Markus 12 - Dadiya NT

Mʊsǝn Kɛl A Dul Nǝb Nɨ A Yo Twam Fogfogi Ywatǝmɨ

¹ Yesu a ja kǝga sʊwa ji mʊsǝn kɛlɔ lɛ gɔ, “Kaa nǝl wo a kwal tɔtwam fogfogi, a kang nǝn kwalɨ, a wʊ bʊwa yamtǝm tʊʊl fogfogigɔ. A fɛ sǝlɨgɔ a deba nyɔ na dʌngtǝm tɔtwam. Nǝngɔ a nǝ kaam nǝb gɔ ya ja jʊng lɛɨ, nǝngɔ a shu a kaa tǝmɨ.

² Kwama kwasatǝmɔ a laɨ, nǝngɔ a twam bwɛ jwaalɛ gǝnɔ gɔ ya yo gǝm tʊʊl fogfogi tɔtwamɔ.

³ Nǝngɔ nǝb nɨ a yo twam ywatǝmɨ, ja ta gǝn, ja bʊg gǝnɨ, ja ywa gǝn kangɔ kwakwaɨ.

⁴ Nǝngɔ a yǝla twam kaa bwɛ jwaalɛ gǝnɨ, nǝngɔ ja bʊg gǝn a dul, ja nǝ gǝn gaalanɨ.

⁵ A yǝla a twam kaaɨ, nǝngɔ nǝb nɨ a yo twam ywatǝmɨ a jʌ gǝnɨ. A twam kaamɨ a lada nyɔ, nǝngɔ ja bʊg kaamɨ, ja jʌbo kaamɨ.

⁶ “A bǝla kaa nǝl wo win swar, bʊla gɔ, wʊnɨ gǝ swɨ lɛɨ. N nʊ a twam nǝn gul a daa ji woi gɔ, ‘Jǝ nǝ nǝ bʊla mɨ dʊʊn.’

⁷ “Nǝb nɨ a yo twam ywatǝmɨ a sʊwaka a bʊtɔ jin gɔ, ‘Nǝ wɔɔtǝm kʊla twamɔ n wɔ, bǝ jʌm gǝn sǝ kʊlagɔ a yǝlam a bǝn.’

⁸ Nǝngɔ ja ta gǝn, ja jʌ gǝnɨ, ja ma bʌlʌn gǝnɔ a gul kwalɨ tɔtwamɨ.”

⁹ Yesu a bʌ ji gɔ, “N wɛ nǝ tɔtwam nɨ ba maa lɛ nǝn nǝb nɨɨ? Bɛ ba jʌbo jʌbo nǝb nɨ a yo twam ywatǝmɨ sǝ a nǝ kaamɨ.

¹⁰ Jǝ́ kiyo bɔ wo a mʊlalɨ kɛl Kwaamaɨ ka? Wʊnɨ sʊwa lɛ gɔ, “ ‘Tɛl nɨ nǝb mɔtǝm kanɔ a kɔɨ, nǝn gɔ a yǝlam tɛl fʌlʌm kanɨ.

¹¹ Jʊ nɨ n maatǝm Tɛlalɔɨ, n jǝ laatǝm kang a daa bǝn woi.’ ”

¹² Dʊʊm Yahudawagɔ a nyǝm gǝ sʊwa mʊsǝn kɛl nɨ a dul jii, nǝngɔ ja saa gola nɨ lɛ jǝ tam gǝn nɛɨ. Jǝ nyʊwa taal nǝbɨɨ lɛ, nǝngɔ ja bǝla gǝn a shui.

Bʌtʌm Kɛl A Dul Ywatǝm Kemʌn Tǝm

¹³ Ja yɨmtǝnɨ, nǝngɔ ja twam kaam nǝbɔ Farisaɨ jǝbɔ nǝbam Hiridusi, sǝ ja shi gǝm kwalɨ a kɛl nɨ ga sʊwaɨ.

¹⁴ Ja bɛɨ, nǝngɔ ja sʊwa gǝn gɔ, “Feyi, nǝn nyǝm mʊ nǝ bɨlǝngkɛl, nǝbɔ gwam win a daa mʊ woi. Mʊ do bɔ kaa nǝl a la kaa wo, mʊ mɛla gola Kwaamaɨ lɛ a mʊgɔ bɨlǝngkɛl. Mʊ kuwo lɛ n dǝngdǝng bǝ ywa Kaisar kemʌn tǝm ka? N ke bɔ dǝngdǝng ka?

¹⁵ Bǝ ywa ka? Ka bǝ ywa lɛ ka?” Yesu a nyǝm fento jinɔ, nǝngɔ a sʊwa ji gɔ, “N wɛ a bwɨ jǝ́ shi mɨ kwalɨ lɛɨ? Jǝ́ bɛ mɨ nǝn kemʌnɔ jǝ́ ywam kemʌn tǝm lɛɨ n kuwo.”

