Markus 11 - Dadiya NT

Yesu A Dɔ Urushalima

¹ Ba jǝ dwama Urushalimagɔ lɛɨ, ja bɛ a tuulɔ Betafaji jǝbɔ Betanyaɨ, a dʌbʌl Yem Zaituni, nǝngɔ Yesu a twam bɛtɔ mɛlalɨ gǝnɔ yoi.

² A sʊwa ji gɔ, “Jǝ́ yɔ a bɛ tuulɔ nɨ a kǝga jeni. Na jǝ́ dɔ lɛɨ, jǝ́ kuwo kuwo bɛ lungsongɔ ja kwa kwaɨ, wʊnɨ mɨ nʊ nɨ a gwi gǝn woi. Jǝ́ kwɨ, jǝ́ bɛ nǝn.

³ Na nǝl a bʌ jen gɔ, ‘Wɛ jǝ́ maa lɛ nyɨɨ?’ Jǝ́ sʊwa gǝn jengɔ, ‘Nǝn Tɛlalɔ swɨ lɛɨ, nǝn yǝla nǝn bɛ bɛ nǝn kǝngkɔ!’ ”

⁴ Nǝngɔ ja shui, ya ja nya bɛ lungsongɔ kwalam a nyanga lɔng a kʌng golaɨ. Ja kwɨɨ,

⁵ nǝb nɨ tɨm woi ja bʌ ji gɔ, “A maa nyǝn? Wɛ a bwɨ jǝ́ kwɨ lungsong nɨ lɛɨ?”

⁶ Nǝngɔ ja gar jim dǝngdǝng kanga Yesu a sʊwa jii, nǝngɔ nǝb nɨ a bǝla ji ja shu nǝn lungsongi.

⁷ Kwama ja bɛ Yesu gǝm nǝn lungsongi, ja matǝn bɛllɛtɨn jinɔ tʌgo a yɛɛ gǝnɔ gǝmɨ, nǝngɔ Yesu a gwii.

⁸ Nǝbɔ a lada a ma dwangtɨn jinɔ a golaɨ, kaamɨ a tal langǝn wʊnɨ ja kaba a mʊgɔ kuuli.

⁹ Nǝb nɨ a kǝgaɨ jǝbɔ nǝb nɨ a guli jǝ tal bwaalɨgɔ lɛ jǝ sʊwa lɛ gɔ, “Bǝlátǝmɔ na a Kwaamaɨ! Bwiligɔ na a nʊ nɨ bɛ lɛ a mʊgɔ dun Tɛlalɔɨ!

¹⁰ Bwiligɔ na a fɔlɔn lɔ tɛtɛ bǝn Daudaɨ nɨ bɛ lɛɨ. Bǝlátǝmɔ na a Kwaamaɨ nɨ a dʌbʌli.”

¹¹ Yesu a dɔ Urushalimaɨ, nǝngɔ a dɔ Kan Kwaamanɔ a dʌng kanjǝlɔ gwamɨ. Nu kwamagɔ a kwɛl a lɛ, nǝngɔ a jel a shu a Betanya jǝbɔ bɛtɔ mɛlalɨ gǝnɨ.

Yesu A Lag Tɨya Dʌfengɔ

¹² Nǝn tǝmsɛlɨ jǝ bǝla Betanyagɔ lɛ nyɨɨ, jʊwanɔ a ta Yesu.

¹³ A kuwo kaa tɨya dʌfeng a kǝgaɨ, nǝngɔ a yɔ gɔ kɛna gǝ nya lɛ nǝn tʊʊlɨ. Ya laɨ, a nya bɔ tʊʊl wo, n ka langǝn. N ke bɔ kwama tʊʊl dʌfeng.

¹⁴ Nǝngɔ a sʊwa dʌfengɔ gɔ, “Ka kaa nǝl ya ja lɛ tʊʊl mʊnɔ wo tag!” Bɛtɔ mɛlalɨ gǝnɔ a nyʊwa jʊ nɨ a sʊwaɨ.

Yesu A Fɛka Kan Kwaamanɔ

¹⁵ Kwama ja yǝla ja bɛ a Urushalimaɨ, Yesu a dɔ Kan Kwaamanɔ a tǝl kaa nǝb miyotǝmɔ lɛ jǝbɔ nǝb tentǝmɔ woi. A tʊngam tebur nǝb nɨ fʌto kemʌn nɛɨ jǝbɔ kotere nǝb nɨ miyo baatitɨn nɛɨ.

¹⁶ A kaa nǝbɔ gɔ ka ja shu lɛ nǝn kanjǝl miyotǝm a mʊgɔ talɨ Kan Kwaaman.

¹⁷ A mɛla nǝbɔ gǝm gɔ, “A mʊla mʊlaɨ gɔ, “ ‘Lɔ mǝndɨ jǝ jo gɔ kan keli bǝlǝntǝmɨ gwam.’ A jenɔ jǝ́ do jǝ́ maam gaatɛ nǝbkuumi.”

