Dʊgam Nyangnyang 7 - Dadiya NT

Nǝbɔ Ja Ga Jim Gwalmanɨ

¹ A gulɔ gǝmɨ, n kuwo bɛtɔ twama Kwaamaɨ naal tɨm a gol lɔngɔ naal na yooli nɨ, ja ta yʊwatɨnɔ naal na yooligɔ, kage yʊwagɔ a fǝ tǝmɔ jǝbɔ wɨmagɔ jǝbɔ tɨyantɨnɔ.

² Nǝngɔ mǝ kuwo kaa bwɛ twama Kwaamaɨ gwi lɛ a twalɨ, a ta gwalman Kwaama kʊlɨɨ a kang. Nǝngɔ a jo bɛtɔ twama Kwaamaɨ nɨ naalɨ nǝn diil nǝn kwaanɨ, nǝb nɨ ja nǝ ji kwaan nǝtǝm gaalan a tǝm nɨɨ jǝbɔ wɨmaɨ.

³ Sʊwa lɛ gɔ, “Ka jǝ́ nǝ lɛ tǝmɔ gaalan jǝbɔ wɨmagɔ, jǝbɔ tɨyantɨnɔ, nǝn lǝga bɔ nǝn ga bɛtɔ jwaalɛn Kwaamaɨ gǝm gwalmanɔ a tɛkǝga dɨn.”

⁴ Nǝngɔ mǝ nyʊwa gɔ bwɨ nǝb nɨ ja ga jim gwalmanɨ, ja la nǝbɔ fʊlkʊblǝnɔ fʊlkʊb win jǝbɔ fʊltǝnaal jeli naal (144,000) a guu nǝbɔ Israilaɨ gwam.

⁵ Ja ga nya Yahudaɨ gǝm gwalmanɔ nǝbɔ fʊlkʊblǝnɔ kʊb jeli yo (12,000), a nya Rubainui nǝbɔ fʊlkʊblǝnɔ kʊb jeli yo (12,000), a nya Gadɨ nǝbɔ fʊlkʊblǝnɔ kʊb jeli yo (12,000),

⁶ a nya Ashirui nǝbɔ fʊlkʊblǝnɔ kʊb jeli yo (12,000), a nya Naftalii nǝbɔ fʊlkʊblǝnɔ kʊb jeli yo (12,000), a nya Manassaɨ nǝbɔ fʊlkʊblǝnɔ kʊb jeli yo (12,000),

⁷ a nya Saminui nǝbɔ fʊlkʊblǝnɔ kʊb jeli yo (12,000), a nya Lawii nǝbɔ fʊlkʊblǝnɔ kʊb jeli yo (12,000), a nya Issakaɨ nǝbɔ fʊlkʊblǝnɔ kʊb jeli yo (12,000),

⁸ a nya Zabalunaɨ nǝbɔ fʊlkʊblǝnɔ kʊb jeli yo (12,000), a nya Yusufui nǝbɔ fʊlkʊblǝnɔ kʊb jeli yo (12,000), a nya Biliyaminui nǝbɔ fʊlkʊblǝnɔ kʊb jeli yo (12,000) tǝgǝn.

Kʌm Mʊrkalɨ Nǝbɨɨ Nǝn Dwang Fulontɨn

⁹ A gul jʊ nɨ mǝ dʌngi, n kuwo kaa kʌm mʊrkalɨ nǝbɨɨ, wʊnɨ a shu kwaan kiyotǝmɨ. Ja bɛ a bǝlǝntǝmɔ gǝm gwam, jǝbɔ Bʌtʌbɔ gwam, jǝbɔ nyiyotɨnɔ gwam, jǝbɔ nǝbɔ gwam. Jǝ tɨlam a kǝga kotere fɔlɔn nɨ jǝbɔ kǝga Bɛ Gal nɨ. Jǝ tɨlam nǝn dwang malǝng fulontɨn. Ja ta langǝn kutʌshelʌnɔ a kangtɨn jinɔ gǝm.

¹⁰ Ja gung diil jinɔ nǝn kwaan jǝ sʊwa lɛ gɔ, “Bʊʊtǝmɔ na a Kwaama bǝnɨ, wʊnɨ yǝm a dʌbʌl kotere fɔlɔnɨ, jǝbɔ daagɔ Bɛ Gal nɨ woi!”

¹¹ Bɛtɔ twama Kwaamaɨ gwam jǝ tɨlam ja kangǝm kangǝmɨ kotere fɔlɔnɔ, jǝbɔ daltɔ dʊʊmɔ jǝbɔ kanjǝl nɨ naal nǝn kʊlɨɨ. Ja jʊng a kǝga kotere fɔlɔn nɨ ja bǝlá Kwaamagɔ.

¹² Jǝ sʊwa lɛ gɔ, “A daa nyɔ! Bǝlátǝmɔ jǝbɔ gungtǝmɔ jǝbɔ nyǝmtǝmɔ jǝbɔ buutǝm kangɔ jǝbɔ dʊʊlǝnɔ jǝbɔ fɔlɔnɔ jǝbɔ kwaanɔ bɛ a ta tʌgo gwanggwang a daa Kwaama bǝnɔ woi, mɨ dɨltǝm wo! A daa nyɔ!”

¹³ Nǝngɔ win a kʊm daltɔ dʊʊm nɨ a bʌ i gɔ, “Nǝbɔ tɨlam nǝn dwang malǝng fulontɨnɨ na bǝ wo? Ja jel a fee?”

¹⁴ Nǝngɔ mǝ jǝla gǝn mǝʊ, “Nǝ dʊʊ, ń nyǝm nyǝmɨ.” Nǝngɔ a sʊwa ɨ gɔ, “N nǝb nɨ a jel a gaalan bwɨlaɨ, ja galam dwang malǝng jinɔ a yǝla fulola nǝn fǝbfǝb nyɨɨ, nǝn tʊʊm Bɛ Gal nɨ.

¹⁵ A kɛl dul jʊ nɨ, “Jǝ tɨm a kǝga kotere fɔlɔn Kwaamaɨ, jǝ maa gǝm maajɨ lɛ kum jǝbɔ kɔkɔ a mʊgɔ Kan Kwaaman. Nʊ nɨ yǝm a dʌbʌl kotere fɔlɔnɨ kɨla ji kɨla nǝn kwaan gǝnɔ.

¹⁶ Mɨsɔ jǝ nyʊwa jʊwan nɛ tag, mɨsɔ jǝ nyʊwa diil mwɛ lɛ wo tag. Mɨsɔ kɔkɔ ga dul jinɔ lɛ, mɨ kaa twɨtǝm kɔkɔ wo.

¹⁷ Jʊ a bwɨɨ, Bɛ Gal nɨ fɔ a tɨbǝl kotere fɔlɔnɨ, nǝn gɔ yǝlam nǝ tɔɔtǝm jinɔ lɛɨ. Nǝn gɔ yɔ lɛ nǝn ji a dɨyalɨ mwɛ kʊlɨɨ. Kwaama nǝn gɔ waam jim mwɛ num jinɔ lɛɨ.”