¹⁶ Nǝngɔ ja bɛ gǝm nǝnɨ, nǝngɔ a bʌ ji gɔ, “Duuli nɨ jǝbɔ dun nɨ na a woi?” Nǝngɔ ja sʊwa gǝn gɔ, “Na a Kaisarɨ.”

¹⁷ Nǝngɔ Yesu a sʊwa ji gɔ, “Jǝ́ nǝ Kaisar jʊ nɨ na a Kaisarɨ, jǝ́ nǝ Kwaama jʊ nɨ na a Kwaamaɨ.” Nǝngɔ ja ta kang a nyiyo a kɛl nɨ a garɨ.

Bʌtʌm Kɛl A Dul Guntǝm A Bwaa

¹⁸ Kaam nǝbɔ Sadukiyaɨ a bɛ a daa Yesu woi, nǝji jǝ sʊwa lɛ gɔ, mɨ guntǝm wo a bwaaɨ. Nǝngɔ ja bʌ gǝn gɔ,

¹⁹ “Feyi, Musa a mʊla bǝm gɔ, na nǝl a bʊla, a bǝla nɔɔlɨ mɨ nǝn bwɛɨ, bɛ kɨla gɔ a naa nɔɔlɨ gɔ sǝ a bʌ kɨla gɔ gǝm bwɛ.

²⁰ Kaam kɛb batǝn wo jǝ nʌbʌl. Bwɛ tɨkǝgagɔ a naa nɔɔlɨ, nǝngɔ a bʊlaɨ, a bʌ bɔ bwɛ.

²¹ Na yogɔ a naa tǝgǝn a bʊla mɨ bwɛ wo, na taalɔ a na nyɔ tǝgǝn.

²² Gwam jinɔ nɨ nʌbʌl ja naa gǝnɨ ja bʊlala. Mɨ nʊ nɨ wo a bʌ bwɛ jǝbɔ gɨɨ. A gulɔ gǝmɨ nɔɔlɨgɔ a bʊla.

²³ A kɔkɔ guntǝmɔ a bwaaɨ, yǝlam nwala woi a kʊm jin? N wɔ gwam jinɔ nʌbʌli ja naa gǝn wo.”

²⁴ Yesu a sʊwa ji gɔ, “Bʊʊlalɨ jenɔ mɨ dǝngdǝng, jʊ a bwɨɨ jǝ́ nyǝm bɔ mʊlalɨ kɛl Kwaamaɨ wo, jǝ́ nyǝm bɔ kwaan Kwaamaɨ wo tag.

²⁵ Kwama guntǝmɔ a bwaaɨ, mɨ naakan wo, mɨsɔ jǝ nǝ naakan nɛ, nǝbɔ yǝlam na bɛtɔ twama Kwaamaɨ a dʌbʌl.

²⁶ A dul kɛl guntǝm a bwaaɨ, jǝ́ kiyo bɔ wo a langǝn bwangǝn Musaɨ jʊ Kwaama a sʊwa gǝn a fulon kɛl kʊm tɨya yʌbigɔ ta kǝla lɛɨ gɔ, ‘Nǝmǝ mǝ Kwaama Ibrahimi, jǝbɔ Kwaama Ishakui jǝbɔ Kwaama Yakubui’ ka?

²⁷ Gǝ ke bɔ Kwaama nǝb nɨ a bʊla bʊlaɨ, gǝ Kwaama nǝb nɨ nǝn kʊlɨɨ. Jǝ́ maa bɔ dǝngdǝng dangǝn!”

Diil Nɨ A Laa Tangǝnɔ Dʊʊnɨ

²⁸ Kaa nǝ mɛlalɨ diilɔ ba nyʊwa jǝ bǝngka kɛl lɛ a bʊtɔ ji. A kuwo Yesu a gar jim kɛl nyanɨ, nǝngɔ a bʌ gǝn gɔ, “N diil won a laa ji gwamɨ?”

²⁹ Yesu a jǝla gǝn gɔ, “Nʊ a laa ji gwamɨ nǝn gɔ, ‘Nǝbɔ Israilaɨ jǝ́ nyʊwa, Tɛlalɔ Kwaama bǝn, n Tɛlalɔ win.

³⁰ Bɛ ń swɨ Tɛlalɔ Kwaama mʊnɔ nǝn nǝl mʊnɔ gwam, nǝn dʊʊmɨ mʊnɔ gwam, nǝn bʊʊlalɨ mʊnɔ gwam, nǝn kwaan mʊnɔ gwam.’

³¹ A yogɔ nǝn gɔ, ‘Swɨ fwalɨ yɨm mʊnɔ kanga mʊ swɨm dul mʊnɔ lɛɨ.’ Mɨ diil nɨ wo a laa nǝb nɨ dʊʊnɨ.”