¹⁸ Dʊʊm nǝbkǝlamɔ jǝbɔ nǝb mɛlalɨ diilɔ ja nyʊwa kɛl nɨɨ, nǝngɔ ja tǝl saatǝm gola nɨ jǝ jʌm gǝn nɛɨ, jǝ nyʊwa taal gǝnɔ lɛ, jʊ a bwɨɨ nǝb nɨ gwam a mʊrkaɨ ja ta kang a nyiyo nǝn mɛlatǝm gǝnɔ.

¹⁹ Nǝn kwaamɨ, nǝngɔ Yesu a jel jǝbɔ bɛtɔ mɛlalɨ gǝnɔ a mʊgɔ tuulɔngɔ gǝmɨ.

Tɨya Dʌfeng Nɨ Yesu A Lagɨ A Swam

²⁰ Nǝn kumsʌl, jǝ shu lɛ nǝngɔ ja kuwo tɨya dʌfengɔ a swam a jʌng gǝnɨ.

²¹ Bitrus a bʊʊla nǝngɔ a sʊwa Yesu gɔ, “Feyi, dʌng! Tɨya dʌfeng nɨ mʊ lagɨ, a swamǝm.”

²² Yesu a jǝla ji gɔ, “Jǝ́ nǝ bɨlǝngkɛl nǝn Kwaama.

²³ N bɨlǝngkɛl mǝ sʊwa jen nɛɨ, na nǝl a nǝ bɨlǝngkɛl a daa Kwaama woi, jǝ́ sʊwa sʊwa yem nɨ jengɔ, ‘Gun ya ń tɨ a mʊgɔ wɨma,’ na ga kɨɨ bɔ nǝl a jʊ nɨ ga sʊwaɨ, na ga nǝ bɨlǝngkɛl gɔ maa maaɨ, jǝ maa gǝm maa.

²⁴ Gǝ na nyɔ mǝ sʊwa jen nɛ, jʊ nɨ gwam jǝ́ kela Kwaama a mʊgɔ keli, bɛ jǝ́ nǝ bɨlǝngkɛl jengɔ jǝ́ kwɛl jǝ́ nya nyaɨ, bwɨ bwɨ nyɔ.

²⁵ Kwama nɨ jǝ́ kelam keli lɛɨ, na jǝ́ ta kaa nǝl a nǝlɨ, jǝ́ kǝlǝm gǝm dɨsɔ Tɨya jen nɨ a dʌbʌli a kǝlǝm jem bwɨlangkɛltɨn jenɔ tʌjen. [

²⁶ Na jǝ́ kǝlǝm bɨɨ, Tɨya jen nɨ a dʌbʌl kwamaɨ, mɨsɔ kǝlǝm jem bwɨlangkɛltɨn jenɔ lɛ.”]

Jǝ Nyǝma Fɔlɔn Maajɨ Yesui Lɛ

²⁷ Ja yǝla ja bɛ a Urushalima tagɨ, Yesu kɛla lɛ a mʊgɔ Kan Kwaaman, nǝngɔ dʊʊm nǝbkǝlamɔ jǝbɔ nǝb mɛlalɨ diilɔ jǝbɔ nǝb dʊʊmɔ ja bɛ a daa gǝ woi.

²⁸ Ja bʌ gǝn gɔ, “N fɔlɔn woi mʊ maa jǝ laatǝm kang nɨ lɛ nǝnɨ? Nuwo a nǝ ń fɔlɔn nɨɨ?”

²⁹ Yesu a sʊwa ji gɔ, “Mǝ bʌ jen kɛl lɛ, jǝ́ jǝla ɨ, mǝ tǝmɨ mǝ sʊwa jen sʊwa fɔlɔn nʊ nɨ mǝ maam maajɨtɨn nɨ lɛɨ.

³⁰ Jǝ́ sʊwa ɨ, fɔlɔn yʊtǝm mwɛ sagsag Yohanaɨ a jel a daagɔ Kwaama woi ka? N daagɔ nǝfili woi ka?”

³¹ Nǝngɔ jǝ sʊwaka lɛ a bʊtɔ ji daddad gɔ, “Na bǝ sʊwa bǝngɔ a jel a daa Kwaama woi, sʊwa sʊwa gɔ, ‘N wɛ a bwɨ jǝ́ nǝ bɔ bɨlǝngkɛl nǝn gɨɨ?’

³² Bǝ sʊwa bǝngɔ a jel a daagɔ nǝfili woi ka?” (Jǝ nyʊwa taal jʊ nɨ lɛ nǝbɔ maa jim lɛɨ, jʊ a bwɨɨ nǝbɔ a kwɛl a do gǝn gɔ, Yohana n nǝkuwotǝmkǝga.)

³³ Nǝngɔ ja jǝla Yesu gɔ, “Nǝn nyǝm bɔ.” Nǝngɔ Yesu a sʊwa ji gɔ, “Mǝ tǝmɨ mɨsɔ mǝ sʊwa jen fɔlɔn nʊ nɨ lɛ mǝ maam kanjǝl nɨ lɛ nǝnɨ.”