Galatiya 4 - Dadiya NT

¹ Jʊ mǝ sʊwa lɛɨ nǝn gɔ, nǝ jatǝm kʊla na gɔ a lɔ bwɛsǝnɨ, ga laa bɔ bwɛ jwaalɛ, bǝ nyǝm sul kʊlagɔ na a gɔ.

² Gǝ na a kang nǝb yotǝm gǝnɨ jǝbɔ nǝb tɨkalɨgɔ, a yɔ nǝn a kwama nɨ nʊ nɨ a bʌ gǝnɨ a jǝla nǝnɨ.

³ A na nyɔ a daa bǝn woi. Nǝn kwama Kiristi lǝga bɔ a bɛɨ, bǝ na na bɛtɨ, bǝ na a mʊgɔ jwaalɛn a jǝfʊlǝn yooli nɨ gǝm.

⁴ Nǝn kwama nɨ kwamagɔ a la dangǝnɨ, nǝngɔ Kwaama a twam Bʊla gɔ wʊnɨ nɔɔlɨ a bʌi, bʌtʌm a mʊgɔ diil.

⁵ A maa nyɔ sǝ a jǝg dul nǝb nɨ a mʊgɔ diili, sǝ a dǝg bǝn bǝ yǝlam bɛtɔ lɔ Kwaamaɨ.

⁶ Jʊ a bwɨɨ jǝ́ bɛtɔ lɔ gɨɨ, Kwaama a twam Yʊwa Bʊla gɨɨ a mʊgɔ nǝl bǝnɨ, Yʊwagɔ jo jangajǝl lɛ gɔ, “Tɛtɛ, Tɛtɛ!”

⁷ Kǝngkǝnɨ jǝ́ ke bɔ bɛtɔ jwaalɛn tag, jǝ́ bɛtɔ bʌlʌng. Jǝ́ yǝlam bɛtɔ bʌlʌng, Kwaama a dǝg jen jǝ́ nǝb jatǝm kʊla.

Jʊ A Kom Bulus Jǝbɔ Nǝbɔ Galatiyaɨ

⁸ Galɨgǝn jǝ́ nyǝm bɔ Kwaamaɨ, jǝ́ yǝlam jwaalɛb a bwangtǝm shom jǝbɔ jǝfʊlǝntɨn, kanjǝl nɨ mɨ a nyiyo jǝlɨ.

⁹ Kǝngkɔ jǝ́ nyǝm Kwaamaɨ, mǝ sʊwa sʊwa mǝʊ Kwaama a nyǝm jen, n wɛ a bwɨ jǝ́ yǝla lɛ a jǝfʊlǝn nɨ mɨsɔ sɔl jem bʊnǝn nɛɨ, jǝ́ swɨ lɛ jǝ́ yǝlam bɛtɔ jwaalɛn jin tag ka?

¹⁰ N wɔ bwangtǝm jǝfʊlǝn kɔkɔtɨnɔ, jǝbɔ bwaalatɨnɔ, jǝbɔ kwamatɨnɔ, jǝbɔ joltɨnɔ mɨ gǝ shu jen nɛ!

¹¹ Jǝ́ nɨ ɨ taal, gaalan nɨ mǝ gʌ a dul jeni, a yɔ nǝn kwan!

¹² Mǝ kela jen nɛ, kambɔ, jǝ́ yǝlam na mǝ, jʊ a bwɨɨ mǝ tǝmɨ n yǝlam na jen. Jǝ́ maa mɨ bɔ kaa bwɨlangkɛl wo.

¹³ Jǝ́ nyǝm twɨla nɨ mǝ maaɨ, nǝn gɔ a bɛ nǝn gola tɨtǝm mǝndɨ a daa jen woi, mǝ bɛ jem nǝn fulon kɛl lǝmɨ nɨ nǝn tɨkǝgaɨ.

¹⁴ Bʊtɔ mǝndɨ nɨ mɨ kwamɨgǝnɨ a yǝlam jem tɛltǝm a lada, jǝ́ kɔ bɔ yotǝm mǝndɨ. A bɨtǝnɨ, jǝ́ yo i maamɔ mǝ bwɛ twama Kwaamaɨ nɨ a dʌbʌli. Jǝ́ yo i maamɔ nǝn Kiristi Yesu nǝn kang gǝn.

¹⁵ Jǝ́ nyʊwa lǝma a kwama gɔ. Kǝngkɔ lǝmagɔ jǝ́ nyʊwa a dul mɨɨ n fee? Mǝ nǝn kang mɨ mǝ sʊwa sʊwa mǝʊ na na gola woi, na jǝ́ kʊʊta nu jenɔ jǝ́ nɨ ɨ!

¹⁶ N yǝlam nǝ kii jen kanga mǝ sʊwa jen bɨlǝngkɛlɨ ka?

