Filibii 2 - Dadiya NT

Mɛlalɨ Nǝn Shigtǝm Dul Kiristii

¹ Kiristi a kʊʊ jem nǝl. Swɨtǝm gǝnɔ a yʌb jem nǝl. Yʊwa Kwaamaɨ a mʊrka jen. Jǝ́ nʊngka bʊnatǝm jǝbɔ swɨkan.

² Bɛ jǝ́ dǝg fulotǝm nǝl mǝndɨ a yii. Jǝ́ yɨ nǝn jǝlakatǝm jǝbɔ swɨkan a kʊm jen. Jǝ́ mʊrka dul, bʊʊlalɨ jenɔ win.

³ Ka jǝ́ maa lɛ swɨtǝm dul jǝbɔ gungtǝm dul. Jǝ́ na nǝn shigtǝm dul. Jǝ́ do nǝbɔ a laa jen laaɨ.

⁴ Bɛ ka jǝ́ ya lɛ kaa maajɨ dul jen a kǝga. Bɛ ya jǝ́ maaka tɨkalɨ lɛ.

⁵ Bɛ jǝ́ maa bʊʊlalɨ na a Yesu Kiristii a maaɨ,

⁶ wʊnɨ n jelkalǝng Kwaamaɨ. Jelkalǝng gǝnɔ na Kwaamaɨ, a dǝg gǝn bɔ a do jʊ nɨ gǝ tɨtǝn nɛ tʌgoi.

⁷ A bǝla kanjǝlɔ gwam a gul. A do jelkalǝng bwɛ jwaalɛɨ dangǝn. Ja bʌ gǝn na nǝfili.

⁸ A yǝlam nǝfili, a shig dul gǝnɔ. A bwangtǝn Kwaama. A yɔ nǝn gɔ a bwaa. A bʊla bwaa na nǝ bwɨlangkɛl a dʌbʌl tɨya kʊʊtǝm!

⁹ A na nyɔ Kwaama a gung gǝn a dʌbʌli, a nǝ gǝn dun nɨ a laa tangǝn duntɨnɔ gwamɨ,

¹⁰ sǝ a mʊgɔ dun Yesui, nǝbɔ gwam jʊng jʊng nǝn dun a dʌbʌl, jǝbɔ tǝm, jǝbɔ mʊgɔ tǝm.

¹¹ A maa nyɔ tag sǝ nyiyotɨnɔ gwam a sʊwa gɔ Yesu Kiristi nǝn Tɛlalɔ, sǝ ja dʊʊl Kwaama Tɛtɛ.

Nyalǝm A Mʊgɔ Yooli

¹² Jǝ́ nǝbɔ mǝ swɨ lɛɨ, kwangkwang jǝ́ bwangtǝn diil mǝndɨ lɛ kwama bǝ dakinii. Kǝngkǝnɨ mɨ bǝ dakini, bɛ maajɨ jenɔ a laa nyɔ. Bɛ jǝ́ maa maajɨ nɨ bʊʊ lɛ nǝn jeni nǝn taal jǝbɔ katǝm bʊtɔ.

¹³ Kwaama a maa maajɨ a nǝl jen. Nǝn gɔ nǝ jen swɨtǝmɔ lɛɨ jǝbɔ kwaan, sǝ jǝ́ maa jʊ nɨ fulo gǝm nǝl lɛɨ.

¹⁴ Bɛ jǝ́ maa kanjǝlɔ gwam mɨ kʊngatǝm wo jǝbɔ gʊbkatǝm.

¹⁵ Jǝ́ maa nyɔ sǝ jǝ́ yǝlam nǝb nɨ mɨ nǝn jǝ tuwoli, nǝb sagsag, bɛtɔ lɔ Kwaamaɨ nɨ mɨ nǝn kʊlanɨ. Jǝ́ yɨ yɨm jenɔ a kʊm nǝb nɨ dulɔ a yǝla yǝlaɨ, nǝb bwɨlangkɛlɔ, nyalǝm jenɔ won nɛ ganggang a kʊm jin a yooli nɨ.

