Dʊgam Nyangnyang 4 - Dadiya NT

Bǝlátǝm A Kwama

¹ A gul jʊ nɨ mǝ yǝla mǝ dʌngi, nǝngɔ mǝ kuwo kaa nyanga kan a wumo wumoi a dʌbʌl kwamaɨ. Diil nɨ mǝ nyʊwa nǝn tɨkǝga wʊnɨ a maa na guutǝm jumi a sʊwa ɨ gɔ, “Gwi fɔ, sǝ n nʊng ń jʊ nɨ bwɨ lɛ a gul nɨ gǝmɨ.”

² Tʌgo a kang mǝ na a mʊgɔ Yʊwa. Nǝngɔ mǝ kuwo kaa kotere fɔlɔn a dʌbʌl kwamaɨ, jǝbɔ kaa nǝl yɨm a dʌbʌl gǝn.

³ Nʊ nɨ yǝm woi a maa na tɛl yasfa jǝbɔ tɛl yakutu. Kaa jʌm wo, wʊnɨ a jelka tɛl zumurudugɔ nyɨɨ, a kangǝm kotere fɔlɔn nɨ.

⁴ Kaam kotere fɔlɔntɨnɔ wo fʊltiyo jeli naal jǝbɔ daltɔ dʊʊmɔ fʊltiyo jeli naal yǝmam a dul jin, ja kangǝm kotere fɔlɔn dʊʊnɔ. Ja dʊʊ dwang fulontɨn jǝbɔ dwang dul mʊn a dul jinɔ gǝm.

⁵ A daa kotere fɔlɔn nɨ kwamagɔ beta lɛ, kunnyiyogɔ ga lɛ, diilɔ mwɛla lɛ. A kǝga kotere fɔlɔn nɨ tag, kʊʊnɨ kǝlagɔ wo nʌbʌl ja lɛ, nǝn gɔ Yʊwatɨn Kwaamaɨ nʌbʌli.

⁶ A kǝga kotere fɔlɔn nɨ kaa jǝl wo beta lɛ nǝn wʊlǝb wʊlǝb nyɔ na bwaala a kʌng wɨmaɨ. A fulo nǝn fǝbfǝb nyɔ na tɛl kwasɨn. A kangǝm kotere fɔlɔn nɨ, kaam kanjǝl wo naal nǝn kʊlɨ, bʊtɔ jinɔ n nutɨn gwam, kǝga jǝbɔ gul.

⁷ Jǝ tɨkǝga nɨ nǝn kʊlɨɨ, a maa na tulʌm, na yogɔ a maa na nɛɛ balɨ, na taalɔ nǝn kǝga maa na nǝfili, na naalɔ a maa na gʌtʌb nɨ shu lɛ a dʌbʌli.

⁸ Pʌd kanjǝl nɨ naal nǝn kʊlɨɨ, gwam jǝ nǝngǝn nǝn bɨlǝntɨnɔ nukun, bʊtɔ jinɔ n nutɨn gwam mʊgɔ jǝbɔ yooli, kum jǝbɔ kɔkɔ mɨ jǝ bǝla sʊwatǝmɔ lɛ gɔ, “Nǝ Sagsag, Nǝ Sagsag, Nǝ Sagsag Tɛlalɔ Kwaama, Nǝ Kwaan! Nǝn gɔ galɨgǝnɨ, nǝn gɔ kǝngkɨɨ, nǝn gɔ tag a kǝgaɨ.”

⁹ Nǝn kwama nɨ kanjǝl nɨ nǝn kʊlɨɨ jǝ bǝlá nʊ nɨ lɛ yǝm a dʌbʌl kotere fɔlɔn nʊ nɨ nǝn kʊlɨ tag mɨ dɨltǝm woi, jǝ nǝ gǝn dʊʊn nɛ, jǝ buu gǝm kang lɛɨ,

¹⁰ daltɔ dʊʊm nɨ fʊltiyo jeli naalɨ, ja jʊng a kǝga nʊ nɨ yǝm a dʌbʌl kotere fɔlɔnɨ, nʊ nɨ nǝn kʊlɨ mɨ dɨltǝm woi, jǝ maa gǝm bǝlátǝm lɛ. Ja ya dwang dul fɔlɔn jinɔ tag a kǝga kotere fɔlɔn nɨ, jǝ ma nafɨ lɛ jǝ sʊwa lɛ gɔ,

¹¹ “Ń la nyɔ, Kwaama Tɛlalɔ bǝn, ń nya bǝlátǝm jǝbɔ dʊʊlǝn jǝbɔ kwaan maatǝm fɔlɔn. Jʊ a bwɨɨ nǝmɔ mʊ fwal kanjǝlɔ gwamɨ, n swɨtǝm mʊn ja yǝlam nyɔ, mʊ fwal ji nyɨɨ.”