Dʊgam Nyangnyang 9 - Dadiya NT

Jum Na Nʊgɔ

¹ Bwɛ twama Kwaamaɨ na nʊgɔ a guu jum gǝnɨ, nǝngɔ mǝ kuwo kaa nyanyamɨ a dʌbʌl a gǝla a yal a tǝmɨ. Ja nǝ nyanyamɨ nɨ jǝ wumtǝm bʊwa nɨ mɨ dɨltǝm woi.

² Nǝn kwama a wum bʊwa nɨ mɨ dɨltǝm woi, nǝngɔ kaa yulʌn jel lɛ wo maa na yulʌn gʌleng gaakǝba. Yulʌn nɨ a sɔm nu kwamagɔ jǝbɔ dʌbʌl kwamagɔ.

³ A mʊgɔ yulʌn nɨ gǝmɨ, swalɨtɨnɔ a jel a tǝmɔ gǝm. Ja nǝ ji kwaan tɛtǝm na dǝnatɨn.

⁴ Ja kaa ji a jatǝm yǝla tǝm nɨ jǝbɔ jʊ nɨ a gii jǝbɔ tɨyantɨnɔ. Ja jǝla jim ja tɛ nǝb nɨ mɨ ji nǝn gwalman Kwaamaɨ a tɛkǝgatɨn jini kwaaji.

⁵ Ja nǝ ji bɔ kwaan jʌtǝm jin. Ja nǝ ji gola nǝtǝm jin gaalan na bwaala nʊ. Bɔɔla tɛtǝm gǝnɔ jǝ nyʊwa lɛɨ maa na tɛtǝm dǝna na a tɛ nǝlɨ.

⁶ A kumtɨn gɔ, nǝbɔ saa saa bwaagɔ mɨsɔ jǝ nya lɛ. Jǝ swɨ bwaagɔ lɛ mɨsɔ jǝ nya lɛ. Bwaagɔ mwal ji lɛ.

⁷ Swalɨtɨn nɨ a jelka tʊwa tatǝm kunɔ nyɔ ja fɛka tatǝm kuni. A dul jinɔ gǝmɨ, ja dʊʊ kaam kanjǝl maamɔ dwang dul mʊn. Kǝga jinɔ maamɔ kǝga nǝfitʌmi.

⁸ Yitʌn dul jinɔ maamɔ yitʌn dul nɔɔtǝmɨ. Nungʌntɨn jinɔ maamɔ nungʌn tulʌm.

⁹ Ja sɔm kulitɨn jinɔ nǝn kaa jǝl maamɔ kemʌn fili. Diil lemʌntɨn jinɔ maamɔ kʌm tʊwatɨn jǝbɔ kʌntʌlʌn tʊwatɨn shu lɛ a daa tatǝm kuni.

¹⁰ Yǝgatɨn jinɔ maamɔ twɨ dǝnatɨn. A mʊgɔ yǝgatɨn jinɔ gǝmɨ, ji nǝn kwaan na nǝtǝm nǝbɔ gaalan na bwaala nʊ, na ja tɛ nǝbɔ nǝnɨ.

¹¹ Ji nǝn fɔlɔ nɨ maa fɔlɔn nɛ a dul jini, nǝn gɔ bwɛ twama bwɨla nɨ ja nǝ gǝn kwaan a dul bʊwa nɨ mɨ dɨltǝm woi. Dun gǝnɔ nǝn nyiyo Yahudawagɨɨ nǝn “Abaddon,” nǝn nyiyo Girikaɨ nǝn “Afoliyon.” Nǝn gɔ “Nǝ Kaltǝmɨ.”

¹² Gaalan na tɨkǝgagɔ a shu. A gulɔ gǝmɨ gaalanɔ wo yo, bɛ lɛ.

Jum Na Nukunɔ

¹³ Nǝngɔ bwɛ twama Kwaamaɨ na nukunɔ a guu jum gǝnɨ. Nǝngɔ mǝ nyʊwa kaa diil jel lɛ a daa jumtɨn nɨ naal a daa twɨtǝm yulʌn na mʊnɔ a kǝga Kwaamaɨ.

¹⁴ Nǝngɔ diilɔ a sʊwa bwɛ twama Kwaamaɨ na nukunɔ, nʊ nɨ nǝn jumi gɔ, “Dem kang a bɛtɔ twama bwɨla nɨ naal ja bwaba bwabaɨ a tiyo Yufiretisi.”

¹⁵ Nǝngɔ ja dem kang a bɛtɔ twama bwɨla nɨ naalɨ, wʊnɨ ja fɛka ji n kɛl kwama nɨɨ, jǝbɔ kum nɨɨ, jǝbɔ bwaala nɨɨ, jǝbɔ jol nɨɨ. Jǝ dem jim kang sǝ ja jʌ nǝbɔ win a mʊgɔ taal na nǝfitʌmɔ gwamɨ.

¹⁶ Bwɨ kʌm nǝb kun nɨ nǝn tʊwaɨ, n nyʊwa ja la milanɔ fʊlkʊb yo (200,000,000).

¹⁷ N wɔ kanga mǝ kuwo tʊwatɨnɔ jǝbɔ nǝb gwitǝm jinɔ a mʊgɔ dʊgam nyangnyangɨ. Nǝb gwitǝm jinɔ a sɔm kulitɨn jinɔ nǝn kemʌn, a fo na mwɛ foon, a fi na jirgina, a jelka mwɛ swanɔ nyɔ tag. Dul tʊwatɨn nɨ a maamɔ dul tulʌmtɨn. Kǝlagɔ jǝbɔ yulʌnɔ jǝbɔ kǝla wʊnɨ a fo, a shi, jel lɛ a nyiyo jin.

¹⁸ Win a mʊgɔ taal na nǝfitʌmi ja jʌ nǝn kanjǝl bwɨlantɨnɔ taal. Jʊtǝb nɨ nǝn gɔ kǝla jǝbɔ yulʌn jǝbɔ kǝla wʊnɨ a fo, a shi jel lɛ a nyiyo jini.

¹⁹ Kwaan tʊwatɨn nɨ gǝ na a nyiyo jin jǝbɔ yǝgatɨn jinɔ. Yǝgatɨn jinɔ a maa na sɔɔtɨn nɨ nǝn dultɨn jǝ nyʊwa nǝbɔ gǝm twɨla lɛ nǝnɨ.

²⁰ Tangǝn nǝfitʌm nɨ kanjǝl bwɨlanɔ a jʌ ji bɨɨ, ja yǝla bɔ ja bǝla jʊtǝb nɨ jǝ maa lɛ nǝn kang jini. Ja bǝla bɔ bwangtǝm nǝblaamɔ, jǝbɔ shomtɨn nɨ ja fɛ nǝn mʊnɨ, jǝbɔ maalʊɨ, jǝbɔ gwaalɨ, jǝbɔ tɛl jǝbɔ tɨyaɨ. Jʊtǝb nɨ mɨ kuwo daa lɛɨ, mɨ nyʊwa lɔl lɛɨ, mɨ yɔ yɔm lɛɨ.

²¹ Ja yǝla bɔ ja bǝla jʌtǝm nǝbɨɨ, jǝbɔ bʌtʌm sowi, jǝbɔ maatǝm bulon, jǝbɔ kuulotǝm kuul.