Dʊgam Nyangnyang 3 - Dadiya NT

Twamagɔ Shu Lɛ A Sardisui

¹ “Bɛ ń mʊla bwɛ twama Kwaamaɨ nɨ a mʊrkalɨ nǝb bwangtǝm Kwaamaɨ nɨ a Sardisui gǝm nyɔ, “Kɛl nɨ nǝn gɔ n twamagɔ a daagɔ nʊ nɨ maa fɔlɔn lɛ nǝn yʊwatɨn Kwaamaɨ nʌbʌli, jǝbɔ nyanyamɨtɨn nɨ nʌbʌli. N nyǝm maajɨ mʊnɔ. Jǝ kuwo ń nɛ gɔ mʊ nǝn kʊlɨ, mɨ nyǝmatǝm wo mʊ na na bʌlʌn.

² Gun guni a daatǝm dum mʊnɔ gǝm. Ń sʊtǝn kwaan a jʊ nɨ a bǝlaɨ. Gǝ na a nyiyo bwaaɨ, jʊ a bwɨɨ mǝ kuwo bɔ maajɨ mʊnɔ a yii sǝgǝr a kǝga Kwaamaɨ.

³ Bɛ ń fɛ bʊʊla jǝbɔ jʊ mʊ yo, mʊ nyʊwa tagɨ. Bɛ ń kɨla gǝn, yǝla bǝla bwɨlangkɛl mʊnɔ. Na mʊ gun bɔ a daatǝm dum mʊnɔ gǝmɨ, mǝ bɛ na nǝkuu. Mɨsɔ mʊ nyǝm kwama nɨ mǝ bɛm lɛ a daa mʊ woi.

⁴ “A bɛ nǝn a kǝngkɨɨ mʊ nǝn kaamɨ wo nǝn dǝm nyɔ a Sardisu, mɨ ji nǝn duto a dul jin. Jǝ yɔ yɔ yɔm jǝbɔ mǝ nǝn dwang fulontɨn, jʊ a bwɨɨ ja la nyɔ.

⁵ Nʊ nɨ a ku jelʌni, jǝ mal gǝm mal dwang fulontɨn. Mɨsɔ mǝ fʌto dun gǝnɔ lɛ a mʊgɔ Langǝn Bwangǝn Kʊlɨ nɨ. Mǝ sʊwa sʊwa mǝʊ gǝ na a mɨ a kǝga Tɛtɛ mɨɨ jǝbɔ kǝga bɛtɔ twama Kwaamaɨ tag.

⁶ Nʊ nɨ nǝn lɔl nyʊwatǝmɨ, bɛ a nyʊwa jʊ nɨ Yʊwagɔ sʊwa daatɨn mʊrkalɨ nǝb bwangtǝm Kwaamaɨ lɛɨ.

Twamagɔ Shu Lɛ A Filadalfiyaɨ

⁷ “Bɛ ń mʊla bwɛ twama Kwaamaɨ nɨ gǝm a mʊrkalɨ nǝb bwangtǝm Kwaamaɨ nɨ a Filadalfiyaɨ gǝm nyɔ, “Kɛl nɨ nǝn gɔ n twamagɔ a daagɔ Nǝ Sagsag nɨ woi, Nǝ bɨlǝngkɛl, wʊnɨ nǝn jǝ wumtǝm nyanga kan Daudaɨ, wʊnɨ na a wumi, mɨ nʊ nɨ wo kubʌl lɛɨ, na a kubʌl tagɨ, mɨ nʊ nɨ wo wum lɛɨ.

⁸ N nyǝm maajɨtɨn mʊnɔ. N bǝla mʊn nyanga kanɔ a wumo wumoi, wʊnɨ mɨ nʊ nɨ wo nǝn kwaan nʊng lɛɨ. N nyǝm kwaan mʊnɔ dǝm sul, ń kɨla kɛl mǝndɨ, mʊ kana bɔ nyǝmtǝm dun mǝndɨ.

⁹ Mǝ dǝg dǝg nǝb nɨ a mʊgɔ kang Mammɨ, nǝbɔ sʊwa lɛ gɔ jǝ Yahudawagɔ jǝ ke bɔ, n gabakɛl jǝ maa lɛɨ, mǝ dǝg ji dǝg ba ja jʊng a kǝga mʊn, sǝ ja nyǝm mǝ swɨ ń nɛ.

¹⁰ Ń kɨla kɛlɔ mǝ sʊwa ń a dul kʊtǝm nǝlɨ, n jʊ a bwɨ mǝ tǝmɨ mǝ kɨla ń nɛ a jʊ nɨ bwɨ lɛ a kwama tɛltǝmɨ, wʊnɨ gǝla lɛ a dul yooli nɨɨ, sǝ ja tɛl nǝb nɨ yǝm a yooli nɨɨ.