³² Nǝngɔ nǝ mɛlalɨ diilɔ a sʊwa Yesu gɔ, “Dǝngdǝng mʊ sʊwaɨ feyi, Tɛlalɔ Kwaama win, mɨ kaa wo na ke bɔ gɨɨ.

³³ Bɛ ń swɨ gǝn nǝn nǝl mʊnɔ gwam, jǝbɔ bʊʊlalɨ mʊnɔ gwam, jǝbɔ kwaan mʊnɔ gwam, swɨ fwalɨ yɨm mʊnɔ kanga mʊ swɨm dul mʊnɔ lɛɨ, a laa tǝlatǝm twama jǝbɔ twɨtǝm yulʌn.”

³⁴ Yesu a kuwo kanga a jǝla kɛlɔ nǝn yʊlanɨ, nǝngɔ a sʊwa gǝn gɔ, “Mʊ kʊta bɔ a fɔlɔn lɔ Kwaamaɨ gǝm.” A gulɔ gǝmɨ mɨ nʊ nɨ a nya kwaan bʊtɔ a bʌ gǝn kaa kɛlɨ.

Bʌtʌm Kɛl A Dul Kiristii

³⁵ Nǝn kwama Yesu maam mɛlalɨ lɛ a Kan Kwaamanɨ, nǝngɔ a bʌ ji gɔ, “N wɛ a dǝg nǝb mɛlalɨ diilɔ a sʊwa gɔ, Kiristi nǝn bʊla Daudaɨ?

³⁶ Dauda nǝn kang gǝn, nǝn kwaan Yʊwa Kwaamaɨ a sʊwa gɔ, “ ‘Tɛlalɔ a sʊwa Tɛlalɔ mɨ gɔ, “Yɨ fɔ a kang jajǝng mɨ, ba la nǝn kwama nɨ mǝ ya ń nɛ a dul fatǝm kiim mʊnɨ.” ’

³⁷ Dauda nǝn kang gǝn a jo gǝn gɔ ‘Tɛlalɔ.’ A maa nyǝn la a yǝlam bʊla gɨɨ?” Nǝbɔ a nyʊwa kɛl nɨ nyɔ a nyiyo Yesui, ja nyʊwa lǝma.

Yesu A Jǝg Duul Nǝb Mɛlalɨ Diilɔ

³⁸ A mʊgɔ mɛlalɨ gǝnɔ gǝm, a sʊwa ji gɔ, “Bɛ jǝ́ nyǝm nǝb mɛlalɨ diilɔ, jǝ swɨ maltǝm bɛllɛ dʊʊntɨn sǝ ya ja bola lɛ nǝn, jǝ swɨ lɛ ya ja yal ji lɛ a gamdʌbo.

³⁹ Jǝ swɨ lɛ ya ja yɨ lɛ a daa yɨm nyan a kantɨn mɛlalɨ, jǝbɔ daa yɨm nyan a lɔ kangwaal.

⁴⁰ N nǝbɔ ja kʊla nɔɔtǝmkʊlabɨ lɛɨ. Jǝ maa keligɔ a som nyɔ sǝ nǝbɔ a sʊwa gɔ jǝ nǝb sagsag. N nǝbɔ jǝ mwɛ ji lɛ a bʊwa, a shiloi.”

Nǝtǝm Kemʌn Nɔɔkʊlagɨɨ

⁴¹ Yesu yǝm a mʊgɔ Kan Kwaaman a daa nɨ jǝ talǝm kemʌn nɛɨ, dʌng nǝbɔ lɛ kanga jǝ talǝm kemʌnɔ lɛ a kʌshi yotǝm kemʌni. Kaam nǝb shilogɔ a lada tal kemʌnɔ lɛ a lada.

⁴² Nǝngɔ a kuwo kaa nɔɔkʊla nǝ bʊnǝn ba tal kemʌn sǝlǝnɔ yoi.

⁴³ Nǝngɔ Yesu a jo bɛtɔ mɛlalɨ gǝnɔ a sʊwa ji gɔ, “Bɨlǝngkɛl mǝ sʊwa jen nɛɨ, jʊ nɨ nɔɔkʊla nǝ bʊnǝn nɨ a mal a kʌshi yotǝm kemʌni, a laa a tangǝn nǝbɨɨ gwam.

⁴⁴ Gwam jinɔ ja nǝ a mʊgɔ jʊ nɨ jǝ nǝn a ladaɨ. Nɔɔlɨ nɨ a nǝ a mʊgɔ bʊnǝn gǝn, a nǝ jʊ nɨ gǝ nǝngǝn gwamɨ, jǝbɔ kanjǝl nɨ a yam nǝl gwamɨ.”