¹⁶ Jǝ́ ta kɛl kʊlɨ nɨ gwanggwang. Na jǝ́ ja kǝga nǝn maatǝm nyɨɨ, na Kiristi a bɛɨ, mǝ maa maa sʊtɔ. Mǝ sʊwa sʊwa mǝʊ maajɨ mǝndɨ jǝbɔ gaalan mǝndɨ, a yɔ bɔ nǝn kwan.

¹⁷ Nǝtǝm bɨlǝngkɛl jenɔ jǝbɔ maajɨ jenɔ a daagɔ Tɛlalɔ woi a maa na tǝlatǝm twama. Na na mǝ tǝla tǝla tʊʊm mǝndɨ a dul twama nɨɨ, mǝ nyʊwa nyʊwa lǝma, n maa fulotǝm nǝl nǝbɔ jen.

¹⁸ Jen tʌjen jǝ́ nyʊwa nyʊwa lǝma, jǝ́ maa fulotǝm nǝl jǝbɔ mǝ.

Timoti Jǝbɔ Abafaroditas

¹⁹ Mǝ ya nǝl lɛ a daagɔ Tɛlalɔ Yesu woi, mǝ tʊng jem tʊng Timoti mɨ tatǝm bʊtɔ wo, sǝ n nya kwaan bʊtɔ nǝn nyʊwatǝm fulon jenɔ.

²⁰ Mɨ mǝ nǝn kaa nǝl wo wʊnɨ ta jen nɛ, a dʌng yɨm jenɔ a bʊm na gɨɨ.

²¹ Tangǝn jinɔ n maajɨ jin ja ya a kǝga jin jǝ maa lɛɨ. N ke bɔ maajɨ Yesu Kiristii.

²² Jen jǝ́ nyǝm yɨm Timotii kanga nǝn maa maajɨ fulon kɛl lǝmɨ Kwaamaɨ dakinii, maamɔ n tɛ bwɛ jǝbɔ bʊla gɔ.

²³ Nǝn gɔ mǝ swɨ lɛ n twam gǝnɨ, na n kuwo kanjǝl mǝndɨ yɔ lɛ dǝngdǝngɨ.

²⁴ Mǝ ya nǝl a daagɔ Tɛlalɔ woi, mǝ tǝmɨ mǝ bɛ lɛ mɨsɔ mǝ ta bʊtɔ lɛ.

²⁵ N kuwo a bʊm nyɔ n yǝla n twam jem Abafaroditas, kɨla mɨ, fwalɨ maajɨ mǝndɨ, fwalɨ gʌtǝm mǝndɨ, wʊnɨ jǝ́ twam gǝn sǝ a tɨka ɨɨ.

²⁶ A kʊta na swɨ lɛ a kuwo jen gwamɨ, jʊ a bwɨɨ a nya komʌn a fulon kɛl bɔɔla gǝnɔ jǝ́ nyʊwaɨ.

²⁷ A daa twɨla dangǝn, ya la bwaa lɛ. Kwaama a ji bʊnǝn gǝnɔ, ke bɔ gɔ kwaagɔ, jǝbɔ mǝ tǝmɨ, jʊ a bwɨɨ kage n maa kaltǝm nǝl a dul kaltǝm nǝl.

²⁸ N jʊ a bwɨ mǝ sɨn nɛ sǝ n twam gǝn a daa jen woi, sǝ jǝ́ maa fulotǝm nǝl na jǝ́ kuwo gǝn tagɨ. Mǝ tǝmɨ n dem komʌn mǝndɨ dǝm.

²⁹ Bɛ jǝ́ yo gǝn nǝn fulotǝm nǝl dangǝn a mʊgɔ Tɛlalɔɨ. Bɛ jǝ́ nǝ nǝb nɨ na gɨɨ dʊʊn,

³⁰ jʊ a bwɨɨ ya bʊla lɛ a maajɨ Kiristii, miyo kʊlɨ gǝnɔ lɛ sǝ a tɨka ɨ maajɨ nɨ jǝ́ dwal bɔ jǝ́ maaɨ.