Ibranii 13 - Dadiya NT

Maatǝm Tɨkalɨ Nɨ Gǝ Fulo Kwaama Gǝm Nǝl Lɛɨ

¹ Bɛ jǝ́ ja kǝga a swɨtǝm kambɨɨ gǝm.

² Bɛ ka jǝ́ bǝla lɛ shigtǝm faabǝmɔ. A gola maatǝm nyɔ kaamɨ a shig bɛtɔ twama Kwaamaɨ mɨ nǝn nyǝmtǝmɨ.

³ Ya jǝ́ maa bʊʊlalɨ lɛ nǝn nǝb nɨ a lɔsomii, maamɔ ja bwa jen dakini jǝbɔ ji. Ya jǝ́ maa bʊʊlalɨ lɛ nǝn nǝb nɨ jǝ nǝ ji gaalan nɛɨ maamɔ nǝjen jǝ́ gʌ lɛɨ.

⁴ Bɛ naakanɔ a nya nǝtǝm dʊʊn, fiyodaalɨ naakanɔ a na sagsag. Nǝb bwɨlanɔ jǝbɔ nǝb bulonɔ Kwaama maa jim maa borang.

⁵ Bɛ ka bʊʊlalɨ jenɔ ya yǝlam lɛ na swɨtǝm kemʌn. Bɛ jǝ́ maa fulotǝm nǝl nǝn jʊ jǝ́ nǝnɨ, jʊ a bwɨɨ Kwaama a sʊwa gɔ, “Mɨsɔ mǝ bǝla ń nɛ wo. Mɨsɔ mǝ kɔ ń nɛ wo.”

⁶ A kɛl jʊ nɨ Kwaama a sʊwaɨ, bɛ bǝ jel nyangnyang bǝ sʊwa bǝngɔ, “Tɛlalɔ nǝn gɔ nǝ tɨkalɨ mǝndɨ. Mɨsɔ mǝ nyʊwa taal lɛ. N wɛ nǝfili maa mɨ lɛɨ?”

⁷ Bɛ jǝ́ bʊʊla nǝn nǝb dʊʊm jenɔ galɨgǝnɨ, nǝb nɨ a kiyo jem kɛl Kwaamaɨ. Jǝ́ dʌng yɨm jinɔ. Bɛ jǝ́ maa mɛlalɨ nǝn nǝtǝm bɨlǝngkɛl jinɔ.

⁸ Yesu Kiristi mɨ gǝ fʌto lɛ wo. Nǝn gɔ dʊgalǝnɨ, nǝn gɔ dwiyeni, mɨ dɨtǝm wo.

⁹ Bɛ ka kaam mɛlalɨ fɨ ya dem lɛ nǝl jenɔ. A bʊm nyɔ lǝma Kwaamaɨ nǝn gɔ yǝlam jʊ ya kʊʊ bǝm nǝl lɛɨ, ke bɔ diil a kɛl jǝjalǝn, wʊnɨ mɨ nǝn tɨkalɨ wo a nǝb nɨ a ya nǝl jinɔ tʌgoi.

¹⁰ Bǝ nǝngǝn nǝn daa twɨtǝm yulʌn, a wʊnɨ nǝb maajɨgɔ a mʊgɔ lɔ tǝlatǝm twama nɨ mɨ ji nǝn fɔlɔn jatǝm jǝjalǝn gɨɨ.

¹¹ Yʊwaltɨn nɨ dalɨ nǝkǝlagɔ gǝ do tʊʊmɔ lɛ ya tǝla a Daa nɨ a Laa Sagsagɨɨ, sǝ a saalǝm bwɨlangkɛlɨ, jǝ twɨm nam gǝnɔ a gulen.

¹² A na nyɔ Yesu tǝgǝn a nɔɔ gaalan a gul tuulɔ, sǝ a dǝg nǝbɔ a yǝlam sagsag nǝn tʊʊm gǝnɔ.

