Luka 24 - Dadiya NT

Yesu A Gun A Bwaa

¹ Nǝn dibɨlɨ nǝn kumsʌl, nɔɔtǝmɔ a wɔɔ nwang nɨ nǝn kunʌn lǝmɨ ja fɛkaɨ, ja shu nǝn a tuugɔ ja fʌlʌm gǝnɨ.

² Ya ja nya ja bʌlʌm gʌleng tɛl nɨ ja swa a nyanga tuugɔ gǝmɨ.

³ Kwama ja dɔm mʊgɔ tuugɨɨ, ja nya bɔ bʊtɔ Tɛlalɔ Yesui wo.

⁴ Jǝ bʊʊla lɛ a nǝl jin gɔ n wɛ a bwɨ nǝn bʌlʌn gǝnɨ, nǝngɔ ja kuwo nǝbɔ yo tɨm a kɔtʌgo a ji gǝmɨ, dwang jinɔ ja dʊɨ beta lɛ nyɔ.

⁵ A mʊgɔ taal, nǝngɔ nɔɔtǝm nɨ a gǝla a lii nǝn dul jinɔ a tǝmɨ. Nǝngɔ nǝb nɨ a sʊwa ji gɔ, “N wɛ a bwɨ jǝ́ saa nʊ nɨ lɛ nǝn dʊʊmɨɨ a mʊgɔ nǝbɔ a bʊlaɨ?

⁶ Mɨ fɔ, a gun! Jǝ́ bʊʊla kanga a sʊwam jeni, kwama jǝbɔ gɔ a Galilii,

⁷ ‘Jǝ nǝ nǝ Bʊla Nǝlɨ a kang nǝb bwɨlangkɛlɨ, sǝ ja kʊʊ gǝn. A kum na taal, gun gun a bwaagɔ gǝm.’ ”

⁸ Nǝngɔ ja bʊʊla nǝn kɛl gǝnɨ.

⁹ Kwama nɔɔtǝm nɨ a yǝlam a daa tuugɔ gǝmɨ, nǝngɔ ja sʊwa bɛtɔ twama gǝnɔ kʊb jeli wini jǝbɔ tangǝn kaam nǝbɔ.

¹⁰ Nɔɔtǝm nɨ a sʊwa nǝbɔ kɛl nɨ jǝbɔ bɛtɔ twama gǝnɨ, nabɔ Maryamu bwɛn Magadaliyaɨ, jǝbɔ Yuwana, jǝbɔ Maryamu nyɨya Yakubui, jǝbɔ kaam nɔɔtǝm nɨ jǝ dakinii.

¹¹ Nǝb nɨ a jǝla bɔ nǝn jʊ nɨ nɔɔtǝm nɨ a sʊwa jii. Jǝ kuwo lɛ maa na kɛl golan.

¹² Nǝngɔ Bitrus a gun a mwal a shu a tuugɔ gǝmɨ. A gǝla a jʊngɨ, nǝngɔ a kuwo dwang lilin nɨ ja sɔ Yesu gǝm bʊtɔ gǝnɔ nǝnɨ daalam kwakwa. Nǝngɔ a yǝla a bɛɨ, bʊʊla lɛ a nǝl gǝn nǝn jʊ a bwɨɨ.

Bɛtɔ Mɛlalɨgɔ Yo A Tǝga Yesu A Gola

¹³ Nǝn kum gɔ kaam nǝb bwangtǝm Yesui wo yo jǝ yi a kaa bɛ tuulɔ nɨ jǝ jo lɛ gɔ Imuwasui. A la mɛlɔ nʌbʌl na nǝl a bǝla mʊgɔ Urushalimagɨɨ.

¹⁴ Jǝ sʊwaka kɛlɔ lɛ a dul kanjǝl nɨ a bwɨ a mʊgɔ Urushalimaɨ.

¹⁵ Kwama nɨ jǝ sʊwaka kɛl nɨ lɛɨ, nǝngɔ Yesu ba nya ji a mʊrka naa jǝbɔ jii.

¹⁶ Ja nyǝm bɔ gɔ nǝn gɔ jǝ bwanga lɛ dakinii.

¹⁷ Nǝngɔ a bʌ ji gɔ, “N kɛl wɛ jǝ́ yɔ lɛ a gola, jǝ́ kiyo lɛɨ?” Ja yǝla ja tɨ nǝn kaltǝm nǝl.

¹⁸ Kaa win a kʊm jin dun gǝnɔ nǝn Kiliyobas, a bʌ gǝn gɔ, “Nǝmɔ mʊ faabɨ kwaamɔ win a Urushalima mʊ nyǝm bɔ jʊ nɨ a bwɨ a mʊgɔ kumtɨn nɨ ka?”

