Ibranii 12 - Dadiya NT

Mwɛl Tɛlalɔɨ

¹ Na nɨ mʊrkalɨ nǝb nǝtǝm nyiyogɔ a lada nyɔ ja kang bǝn jǝ dʌng bǝn nɛɨ, bɛ bǝ tǝlam kanjǝl tuulogɔ jǝbɔ bwɨlangkɛl nɨ a ta bǝn gʊ bǝn nɛ nǝn guli, bɛ bǝ mwal sʊgɔl laakatǝm nɨ a kǝga bǝnɨ nǝn kʊtǝm nǝl.

² Bǝ ya nu bǝnɔ a daagɔ Yesu woi, gǝ nɨ n dʊʊ nǝb nǝtǝm bɨlǝngkɛlɨ, nǝn gɔ n nǝ yiitǝm gǝnɨ. Wʊnɨ n kɛl fulotǝm nǝl nɨ Kwaama a ya a kǝga gǝnɨ, a kʊ nǝl nǝn tɨya kʊʊtǝmɔ, n jǝ gunidul, a do bɔ nyɔ a dul gǝn. Kǝngkǝnɨ yǝm a kang jajǝng kotere fɔlɔn Kwaamaɨ.

³ Bɛ jǝ́ dʌng nʊ nɨ a kʊ nǝl a kii nɨ nǝb bwɨlangkɛlɔ maa gǝm lɛɨ, kage a lʊwa jen jǝ́ dem nǝl.

⁴ Kɨlan jenɔ a dul bwɨlangkɛlɨ, a la bɔ jǝ tǝla tʊʊm jenɔ lɛɨ.

⁵ Jǝ́ twabǝm kʊʊtǝm nǝl nɨ Kwaama a maa jem gɔ jǝ́ bɛtɔ lɔ gɨɨ ka? Wʊnɨ gɔ, “Bʊla mɨ, bɛ ka ń soga lɛ mwɛl Tɛlalɔɨ. Ka ń dem lɛ nǝl na mwɛ ń nɛɨ.

⁶ Jʊ a bwɨɨ Tɛlalɔ gǝ mwɛ nʊ nɨ swɨ lɛɨ. Gǝ mwɛ mwɛ nʊ nɨ gwam ga yo na bwɛɨ.”

⁷ Nɔɔtǝm gaalan nɨ jǝ́ kʊtǝn nǝl tʌgoi, n mwɛl gwam. Kwaama a ta jen jǝ́ bɛtɔ lɔ gɨɨ. N bwɛ won tɛ bwɛ mɨ gǝ mwɛ lɛɨ?

⁸ Na na ja mwɛ jen bɔ kanga jǝ mwɛm tangǝnɔ lɛɨ, na jǝ́ yǝlam bɛtɨ gulen. Jǝ́ ke bɔ bɛtɨ tɛn.

⁹ A di dwiyeni, tɛtǝlam bǝnɔ a yoolii gǝ mwɛ bǝn mwɛ, bǝ nǝ ji shigtǝm dul lɛ. A bʊm bɔ nyɔ bǝ maa Tɛ yʊwagɔ gǝm shigtǝm dul nyangǝn, sǝ bǝ nya kʊlɨ ka?

¹⁰ Ji ja mwɛ bǝn a kǝlɨ kwama nǝn dǝm nyɔ kanga ja kuwo a bʊmɨ. A Kwaamaɨ gǝ mwɛ bǝn a jʊ nɨ bʊm bǝm lɛɨ, sǝ bǝ mʊrka dul jǝbɔ gɔ a mʊgɔ sagsag gǝnɔ gǝm.

¹¹ Mwɛlɔ pʌd nǝn kwama nɔɔtǝm gǝnɨ n jǝ fitǝm nǝl. N ke bɔ jǝ fulotǝm nǝl. A gulɔ gǝm nǝb nɨ a nya mwɛl nyɨɨ, jǝ yɨ yɨ yɨm dǝngdǝng jǝbɔ yɨm kwamɨgǝn.

Gʊtǝm Lɔl A Dul Kɔtǝm Lǝma Kwaamaɨ

¹² A kɛl dul mwɛl Kwaamaɨ, jǝ́ tal bǝgǝl kang jenɔ nɨ ka lɛ kʌbkʌbi jǝbɔ duntɨn jenɔ nɨ a kwama bɨɨ.

¹³ “Jǝ́ fɛ golagɔ sɨn,” kage nʊ nɨ kenta lɛ kentaɨ a nya komʌn. Bɛ a nya gungtǝm.

¹⁴ Jǝ́ yɨ yɨm kwamɨgǝn jǝbɔ nǝbɔ pʌd. Bɛ jǝ́ yɨ yɨm sagsag. Na mɨ nyɨɨ, mɨ nʊ nɨ wo kuwo Tɛlalɔ lɛɨ.

¹⁵ Bɛ jǝ́ fɛ jǝ́ dʌng, mɨ nʊ nɨ wo lɛ nyatǝm lǝma Kwaamaɨ lɛɨ, kage kaa nǝ nʌl tuuli a na a kʊm jen, a bɛ nǝn kutʌm jǝbɔ kaltǝm nǝbɨɨ a lada.

