Kolosii 3 - Dadiya NT

Yɨtǝm Yɨm Fɨɨ

¹ Kwaama a gung jen nǝn kʊlɨ jǝbɔ Kiristi. Na gǝ na nyɨɨ, bɛ jǝ́ saa kanjǝl nɨ a dʌbʌli, a daa nɨ Kiristi yǝm woi, a kang jajǝng Kwaamaɨ.

² Bɛ jǝ́ ya bʊʊlalɨ jenɔ a kanjǝl nɨ a dʌbʌli, ke bɔ kanjǝl nɨ a tǝmɨ.

³ Jǝ́ bʊla. Kʊlɨ jenɔ a wuu wuui jǝbɔ Kiristi a daagɔ Kwaama woi.

⁴ Na Kiristi wʊnɨ nǝn gɔ n kʊlɨ jeni, na a bɛɨ, jǝ́ bɛ bɛ dakini jǝbɔ gɔ a mʊgɔ dʊʊlǝn gǝn.

Kʊlɨ Galɨ Jǝbɔ Kʊlɨ Fɨ

⁵ Gǝ na nyɔ bɛ jǝ́ jǝgǝm nǝl jenɔ a wɛl yooligɔ gǝm, bulon, jǝbɔ maajɨ kalalɨ, jǝbɔ wɛl bwɨla, jǝbɔ bwɨlang nǝlǝn, jǝbɔ konatǝm nu wʊnɨ tǝgǝn n bwangtǝm shomi.

⁶ N kɛl dul kanjǝl nɨ nabwɨl Kwaamaɨ bɛ lɛ a dul nǝb bǝngɨ lɔlɨ.

⁷ Galɨgǝn jǝ́ yɔ nyɔ a mʊgɔ yɨm galɨgɔ jǝ́ yɨɨ, nǝn kwama jǝ́ yɨm a kumtojilii.

⁸ Kǝngkɔ bɛ jǝ́ bǝla jʊtǝb nɨ wo, nabwɨl, jǝbɔ bʊwaka nǝl, jǝbɔ kɔkan, jǝbɔ kalkatǝm dun, jǝbɔ sʊwalatǝm kanjǝl bwɨla.

⁹ Bɛ ka jǝ́ maaka lɛ gabakɛl, jʊ a bwɨɨ jǝ́ kwɛl jǝ́ bǝla yɨm galɨgɔ jǝbɔ maajɨtɨn gǝnɔ.

¹⁰ Jǝ́ do nǝl fɨ, wʊnɨ ja fʌto a jelkalǝng Nǝ Fwaltǝmɨ, sǝ jǝ́ nyǝm gǝn dangǝn.

¹¹ A daa nɨ gǝm, mɨ gola nʊngkatǝm wo nǝn dʌmʌn a kʊm bwɛ Bʌl jǝbɔ bwɛ Yahuda, nʊ nɨ a biyo mwɛnɨ jǝbɔ nʊ nɨ a biyo bɔ mwɛnɨ, nǝ saatǝm kutʌm jǝbɔ nʊ nɨ a swɛla swɛlaɨ, bwɛ lɔɨ jǝbɔ bwɛ jwaalɛ. Kiristi nǝn gɔ a laa jǝlɨ, nǝn gɔ a mʊgɔ bǝn gwamɨ.

¹² Gǝ na nyɔ, bɛ jǝ́ do nǝl bʊnatǝm, jǝbɔ maatǝm jǝ nya, jǝbɔ shigtǝm dul, jǝbɔ yʌbtǝm dul, jǝbɔ kʊtǝm nǝl, kanga jǝ́ nǝbɔ Kwaama a jǝgamɨ, nǝb sagsag, nǝbɔ Kwaama swɨ lɛɨ.