¹⁹ Nǝngɔ Yesu a bʌ ji gɔ, “N wɛ a bwɨɨ?” Ja jǝla gǝn gɔ, “Kɛlɔ nǝ sʊwa lɛɨ gǝ na a jʊ nɨ a bwɨ nǝn Yesu bwɛ Nazaratɨ. N nǝkuwotǝmkǝga, nǝn kwaan a sʊwatǝm kɛl jǝbɔ maatǝm maajɨ a kǝga Kwaamaɨ jǝbɔ nǝbɔ gwam.

²⁰ Dʊʊm nǝbkǝlamɔ jǝbɔ nǝb fɔlɔn tǝm bǝnɔ n nǝbɔ a nǝ ji Yesui, sǝ ja mwatɨ gǝm borang jʌtǝm, ja kʊʊ gǝnɨ.

²¹ Nǝ ya nǝl lɛ nǝn gɔ ba jǝg nǝn nɛ nǝn nǝbɔ Israilaɨ a mʊgɔ gaalan bǝnɔ gǝmɨ. Kumɔ taal dwiyen na jʊ nɨ a bwɨɨ.

²² Nǝn gɔ nɨ kaam nɔɔtǝm nǝnɔ sʊwa nǝn kaa kɛl lɛ a laa kwaan nǝnɨ gɔ jǝ yɔ a tuu gǝnɔ gǝm nǝn kumsʌl butʌb dwiyen,

²³ jǝ nya bɔ bʊtɔ gǝnɔ wo. Ba ja sʊwa nǝn gɔ jǝ kuwo bɛtɔ twama Kwaamaɨ. Nǝji ja sʊwa nɔɔtǝmɔ gɔ Yesu a gun nǝn kʊlɨɨ.

²⁴ Kaam nǝb nɨ nǝ dakini a yɔ a tuugɔ gǝm. Ja nya bɔ nǝl wo kanga nɔɔtǝm nɨ a sʊwa gɔ jǝ kuwo gǝn bɨɨ.”

²⁵ Nǝngɔ a sʊwa ji gɔ, “N wɛ a bwɨ jǝ́ fʌmola nyɨɨ? Nǝl jenɔ a bwa nǝtǝm bɨlǝngkɛl nǝn jʊ nɨ nǝbkuwotǝmkǝgagɔ a sʊwa gwamɨ!

²⁶ A yǝlam nyɔ Kiristi a nyʊwa gaalan jʊtǝb nɨ sǝla a dɔ mʊgɔ dʊʊlǝn gǝnɔ.”

²⁷ Nǝngɔ a nʊng ji jʊ ja sʊwa a mʊgɔ mʊlalɨ kɛl Kwaamaɨ gǝm a dul gǝnɨ, jʊ a tǝl a mɛlalɨ Musaɨ a yɔ nǝn a nǝbkuwotǝmkǝgagɔ gwamɨ.

²⁸ Ba ja dwama tuulɔ nɨ jǝ yilomi, nǝngɔ Yesu a nʊng maamɔ yi a kǝgaɨ.

²⁹ Nǝngɔ ja kela gǝn gɔ, “Ka ń shu lɛ. Kwama yukumɔ a kwɛl a ko.” Nǝngɔ a shu a lɔ jǝbɔ jii.

³⁰ Kwama nɨ jǝ jam jǝjalǝnɔ lɛɨ, nǝngɔ a do kʊkkʊmɨ, a buu Kwaama gǝm kang, a kǝlsa, a tǝga jii.

³¹ A daagɔ nǝngɔ la nu jinɔ a wumoi. Nǝngɔ la ja nyǝm gǝnɨ. Nǝngɔ a lɛlam jim tʌgo a daagɨɨ.

³² Jǝ bʌbko lɛ gɔ, “Nǝl bǝnɔ a lǝm bɔ nyɔ nǝn kwama nɨ sʊwa bǝn kɛlɔ lɛ a gola a mʊgɔ langǝn bwangǝn Kwaamaɨ ka?”

³³ Ja gun tʌgo a kang ja ta gola Urushalimaɨ. Ja nya bɛtɔ mɛlalɨgɔ kʊb jeli wini wo jǝbɔ nǝbɔ dakini jǝbɔ jii, ja mʊrka dakinii.

³⁴ Nǝngɔ bɛtɔ mɛlalɨgɔ a sʊwa gɔ, “N bɨlǝngkɛl, Tɛlalɔ a gun, a nʊng dul gǝnɔ a daa Saminu woi.”

