Galatiya 6 - Dadiya NT

Jǝ́ Maa Kambɔ Gǝm Tɨkalɨ

¹ Kambɔ, na jǝ́ nya kaa nǝl a mʊgɔ bwɨlangkɛlɨ, jen nɨ jǝ́ yii nǝn Yʊwa Kwaamaɨ, bɛ jǝ́ yǝla jǝ́ bɛ nǝn gɔ a mʊgɔ gola nya nǝn yʌbtǝm dul. Bɛ jen tʌjen jǝ́ dʌng dul jenɔ, kage jǝ́ nya tɛltǝm a maatǝm bwɨlangkɛl.

² Jǝ́ tɨkaka a mʊgɔ gaalan. Maatǝmɔ nyɨɨ, jǝ́ yii yii diil Kiristii.

³ Na kaa nǝl do dul gǝnɔ lɛ gɔ gǝ kaa jǝlɨ, gǝ ke bɔ kaa jǝl, gǝ swag dul gǝn.

⁴ Bɛ jǝ́ tɛl maajɨ jenɔ win win gwam jenɔ. Na a bʊmɨ, sǝla jǝ́ maa lɨyal jǝbɔ jʊ nɨ mʊ maa nǝn dul mʊnɨ, mɨsɔ mʊ nʊng dul mʊnɔ lɛ jǝbɔ kaa nǝl.

⁵ Bɛ gwam jenɔ win win jǝ́ do kʊlǝn jenɔ.

⁶ Nʊ nɨ ja mɛla gǝm kɛl Kwaamaɨ, bɛ ga tǝga jǝ nyan nɨ gwam gǝ nǝnɨ jǝbɔ nʊ nɨ a mɛla gǝmɨ.

⁷ Ka ja swag jen nɛ. Mɨ jǝ mog Kwaama lɛ. Jʊ nɨ nǝl a kwalɨ, nǝn gɔ gǝ kʌso lɛɨ.

⁸ Nʊ nɨ a kwal kwala a wɛl swɨtǝm nǝl gǝnɨ, nǝn gɔ yɔ lɛ nǝn gɔ a kʌsotǝm bwaaɨ. Nʊ nɨ a kwal kwala nɨ fulo Yʊwa Kwaamaɨ gǝm nǝl lɛɨ, nya nya kʌsotǝm kʊlɨ nɨ mɨ dɨtǝm woi.

⁹ Bɛ ka bʊtɔ bǝnɔ ya yʌb lɛ a maatǝm maajɨ nya. Na a lʊwa bǝn bɔ bǝ gɨyaɨ, kwamagɔ bɛ lɛ wo bǝ kʌso kʌso bwili.

¹⁰ Gǝ na nyɔ, nǝn kwama nɨ bǝ nya golaɨ, bɛ bǝ maa nǝbɔ gǝm pʌd jǝ nya, bɛ bǝ fɛ bǝ maa nǝb bwangtǝm nɨ gǝm a nǝ bɨlǝngkɛlɨ.

Bulus A Gʊ Lɔl Jǝbɔ Yalkatǝm

¹¹ Bɛ jǝ́ dʌng mʊlalɨ dʊʊlantɨn nɨ mǝ maa jem lɛ nǝn kang mǝndɨ!

¹² Nǝb nɨ swɨ lɛ a dǝg jen biyotǝm mwɛn nǝn kwaanɨ, jǝ swɨ lɛ ja kuwo ji jǝ kaa jǝl a kǝga nǝbɨɨ. Jʊ a bwɨ jǝ maa jem lɛ nyɨɨ, jǝ mwal nyʊwatǝm gaalan nɨ jǝ maa jim lɛ a dul kʊʊtǝm Kiristii.

¹³ Nǝb nɨ jǝ maa jim biyotǝm mwɛnɨ, mɨ jǝ kɨla diil Musaɨ lɛ. N swɨtǝm jin gɔ jǝ biyo jem mwɛn, sǝ jǝ maa sʊtɔ nǝn jen gɔ jǝ biyo jem mwɛn.

¹⁴ Mɨsɔ mǝ maa sʊtɔ lɛ wo, na ke bɔ a dul kʊʊtǝm Tɛlalɔ bǝn Yesu Kiristii, wʊnɨ a dul bwaa gǝn a tɨya kʊʊtǝm mǝ tǝlam kanjǝl yooli nɨɨ, yooli nɨ a tǝlam kanjǝl mǝndɨ.

¹⁵ Biyotǝm mwɛn jǝbɔ mɨ biyotǝm mwɛn wo mɨ ji a nyiyo kaa jǝl. Jʊ a nyiyo jǝlɨ nǝn gɔ fwaltǝm fɨ, nǝn gɔ a nyiyo jǝlɨ.

¹⁶ Bɛ lǝmagɔ jǝbɔ jitǝm bʊnǝnɔ a yɨ jǝbɔ nǝb nɨ gwam bwangtǝn diiltɨn nɨ lɛɨ. Nǝb nɨ nǝn gɔ nǝb Israilaɨ bɨlǝngǝn a Kwaamaɨ.

¹⁷ A kǝga nɨ ka kaa nǝl ya yǝla lɛ a kom i tag, jʊ a bwɨɨ a bʊtɔ mɨ kʊlan dɛɛltɨnɔ wo nʊng lɛ gɔ mǝ bwɛ jwaalɛ Yesui.

¹⁸ Kambɔ, bɛ lǝma Yesu Kiristii Tɛlalɔ bǝn, a kɨla kʊlɨ jenɔ. A daa nyɔ.