Dʊgam Nyangnyang 22 - Dadiya NT

Tiyo Kʊlɨgɔ

¹ Nǝngɔ bwɛ twama Kwaamaɨ a nʊng ɨ tiyo mwɛ kʊlɨgɨɨ, beta lɛ na tɛl kwaasɨn, jel lɛ a mʊgɔ kotere fɔlɔn Kwaamaɨ jǝbɔ a Bɛ Gal nɨɨ.

² A yɔ nǝn a tɨbǝl gʌleng gola dʊʊnɔ a tuulɔngɔ gǝmɨ. A kʌng tiyo nɨ yoi, tɨya kʊlɨgɔ tɨm wo, wʊnɨ tʊʊ tʊʊlɔ lɛ dʊʊmɔ kʊb jeli yoi, bwaalatɨnɔ pʌd jǝ tʊʊ tʊʊl lɛ. Langǝntɨnɔ n nyinong nɨ ya gung bǝlǝntǝmɔ lɛ a bɔɔlaɨ.

³ Mɨ lagtǝm wo a dul kaa jǝl. Kotere fɔlɔn Kwaamaɨ jǝbɔ a Bɛ Gal nɨ na wo a mʊgɔ tuulɔ nɨ gǝm. Jwaalɛb gǝnɔ nǝ gǝn nǝ bǝlátǝm.

⁴ Jǝ kuwo kuwo kǝga gǝnɔ. Dun gǝnɔ jǝ mʊla mʊla a tɛkǝgatɨn jinɔ gǝm.

⁵ Mɨsɔ jǝ fi kum lɛ wo. Mɨsɔ jǝ swɨ kuwotǝm nyalǝm fitila lɛ jǝbɔ nyalǝm kɔkɔgɔ, jʊ a bwɨɨ, Tɛlalɔ Kwaama nǝn gɔ yǝlam jim nyalǝm lɛɨ. Jǝ maa maa fɔlɔn mɨ dɨltǝm wo.

Yesu Bɛ Lɛ Mɨsɔ Kʊta Lɛ

⁶ Nǝngɔ bwɛ twama Kwaamaɨ a sʊwa ɨ gɔ, “Kɛltɨn nɨ mʊ nyʊwaɨ, n bɨlǝngǝn, bɛ ń ya nǝl wo. Tɛlalɔ, Kwaama wʊnɨ a nǝ nǝbkuwotǝmkǝgagɔ Yʊwa gǝnɨ, a twam bwɛ twama gǝnɔ sǝ a nʊng bɛtɔ jwaalɛn gǝnɔ gɔ kanjǝl nɨ mɨ nyǝmatǝm wo bwɨ bwɨ mɨsɔ kʊta lɛ.”

⁷ “N wɔ mǝ bɛ lɛ mɨsɔ kʊta lɛ! Bwiligɔ na a nǝb nɨ bwangtǝn kɛltɨn kuwotǝmkǝga langǝn bwangǝn nɨ lɛɨ.”

⁸ Mǝ Yohana, n nyʊwa, n kuwo kanjǝl nɨ. Kwama mǝ nyʊwam ji jǝbɔ kuwotǝm jini, nǝngɔ mǝ jʊng a kǝga bwɛ twama Kwaamaɨ nɨ a nʊng ɨ kanjǝl nɨ sǝ n maa gǝm bǝlátǝm.

⁹ Nǝngɔ a sʊwa ɨ gɔ, “Bɛ ka maa lɛ nyɔ! Mǝ, mǝ bwɛ jwaalɛ na mɔ jǝbɔ kɛtǝlam mʊnɔ, nǝbkuwotǝmkǝgagɔ, jǝbɔ nǝb nɨ pʌd a bwangtǝn kɛltɨn nɨ a mʊgɔ langǝn bwangǝn nɨɨ. Bǝlá Kwaama kwaagɔ!”

¹⁰ Nǝngɔ a sʊwa ɨ gɔ, “Bɛ ka ń bʊltɨ lɛ kɛltɨn kuwotǝmkǝga langǝn bwangǝn nɨ, jʊ a bwɨɨ kwamagɔ a dwama kanjǝl nɨ bwɨm lɛɨ.