³⁵ Nǝngɔ nǝb nɨ yoi a sʊwa ji jʊ a bwɨ nǝn ji a golaɨ. Ja sʊwa ji kanga ja nyǝm gǝnɨ, a kwama a tǝgam ji kʊkkʊmɨ.

Yesu A Nʊng Dul Gǝnɔ A Daagɔ Bɛtɔ Mɛlalɨ Gǝnɔ Woi

³⁶ Nǝn kwama nɨ jǝ kiyom kɛl nɨ lɛɨ a nyiyo jini, nǝngɔ Yesu ba tɨ a tɨbǝl jini. A sʊwa ji gɔ, “Bɛ lǝmagɔ a yɨ a kʊm jen.”

³⁷ Taalɔ a ta ji, jǝ bʊʊla lɛ gɔ kɛna n bʊtɔ.

³⁸ Nǝngɔ a sʊwa ji gɔ, “N wɛ a bwɨ taalɔ a ta jeni? N wɛ jǝ́ kǝma lɛ a nǝl jenɔ gǝmɨ?

³⁹ Jǝ́ dʌng kang mǝndɨ jǝbɔ naa mǝndɨ. Nǝmǝ! Jǝ́ ke i sǝ jǝ́ nyʊwa. Bʊtɔ mɨ nǝn nam jǝbɔ kuto kanga jǝ́ kuwo mǝ nǝngǝnɨ.”

⁴⁰ Nǝn kwama a sʊwam ji kɛl nɨɨ, nǝngɔ a nʊng ji kang gǝnɔ jǝbɔ naa gǝnɨ.

⁴¹ Ja jǝla bɔ nǝn kɛl nɨ jʊ a bwɨɨ fulotǝm nǝlɔ jǝbɔ jǝ laatǝm kang a kwɛl a ta ji. Nǝngɔ a bʌ ji gɔ, “Jen nǝn jǝjalǝn fɔ ka?”

⁴² Nǝngɔ ja nǝ gǝn jʌngi nɨ ja fʌ fʌi.

⁴³ Nǝngɔ a yo, a woi, jǝ dʌng gǝn nɛ.

⁴⁴ Nǝngɔ a sʊwa ji gɔ, “Jʊ nɨ n jʊ mǝ sʊwa jen kwama nɨ bǝ dakinii, jǝ yii yii kɛl nɨ ja sʊwa a dul mɨɨ a mʊgɔ diil Musaɨ, jǝbɔ a nǝbkuwotǝmkǝgagɨɨ, jǝbɔ nafɨ Zaburaɨ.”

⁴⁵ Nǝngɔ a wum nu jinɔ sǝ ja nyǝm langǝn bwangǝn Kwaamaɨ.

⁴⁶ Nǝngɔ a sʊwa ji gɔ, “Jʊ nɨ nǝn gɔ jʊ ja mʊlaɨ, Kiristi nɔɔ nɔɔ gaalan sǝ a gun a bwaagɔ gǝm a kum na taal.

⁴⁷ A mʊla mʊlaɨ tag gɔ, jǝ kiyo kiyo nǝbɔ gǝm kɛl Kwaamaɨ gwam a mʊgɔ dun gǝn sǝ ja yǝla ja bǝla bwɨlangkɛl jinɔ, sǝ ja kǝlǝm bwɨlangkɛlɔ a tǝmɔ gǝm gwam, jǝ tǝl a Urushalima.

⁴⁸ Jǝ́ nǝb nǝtǝm nyiyo a dul kanjǝl nɨ.

⁴⁹ Ya mǝ twam jen twam jʊ Tɛtɛ mɨ a maa jem swatǝm yaaɨ. Jǝ́ yɨ fɔ a mʊgɔ Urushalima, ba la nǝn kwama Kwaama nǝ jen kwaan nɨ lɛ bɛ lɛ a dʌbʌli.”

Ja Do Yesu A Dʌbʌl

⁵⁰ Kwama Yesu a jǝgǝm ji ba la nǝn ji a kaa bɛ tuulɔ nɨ jǝ jo lɛ gɔ Betanyaɨ, nǝngɔ a gung kang gǝnɔ a dǝg jim bwiligɨɨ.

⁵¹ Nǝn kwama dǝgǝm jim bwiligɔ lɛɨ, nǝngɔ a bǝla jii, nǝngɔ ja do gǝn a dʌbʌli.

⁵² Nǝngɔ ja jʊng ja bǝlá gǝnɨ, ja yǝla a mʊgɔ Urushalima nǝn gʌleng fulotǝm nǝlɨ.

⁵³ Nǝngɔ ja yɨ kum jǝbɔ kɔkɔ a Kan Kwaaman jǝ bǝlá Kwaamagɔ lɛɨ.