Luka 21 - Dadiya NT

Maltǝm Kemʌn Nɔɔkʊlagɨɨ

¹ Kwama nɨ Yesu a gung dul gǝnɨ, nǝngɔ a kuwo nǝb shilogɔ tal kemʌn jinɔ lɛ a kʌshi yotǝm kemʌn a Kan Kwaamanɨ.

² Nǝngɔ a kuwo nɔɔkʊla nɨ n nǝ bʊnǝnɨ, a bɛ nǝn a gǝnɔ kemʌn sǝlǝnɔ yo ba tal pʌd gwamɨ.

³ Nǝngɔ Yesu a sʊwa ji gɔ, “Bɨlǝngǝn mǝ sʊwa jen nɛɨ, nǝtǝm kemʌn nɔɔkʊla nǝ bʊnǝn nɨ a laa a tangǝnɨ.

⁴ A jinɔ, ja nǝ a mʊgɔ nyatǝm jinɔ jǝ nǝngǝn a ladaɨ, a gǝnɔ a nǝ a mʊgɔ bʊnǝn gǝnɔ gǝm, a do jʊ nɨ gǝ nǝnɨ pʌd, nǝngɔ a talɨ.”

Yesu A Sʊwa Kʌbotǝm Nɨ Nya Kan Kwaamanɔ Lɛɨ

⁵ Kaam bɛtɔ mɛlalɨ gǝnɔ jǝ sʊwa kɛl lɛ a dul Kan Kwaaman gɔ, tatǝn nɨ a bʊma nyɔ ja mɔ kan nɨ nǝnɨ jǝbɔ jʊ nɨ ja fɛka gǝn nǝnɨ. Nǝngɔ Yesu a sʊwa gɔ,

⁶ “Jʊtǝb nɨ jǝ́ kuwo lɛ nyɨɨ, kumɔ bɛ lɛ wo wʊnɨ mɨ tɛl nɨ wo jǝ bǝla lɛ a dʌbʌl kǝgaɨ ja tʊngǝm bɨɨ.”

Nʊngtǝm Gaalantɨn

⁷ Nǝngɔ ja bʌ gǝn gɔ, “Feyi, jʊ nɨ bwɨ fɨyang? N wɛ nǝ kuwo lɛɨ sǝ nǝ nyǝm kanjǝl nɨ bwɨ bwɨɨ?”

⁸ Nǝngɔ Yesu a sʊwa ji gɔ, “Bɛ jǝ́ nyǝm ka kaa nǝl a swag jen. Nǝbɔ a lada na jǝ bɛ lɛ a mʊgɔ dun mɨɨ. Jǝ sʊwa lɛ gɔ nǝji ji nǝn mɨɨ, dɨltǝm yooligɔ a dwama! Ka jǝ́ bwang jim lɛ.

⁹ Na jǝ́ nyʊwa kɛl tatǝm kun jǝbɔ kɨlantɨnɨ, ka jǝ́ nyʊwa lɛ taal. Kanjǝl nɨ tǝl bwɨ bwɨ dɨn. Dɨltǝmɔ mɨsɔ bɛ lɛ tʌgo a kang.”

¹⁰ Nǝngɔ a ja kǝga nǝn kɛl gǝnɨ gɔ, “Bǝlǝntǝm jǝbɔ bǝlǝntǝm jǝ ta ta kun. Lɔ fɔlɔn jǝbɔ lɔ fɔlɔn jǝ ta ta kun.

¹¹ Jǝ maa maa bwɨlang mǝgatǝm tǝm, jǝbɔ jʊwan bwɨla, jǝbɔ tonʌn bɔɔla a daatɨnɔ gǝm nǝn dʌmʌn. Jǝ kuwo kuwo jǝ taal jǝbɔ kanjǝl laatǝm kang a dʌbʌl.

¹² “Sǝla kanjǝl nɨ a bwɨ gwam, jǝ taba jen taba, ja nǝ jen gaalan. Jǝ yɔ yɔ nǝn jen a kǝga kantɨn mɛlalɨ sǝ ja maa jem borang. Ja kubʌl jen a lɔsomi. Jǝ yɔ yɔ nǝn jen a kǝga fɔlɔlɔmɨ jǝbɔ kǝga nǝb dʊʊm a kɛl dun mɨ.

¹³ A kwama gɔ jǝ́ yǝlam nǝb nǝtǝm nyiyo a daa ji woi.

¹⁴ Ka jǝ́ do lɛ bʊʊlalɨ a nǝl jen jengɔ jǝ́ maa nyǝn jǝ́ kʌshi dul jenɔ lɛ dɨsɔ la kanjǝl nɨ a bwɨ nǝn jeni.

¹⁵ Mǝ nǝ jen nǝ kɛlɔ jǝbɔ yʊlanɔ jǝ́ kʌshi dul jenɔ lɛ nǝnɨ, sǝ a yǝlam mɨ nǝ kii jenɔ nɨ wo nya gola tuwol jenɔ lɛɨ.

¹⁶ Tɛtǝlam jenɔ, jǝbɔ kɛtǝlam jenɔ, jǝbɔ nanǝgam jenɔ, jǝbɔ fatǝlam jenɔ, jǝ miyo jen miyo, ja jʌbo kaamɨ jenɔ.

¹⁷ Nǝbɔ kɔ jen kɔ a kɛl dun mɨ.

¹⁸ N sʊwa jen win a mʊgɔ yitʌn dul jenɔ gǝm mɨsɔ lɛla lɛ.

¹⁹ Na jǝ́ kʊ nǝlɨ, jǝ́ bʊʊ bʊʊ.

