Dʊgam Nyangnyang 6 - Dadiya NT

Mɛltɨnɔ

¹ Nǝngɔ mǝ dʌngi kanga Bɛ Gal nɨ a gwal win a mʊgɔ mɛltɨn nɨ ja bʊltɨm nyiyo langǝn bwangǝnɔ ja kʊlʊm kʊlʊmɨ daatɨnɔ nʌbʌli. Nǝngɔ mǝ nyʊwa win a kʊm kanjǝl nɨ nǝn kʊlɨ naalɨ a sʊwa kɛl maamɔ kunnyiyo a gaɨ gɔ, “Ba!”

² Mǝ dʌngi, nǝngɔ mǝ kuwo kaa tʊwa fuloi. Nǝ gwitǝm gǝnɔ nǝngǝn nǝn fingalɨ. Ja nǝ gǝn dwang dulɔ, a kwɛl a ku jelʌn, jel lɛ sǝ a sʊtǝn kutʌm jelʌnɔ.

³ Nǝngɔ Bɛ Gal nɨ a gwal mɛl na yogɨɨ. N nyʊwa jʊ nɨ nǝn kʊlɨ na yogɔ a sʊwa gɔ, “Ba!”

⁴ Nǝngɔ kaa tʊwa feli a jeli. Nǝngɔ ja nǝ nǝ gwitǝm gǝnɔ gola gɔ ga dem lǝmagɔ a yooli nɨ, dɨsɔ nǝfitʌmɔ ya jʌbko lɛ. Nǝngɔ ja nǝ gǝn gʌleng gulʌni.

⁵ Nǝn kwama Bɛ Gal nɨ a gwal mɛl na taalɨ, n nyʊwa jʊ nɨ nǝn kʊlɨɨ na taalɔ a sʊwa gɔ, “Ba!” Kanga mǝ dʌngi, n kuwo kaa tʊwa fili. Nǝ gwitǝm gǝnɔ nǝngǝn nǝn jǝ sʊwatǝmɔ a kang gǝn.

⁶ Nǝngɔ mǝ nyʊwa kaa jǝl a maa na diil a kʊm kanjǝl nɨ naal nǝn kʊlɨɨ sʊwa lɛ gɔ, “Nǝn kwama nɨ taasa nu jaamɔ win a ywatǝm kemʌn maajɨ kumɔ wini, jǝbɔ taasa nu kwalǝmɔ taal a ywatǝm kemʌn maajɨ kumɔ wini, bɛ ka ń kal lɛ nwangɔ jǝbɔ mwɛ fogfogigɔ.”

⁷ Nǝn kwama Bɛ Gal nɨ a gwal mɛl na naalɨ, n nyʊwa diil jʊ nɨ nǝn kʊlɨɨ na naalɔ a sʊwa gɔ, “Ba!”

⁸ Mǝ dʌngi, nǝngɔ mǝ kuwo kaa tʊwa nɨ nǝn jʌmto jʌmto nyɨɨ. Dun nǝ gwitǝm gǝnɔ nǝn Bwaa. Daa yamtǝm borang a twal nǝn gɔ a bǝmtǝnɨ. Nǝngɔ ja nǝ ji kwaan win a mʊgɔ naal na tǝgatǝm yooligɨɨ, sǝ ja jʌ nǝbɔ nǝn gulʌn, jǝbɔ jʊwan, jǝbɔ bɔɔla, jǝbɔ namɔ kuuli.

⁹ Nǝn kwama Bɛ Gal nɨ a gwal mɛl na nʊgɨɨ, n kuwo kʊlɨtɨn nǝb nɨ ja jʌbo a dul kɛl Kwaamaɨ, jǝbɔ nǝtǝm nyiyo a kɛl Kwaamaɨ ja maaɨ. N kuwo ji a sʊʊ daa twɨtǝm yulʌn.

¹⁰ Nǝngɔ ja gung diilɔ nǝn kwaan ja sʊwa gɔ, “Nǝ dʊʊ Tɛlalɔ, nǝ sagsag, nǝ bɨlǝngkɛl, n fɨyang mʊ mwatɨ nǝbɔ yoolii nɨ gǝm borangɔ lɛɨ? N fɨyang tag mʊ ywa naan tʊʊm nǝnɔ lɛ a daagɔ nǝb nɨ a jʌ nǝnɨ?”

¹¹ Nǝngɔ ja tǝga ji bɛllɛ fulontɨnɔ gwam jini. Nǝngɔ ja sʊwa ji gɔ ja fǝb dǝm, a yɔ nǝn a kwama nɨ ja yii dǝngdǝng ladatǝm fatǝm nǝb bwangtǝm jini, kɛtǝlam jinɔ, tangǝn nǝbɔ wo jǝ jʌbo lɛɨ kanga ja jʌbo jii.

¹² Nǝn kwama Bɛ Gal nɨ a gwal mɛl na nukuni, mǝ dʌngi, nǝngɔ tǝmɔ a mǝga nǝn jʌgjʌg nyɨɨ. Nu kwamagɔ a yǝlam a fili na tulong dwang nɨ ja fɛ nǝn yitʌn bɨ filii. Bwaalagɔ a yǝlam a feli na tʊʊm.

¹³ Nyanyamɨtɨnɔ a gǝla a tǝla a tǝm, kanga tɨya dʌfengɔ gǝ tǝlam tʊʊl gul gǝnɔ lɛ nǝn kwanɨ, na yʊwa bwɨlagɔ a mǝg gǝnɨ.

¹⁴ Dʌbʌlɔ a kʊlʊm a maa na kʌshen. Nǝngɔ ja tʊngǝm yemtɨnɔ gwam jǝbɔ tǝmtɨnɔ a tɨbǝl wɨmaɨ a daa yɨm jinɔ gǝmɨ.

¹⁵ Nǝngɔ fɔlɔlɔmɔ a yooli nɨɨ, jǝbɔ bɛtɔ fɔlɔlɔmɔ, jǝbɔ daltɔ dʊʊm sʊwajaamɔ, jǝbɔ nǝb shilogɔ, jǝbɔ nǝb dʊʊmɔ, jǝbɔ jwaalɛbɔ jǝbɔ nǝbɔ gwam ja wuu a gaatɛtɨn jǝbɔ yemtɨnɨ.

¹⁶ Jǝ sʊwa yemtɨnɔ lɛ jǝbɔ gamtɨnɔ gɔ, “Jǝ́ tǝla nǝm a dul. Jǝ́ yʊ nǝn a nu nʊ nɨ yǝm a dʌbʌl kotere fɔlɔnɔ gǝmɨ. Jǝ́ yʊ nǝn tag a nabwɨl Bɛ Gal nɨ,

¹⁷ jʊ a bwɨɨ, gʌleng kɔkɔ nabwɨl jinɔ a bɛ. Nuwo mwɨ lɛ a tɨɨ?”