Filimon 1 - Dadiya NT

Yaltǝm

¹ Nǝmǝ mǝ Bulus bwɛ lɔsomii, a kɛl dul Yesu Kiristii, jǝbɔ Timoti kɨla bǝn. Nǝn mʊla Filimon gǝm langǝn bwangǝn nɨ lɛɨ, fwalɨ nyan bǝnɔ jǝbɔ fwalɨ maajɨ bǝnɔ.

² Nǝn mʊla Aufiya gǝm lɛ tǝgǝn kɨla bǝn nɔɔlɨgɔ, jǝbɔ Arkibus fwalɨ gaalan bǝnɔ, jǝbɔ mʊrkalɨ nǝb bwangtǝm Kwaamaɨ nɨ mʊrka lɛ a lɔ mʊɨ.

³ Bɛ lǝmagɔ jǝbɔ yɨm kwamɨgǝn a yɨ jǝbɔ jen a daagɔ Tɛtɛ bǝn Kwaama woi jǝbɔ Tɛlalɔ Yesu Kiristi.

Swɨtǝm Filimoni Jǝbɔ Nǝtǝm Bɨlǝngkɛl Gǝnɔ

⁴ Kwangkwang mǝ buu buu Kwaama mǝndɨ gǝm kang na n bʊʊla nǝn mɔ a mʊgɔ kelitɨn mǝndɨ gǝmɨ,

⁵ jʊ a bwɨɨ, n nyʊwa kɛl nǝtǝm bɨlǝngkɛl mʊnɔ a mʊgɔ Tɛlalɔ Yesui jǝbɔ swɨtǝm mʊnɔ mʊ maa nǝb sagsagɔ gǝm lɛɨ.

⁶ Mǝ maa keli lɛ, bɛ ń tɨ nǝn kwaan a sʊwatǝm nǝtǝm bɨlǝngkɛl mʊnɔ gǝm, sǝ ń nya nyǝmtǝm kanjǝl nyan nɨ gwam bǝ nǝn a mʊgɔ Kiristii.

⁷ N maa fulotǝm nǝl dangǝn, jǝbɔ sʊtǝm kwaan a swɨtǝm mʊnɔ gǝm kɛgɔ, jʊ a bwɨɨ ń kʊʊ nǝb sagsagɔ gǝm nǝl.

Bulus A Maa Keli A Kɛl Dul Onisimusi

⁸ N jʊ a bwɨ a mʊgɔ Kiristii maa maa nyɔ mɨ taal wo n dǝg ń ń maa jʊ nɨ a daa tʌgo ń maaɨ.

⁹ A kɛl dul swɨkan, a bʊm nyɔ n kela ń ń maa nyɔ, mǝ, Bulus dʊʊ, n wɔ kǝngkɔ tag mǝ bwɛ lɔsomii a kɛl dul Yesu Kiristii.

¹⁰ Mǝ kela ń nɛ a kɛl dul bʊla mɨ Onisimusi, wʊnɨ mǝ yǝlam tɛtɛ gɔ nǝn kwama ja bwa ɨ a lɔsomii.

¹¹ Galɨgǝn mɨ nǝn tɨkalɨ a daa mʊ woi. Kǝngkǝnɨ nǝn tɨkalɨ a daa bǝn woi, mǝ jǝbɔ mɔ.

¹² Mǝ twam gǝn nɛ, n nʊ nɨ a nǝl mɨ dangǝnɨ, yilo a daa mʊ woi.

¹³ Na mǝ swɨ swɨ n ta gǝn a daa mɨ woi, sǝ a do nyiyo mʊnɔ a mʊgɔ tɨkalɨ mǝndɨ, nǝn kwama ja bwa ɨ a mʊgɔ lɔsomi a dul fulon kɛl lǝmɨɨ.

¹⁴ Mǝ swɨ bɔ n maa kanjǝl nɨ mɨ nǝn jǝlatǝm mʊn, kage jǝ nyan nɨ mʊ maaɨ a yǝlam nǝn kwaan, ke bɔ nǝn swɨtǝm mʊn.

¹⁵ Kɛna n jʊ a bwɨ a wʊlaka jǝbɔ mɔ a kʊtam dǝmɨ, sǝ ń nya gǝn a yǝla a bɛ a daagɔ mʊ woi mɨ wʊlakatǝm wo tag.

¹⁶ Kǝngkɔ n ke bɔ bwɛ jwaalɛ. A laa bwɛ jwaalɛ. N kɛ nǝ swɨtǝm a daa mɨ woi. A mʊnɔ a shu nyɔ a gola bʊtɔ jǝbɔ gola Tɛlalɔɨ.

¹⁷ A dul kɛl nɨ, na ń do i na fwalɨ yɨm mʊnɨ, bɛ ń yo gǝn kanga mʊ yo i.

¹⁸ Na a maa mʊn kaa bwɨlangkɛlɨ, na mʊ bwang gǝm naan nɛɨ, bɛ ń dǝg ɨ n ywa ń.

¹⁹ Nǝmǝ mǝ Bulus, mǝ mʊla mʊn jʊ nɨ lɛ nǝn kang mɨɨ. Mǝ yǝla mǝ ywa ń ywa ń. Mɨsɔ mǝ sʊwa lɛ mǝʊ mǝ bwang mʊn naan kʊlɨgɔ lɛ mʊ nya a kang mɨɨ.

²⁰ Kɛgɔ, mǝ swɨ lɛ n nya tɨkalɨ a daa mɔ woi a mʊgɔ Tɛlalɔɨ. Bɛ ń fulo mɨ nǝl a mʊgɔ Kiristii.

²¹ N jǝla nǝn mɔ, mʊ nyʊwa ɨ nyʊwa ɨ. N jʊ a bwɨ mǝ mʊla mʊn nɛɨ, n nyǝm mʊ maa maa a laa jʊ nɨ mǝ sʊwaɨ.

²² Kaa jʊ wɔ: Bɛ ń fɛka mɨ kan shigtǝmɔ, jʊ a bwɨɨ mǝ ya nǝl lɛ ja nɨ ɨ gola n yɔ a daa jen woi a kɛl dul maatǝm keli jenɔ gǝm.

Dɨltǝm Yaltǝmɔ

²³ Abafaras, fwalɨ yɨm lɔsomi mǝndɨ a kɛl dul Kiristi Yesui, yal ń nɛ.

²⁴ A na nyɔ tag, Markus, jǝbɔ Aristarkus, jǝbɔ Dimas jǝbɔ Luka fatǝm maajɨ mǝndɨɨ, jǝ yal ń nɛ.

²⁵ Bɛ lǝma Tɛlalɔ Yesu Kiristii a ta tʌgo gwanggwang a nǝl jenɔ gǝm.