Yesu A Sʊwa Kʌbotǝm Nɨ Nya Urushalimagɔ Lɛɨ

²⁰ “Na jǝ́ kuwo kʌm sʊwajaamɔ a kang Urushalimagɨɨ, bɛ jǝ́ nyǝm mɨsɔ kʊta lɛ, kʌbotǝm gǝnɔ a dwama.

²¹ A kwama gɔ bɛ nǝb nɨ a Yahudiyaɨ, ja mwala ja gwi yem. Bɛ nǝb nɨ a mʊgɔ tuulɔɨ ja jelʌm. Nǝb nɨ a kuuli, ka ja dɔ lɛ tuulɔngɔ.

²² Kɔkɔ mwɛl Urushalimagɨɨ a bɛ, wʊnɨ a yii kanjǝlɔ gwam nǝbkuwotǝmkǝgagɔ a mʊlaɨ.

²³ Nɔɔtǝmɔ nǝn fʌli, jǝbɔ nɔɔtǝm nabwɛmɔ jǝ nɔɔ nɔɔ gaalan a tǝm Israila. Na nabwɨl Kwaamaɨ a gǝla a dul nǝbɨɨ, jǝ nyʊwa nyʊwa gaalan.

²⁴ Jǝ jʌbo jʌbo kaam nǝbɔ nǝn gulʌn. Ja taba kaamɨ tag ja yɔ nǝn ji a jwaalɛn a tǝm Bʌtʌbi gwam. Bʌtʌbɔ fala fala Urushalimagɔ, a yɔ nǝn a kwama dɨltǝm Bʌtʌbi.

Bɛtǝm Bʊla Nǝlɨ

²⁵ “Jǝ́ kuwo kuwo jǝ nʊngtǝm a nu kwama, jǝbɔ bwaala, jǝbɔ nyanyamɨ. Nǝfitʌmɔ a yoolii nyʊwa nyʊwa taal mwɛ wɨma nɨ mʊla lɛ ji kʌbʌl lɛɨ.

²⁶ Nǝfitʌmɔ fʌm fʌm nǝn taal, jǝbɔ yalɨ kuli nǝn jʊtǝb nɨ bwɨ lɛ a yooligɔ gǝmɨ. Jǝ mǝg mǝg kanjǝl nɨ a dʌbʌl kwamaɨ.

²⁷ A kwama gɔ jǝ kuwo kuwo Bʊla Nǝlɨ bɛ lɛ a mʊgɔ lul, a mʊgɔ kwaan gǝn jǝbɔ gʌleng dʊʊlǝn gǝnɔ.

²⁸ Na kanjǝl nɨ a tǝl bwɨ lɛɨ, bɛ jǝ́ gung dul jenɔ, jǝ́ dʌng dʌbʌlɔ, jǝgtǝm jenɔ a dwama.”

Mɛlalɨ A Dul Tɨya Dʌfeng

²⁹ Nǝngɔ Yesu a sʊwa ji mʊsǝn kɛl nɨɨ gɔ, “Jǝ́ dʌng tɨya dʌfengɔ jǝbɔ tangǝn tɨyantɨnɔ.

³⁰ Na ja tǝl jǝ to langǝn fɨgɔ lɛɨ, jen nǝn kang jen jǝ́ kuwo, jǝ́ nyǝm shenagɔ a dwama.

³¹ Gǝ na nyɔ na jǝ́ kuwo kanjǝl nɨ bwɨ lɛɨ, bɛ jǝ́ nyǝm fɔlɔn lɔ Kwaamaɨ a dwama.

³² “N bɨlǝngkɛl mǝ sʊwa jen nɛɨ, nǝbɔ kal nɨɨ, mɨsɔ jǝ bʊla lɛ, na kanjǝl nɨ gwam a bwɨ bɨɨ.

³³ Dʌbʌlɔ jǝbɔ tǝmɔ dɨ dɨ. Kɛl mǝndɨ mɨsɔ dɨ lɛ wo.

Gʊtǝm Lɔl Jǝbɔ Yɨm Fɛkalɨ

³⁴ “Jǝ́ yɨ nǝn fɛkalɨ. Bɛ ka jǝ́ jǝla lɛ jatǝmɔ, jǝbɔ nɔɔtǝmɔ, jǝbɔ komʌn kanjǝl yooli nɨ a tangǝm nǝn jen a bwangtǝm mɨ, kage kɔkɔgɔ ba do jen nǝn dul

³⁵ maa na kwalɨ. Kɔkɔ nɨ bɛ bɛ a dul nǝb nɨ yǝm a yooli nɨ gwamɨ.

³⁶ Jǝ́ yɨ nǝn fɛkalɨ. Jǝ́ kela Kwaamagɔ lɛ kwangkwang, sǝ jǝ́ nya kwaan bʊʊtǝm a kanjǝl nɨ bwɨ lɛ a kǝgaɨ, sǝ jǝ́ tɨ nǝn fulotǝm nǝl a kǝga Bʊla Nǝlɨ.”

³⁷ Kum jǝbɔ kum Yesu gǝ maa mɛlalɨgɔ a Kan Kwaaman. Na nǝn kwaamɨ, gǝ jel jel a shu a tuli nɨ jǝ jo lɛ gɔ Yem Zaituni, sǝ ya daa wo.

³⁸ Nǝbɔ pʌd jǝ bɛ nǝn kumsʌl butʌb, sǝ ba ja nya gǝn a Kan Kwaaman, sǝ ja nyʊwa mɛlalɨ gǝnɔ.