Dʊgam Nyangnyang 8 - Dadiya NT

Mɛl Na Nʌbʌlɔ Jǝbɔ Taasa Mʊnɔ

¹ Nǝn kwama Bɛ Gal nɨ a gwal mɛl na nʌbʌli, dʌbʌlɔ shig, a la minti fʊtǝtaal.

² Nǝngɔ la mǝ kuwo bɛtɔ twama Kwaamaɨ nɨ nʌbʌli jǝ tɨm a kǝga Kwaamaɨ, ja nǝ ji jumtɨnɔ nʌbʌl.

³ Kaa bwɛ twama Kwaamaɨ ba tɨ a daa twɨtǝm yulʌn, a ta taasa mʊn a kang. Nǝngɔ ja nǝ gǝn jǝ twɨtǝm nɨ nǝn kunʌn lǝmɨɨ, dɨsɔ a mʊr jǝbɔ keli nǝb sagsagɔ, sǝ a do a yɔ nǝn a daa twɨtǝm yulʌn na mʊnɔ a kǝga kotere fɔlɔnɨ.

⁴ Nǝngɔ kanjǝl twɨtǝm nɨ nǝn kunʌn lǝmɨɨ, a mʊrka jǝbɔ keli nǝb sagsag nɨ a jel a kang bwɛ twama Kwaamaɨ, sǝ a shu a kǝga Kwaamaɨ.

⁵ Nǝngɔ bwɛ twama Kwaamaɨ a do taasa nɨɨ, a yii nǝn kǝla a daa twɨtǝm yulʌni. A wa a yooligɔ gǝm gwamɨ, nǝngɔ kunnyiyogɔ ga lɛ, diilɔ mwɛla lɛ, kwamagɔ beta lɛ, tǝmɔ mǝga lɛɨ.

Jumtɨnɔ Nʌbʌl

⁶ Nǝngɔ la bɛtɔ twama Kwaamaɨ nɨ nʌbʌli, nǝb nɨ nǝn jumtɨnɔ nʌbʌli, ja fɛka guutǝm jum jini.

⁷ Bwɛ twama Kwaamaɨ na tɨkǝgagɔ a guu jum gǝnɨ, nǝngɔ tɛl kwamanɔ jǝbɔ kǝlagɔ a sɛ nǝn tʊʊmɨ, ja tal ji fɔ a yooli nɨɨ. Win a mʊgɔ taal na tǝmɔ a twɨm. Win a mʊgɔ taal na tɨyantɨnɔ a twɨm. Pʌd yǝla yʌbigɔ a twɨm.

⁸ Bwɛ twama Kwaamaɨ na yogɔ a guu jum gǝnɨ, nǝngɔ ja ma kaa jǝl a wɨmaɨ, a maa na gʌleng tuli, ja kǝla lɛ. Win a mʊgɔ taal na mwɛmɔ a wɨmaɨ a yǝlam tʊʊm.

⁹ Win a mʊgɔ taal na kanjǝl nɨ nǝn kʊlɨ a wɨmaɨ ja bʊlala. Win a mʊgɔ taal na tɨyamwɛngtɨnɔ a kǝlala.

¹⁰ Bwɛ twama Kwaamaɨ na taalɔ a guu jum gǝnɨ, nǝngɔ kaa gʌleng nyanyamɨ a gǝla a dʌbʌl a yalɨ, ta lɛ na kʊʊnɨ kǝla. A tǝla a dul win a mʊgɔ taal na tiyotɨnɔ jǝbɔ dɨyalɨ mwɛ.

¹¹ Dun nyanyamɨ nɨ nǝn “Sangǝn.” Win a mʊgɔ taal na mwɛmɔ a yǝlam a tuuli. Nǝbɔ a lada na a bʊlala a nɔɔtǝm mwɛ tuuli nɨ a tuultǝm gǝnɔ gǝmɨ.

¹² Bwɛ twama Kwaamaɨ na naalɔ a guu jum gǝnɨ, win a mʊgɔ taal na nu kwamagɔ jǝbɔ win a mʊgɔ taal na bwaalagɔ jǝbɔ win a mʊgɔ taal na nyanyamɨtɨnɔ jǝbɔ fulotǝm jinɔ a yǝlam duddugi. Win a mʊgɔ taal na kɔkɔgɔ mɨ nyalǝm wo. Win a mʊgɔ taal na kumɔ mɨ nyalǝm wo.

¹³ Nǝngɔ mǝ dʌngi, n nyʊwa kaa gʌtʌb shu lɛ a dʌbʌl kwama sʊwa lɛ nǝn diil dʊʊn gɔ, “N mwɛ jen! N mwɛ jen! N mwɛ jen jǝ́ nǝb yɨm yooli nɨɨ, nǝn jʊ bwɨ lɛɨ, na bɛtɔ twama Kwaamaɨ nɨ taalɨ, a guu jum jini.”