Kolosii 2 - Dadiya NT

¹ Mǝ swɨ lɛ jǝ́ nyǝm dɔtatǝm nɨ mǝ dɔta lɛ a kɛl dul jeni, jǝbɔ nǝb nɨ a Lawudikiyaɨ, jǝbɔ nǝb nɨ ja kuwo i bɔ woi kǝga jǝbɔ kǝgaɨ.

² Swɨtǝm mǝndɨ ja kʊʊ jim nǝl, kanga ja mʊrka nǝl jinɔ a gola swɨkanɨ, sǝ ja nya bwili a nyǝmtǝm jʊ nɨ Kwaama a yʊ yʊɨ, wʊnɨ nǝn Kiristii.

³ N daa gǝ woi ja yʊ shilo yʊlanɔ jǝbɔ nyǝmtǝmɔ gwamɨ.

⁴ Mǝ sʊwa jen jʊ nɨ, kage kaa nǝl a swag jen nǝn kɛl swagtǝm.

⁵ A bʊtɔɨ, mɨ mǝ wo nǝbɔ jen sul, bʊʊlalɨ mɨɨ wo jǝbɔ jen. Mǝ maa fulotǝm nǝl lɛ nǝn yɨm nɨ a daa tʌgo jǝ́ maaɨ jǝbɔ tɨm jenɔ nǝn kwaan jǝ́ tɨ a nǝtǝm bɨlǝngkɛl a daa Kiristi woi.

Bwangtǝm Kiristii A Bɛ Nǝn Yɨm Fɨɨ

⁶ Kanga jǝ́ yo Kiristi Yesu nǝn Tɛlalɔ jeni, bɛ jǝ́ ja kǝga nǝn yɨmɔ a mʊgɔ gǝn.

⁷ Bɛ nʌltɨn jenɔ ya dʊʊl lɛ a mʊgɔ Kiristii. Bɛ kʊlɨ jenɔ a dʊʊl a mʊgɔ gǝn. Bɛ jǝ́ tɨ nǝn kwaan a mʊgɔ nǝtǝm bɨlǝngkɛlɔ gǝm ja mɛla jemi. Bɛ jǝ́ buu gǝm kang a lada.

⁸ Ka jǝ́ jǝla lɛ kaa nǝl a swag jen a gola mɛlalɨ nǝn kwan, a jǝfʊlǝn nǝbɨɨ, wʊnɨ n jǝfʊlǝn yoolii, n ke bɔ a Kiristii.

⁹ A yɨm Kiristii na nǝfilii, dʊʊlǝn Kwaamaɨ gwam gǝ na a daa gǝ woi.

¹⁰ N daa gǝ woi jǝ́ yii dǝngdǝngɨ, wʊnɨ nǝn gɔ n dul a dul fɔlɔn jǝbɔ kwaanɨ.

¹¹ N mʊgɔ gǝn tag a biyo jem mwɛnɨ, ke bɔ biyotǝm mwɛn nǝn kang nǝfilii. Kiristi a maa nyɔ sǝ a dem bʊtɔ bwɨlangkɛl jenɔ.

¹² Ja fʌl jen jǝbɔ gɔ a gola yʊtǝm mwɛ sagsag, ja gung jen jǝbɔ gɔ a gola nǝtǝm bɨlǝngkɛl a kwaan Kwaamaɨ, wʊnɨ a gung gǝn a bwaaɨ.

¹³ Jǝ́ bʌlʌn, jʊ a bwɨɨ jǝ́ nǝb bwɨlangkɛl. Jǝ́ bʌlʌn, jʊ a bwɨɨ ja dem jem bɔ bʊtɔ bwɨlangkɛl jenɔ. Kwaama a fɛ jen nǝn kʊlɨ jǝbɔ Kiristi. A kǝlǝm bǝm bwɨlangkɛl bǝnɔ gwam.

¹⁴ A maa nyɔ a gola kwɨtǝm dwang borangɔ a bwa bǝn nǝn diiltɨn gǝnɨ, a dem a gola kʊʊtǝm gǝn a dʌbʌl tɨya kʊʊtǝmɨ.

¹⁵ A wɔɔm kanjǝl tatǝm kun Mammɨ jǝbɔ kwaan nǝblaamɨ jǝbɔ fɔlɔn jinɔ, a nǝ ji gunidul a talɨ, a ku jelʌn a dʌbʌl tɨya kʊʊtǝm.

Jǝ́ Ya Nǝl A Kanjǝl Nɨ A Dʌbʌli

¹⁶ A dul jʊ nɨ, ka jǝ́ jǝla lɛ kaa nǝl a nǝ jen bwɨlangkɛl a dul jʊ nɨ jǝ́ ja lɛɨ, jǝbɔ jʊ nɨ jǝ́ nɔɔ lɛɨ. Ka jǝ́ jǝla lɛ kaa nǝl a nǝ jen bwɨlangkɛl a dul kɨlatǝm dikulom Jeltǝm Bwaala, jǝbɔ Kum Fǝbtǝm tag.

¹⁷ Kanjǝl nɨ n duuli nǝn kwan a jʊ nɨ bɛ lɛɨ. Kiristi nǝn gɔ na a nyagɨɨ.

¹⁸ Bɛ ka jǝ́ jǝla lɛ kaa nǝl a soga jen gɔ gǝ kaa jǝl, gɔ gǝ maa dʊgam nyangnyang lɛ, gɔ gǝ nǝn shigtǝm dul, gɔ gǝ maa bɛtɔ twama Kwaamaɨ gǝm bǝlátǝm lɛ. Nʊ nɨ n bʊʊlalɨ bwɨla nɨ a nǝl gǝnɨ dǝg gǝn gungtǝm dul lɛɨ.

¹⁹ A mʊrka bɔ a daa Kiristi woi wʊnɨ nǝn gɔ n duli. N daa gǝ woi bʊtɔgɔ gwam nya jǝ nyan nɛɨ, wʊnɨ a mʊrka a gola jinʌn jǝbɔ nʌl bʊtɔɨ, dʊʊl lɛ nǝn kwaan Kwaamaɨ.

²⁰ Na bwaa jenɔ jǝbɔ Kiristii a jǝg jen a jǝfʊlǝn yooli nɨɨ, n wɛ a bwɨ jǝ́ yɨ yɨm lɛ maamɔ jǝ́ na a yooli tagɨ? N wɛ a bwɨ jǝ́ bwangtǝn diiltɨn nɨ lɛ sʊwa lɛ gɔ,

²¹ “Bɛ ka ń ta lɛ! Bɛ ka ń twɨ lɛ jǝjalǝn! Bɛ ka ń ke lɛɨ!”

²² Diil nɨ n kɛl kanjǝl nɨ na ja ja jii, bʊta lɛɨ. Diiltɨn nɨ n diiltɨn mɛlalɨ nǝfilii.

²³ Diiltɨn nɨ maamɔ bɨlǝngǝn, gǝ nʊng yʊlan, gǝ dǝg bǝlátǝm nǝn kwaan, gǝ dǝg shigtǝm dul na kwaan, gǝ dǝg nǝtǝm bʊtɔgɔ gaalan. Diiltɨn nɨ mɨsɔ tɨ lɛ nǝn nǝl a maatǝm kanjǝl bwɨla nɨ bʊtɔ gǝnɔ swɨ lɛ a maaɨ.