo bʊʊ lɛɨ. N bʊnatǝm nǝb nɨ ga jǝgǝmɨ nǝngɔ a biyom kumtɨnɨ.

²¹ “Nǝn kwama gɔ, na nǝl a sʊwa jen gɔ, ‘Jǝ́ dʌng, Kiristi n wɔ, jǝ́ dʌng, n wuleni,’ bɛ ka jǝ́ jǝla lɛ.

²² Kiristitɨn gabakɛlɔ, jǝbɔ nǝbkuwotǝmkǝga gabakɛlɔ jela jela, jǝ maa maa kanjǝl laatǝm kang jǝbɔ jǝ nʊngtǝm, sǝ ja swag nǝb nɨ ja jǝgamɨ, na jǝ nya nya golaɨ.

²³ A dul kɛl nɨɨ, bɛ jǝ́ nyǝm! N kwɛl n sʊwa jen sǝla kanjǝl nɨ a bwɨ.

Bɛtǝm Bʊla Nǝlɨ

²⁴ “A kwama gaalan nɨ bɛm lɛ ba shui, “ ‘Nu kwamagɔ mɨsɔ fulo lɛ. Bwaalagɔ tǝgǝn mɨsɔ fulo lɛ.

²⁵ Nyanyamɨtɨnɔ jǝ gǝlala a dʌbʌl kwama sǝ ja tǝla. Jǝ mǝg mǝg kanjǝl dʊʊntɨn nɨ a dʌbʌl kwamaɨ.’

²⁶ “A kwama gɔ nǝfitʌmɔ kuwo kuwo Bʊla Nǝlɨ bɛ lɛ a mʊgɔ lul nǝn kwaan fɔlɔn gǝnɔ jǝbɔ dʊʊlǝn gǝnɔ.

²⁷ Twam twam bɛtɔ twama Kwaamaɨ sǝ a mʊr nǝb nɨ ga jǝgam ji a twalɨ, jǝbɔ a diyengɔ, jǝbɔ a gǝlalangɔ, jǝbɔ a gwilʌngɔ. Jʊ a ta a daa tǝmɔ a dɨlǝmɨ a yɔ nǝn a daa dʌbʌl kwamagɔ ya dɨlǝmɨ.

Mɛlatǝm Nǝn Tɨya Dʌfeng

²⁸ “Bɛ jǝ́ mɛla kaa jǝl nǝn tɨya dʌfengɔ. Na kangtɨn gǝnɔ a tǝl to langǝn fɨgɔ lɛɨ, jǝ́ nyǝm shenagɔ a dwama.

²⁹ Gǝ na nyɔ tag, na jǝ́ kuwo kanjǝl nɨ bwɨ lɛɨ, bɛ jǝ́ nyǝm a dwama, tɨm a nyanga kan.

³⁰ N bɨlǝngkɛl mǝ sʊwa jen nɛɨ, nǝbɔ kal nɨɨ mɨsɔ jǝ bʊla lɛ, na kanjǝl nɨ gwam a bwɨ bɨɨ.

³¹ Dʌbʌlɔ jǝbɔ tǝmɔ dɨ dɨ. Kɛl mǝndɨ mɨsɔ dɨ lɛ wo.

Mɨ Nǝn Nʊ Nɨ A Nyǝm Kum Bɛtǝm Gǝnɨ

³² “Mɨ nǝn nʊ nɨ a nyǝm kumɔ jǝbɔ kemʌnɔ jʊ nɨ bwɨm lɛɨ. Bɛtɔ twama Kwaamaɨ a dʌbʌli, jǝbɔ Bʊlagɔ ja nyǝm bɔ. Nǝn Tɨyagɔ kwaagɔ win a nyǝmɨ.

³³ Bɛ jǝ́ nyǝm! Bɛ jǝ́ yɨ nǝn fɛkalɨ! Jʊ a bwɨɨ mɨ nǝn nʊ nɨ a nyǝm kwamagɔ jǝbɔ kemʌnɔ jʊ nɨ bwɨm lɛɨ.

³⁴ Gǝ na na nʊ nɨ a jel shu lɛ a yɔmɨ. Shu lɛɨ, a bǝla dʌngtǝm lɔ gǝnɔ a kang bɛtɔ jwaalɛn gǝnɨ, gwam jinɔ ji nǝn jǝ maatǝm. A sʊwa nǝ dʌngtǝm nyanga lɔngɔ gɔ a yɨ nǝn fɛkalɨ.

³⁵ “Gǝ na nyɔ jǝ́ yɨɨ nǝn fɛkalɨ. Jǝ́ nyǝm bɔ kwama nɨ tɛlalɔngɔ bɛm lɛɨ. Kɛna bɛ nǝn kwama kwalɨ jangagɔ a ma kamɨɨ, kɛna bɛ nǝn kwaamɨɨ, kɛna bɛ nǝn sangdɨlangɨ, kɛna bɛ nǝn kumsʌli.

³⁶ Jǝ́ yɨ nǝn fɛkalɨ kage ba nya jen mɨ jen nǝn fɛkalɨ, jǝ́ daa dum lɛ.

³⁷ Jʊ nɨ mǝ sʊwa lɛɨ, mǝ sʊwa jen gwam, ‘Bɛ jǝ́ yɨɨ nǝn fɛkalɨ!’ ”