Dʊgam Nyangnyang 21 - Dadiya NT

Dʌbʌl Kwama Fɨgɔ Jǝbɔ Tǝm Fɨgɔ

¹ Nǝngɔ mǝ kuwo dʌbʌl kwama fɨgɔ jǝbɔ tǝm fɨgɨɨ. Dʌbʌl kwama tɨkǝgagɔ jǝbɔ tǝm na tɨkǝgagɔ a shu, mɨ kaa wɨma wo.

² N kuwo Tuulɔ Sagsagɔ, Urushalima fɨgɔ gǝla lɛ a dʌbʌl kwama, a daa Kwaama woi. A fɛka na nɔɔgwaalɨ nǝn dʊʊl sǝ bwɨla gɔ a kuwo gǝn.

³ N nyʊwa kaa diil nǝn kwaan nyɔ a daagɔ kotere fɔlɔnɔ woi, sʊwa lɛ gɔ, “Jǝ́ kuwo, daa yɨm Kwaamaɨ gǝ na jǝbɔ nǝbɔ, yɨ jǝbɔ ji. Jǝ yǝlam nǝbam gǝn, Kwaama nǝn dul gǝn yɨ yɨ jǝbɔ ji a yǝlam Kwaama ji.

⁴ Waam jim waam mwɛ num jinɔ gwam. Mɨ kaa bwaa wo, mɨ fitǝm nǝl wo, mɨ wi wo jǝbɔ nɔɔtǝm gaalan, jʊ a bwɨɨ kanjǝl galɨgɔ a kwɛl a shu shui.”

⁵ Nʊ nɨ yǝm a dʌbʌl kotere fɔlɔnɨ a sʊwa gɔ, “Mǝ fɛ kanjǝlɔ lɛ gwam a yǝlam a fɨ!” Nǝngɔ a sʊwa gɔ, “Mʊla jʊ nɨ, jʊ a bwɨɨ kɛl nɨ n jǝ yatǝm nǝl, n bɨlǝngkɛl.”

⁶ A sʊwa ɨ gɔ, “A dɨɨ. Nǝmǝ mǝ Alfaɨ, Nǝmǝ mǝ Omegaɨ, Nǝmǝ mǝ Tɨkǝgaɨ, Nǝmǝ mǝ Dɨltǝmɨ. Nʊ nɨ nyʊwa diil mwɛ lɛɨ, mǝ nǝ gǝn nǝ mwɛ nɨ a mʊgɔ bwili mwɛ kʊlɨ nǝn kwan.

⁷ Nʊ nɨ a ku jelʌni, ja ja kʊlagɔ a daa mǝ woi. N yǝlam Kwaama gǝn, gǝ tǝgǝn a yǝlam bwɛ a daa mǝ woi.

⁸ Nǝb taalɔ, jǝbɔ nǝb nɨ kǝl swatǝm yaa lɛɨ, jǝbɔ nǝb nɨ mɨ maa maajɨ bʊmɨ lɛɨ, jǝbɔ nǝb jʌtǝm dul, jǝbɔ nǝb swɨtǝm maatǝm bulon, jǝbɔ feyilʌmɔ, jǝbɔ nǝb bwangtǝm shom, jǝbɔ nǝb gabatǝm kɛl gwam, jʊ jǝ nya lɛɨ n gʌto nɨ ja kǝla lɛɨ, a fo a shii, wʊnɨ nǝn gɔ bwaa na yogɨɨ.”

Urushalima Fɨgɔ

⁹ Nǝngɔ win a mʊgɔ bɛtɔ twama Kwaamaɨ nɨ nʌbʌli, nǝb nɨ nǝn taasatɨnɔ nʌbʌli, a yiilo nǝn gaalan bwɨlantɨn nɨ nʌbʌl na dɨltǝmɨ, a bɛ ba sʊwa ɨ gɔ, “Bɛ ba n nʊng ń nɔɔgwaalɨgɔ, nwala Bɛ Galɨ.”

¹⁰ Nǝngɔ a do i a shu nǝn a mʊgɔ Yʊwaɨ. A yɔ nǝn mǝ a kaa gʌleng yem nɨ a deba nyɨɨ, a nʊng ɨ Tuulɔ Urushalimagɔ Sagsagɨ. Gǝla lɛ a dʌbʌl kwama a daagɔ Kwaama woi.

¹¹ Tuulɔ nɨ beta lɛ nǝn dʊʊlǝn Kwaamaɨ, betatǝm gǝnɔ a maa na tɛl bʊmǝntɨn, maamɔ tɛl kwaasɨn fulo nǝn fǝbfǝb nyɔ, beta lɛ na bwaala.

¹² Nǝn gʌleng kwalɨ nɨ a deba nyɨɨ, nǝn nyanga tuulɔngɔ kʊb jeli yo jǝbɔ bɛtɔ twama Kwaamaɨ kʊb jeli yoi a nyanga tuulɔngɔ gǝm. A nyanga tuulɔngɔ gǝm, ja mʊla duntɨn dʊʊm Israilaɨ kʊb jeli yoi.

