Ibranii 9 - Dadiya NT

Lɔ Tǝlatǝm Twama Na Yooligɔ

¹ Swatǝm yaa tɨkǝgagɔ nǝn diiltɨn gǝnɔ na maatǝm bǝlátǝm jǝbɔ lɔ maatǝm gǝnɔ, wʊnɨ nǝbɔ a fɛka a yoolii.

² Ja fɛ lɔ tǝlatǝm twamagɔ. A mʊgɔ gǝnɨ, kanɔ wo wʊnɨ ja bel mʊgɔ gǝnɔ yoi. Kan na tɨkǝgagɔ jǝ jo gɔ, n daa sagsag, wʊnɨ daa swatǝm fitilagɔ woi, jǝbɔ teburɔ jǝbɔ kʊkkʊm nɨ ja tǝlam twamaɨ.

³ A gul dwang na yogɔ, kaa lɔ tǝlatǝm twama wo wʊnɨ jǝ jo lɛ gɔ Daagɔ a Laa Sagsagɨ.

⁴ A mʊgɔ gǝn kaa jǝ twɨtǝm yulʌnɔ wo wʊnɨ ja fɛ nǝn mʊnɨ, jǝbɔ kwaati swatǝm yaagɔ wʊnɨ ja sumo ja kɛla nǝn gwam nǝn mʊnɨ. A mʊgɔ kwaati nɨ taasa mʊnɔ wo nǝn manna a mʊgɔ gǝn, jǝbɔ dwam Harunaɨ wʊnɨ a to toi, jǝbɔ mʊlalɨ a tatǝn na swatǝm yaagɔ gǝm.

⁵ A dʌbʌl kwaati swatǝm yaa nɨ, kaam kanjǝl wo nǝn jelkalǝng kanjǝl nɨ nǝn kʊlɨ a dʌbʌl na nʊngtǝm dʊʊlǝn Kwaamaɨ, wʊnɨ lemʌn bɨlǝn jinɔ a sɔm sumʌn kwaati nɨɨ. Mɨsɔ bǝ dwal lɛ bǝ kiyo kanjǝl nɨ a talɨ kanga bǝ swɨ lɛ kǝngkǝnɨ.

⁶ Na nǝn kwama ja dɨ fɛkatǝm kanjǝlɔ na nɨɨ, sǝla nǝbkǝlamɔ ya dɔ kan na winɔ lɛ kwangkwang, ya ja maa maajɨ jinɔ lɛ na bǝlátǝm.

⁷ A kan na yogɔ, n dalɨ nǝkǝlagɔ kwaagɔ gǝ dɔ lɛɨ, gǝ tǝgǝn gǝ dɔ naa win a jol. Gǝ dɔ nǝn tʊʊm wʊnɨ gǝ tǝla lɛ a kɛl dul bwɨlangkɛl gǝnɨ jǝbɔ bwɨlangkɛl nɨ nǝbɔ a maa ke bɔ a nyǝmtǝm jini.

⁸ A gola nɨ Yʊwa Kwaamaɨ gǝ nʊng gɔ ka ja wum lɛ Daagɔ a Laa Sagsagɨɨ dɨn, na kan na tɨkǝgagɔ maa maajɨ lɛɨ.

⁹ Wʊnɨ nǝn gɔ jʊ nʊng lɛ a kwama nɨ kǝngkɨɨ. Nǝtǝm kanjǝlɔ jǝbɔ tǝlatǝm twamagɔ mɨsɔ saal nǝl nǝb bwangtǝmɨ lɛ sagsag.

¹⁰ Diiltɨn nɨ gǝ nʊng jatǝm jǝjalǝn, jǝbɔ jǝ nɔɔlǝng, jǝbɔ kanjǝl saaltǝm bʊtɔ jǝ maa lɛ kwaagɨɨ. Diiltɨn nɨ n maajɨ bʊtɔɨ, dɨ maajɨgɔ nǝn kwama nɨ diil fɨgɔ a jeli.

Tʊʊm Kiristii

¹¹ A Kiristii a bɛ kǝngkɨɨ, n dalɨ nǝkǝla na kanjǝl nyan nɨ woi. A dɔ lɔ tǝlatǝm twama wʊnɨ a laa bʊmǝnɨ, wʊnɨ n ke bɔ maatǝm nǝfilii, n ke bɔ jǝ fwaltǝm na yooli nɨ.

¹² Kiristi a dɔ Daa nɨ a Laa Sagsagɨɨ naa win swar, mɨ sʊtǝm wo. Ke bɔ a gola tʊʊm bɨntɨn jǝbɔ bɛl nɛɛ a dɔɨ. A dɔ a gola tʊʊm gǝn. A maa bǝm jǝgtǝm nɨ mɨ dɨltǝm woi.

¹³ N tʊʊm bɨntɨn jǝbɔ na nɛɛ batǝn, jǝbɔ bugom bwatam nɛɛ nɔɔtǝn jǝ wa nǝb nɨ gǝm lɛ nǝn bwɨlangkɛlɨ. Jǝ buti ji lɛ nǝnɨ sǝ bʊtɔ jinɔ a yǝlam sagsag.

