Kolosii 4 - Dadiya NT

¹ Tɛlalɔtɨnɔ, bɛ jǝ́ ta jwaalɛb jenɔ nǝn bɨlǝngǝn a bʊm bʊmɨ, jʊ a bwɨɨ jǝ́ nyǝm tʌjen jǝ́ nǝngǝn nǝn Tɛlalɔ a dʌbʌl.

² Jǝ́ ja kǝga nǝn maatǝm keli. Jǝ́ yɨ nǝn fɛkalɨ a mʊgɔ gǝn jǝbɔ buutǝm kang.

³ Jǝ́ kela Kwaama a wum nǝm gola nǝn sʊwa kɛl nɨ ja yʊ yʊɨ a dul Kiristii, wʊnɨ n kɛl dul gǝn ja bwa ɨɨ.

⁴ Jǝ́ kela Kwaama a dul mɨ sǝ n kiyo kɛl gǝnɔ dǝngdǝng, kanga a bʊm mǝ maa lɛɨ.

⁵ Bɛ jǝ́ yɨ yɨm jenɔ nǝn yʊlan a mʊgɔ nǝb nɨ ke bɔ nǝb bwangtǝmɨ. Jǝ́ maa maajɨ nǝn gola nɨ jǝ́ nyaɨ.

⁶ Kwangkwang, bɛ kɛl jenɔ a yǝlam kɛl lǝmɨ jǝbɔ gʊtǝm nǝl nǝbɨɨ, sǝ jǝ́ nyǝm kɛl nɨ a bʊm jǝ́ gar nǝbɔ gǝm lɛɨ.

Dɨltǝm Yaltǝmɔ

⁷ Tikikus sʊwa jen sʊwa jʊ mǝ wo a mʊgɔ gǝnɨ gwam. N kɛ nǝ swɨtǝm. N nǝ tatǝm swatǝm yaa. N fwalɨ maajɨ a mʊgɔ Tɛlalɔɨ.

⁸ Mǝ twam gǝn a daa jen woi a dul kɛl nɨɨ, sǝ jǝ́ nyǝm jʊ nǝn wo a mʊgɔ gǝnɨ, sǝ a kʊʊ jem nǝl.

⁹ Yɔ jǝbɔ Onisimus, kɨla bǝn nɨ n nǝ tatǝm swatǝm yaa bǝ swɨ gǝn nɛɨ, wʊnɨ gǝ na a kʊm jeni. Nǝji jǝ sʊwa jen jʊ nɨ lɛ bwɨ lɛɨ.

¹⁰ Aristarkus, wʊnɨ a lɔsomi jǝbɔ mǝɨ, yal jen nɛ. Markus tǝgǝn yal jen nɛ, wʊnɨ tʊga ji win jǝbɔ Barnabaɨ, wʊnɨ mǝ kwɛl mǝ sʊwa kɛl a dul gǝnɨ. Na a bɛ a daa jen woi, bɛ jǝ́ yo gǝn kangɔ yo.

¹¹ Yasuwa wʊnɨ jǝ jo lɛ gɔ Yustusi, yal jen nɛ. Nǝb nɨ taalɨ, nǝji kwaaji a kʊm Yahudawagɔ n nǝb bwangtǝmɔ maa maajɨ lɛ jǝbɔ mǝ a dul fɔlɔn lɔ Kwaamaɨ, jǝ kʊʊ mɨ nǝl lɛɨ.

¹² Abafaras wʊnɨ win a kʊm jeni, n bwɛ jwaalɛ Kiristi Yesui, yal jen nɛ. Kwangkwang maa jem keli lɛ nǝn bɨlǝngǝn sǝ jǝ́ tɨ nǝn kwaan, sǝ jǝ́ bwangtǝn jʊ nɨ Kwaama swɨ lɛ gwamɨ.

¹³ N sʊwa jen bɨlǝngǝn, a maa jem maajɨ dangǝn jǝbɔ nǝb nɨ a Lawudikiyaɨ, jǝbɔ nǝbɔ a Hirafolisi.

¹⁴ Luka nǝ nyinongɔ bǝ swɨ lɛɨ, jǝbɔ Dimas jǝ yal jen nɛ.

¹⁵ Jǝ́ yal kambɔ nɨ a Lawudikiyaɨ. Jǝ́ yal Nimfa jǝbɔ mʊrkalɨ nǝb bwangtǝm Kwaamaɨ nɨ a lɔ gɨɨ.

¹⁶ Na jǝ́ dɨ kiyotǝm langǝn bwangǝn nɨ a kǝga jeni, jǝ́ dǝg ja kiyo a kǝga mʊrkalɨ nǝb bwangtǝm Kwaamaɨ nɨ a Lawudikiyaɨ. Jen tʌjen bɛ jǝ́ kiyo langǝn bwangǝn nɨ nǝbɔ Lawudikiyaɨ twam jem lɛɨ.

¹⁷ Jǝ́ sʊwa Arkibus a tagǝm maajɨ nɨ Tɛlalɔ a nǝ gǝnɨ.

¹⁸ Mǝ Bulus, nǝmǝ mǝ mʊla yaltǝm nɨ lɛ nǝn kang mɨɨ. Ka jǝ́ twab lɛ, ja bwa ɨ a lɔsomi. Bɛ lǝma Kwaamaɨ a yɨ jǝbɔ jen.