Ibranii 8 - Dadiya NT

Yesu N Dalɨ Nǝkǝla Swatǝm Yaa Nyanɔ

¹ Kɛl nɨ gǝ nʊng gɔ, bǝ nǝngǝn nǝn dalɨ nǝkǝla nyɔ, wʊnɨ a yɨ a kang jajǝng kotere fɔlɔn nǝ Dʊʊ nɨ a dʌbʌl kwamaɨ.

² Dalɨ nǝkǝla nɨ maa maajɨ lɛ a Daa nɨ a Laa Sagsagɨɨ, lɔ tǝlatǝm twama na bɨlǝngkɛl wʊnɨ Tɛlalɔ a swaɨ, ke bɔ a nǝfilii.

³ Daltɔ nǝbkǝlamɔ gwam ja ya ji sǝ ja twɨ yulʌn jǝbɔ tǝlatǝm twama. Gǝ tǝgǝn, bɛ a yǝlam nyɔ gǝ nǝn jʊ nɨ gǝ tǝlam twama lɛɨ.

⁴ Na na gǝ na a yooli nɨ kǝngkɨɨ, na a yǝlam bɔ nǝkǝla. Nǝbkǝlamɔ wo n nǝbɔ tǝla twama lɛɨ kanga diilɔ a nʊngɨ.

⁵ Jǝ maa maajɨgɔ a lɔ tǝlatǝm twama nɨ n jelkalǝng lɔ nɨ a dʌbʌli. N jʊ a bwɨ Kwaama a gʊ lɔl Musaɨ nǝn kwamagɔ maam fɛkalɨ mɔtǝm lɔ tǝlatǝm twamagɔ lɛɨ, a sʊwa gɔ, “Bɛ ń kaa lɔl mʊnɔ. Bɛ ń fɛka kanjǝlɔ a yɔ tʌgo kanga mǝ sʊwa ń a dʌbʌl yemi.”

⁶ Bɨlǝngǝnɔ n wɔ, Yesu a nya maajɨ nǝkǝla nɨ a laa a nǝbkǝlamɨɨ, kanga swatǝm yaa nɨ a yǝlam a tɨbǝl bǝnɨ a laa a galɨgɨɨ, wʊnɨ ja yo gǝn a dul swatǝm yaatɨn nɨ a laa a galɨgɨɨ.

⁷ Na na swatǝm yaa tɨkǝgagɔ a gɨya bɨɨ, na mɨ kaa gola saatǝm swatǝm yaa na yogɔ wo.

⁸ Kwaama a kuwo bwɨlangkɛl jinɔ a sʊwa ji gɔ, “Kwamagɔ bɛ lɛ wo, a sʊwatǝm Tɛlalɔɨ, mǝ fɛka fɛka swatǝm yaa fɨgɔ jǝbɔ nǝbɔ Israilaɨ, jǝbɔ nǝbɔ Yahudaɨ.

⁹ N ke bɔ na swatǝm yaa nɨ mǝ maa jǝbɔ tʊgalam jini, nǝn kwama nɨ mǝ tam kang jinɔ sǝ n jǝg ji a tǝm Masarɨ. Jʊ a bwɨɨ, ja tɨ bɔ a tatǝm swatǝm yaa mǝndɨ gǝm nǝn bɨlǝngǝn. N jʊ a bwɨ mǝ yǝla jim guli, n nyʊwa Tɛlalɔ.

¹⁰ Mǝ Tɛlalɔ, n sʊwa mǝʊ, wʊnɨ nǝn gɔ swatǝm yaagɔ mǝ maa lɛ jǝbɔ nǝbɔ Israilaɨ a gul kumtɨn nɨɨ. Mǝ dǝg dǝg diil mǝndɨ a mʊgɔ nǝl jinɔ gǝm, sǝ n mʊla jim a nǝl jinɔ gǝm. Mǝ yǝlam yǝlam Kwaama jin. Ji tʌji jǝ yǝlam yǝlam nǝbam mɨ.

¹¹ Mɨsɔ nǝl mɛla nʊ nɨ gǝm lɛ jǝ yǝm dakinii gǝm jǝl. Mɨsɔ kaa sʊwa kɨla gɔ lɛ gɔ, ‘Nyǝm Tɛlalɔ!’ Jʊ a bwɨɨ nǝbɔ gwam nyǝm ɨ nyǝm ɨ, jʊ a ta a nǝb dwalǝmɔ gǝm a yɔ nǝn a nǝb dʊʊmɨ.

¹² Mǝ ji ji bʊnǝn jinɔ a shil jinɔ gǝm. Mɨsɔ mǝ bʊʊla lɛ nǝn bwɨlangkɛl jinɔ tag.”

¹³ Nǝn kwama a sʊwa kɛl a dul swatǝm yaa fɨɨ, a nʊng na tɨkǝgagɔ a yǝlam a galɨ dangǝn, jʊ nɨ gʌlo lɛɨ, sʊ gʌlonɔ lɛ. Ya la dɨltǝm lɛ dangǝn.