Filibii 1 - Dadiya NT

Yaltǝm

¹ Nǝmǝ mǝ Bulus nǝbɔ Timoti, nǝn bɛtɔ jwaalɛn Kiristi Yesui, Nǝn mʊla nǝb sagsagɔ gǝm lɛ gwam a Filibii, nǝbɔ a mʊgɔ Kiristii, jǝbɔ nǝb dʊʊm nɨ dʌng nǝb bwangtǝmɔ lɛɨ jǝbɔ nǝbɔ maa jim maajɨ lɛɨ.

² Bɛ lǝmagɔ jǝbɔ yɨm kwamɨgǝn a yɨɨ jǝbɔ jen a daagɔ Tɛtɛ bǝn Kwaama woi jǝbɔ Tɛlalɔ Yesu Kiristi.

Keli Kwaamaɨ Bulus A Maa A Dul Mʊrkalɨ Nǝb Bwangtǝm Kwaamaɨ A Filibii

³ Mǝ buu Kwaama mǝndɨ gǝm kang lɛ nǝn kwama nɨ gwam mǝ bʊʊla jǝbɔ jeni.

⁴ Nǝn kwama mǝ maa keli lɛ a dul jeni, mǝ maa nǝn fulotǝm nǝl.

⁵ Mǝ buu kang lɛ a yɔmɔ jǝ́ yɔ lɛ dakini jǝbɔ mǝ a watǝm fulon kɛl lǝmɨ nɨ, a tǝltǝm, a bɛ nǝn a dwiyeni.

⁶ Mɨ nyǝmatǝm wo, Kwaama nɨ a tǝl maajɨ nyan nɨ a daa jen woi, yɔ yɔ nǝn a dɨltǝm dɨsɔ a la nǝn a kɔkɔ bɛtǝm Yesu Kiristii.

⁷ N dǝngdǝng a daa mɨ woi ya n bʊʊla lɛ nǝn jen nyɔ gwam, jʊ a bwɨɨ n ya jen a nǝl mɨ. Na mǝ na a bwatǝmɨ, na mǝ na a kʌshitǝm fulon kɛl lǝmɨ nɨɨ, wʊnɨ mǝ nʊng jen nɛ n dǝngdǝngɨ, jǝ́ tǝga lǝma maajɨ Kwaamaɨ jǝbɔ mǝ.

⁸ Kwaama a nyǝm n swɨ jen na swɨtǝmɔ Kiristi Yesu maa jem lɛɨ.

⁹ Keli mǝndɨ nǝn gɔ bɛ swɨtǝm jenɔ a ja kǝga, nǝn nyǝmtǝm jǝbɔ yʊlan dangǝn,

¹⁰ sǝ jǝ́ jǝgǝm kanjǝl nyanɔ, jǝ́ yǝlam nǝb sagsag, nǝb nɨ mɨ nǝn daa tuwoli, ba la nǝn a kum bɛtǝm Kiristii.

¹¹ Jǝ́ yii tag nǝn maajɨ dǝngdǝng wʊnɨ jǝ́ nya lɛ a gola Yesu Kiristii. Wʊnɨ nǝn gɔ bɛ lɛ nǝn dʊʊlǝn Kwaamaɨ jǝbɔ bǝlátǝm gǝnɨ.

Jʊ Mǝ Ya A Nǝl A Yɨm Mɨɨ Nǝn Kiristi

¹² Kambɔ, mǝ swɨ lɛ jǝ́ nyǝm, kanjǝl nɨ a bwɨ nǝn mɨɨ, nǝn gɔ a bɛ nǝn watǝm fulon kɛl lǝmɨgɨɨ.

¹³ A dul jʊ nɨ, a yǝlam jǝ nʊngtǝm a daagɔ nǝb tɔɔtǝm lɔ fɔlɔgɔ woi jǝbɔ tangǝn nǝbɔ gwam, gɔ bwatǝm mǝndɨ n kɛl dul Kiristii.

¹⁴ A kɛl dul bwatǝmɔ ja maa mɨɨ, kɔrɔ nǝb bwangtǝm wʊnɨ n kɛtǝlam mɨ a mʊgɔ Tɛlalɔɨ, ja jel nyangnyang jǝ sʊwa kɛl Kwaamaɨ lɛ mɨ taal wo.

¹⁵ Kaamɨ gǝ kiyo kɛl Kiristii a kɛl nungon jǝbɔ bangakatǝm. Kaamɨ gǝ kiyo a gola nyan.