¹³ A twal nyanga kanɔ taal, a gwilʌng wo taal, a tǝbang taal, a diyeng taal.

¹⁴ Kwalɨ tuulɔngɔ nǝngǝn nǝn jʌng kwalɨgɔ kʊb jeli yo. A dultɨn jinɔ gǝm ja mʊla duntɨn bɛtɔ twamagɔ kʊb jeli yoi a Bɛ Gal nɨ.

¹⁵ Bwɛ twama Kwaamaɨ nɨ a sʊwa kɛl dakini jǝbɔ mǝɨ, nǝngǝn nǝn jǝ sʊwatǝmɔ a kang gǝn, ja fɛ nǝn mʊn, sǝ a sʊwa tuulɔngɔ, jǝbɔ nyanga kantɨn gǝnɔ, jǝbɔ kwalɨtɨn gǝnɔ.

¹⁶ Tuulɔ nɨ a laaka bɔ, somʌn gǝnɔ jǝbɔ fʌl gǝnɔ, win. Nǝngɔ bwɛ twama Kwaamaɨ a sʊwa tuulɔ nɨ nǝn dwam sʊwatǝm gǝnɨ a nya mɛlɔ fʊlkʊblǝnɔ win jǝbɔ fʊlkʊb naal (1,400), somʌn gǝnɔ jǝbɔ fʌl gǝnɔ jǝbɔ debatǝm gǝnɔ win.

¹⁷ A sʊwa kwalɨgɨɨ a nya debatǝm gǝnɔ a la sʊwatǝm naagɔ fʊltǝnukun jeli nukun (66) a sʊwatǝm kang nǝfilii, a wʊnɨ bwɛ twama Kwaamaɨ maa maajɨ lɛ nǝnɨ.

¹⁸ Kwalɨgɔ ja fɛ nǝn tɛl yasfa. Tuulɔngɔ ja fɛ nǝn mʊn, a bʊm na bwaala.

¹⁹ Fʌlʌm kwalɨ tuulɔngɔ, ja fɛ nǝn tɛl bʊmǝntɨn nǝn dʌmʌn. Tǝltǝm fʌlʌmɔ ja fɛ nǝn tɛl yasfa, a yogɔ n safir, a taalɔ n agata, a naalɔ n zumurudu,

²⁰ a nʊgɔ n onis, a nukunɔ n yakutu, a nʌbʌlɔ n kirisolat, a naalǝbɔ n beril, a tʊlkʊbɔ n tofaz, a kʊbɔ n kirisofaras, a kʊb jeli winɔ n yakinta, a kʊb jeli yogɔ n ametis.

²¹ Nyanga kantɨn tuulɔ nɨ kʊb jeli yoi, n luu luu ja fɛ ji nǝnɨ. Gola tuulɔngɔ ja fɛ nǝn mʊn kwaagɔ, a fulo nǝn fǝbfǝb nyɔ yo nu lɛ na bwaala.

²² Mǝ kuwo bɔ Kan Kwaaman wo a mʊgɔ tuulɔngɔ gǝm, jʊ a bwɨɨ Kan Kwaaman gǝnɔ nǝn Tɛlalɔ Kwaama Nǝ kwaan, jǝbɔ Bɛ Gal nɨ tag.

²³ Tuulɔngɔ a saa bɔ nyalǝm kɔkɔ, jǝbɔ fulotǝm bwaala sǝ a nǝ gǝn nyalǝm, jʊ a bwɨɨ dʊʊlǝn Kwaamaɨ nǝn gɔ nyalǝm gǝnɨ. Bɛ Gal nɨ nǝn gɔ fitila gǝnɨ.

²⁴ N nyalǝm gǝn bǝlǝntǝmɔ yɔm yɔm lɛɨ. Fɔlɔlɔm yooligɔ jǝ bɛ bɛ nǝn dʊʊlǝn jinɔ wo.

²⁵ Nyanga tuulɔngɔ mɨ jǝ nʊng ji lɛ wo, kum jǝbɔ kɔkɔ. Mɨ fitǝm kum wo fʌlen.

²⁶ Jǝ bɛ bɛ nǝn dʊʊlǝn bǝlǝntǝmɔ jǝbɔ nǝtǝm dʊʊn jinɔ a mʊgɔ tuulɔ nɨ.

²⁷ Mɨ nyǝmatǝm wo, mɨ kaa jʊ nɨ wo mɨ sagsag dɔ mʊgɔ gǝn nɛɨ. Nʊ nɨ maa jʊ nɨ lɛ a bʊm bɔ kuwotǝmɨ, jǝbɔ nʊ nɨ maa gabakɛl lɛɨ mɨsɔ dɔ lɛ, na ke bɔ nǝbɔ ja mʊla duntɨn jinɔ a langǝn bwangǝn kʊlɨ a Bɛ Gal nɨ kwaagɨɨ.