Filibii 4 - Dadiya NT

Jǝ́ Maa Fulotǝm Nǝl Nǝn Tɛlalɔ

¹ Kɛtǝlam mɨ nɨ mǝ swɨ lɛɨ, wʊnɨ mǝ maa gom kuwotǝm jenɔ lɛɨ. Nǝjen jǝ́ jǝ fulotǝm nǝl mǝndɨ jǝbɔ dwang dul nɨ mǝ yo a dul maajɨ mɨɨ. Jǝ́ yɨ nǝn bɨlǝngkɛl a daa Tɛlalɔ woi.

² N gʊ Afodiya gǝm lɔl jǝbɔ Sintiki mǝʊ, ja yɨ yɨm nya dakini, ja bǝla gʊbkatǝmɔ wo, jʊ a bwɨɨ jǝ na a Tɛlalɔɨ.

³ Mʊ fwalɨ maajɨ mɨ, mǝ kela ń nɛ, bɛ ń tɨka nɔɔtǝm nɨ ja maa maajɨ jǝbɔ mǝ jǝbɔ Kilemas jǝbɔ tangǝn fatǝm maajɨ mǝndɨ a dul fulon kɛl lǝmɨ. Duntɨn jinɔ a mʊgɔ langǝn bwangǝn kʊlɨ.

⁴ Bɛ jǝ́ maa fulotǝm nǝl kwangkwang nǝn Tɛlalɔ. Mǝ sʊwa jen nɛ tʌgo tag, jǝ́ maa fulotǝm nǝl!

⁵ Bɛ nǝbɔ gwam a kuwo shigtǝm dul jenɔ. Bɛtǝm Tɛlalɔɨ a dwama.

⁶ Ka jǝ́ kom lɛ dul jenɔ a dul kaa jǝl. Bɛ jǝ́ kela Kwaama jʊ jǝ́ swɨ lɛɨ. Bɛ jǝ́ buu gǝm kang a kanjǝlɔ gǝm gwam a maa jemi.

⁷ Dɨsɔ lǝma Kwaamaɨ wʊnɨ a laa nyǝmtǝm bǝnɔ gwamɨ, a tɔɔ nǝl jenɔ jǝbɔ bʊʊlalɨ jenɔ a mʊgɔ Kiristi Yesui.

Jǝ́ Maa Bʊʊlalɨ Nǝn Kanjǝl Nɨ

⁸ A dɨltǝmɔ gǝmɨ kambɔ, jǝ́ maa bʊʊlalɨ a jʊ nɨ n bɨlǝngkɛlɨ, jǝbɔ jʊ nɨ na nǝtǝm dʊʊnɨ, jǝbɔ jʊ nɨ dǝngdǝngɨ, jǝbɔ jʊ nɨ sagsagɨ, jǝbɔ jʊ nɨ na swɨtǝmɨ, jǝbɔ jʊ nɨ a daa tʌgoi, jǝbɔ jʊ nɨ a la nǝtǝm dʊʊn jǝbɔ bǝlátǝmɨ. Jǝ́ maa bʊʊlalɨ a dul kanjǝl nɨ gǝm gwam.

⁹ Jʊ nɨ jǝ́ mɛlaɨ, jǝbɔ jʊ nɨ jǝ́ yoi, jǝbɔ jʊ nɨ jǝ́ nyʊwaɨ, jǝbɔ jʊ nɨ jǝ́ kuwo a daa mǝ woi, bɛ jǝ́ ya a mɛlalɨ. Na jǝ́ maa nyɨɨ, Kwaama nǝ nǝtǝm lǝma yɨ yɨ jǝbɔ jen.

Buutǝm Kang A Nǝtǝm Lǝma Jenɔ Gǝm

¹⁰ N maa fulotǝm nǝl nǝn Tɛlalɔ dangǝn, jʊ a bwɨɨ jǝ́ yǝla jǝ́ tǝl dʌngtǝm nɨ jǝ́ maa mɨ lɛɨ tʌgo. N nyǝm galɨgǝn jǝ́ bʊʊla lɛ nǝn mǝ a nǝl jen, jǝ́ nya bɔ gola nʊngtǝm gǝnɔ.

¹¹ Mǝ ta bɔ fɨɨ nǝn jʊ nɨ mǝ nya lɛɨ. N mɛla yɨm boga fʌl a golantɨnɔ gwam mǝ nya dul mɨ woi.

¹² N nyǝm jʊ nɨ a ja bʊnǝnɨ jǝbɔ nyatǝmɨ, n nyǝm yɨm gola kanjǝlɔ gwam. N kwɛl n mɛla yɨm jʊwan jǝbɔ boga fʌl, yɨm nyatǝm jǝbɔ yɨm bʊnǝn.

¹³ Mǝ dwal dwal n maa kanjǝlɔ gwam a dul nʊ nɨ nɨ ɨ kwaan nɛɨ.

¹⁴ Tɨkalɨgɔ jǝ́ maa mɨ nǝn kwama mǝ a mʊgɔ gaalanɨ, a bʊmbʊr.

¹⁵ Jǝ́ nǝbɔ Filibii jǝ́ kwɛl jǝ́ nyǝm nǝn kang jen nǝn kwama mǝ tǝlǝm kiyotǝm fulon kɛl lǝmɨ nɨ a Makidoniyaɨ, nǝn kwama mǝ bǝlam daa gɨɨ, mɨ nǝn kaa mʊrkalɨ nǝb bwangtǝm Kwaamaɨ nɨ a maa mɨ tɨkalɨɨ, na ke bɔ jeni.

¹⁶ Nǝn kwama nɨ mǝ a tǝm Tasalonikaɨ, jǝ́ twam mɨ tɨkalɨ ke bɔ naagɔ win, ke bɔ naagɔ yo.

¹⁷ Mǝ sʊwa bɔ mǝʊ mǝ saa lǝma a daa jen woi. Mɨ nyɔ. Mǝ swɨ lɛ jǝ́ nya jʊ nɨ sʊ jem bwili lɛ a nǝtǝmɔ jǝ́ maa lɛɨ.

¹⁸ Ja ywa ɨ kanjǝlɔ gwam, a shu kwaan. N nyʊwa lǝma dangǝn nǝn tɨkalɨgɔ jǝ́ twam mɨ a kang Abafaroditasɨ. A maa na jǝ twɨtǝm yulʌn nɨ nǝn kunʌn nyaɨ, jǝ yotǝm wʊnɨ fulo Kwaama gǝm nǝl lɛɨ.

¹⁹ Kwaama mǝndɨ nǝn gɔ nǝ jen kanjǝlɔ lɛ gwam jǝ́ saa lɛɨ, a dʊʊlǝn nyatǝm gǝnɔ gǝm a mʊgɔ Kiristi Yesui.

²⁰ Bɛ dʊʊnɔ a yɨ nyɔ a daagɔ Kwaama Tɛtɛ bǝn woi, mɨ dɨtǝm wo! A daa nyɔ.

Dɨltǝm Yaltǝmɔ

²¹ Jǝ́ yal nǝb sagsagɔ gwam, nǝb nɨ na a Kiristi Yesui. Kɛtǝlamɔ nǝn dakinii, jǝ yal jen nɛ.

²² Nǝb sagsagɔ gwam yal jen nɛ. Nǝb nɨ a lɔ fɔlɔ Kaisarɨ yal jen nɛ dangǝn.

²³ Bɛ lǝma Tɛlalɔ Yesu Kiristii a yɨ nyɔ a mʊgɔ nǝl jen.