¹³ A dul kɛl nɨ, bɛ bǝ jel tǝbǝn ya bǝ nya gǝn a gulen, sǝ bǝ nɔɔ gaalanɔ ja nǝ gǝnɨ.

¹⁴ Jʊ a bwɨɨ mɨ bǝn nǝn tuulɔ nɨ mɨ dɨtǝm woi fɔ. N tuulɔ nɨ bɛ lɛ a kǝgaɨ bǝ saa lɛɨ.

¹⁵ Bɛ ya bǝ maa bǝlátǝm Kwaamaɨ lɛ a gola Yesui, bǝlátǝm nɨ na tǝlatǝm twama ya bǝ maa lɛɨ, bǝ gung dun gǝnɔ lɛ.

¹⁶ Ka jǝ́ bǝla lɛ maatǝm jǝ nyan jǝbɔ tǝgatǝm kanjǝlɔ jǝbɔ ji. Jʊtǝb nɨ a maa na tǝlatǝm twama wʊnɨ fulo Kwaama gǝm nǝl lɛɨ.

¹⁷ Jǝ́ nǝ nǝb dʊʊm jenɔ shigtǝm dul. Jǝ́ nyʊwa diil jinɔ. Nǝji jǝ tɔɔ jen nɛɨ, nǝji jǝ kiyo maajɨ jinɔ lɛ a kǝga Kwaamaɨ. Jǝ́ maa nyɔ sǝ ja maa fulotǝm nǝl a maajɨ jinɔ gǝm, ke bɔ a fitǝm nǝl. Na ja maa nǝn fitǝm nǝlɨ, mɨsɔ maa jem tɨkalɨ lɛ.

¹⁸ Jǝ́ maa nǝm keli. Nǝn nyǝm nyɔ nǝn nǝn mʊgɔ nǝl nɨ mɨsɔ nǝn nyʊwa gunidul lɛɨ. Nǝn swɨ lɛ nǝn yɨ yɨm nǝnɔ a gola nyan.

¹⁹ Mǝ kel jen nɛ nǝn bɨlǝngǝn jǝ́ maa nyɔ, sǝ n yǝla a daa jen woi dǝbǝr.

Dǝgtǝm Bwili Jǝbɔ Yaltǝm

²⁰ Bɛ Kwaama nɨ nǝ yɨm kwamɨgǝn nɛɨ, wʊnɨ a gung Tɛlalɔ bǝn Yesu a bwaaɨ, gʌleng nǝ tɔɔtǝm kwamɨ nɨ a gola tʊʊm nɨ nʊng swatǝm yaa nɨ lɛ mɨ dɨtǝm woi,

²¹ a fɛka jen a kanjǝl nyanɔ gǝm gwam, sǝ jǝ́ maa maajɨ nɨ swɨ lɛɨ, sǝ a maa maajɨ a mʊgɔ bǝn, sǝ a yǝlam jǝ bǝlátǝm a daa gǝ woi a gola Yesu Kiristii. Bɛ dʊʊlǝnɔ a ta tʌgo gwanggwang a daa gǝ woi mɨ dɨtǝm wo. A daa nyɔ.

²² Mǝ kel jen nɛ kambɔ, jǝ́ kʊ nǝl nǝn gʊtǝm lɔl mǝndɨ, jʊ a bwɨɨ mǝ mʊla jem nǝn kʌb nyɔ.

²³ Jǝ́ nyǝm, ja dem kang a kɨla bǝn Timoti gǝm. Jǝ́ kuwo i kuwo i nǝbɔ gɔ a daa jen woi na a bɛtǝnɨ.

²⁴ Jǝ́ yal nǝb dʊʊm jenɔ, jǝbɔ nǝb bwangtǝm Kwaamaɨ gwam. Nǝb nɨ fɔ a tǝm Italiyaɨ yal jen nɛ.

²⁵ Bɛ lǝmagɔ a yɨ jǝbɔ jen gwam. A daa nyɔ.