¹¹ Bɛ nʊ nɨ maa jʊ nɨ lɛ a bʊm bɨɨ, a ja kǝga nǝn maatǝmɔ. Bɛ nʊ nɨ maa jǝ yaalɨ lɛɨ, a ja kǝga nǝn maatǝmɔ. Bɛ nʊ nɨ maa jʊ nɨ lɛ dǝngdǝngɨ, a ja kǝga nǝn maatǝmɔ. Bɛ nʊ nɨ n nǝ sagsagɨ, a ja kǝga nǝn yɨm sagsagɔ.”

¹² “N wɔ, mǝ bɛ lɛ mɨsɔ kʊta lɛ! Lǝma mǝndɨ gǝ na a daa mǝ woi. Mǝ nǝ nǝ nǝbɔ pʌd a yɔ dǝngdǝng jǝbɔ jʊ ja maaɨ.

¹³ Nǝmǝ mǝ Alfa, nǝmǝ mǝ Omega, nǝmǝ mǝ tɨkǝgagɨɨ, nǝmǝ mǝ dɨltǝmɨ.

¹⁴ “Bwiligɔ na a nǝb nɨ a gam dwang malǝngtɨn jini, sǝ ja nya gola jatǝm tʊʊl tɨya kʊlɨgɨɨ, sǝ jǝ dɔ nyangatɨn tuulɔngɨ.

¹⁵ Nǝbɔ a gul tuulɔ nɨɨ, n nǝb bwɨlan, jǝbɔ nǝb nɨ maa maajɨ feyi lɛɨ, jǝbɔ nǝb maajɨ bulon, jǝbɔ nǝb jʌtǝm dul, jǝbɔ nǝb bwangtǝm shom, jǝbɔ nǝbɔ swɨ maatǝm gabakɛl lɛ a mʊgɔ kɛltɨn jinɔ gǝm gwamɨ, jǝbɔ maajɨtɨn jinɔ.

¹⁶ “Mǝ Yesu, mǝ twam bwɛ twama mǝndɨ sǝ a sʊwa daatɨn mʊrkalɨ nǝb bwangtǝm Kwaamaɨ kanjǝl nɨ. Nǝmǝ mǝ jingɔ, jǝbɔ guu Daudaɨ. Nǝmǝ mǝ nyalǝm tulkasi kumsʌli.”

¹⁷ Yʊwagɔ jǝbɔ nɔɔgwaalɨgɔ a sʊwa gɔ, “Bɛ!” Nǝb nɨ gwam a nyʊwaɨ, bɛ ja sʊwa gɔ, “Bɛ!” Nǝb nɨ gwam nyʊwa diil mwɛ lɛɨ, bɛ ja bɛ. Nǝb nɨ swɨ mwɛ kʊlɨgɔ lɛɨ, ba ja yo lǝma mwɛ kʊlɨgɔ.

¹⁸ Mǝ Yohana, mǝ gʊ lɔl jenɔ lɛ pʌd, nǝb nɨ a nyʊwa kɛltɨn kuwotǝmkǝgagɔ a mʊgɔ langǝn bwangǝn nɨɨ, na kaa nǝl a sʊtǝn kaa jǝl a dul jini, Kwaama sʊ gǝm sɔ gaalan bwɨlantɨn nɨ ja nʊng a mʊgɔ langǝn bwangǝn nɨ.

¹⁹ Na kaa nǝl a dem kɛltɨnɔ a mʊgɔ langǝn bwangǝn kuwotǝmkǝga nɨɨ, Kwaama dem dem jʊ gǝ nya lɛ a daagɔ tɨya kʊlɨgɔ woi jǝbɔ tuulɔ sagsagɔ, wʊnɨ nǝn gɔ jʊ ja nʊng a mʊgɔ langǝn bwangǝn nɨɨ.

²⁰ Nʊ nɨ a nǝ nyiyo a dul kanjǝl nɨ, a sʊwa gɔ, “Bɨlǝngǝn, mǝ bɛ lɛ mɨsɔ kʊta lɛ.” A daa nyɔ. Bɛ, Tɛlalɔ Yesu.

²¹ Bɛ lǝma Tɛlalɔ Yesui a yɨ jǝbɔ nǝbam Kwaamaɨ gwam. A daa nyɔ.