¹⁶ Nǝb nɨ kiyo fulon kɛl lǝmɨ Kiristii lɛ a gola nyanɨ, ja maa nyɔ a dul swɨtǝm mɨɨ, kanga ja nyǝm Kwaama a ya ɨ fɔ sǝ n kʌshi fulon kɛl lǝmɨgɨɨ.

¹⁷ A nǝb wuleni, jǝ sʊwa kɛl Kiristii a gola swɨtǝm dul, ke bɔ nǝlɔ win, jǝ swɨ lɛ ja nɨ ɨ gaalan a mʊgɔ lɔsomi.

¹⁸ A kal wɛ? Jʊ bǝ dʌng lɛɨ nǝn gɔ na jǝ maam na kuwotǝm nui, na n bɨlǝngǝn n kɛl Kiristii jǝ kiyo lɛɨ, n maa fulotǝm nǝl nǝngǝn. Mǝ ja ja kǝga nǝn fulotǝm nǝl dangǝn,

¹⁹ jʊ a bwɨɨ n nyǝm mǝʊ n gola keli jenɔ jǝbɔ tɨkalɨ Yʊwa Yesu Kiristii nǝn gɔ jǝg ɨ lɛɨ.

²⁰ N ya nǝl dangǝn, mɨsɔ mǝ nyʊwa gunidul lɛ, mǝ bɨ bɨ nǝl dangǝn a kǝngkɔ jǝbɔ tangǝn kumtɨnɔ sǝ Kiristi a nya gungtǝm a daa mɨ woi, na mǝ yǝm nǝn kʊlɨɨ, na n bʊla bʊlaɨ.

²¹ A daa mǝ woi, yɨmɔ nǝn kʊlɨɨ nǝn Kiristi. Bwaagɔ n bwili.

²² Na a yǝlam mǝ yɨ yɨ nǝn kʊlɨɨ, mǝ maa maa maajɨ nɨ bɛ lɛ nǝn nyatǝmɨ. Mǝ nyǝm bɔ nʊ mǝ dem lɛɨ.

²³ Gwam jinɔ yo jǝ gʊ nǝl mǝndɨ lɛ dangǝn. Swɨtǝm mǝndɨ n bʊla sǝ n yɔ ya n yɨ nǝbɔ Kiristi. Nǝn gɔ jʊ a laa jǝlɨ.

²⁴ N nyǝm gwam jenɔ jǝ́ saa ɨ lɛ tag. A bʊm nyɔ n ja kǝga nǝn yɨmɔ.

²⁵ N jǝla gǝ na nyɔ, n nyǝm mǝ yɨ yɨ nǝn kʊlɨ sǝ n ja kǝga nǝn tɨkalɨ jenɔ gwam, sǝ jǝ́ dʊʊl, jǝ́ maa fulotǝm nǝl nǝn nǝtǝm bɨlǝngkɛl jenɔ.

²⁶ Sǝ na kwama mǝ bɛ a daa jen woi tagɨ, jǝ́ nya gola jʊ jǝ́ maam sʊtɔ lɛ nǝn a mʊgɔ Kiristi Yesui a kɛl dul mɨ.

²⁷ Jʊ a laa jǝlɨ, jǝ́ yɨ yɨm nɨ a yɔ dǝngdǝng jǝbɔ fulon kɛl lǝmɨ Kiristii, dɨsɔ na n bɛ sǝ ba n kuwo jeni, na mǝ bɛ bɨɨ, n nyʊwa fulon gɔ yɨm jenɔ a yǝlam win, bʊʊlalɨ jenɔ win. Mǝ nyǝm nyǝm mǝʊ jǝ́ maa maajɨ lɛ dakini nǝlɔ win dangǝn sǝ bǝ kʌshi fulon kɛl lǝmɨgɔ.

²⁸ Ka jǝ́ nyʊwa lɛ taal nǝb kiim jeni wo dǝm. Jʊ nɨ gǝ nʊng gola bʊlatǝm jin. A jenɔ gǝ nʊng gola bʊʊtǝm jen. Nʊngtǝmɔ a bɛ a daagɔ Kwaama woi.

²⁹ A nǝ jen lǝmagɔ ke bɔ a dul nǝtǝm bɨlǝngkɛl a daagɔ Kiristi woi kwaagɔ, n gaalanɔ jǝ́ nɔɔ lɛ a kɛl dul gǝnɨ.

³⁰ Kanga jǝ́ kuwo i mǝ gʌi jǝbɔ gaalanɔ jǝ́ nyʊwa mǝ nɔɔ lɛɨ, kǝngkɔ tʌjen jǝ́ gʌ gʌ nyɔ na mǝ.