Dʊgam Nyangnyang 5 - Dadiya NT

Langǝn Bwangǝnɔ Ja Kʊlʊm Kʊlʊmɨ Jǝbɔ Bɛ Galɔ

¹ Nǝngɔ mǝ kuwo kaa langǝn bwangǝn nɨ ja kʊlʊm kʊlʊmɨ. Gǝ na a kang jajǝng nʊ nɨ yǝm a dʌbʌl kotere fɔlɔnɨ, nǝn mʊlalɨ a mʊgɔ jǝbɔ gul. Ja bʊltɨm nyiyo gǝnɔ nǝn mɛl daatɨnɔ nʌbʌl.

² N kuwo kaa dalɨ bwɛ twama Kwaamaɨ tag, ga diil lɛ nǝn kwaan gɔ, “Nuwo a la nyɔ gwal mɛl nɨ lɛ ja bʊltɨ daatɨnɔ nʌbʌli sǝ a wum langǝn bwangǝn nɨɨ?”

³ Mɨ nʊ nɨ wo a dʌbʌl jǝbɔ tǝm jǝbɔ mʊgɔ tǝmɨ, wʊnɨ a la nyɔ a wum langǝn bwangǝn nɨ a dʌng mʊgɔ gǝnɨ.

⁴ Nǝngɔ mǝ ji wi nyangǝnɨ, jʊ a bwɨɨ mɨ nʊ nɨ wo a la wum langǝn bwangǝn nɨ lɛ sǝ a dʌng mʊgɔ gǝnɨ.

⁵ Nǝngɔ win a kʊm daltɔ dʊʊm nɨ a sʊwa ɨ gɔ, “Bɛ ka ń ji lɛ wi! N wɔ, tulʌm nɨ a dʊʊm Yahudaɨ, guu Daudaɨ, a ku jelʌn nyangǝn. Nǝngǝn nǝn kwaan nɨ wum langǝn bwangǝn nɨ lɛɨ, a gwalam mɛl nɨ ja bʊltɨ daatɨnɔ nʌbʌli.”

⁶ Nǝngɔ mǝ kuwo kaa Bɛ Gal tɨm a tɨbǝl kotere fɔlɔnɨ. A kang gǝnɨ, n kanjǝl nɨ naal nǝn kʊlɨɨ jǝbɔ daltɔ dʊʊmɔ. Bɛ Gal nɨ maamɔ ja biyo biyo. Nǝngǝn nǝn jumtɨnɔ nʌbʌl jǝbɔ nutɨnɔ nʌbʌl, wʊnɨ Yʊwatɨn Kwaamaɨ nʌbʌl ja twam a yooli nɨ pʌd gwamɨ.

⁷ Nǝngɔ a yɔ ya do langǝn bwangǝn nɨ a kang jajǝng nʊ nɨ yǝm a dʌbʌl kotere fɔlɔnɨ.

⁸ Nǝn kwama a dem langǝn bwangǝn nɨɨ, kanjǝl nɨ naal nǝn kʊlɨɨ, jǝbɔ daltɔ dʊʊm nɨ fʊltiyo jeli naalɨ, ja jʊng a kǝga Bɛ Gal nɨɨ. Pʌd jinɔ ja ta gǝlǝnggǝlǝngɔ a kang jǝbɔ taasatɨn mʊnɔ a yii nǝn kanjǝl twɨtǝm nɨ nǝn kunʌn lǝmɨɨ, wʊnɨ nǝn gɔ n keli nǝb sagsagɨɨ.

⁹ Jǝ ma nafɨ fɨgɔ lɛ jǝ sʊwa lɛ gɔ: “Ń la nyɔ ń do langǝn bwangǝn nɨ, ń gwalam mɛltɨn nɨ ja bʊltɨ tʌgoi, jʊ a bwɨɨ galɨgǝn ja jʌ ń, nǝmɔ tag mʊ ten Kwaama gǝm nǝbɔ a gola tʊʊm mʊnɨ. Mʊ ten Kwaama gǝm nǝbɔ a daagɔ nyiyotɨnɔ woi pʌd jǝbɔ bǝlǝntǝmɔ gwam.

¹⁰ Ń dǝg ji ja yǝlam lɔ fɔlɔn jǝbɔ nǝbkǝlam Kwaama bǝnɨ, sǝ ja maa fɔlɔn yooli nɨ.”

¹¹ Nǝngɔ mǝ dʌngi, nǝngɔ mǝ nyʊwa diil bɛtɔ twama Kwaamaɨ a lada nyɨɨ, ladatǝm jinɔ a la fʊlkʊblǝntɨn a yɔ nǝn a fʊlkʊblǝntɨn, fʊlkʊblǝn kʊb naagɔ fʊlkʊblǝn kʊb. Ja kangǝm kotere fɔlɔnɔ jǝbɔ kanjǝl nɨ nǝn kʊlɨɨ jǝbɔ daltɔ dʊʊmɔ.

¹² Jǝ ma nafɨ lɛ nǝn diil nǝn kwaan gɔ, “Ń la nyɔ, Bɛ Gal wʊnɨ ja biyoi, sǝ ń yo fɔlɔnɔ, jǝbɔ shilogɔ, jǝbɔ nyǝmtǝmɔ, jǝbɔ kwaanɔ, jǝbɔ dʊʊlǝnɔ, jǝbɔ gungtǝmɔ, jǝbɔ bǝlátǝmɔ!”

¹³ Nǝngɔ mǝ nyʊwa kanjǝl fwaltǝmɔ pʌd a dʌbʌl kwamaɨ jǝbɔ tǝmɔ jǝbɔ mʊgɔ tǝmɔ, jǝbɔ mʊgɔ wɨmagɔ jǝbɔ pʌd jʊ a mʊgɔ yooli nɨ jǝ ma nafɨgɔ lɛ. “Bɛ bǝlátǝmɔ jǝbɔ nǝtǝm dʊʊnɔ jǝbɔ gungtǝmɔ jǝbɔ fɔlɔnɔ a ta tʌgo gwanggwang a daagɔ nʊ nɨ yɨm a dʌbʌl kotere fɔlɔnɨ, jǝbɔ Bɛ Galɔ, a yɔ nǝn mɨ dɨltǝm wo!”

¹⁴ Nǝngɔ kanjǝl nɨ naal nǝn kʊlɨ jǝ sʊwa lɛ gɔ, “A daa nyɔ!” Nǝngɔ daltɔ dʊʊm nɨ a gǝla jʊng ja maa bǝlátǝmɨ.