¹⁶ Ka kaa nǝl ya yǝlam lɛ nǝ bulon jǝbɔ nǝ kɔtǝm Kwaamaɨ na Isuwa, wʊnɨ n kɛl jatǝm jǝjalǝn naagɔ win a miyo dʊʊn bʌtʌm gǝnɨ.

¹⁷ Jǝ́ nyǝm, nǝn gul a swɨ sǝ gǝ ja kʊla bwili nɨɨ, nǝngɔ ja kɔ gǝnɨ, jʊ a bwɨɨ, a nya bɔ gola a yǝla a bǝla bwɨlangkɛl gǝnɔ. A tɨtǝn saatǝm gǝnɔ nǝn mwɛ num sul, a nya bɔ.

¹⁸ Jǝ́ bɛ bɔ a daa nɨ a maa na Yem Sinai wʊnɨ jǝ́ ke lɛɨ, ja kǝla lɛ a duddugi, jǝbɔ yʊwa bwɨlaɨ,

¹⁹ a yɔ nǝn a guutǝm jum, jǝbɔ kaa diil nɨ sʊwa kɛl lɛɨ, nǝb nɨ a nyʊwaɨ ja kela gɔ jǝ swɨ bɔ jǝ nyʊwa kɛl nɨ tag.

²⁰ Ja kel nyɔ, jʊ a bwɨɨ, ja mwɨ bɔ ja bwangtǝn diil nɨ a sʊwa gɔ, “Gwam jʊ nɨ a ke yem nɨɨ, na n yʊwalɨ, na n nǝfilii, bɛ ja mala gǝn nǝn tɛl ja jʌ.”

²¹ A kuwotǝm jʊ nɨ n jǝ taal dangǝn! Nǝngɔ Musa a sʊwa gɔ, “Bʊtɔ mɨ ka lɛ kʌbkʌb nǝn taal bwɨla.”

²² A jenɔ jǝ́ bɛ, jǝ́ la Yem Sihiyonagɔ jǝbɔ Urushalima dʌbʌl kwamagɔ, tuulɔ Kwaama kʊlɨɨ. Jǝ́ bɛ a daagɔ bɛtɔ twama Kwaamaɨ, fʊlkʊblǝntɨn a mʊrka a mʊgɔ nyʊwatǝm fulotǝm nǝlɨ.

²³ Jǝ́ la mʊrkalɨ nǝb bwangtǝm Kwaamaɨ nɨ a jo nǝn tɨkǝgaɨ, nǝb nɨ ja mʊla dun jinɔ a dʌbʌl kwamaɨ. Jǝ́ bɛ a daagɔ Kwaama woi, wʊnɨ nǝn gɔ maa nǝfitʌmɔ gǝm borang lɛ gwamɨ. Jǝ́ bɛ a daagɔ dʊʊmɨ nǝfitʌm nɨ dǝngdǝngɨ, nǝb nɨ Kwaama a dǝg ji mɨ nǝn dutoi.

²⁴ Jǝ́ la daagɔ Yesu woi, nʊ nɨ a tɨbǝl swatǝm yaa fɨɨ. Jǝ́ la daa tǝlatǝm tʊʊm nɨ sʊwa kɛl bʊmǝn nɛɨ, wʊnɨ a laa tʊʊm Habilaɨ.

²⁵ Jǝ́ fɛ jǝ́ dʌng kage jǝ́ kɔ Kwaama nɨ sʊwa kɛl nɨ lɛɨ. Na nǝb nɨ a kɔ nyʊwatǝm nʊ nɨ gʊ jim lɔl lɛ a yooli nɨɨ ja bʊʊ bɨɨ, la maa nyǝn bǝ bʊʊ lɛɨ, na bǝ kɔ nʊ nɨ gʊ lɔl bǝnɔ lɛ a dʌbʌl kwamaɨ?

²⁶ Nǝn kwama gɔ diil gǝnɔ a mǝg yooligɨɨ, kǝngkɔ a swa yaa, gɔ, “A bǝla naagɔ win tag, ke bɔ yooli kwaagɔ mǝ mǝg lɛɨ, dʌbʌl kwamagɔ wo tǝgǝn.”

²⁷ Sʊwatǝm kɛlɔ gɔ, “A bǝla naagɔ win tag” a nʊng tʊngatǝm kanjǝl nɨ ja mǝg mǝgɨ, kanjǝl nɨ ja fwal fwalɨ, sǝ kanjǝl nɨ mɨ gǝ mǝga lɛɨ a tɨ nǝn kwaan mɨ mǝgatǝm wo.

²⁸ A dul kɛl nɨ, bɛ bǝ buu kang, jʊ a bwɨɨ bǝ nya nya fɔlɔn nɨ mɨ mǝgatǝm woi. A na nyɔ tag bǝ maa Kwaama gǝm bǝlátǝm, jǝ yotǝm, nǝn taal jǝbɔ nǝtǝm dʊʊn nyan.

²⁹ Jʊ a bwɨɨ, “Kwaama bǝnɔ n kǝla nɨ twɨm kanjǝlɔ lɛ gwamɨ.”