¹³ Bɛ ka jǝ́ tabka lɛ a nǝl. Na kaa nǝl nǝngǝn nǝn kɛl jǝbɔ kɨla gɨɨ, bɛ ga kǝlǝm gǝm kanga Tɛlalɔ a kǝlǝm jemi, jen tʌjen bɛ jǝ́ kǝlǝmka.

¹⁴ Jʊ a laa jʊtǝb nɨ gwamɨ, bɛ jǝ́ do nǝl swɨkan, wʊnɨ a mʊr jen gwam jǝ́ yǝlam wini.

¹⁵ Bɛ yɨm kwamɨgǝn a Kiristii a maa fɔlɔn a nǝl jen. N kɛl gɔ ja jo jen jǝ́ yǝlam bʊtɔgɔ wini. Bɛ jǝ́ yǝlam nǝb buutǝm kang.

¹⁶ Bɛ kɛl Kiristii a yɨ a mʊgɔ nǝl jen a lada. Bɛ ya jǝ́ mɛlaka lɛ, bɛ ya jǝ́ mwɛka lɛ nǝn yʊlan a gola matǝm nafɨ Zaburaɨ, jǝbɔ nafɨ bǝlátǝm Kwaamaɨ, jǝbɔ nafɨtɨn nɨ Yʊwagɔ a bɛ nǝnɨ. Jǝ́ ma lɛ nǝn buutǝm kang a mʊgɔ nǝl jenɔ gǝm.

¹⁷ Jʊ nɨ jǝ́ maa lɛ gwamɨ, a dul kɛl jǝbɔ maajɨɨ, bɛ jǝ́ maa gwam a mʊgɔ dun Tɛlalɔ Yesui, jǝ́ buu Kwaama Tɛtɛ gǝm kang lɛ a gola gǝn.

Yɨm Nɨ A Daa Tʌgo A Nǝ Bwangtǝmɨ

¹⁸ Jǝ́ nɔɔtǝm naatǝmɔ, jǝ́ bwangtǝn batǝlam jenɔ kanga a daa tʌgo a gola Tɛlalɔɨ.

¹⁹ Jǝ́ batǝmɔ, jǝ́ swɨ nɔɔtǝlam jenɔ. Ka jǝ́ nʊng ji lɛ bwɨlang nǝlǝn.

²⁰ Jǝ́ bɛtɔ dwalǝnɔ, bɛ jǝ́ nyʊwa tɛtǝlam jenɔ a golantɨnɔ gǝm gwam. N jʊ fulo Tɛlalɔ gǝm nǝl lɛɨ.

²¹ Jǝ́ tɛbɔ, ka jǝ́ maa lɛ bɛtɨ gǝm mwɛl bwɨlan, kage a kǝlam jim bʊtɔ.

²² Jǝ́ jwaalɛbɔ, bɛ jǝ́ bwangtǝn tɛlalɔtɨn jenɔ a yooli nɨɨ a kanjǝlɔ gǝm gwam, ke bɔ maajɨ kuwotǝm nu, na nǝb nɨ swɨ fulotǝm nǝbɔ gǝm nǝl lɛɨ. Jǝ́ maa maajɨ nǝlɔ win, jǝ́ nyʊwa taal Tɛlalɔɨ lɛ.

²³ Gwam jʊ nɨ jǝ́ maa lɛɨ, jǝ́ maa nǝn nǝl jenɔ gwam, maamɔ jǝ́ maam Tɛlalɔ, ke bɔ nǝfili.

²⁴ Nǝn Tɛlalɔ Kiristi jǝ́ maa gǝm maajɨ lɛɨ! Jǝ́ nyǝm Tɛlalɔ nǝ jen nǝ kʊla maajɨ jenɔ jǝ́ maaɨ.

²⁵ Nʊ nɨ maa jʊ nɨ lɛ a bʊm bɨɨ, nya nya ywatǝm gǝnɔ a jʊ nɨ a bʊm bɔ ga maaɨ. Kwaama mɨ gǝ nʊng swɨtǝm dul lɛ.