¹⁴ Na nyǝn a tʊʊm Kiristii wʊnɨ a nǝ dul gǝnɔ nɨ mɨ nǝn duto a daa Kwaama woi, a gola Yʊwa Kwaamaɨ nɨ mɨ dɨltǝm woi. A saalǝm nǝl bǝnɔ a maatǝm kanjǝl jǝfʊlǝn nɨ yɔ lɛ nǝn bǝn a bwaaɨ. Sǝ bǝ bǝlá Kwaama nɨ nǝn kʊlɨɨ.

¹⁵ Kiristi a bʊla sǝ a jǝg ji a bwɨlangkɛl nɨ ja maa a swatǝm yaa tɨkǝgagɔ gǝmɨ. A dul bwaa gǝnɔ gǝm, nǝn gɔ a tɨbǝl swatǝm yaa fɨgɔ gǝmɨ, sǝ nǝb nɨ ja jo jii, ja yo kʊla nɨ mɨ dɨltǝm woi, wʊnɨ ja swam jim yaaɨ.

¹⁶ Na kaa nǝl a sʊwa nʊ nɨ ja kʊla gǝnɔ lɛɨ, bɛ ja nyǝm nʊ gɔ a bʊla dɨn.

¹⁷ Jʊ a bwɨɨ nʊ nɨ ja kʊlagɔ lɛɨ, mɨ nǝn kwaan na nʊ nɨ a sʊwa kɛlɨ a bʊla bɨɨ, mɨsɔ jǝ maa maajɨ lɛ nǝn, na nʊ gɔ a nǝn kʊlɨɨ.

¹⁸ N jʊ a bwɨ swatǝm yaa tɨkǝgagɔ mɨ gǝ maa maajɨ lɛɨ, na mɨ tʊʊm woi.

¹⁹ Nǝn kwama Musa sʊwam nǝbɔ kɛlɔ lɛ a diilɔ gǝm gwamɨ, nǝngɔ a dʊwa tʊʊm bɛl nɛɛgɔ jǝbɔ a bɨntɨnɔ, a mʊrka jǝbɔ mwɛmɔ, jǝbɔ lugo feligɔ, jǝbɔ kang tɨya izobɔ, nǝngɔ a wa langǝn bwangǝn borangɔ gǝm jǝbɔ nǝbɔ gwam.

²⁰ Sʊwa lɛ gɔ, “Wʊnɨ nǝn gɔ n tʊʊmɔ nʊng swatǝm yaa nɨ lɛɨ, wʊnɨ Kwaama a maa a dul jeni.”

²¹ Nǝngɔ a wa tʊʊmɔ a lɔ tǝlatǝm twama nɨ gǝmɨ, jǝbɔ kanjǝlɔ gwam na maatǝm maajɨɨ.

²² N bɨlǝngǝn, kanga diilɔ a nʊngɨ, kanjǝlɔ gwam ja saalǝm nǝn tʊʊm. Na ke bɔ tǝlatǝm tʊʊmɨ, na mɨ kǝlǝmtǝm bwɨlangkɛl wo.

Kiristi A Nǝ Dul Gǝnɔ Sǝ A Kǝlǝm Bwɨlangkɛl

²³ N kanjǝl nɨ a yǝlam nyɔ jǝ butim kanjǝl nɨ lɛ a jelka kanjǝl nɨ a dʌbʌli. A kanjǝl nɨ a dʌbʌli jǝ buti ji nǝn tǝlatǝm twama nɨ a laa kanjǝl nɨ bʊmǝnɨ.

²⁴ Jʊ a bwɨɨ, Kiristi a dɔ bɔ kaa lɔ tǝlatǝm twama wʊnɨ nǝfili a mɔɨ, wʊnɨ nǝn gɔ n jelkalǝng lɔ dʌbʌli. A dɔ dʌbʌlɔ tǝgǝn sǝ a nʊng dul gǝnɔ a kǝga Kwaamaɨ a kɛl dul bǝn.

²⁵ A dɔ bɔ a kwama sǝ a nǝ dul gǝnɔ jǝ twɨtǝm yulʌn kwangkwang kanga dalɨ nǝkǝlagɔ gǝ dɔ lɛ a Daa nɨ a Laa Sagsag a joli, sǝ a tǝla tʊʊm nɨ ke bɔ a gǝnɨ.

²⁶ Na na Kiristi gǝ nǝ dul gǝnɔ a joli, na nɔɔ nɔɔ gaalan kwangkwang dangǝn a tǝltǝm yooligɔ gǝm ba la nǝn a kǝngkɨɨ. Kǝngkɔ a nʊng dul gǝnɔ naa win swar a dɨltǝm yooligɔ gǝm sǝ a dem bwɨlangkɛlɔ a gola nǝtǝm dul gǝn a twɨtǝm yulʌn.

²⁷ Ja ya nǝfili gǝm bwaagɔ naa win swar. A gulɔ gǝmɨ n borang.

²⁸ A na nyɔ Kiristi tǝgǝn ja nǝ a twɨtǝm yulʌn naagɔ win swar, sǝ a dem bwɨlangkɛl nǝbɨɨ a lada. Yǝla bɛ bɛ, bɛtǝm na yogɔ, ke bɔ a dul demtǝm bwɨlangkɛl, bɛ sǝ ba bʊʊ nǝn nǝb nɨ yam bɛtǝm gǝnɔ lɛɨ.