¹⁷ Nǝb nɨ swɨ lɛ a nʊng jen swɨtǝmɨ, ke bɔ jʊ a nǝl jini. Jǝ swɨ lɛ jǝ wʊlaka kʊm jenɔ jǝbɔ nǝn, sǝ jǝ́ swɨ jii.

¹⁸ A bʊm nyɔ bǝ nʊng swɨtǝm, na gǝ na gola nyanɨ. Bɛ a yǝlam nyɔ kwangkwang. Ka yǝlam lɛ nǝn kwama mǝ dakini nǝbɔ jeni kwaagɔ.

¹⁹ Jǝ́ bɛtɔ lɔ mɨɨ dwalǝnɔ, mǝ yǝla mǝ nɔɔ nɔɔ gaalan a dul jen na nɔɔlɨ nɨ bʌ bʌl lɛɨ, ba la nǝn a kwama nɨ jǝ́ yǝlam lɛ na Kiristii!

²⁰ N swɨ n na nǝbɔ jen kǝngkɔ, sǝ n fʌto diil mǝndɨ, jʊ a bwɨɨ n nya komtǝm a kɛl dul jen.

Mʊsǝn Kɛl A Dul Hajaratui Jǝbɔ Saratu

²¹ Bɛ jǝ́ sʊwa ɨ, jen nɨ jǝ́ swɨ lɛ jǝ́ bwangtǝn diil Musaɨ, jǝ́ nyʊwa bɔ jʊ diil Musaɨ a sʊwaɨ ka?

²² A mʊla mʊlaɨ sʊwa lɛ gɔ, Ibrahim nǝngǝn nǝn bɛtɔ batǝnɔ yo. Wini na a bwɛn jwaalɛgɨɨ, a wini na a nɔɔlɨ nɨ a mʊgɔ yɨm dul gǝnɨ.

²³ Bwɛ balɨ bwɛn jwaalɛ nɨɨ, ja bʌ gǝn a gola bʌl nyan. Bwɛ balɨ nɔɔlɨ naatǝmɔ, ja bʌ gǝn a gola yiitǝm swatǝm yaa Kwaamaɨ.

²⁴ Jʊ nɨ gǝ nʊng mʊsǝn. Nɔɔtǝm nɨ jǝ nʊng swatǝm yaa yo. Win jʌng gǝnɔ n Yem Sinai, wʊnɨ bʌ bɛtɔ jwaalɛn nɛɨ. Nǝn gɔ nǝn Hajaratu.

²⁵ Hajaratu gǝ nʊng Yem Sinai a tǝm Larabawagɨɨ. Nǝn gɔ nʊngtǝm Urushalima a kǝngkɨɨ, jʊ a bwɨɨ gɔ jǝbɔ bɛtɔ lɔ gɨɨ jǝ jwaalɛb.

²⁶ Urushalima dʌbʌlɔ, n yɨm dul gǝn. Nǝn gɔ tag nǝn nɛnɛ bǝnɨ.

²⁷ A mʊla mʊlaɨ sʊwa lɛ gɔ, “Maa fulotǝm nǝl, mɔ nɔɔlɨ jolʌm, mɨ mʊ bʌ bʌl lɛ. Ga kwaalɨ, mʊ nɨ mʊ nyʊwa bɔ bɔɔla bʌtʌm bʌl woi, jʊ a bwɨɨ nɔɔlɨ nɨ bwɨla gɔ a mwal a bǝla gǝnɨ, bɛtɔ lɔ gɨɨ a laa a nɔɔlɨ nɨ nǝn balɨɨ.”

²⁸ Kambɔ, bǝn bǝ bɛtɨ swatǝm yaa na Ishakui.

²⁹ Kanga nɨ galɨgǝn, gǝ nɨ ja bʌ gǝn a gola bʌl nyanɨ, a nǝ gaalan a nʊ nɨ ja bʌ a dul kwaan Yʊwaɨ, gǝ na nyɔ kǝngkǝnɨ tag.

³⁰ Mʊlalɨ kɛl Kwaamaɨ a sʊwa gɔ wɛ? A sʊwa gɔ, “Kaa nɔɔlɨ bwɛn jwaalɛ nɨ jǝbɔ bwɛ balɨ gǝnɔ, jʊ a bwɨɨ, bwɛ balɨ bwɛn jwaalɛɨ nɨ mɨsɔ ja kʊla lɛ jǝbɔ bwɛ balɨ nɔɔlɨɨ nɨ nǝn yɨm duli.”

³¹ Gǝ na nyɔ kambɔ, bǝn bǝ ke bɔ bɛtɔ lɔ bwɛn jwaalɛ nɨ. Bǝ na a nɔɔlɨ nɨ nǝn yɨm duli.