¹¹ “Mǝ bɛ lɛ mɨsɔ kʊta lɛ. Bɛ ń ta nǝtǝm bɨlǝngkɛl mʊnɔ gwanggwang, kage kaa nǝl a yem mʊn dwang dul fɔlɔn mʊnɔ.

¹² Nʊ nɨ a ku jelʌni, mǝ dǝg gǝn dǝg a yǝlam tɨya lɔng a mʊgɔ Kan Kwaaman Kwaama mǝndɨ. Mɨsɔ yǝla lɛ a jel wo a mʊgɔ gǝn. Mǝ mʊla mʊla dun Kwaama mǝndɨ a bʊtɔ gǝn, jǝbɔ dun Tuulɔ Dʊʊn Kwaama mǝndɨ, Urushalima fɨgɔ, wʊnɨ gǝla lɛ a dʌbʌl a daagɔ Kwaama mǝndɨ a dʌbʌl kwamaɨ. Mǝ mʊla mʊla dun fɨ mǝndɨ tag a bʊtɔ gǝn.

¹³ Nʊ nɨ nǝn lɔl nyʊwatǝmɨ, bɛ a nyʊwa jʊ Yʊwagɔ sʊwa daatɨn mʊrkalɨ nǝb bwangtǝm Kwaamaɨ lɛɨ.

Twamagɔ Shu Lɛ A Lawudikiyaɨ

¹⁴ “Bɛ ń mʊla bwɛ twama Kwaamaɨ nɨ gǝm a mʊrkalɨ nǝb bwangtǝm Kwaamaɨ nɨ gǝm a Lawudikiyaɨ gǝm nyɔ, “Kɛl nɨ nǝn gɔ n twamagɔ a daagɔ nʊ nɨ jǝ jo lɛ gɔ A daa nyɨɨ, Nǝ yiitǝm swatǝm yaa, jǝbɔ nǝ nǝtǝm nyiyo nyan, n daa gǝ woi Kwaama a fwal kanjǝlɨ.

¹⁵ N kwɛl n nyǝm nyǝmɨ maajɨtɨn mʊnɔ. Mʊ yʌb bɔ yʌbi, mʊ shilo bɔ shiloi. Na ń yʌb yʌbi, na mɨ nyɨɨ ń shilo shiloi.

¹⁶ Mʊ bǝlagbǝlag. Mʊ yʌb bɔ yʌbi, mʊ shilo bɔ shiloi. A dul kɛl nɨɨ, mǝ tɛɛ ń tɛɛ ń fʌlen a mʊgɔ nyiyo mɨ.

¹⁷ Mʊ sʊwa mɔʊ, ‘Mǝ nǝ kemʌn, mǝ nǝ shilo, mǝ saa bɔ kaa jǝl.’ Mʊ nyǝm bɔ mɔʊ mɨ mʊ nǝn jǝl, jǝ bʊnatǝm, nǝ bʊnǝn, kuli jǝbɔ kʊnkʊn.

¹⁸ A dul kɛl nɨ mǝ nǝ ń nyiyo lɛ, bɛ ń ten mʊnɔ a daa mɨ woi, wʊnɨ ja saalǝm nǝn kǝlaɨ, sǝ ń yǝlam nǝ shilo. Bɛ ń ten dwang fulontɨnɔ mʊ dʊʊ lɛɨ tag, sǝ ń sɔm kʊnkʊn mʊnɔ nǝn, kage ń nyʊwa gunidul. Bɛ ń ten nwang waatǝmɔ a nu, sǝ ń nya kuwotǝm daa.

¹⁹ “Nǝbɔ mǝ swɨ lɛɨ, n nǝbɔ mǝ gʊ jim lɔl lɛɨ, n nǝbɔ mǝ mwɛ ji lɛɨ. Maa kwaan bʊtɔ, ń yǝla ń bǝla bwɨlangkɛl mʊnɔ.

²⁰ Mǝ wɔ mǝ tɨm a nyanga kan, mǝ ga lɛ. Na nʊ nɨ a nyʊwa diil mǝndɨ a wum nyanga kanɨ, mǝ dɔ dɔ a daa gǝ woi, sǝ n ja nǝbɔ gɔ, ga ja jǝbɔ mǝ.

²¹ “Nʊ nɨ a ku jelʌni, mǝ nǝ gǝn nǝ gola a yɨ jǝbɔ mǝ a dʌbʌl kotere fɔlɔn mǝndɨ, kanga mǝ tǝmɨ mǝ ku jelʌni, mǝ yɨ dakini nǝbɔ Tɛtɛ mɨ a dʌbʌl kotere fɔlɔn gǝnɨ.

²² Nʊ nɨ nǝn lɔl nyʊwatǝmɨ, bɛ a nyʊwa jʊ nɨ Yʊwagɔ sʊwa daatɨn mʊrkalɨ nǝb bwangtǝm Kwaamaɨ lɛɨ.”