Dʊgam Nyangnyang 20 - Dadiya NTJolɔ Fʊlkʊblǝn 1 Nǝngɔ mǝ kuwo kaa bwɛ twama Kwaamaɨ gǝla lɛ a dʌbʌl kwamaɨ, nǝn jǝ wumtǝm bʊwa nɨ mɨ dɨltǝm woi, jǝbɔ gʌleng golman a kang gǝn. 2 A ta sɔɔ bwɨla nɨ, wʊnɨ nǝn gɔ gʌleng sɔɔ dʊʊ galɨgɨɨ, wʊnɨ nǝn gɔ Mammɨ, a bwa gǝn jolɔ fʊlkʊblǝn. 3 A mal gǝn a mʊgɔ bʊwa nɨ mɨ dɨltǝm woi. A nʊng, a gatǝn mɛl gǝnɔ tʌgo, jʊ a bwɨɨ kage a sʊtǝn swagtǝm Bʌtʌbɔ, sǝ a la nǝn jol nɨ fʊlkʊblǝnɔ dɨ lɛɨ. A bɨtǝnɨ, jǝ dem gǝm dem kang kwama nǝn dǝm nyɔ. 4 Nǝngɔ mǝ kuwo kaam kotere fɔlɔnɔ, jǝbɔ nǝb nɨ ja nǝ ji fɔlɔn biyotǝm borangɨ yǝmam a dul jin. N kuwo kʊlɨ nǝb nɨ ja betam dultɨn jini, a kɛl nǝtǝm nyiyo a dul Yesui jǝbɔ kɛl Kwaamaɨ. Nǝji ja nǝ bɔ yʊwal bwɨla nɨ bǝlátǝm jǝbɔ bawilom gǝnɨ, ja yo bɔ kwatɨ a tɛkǝga jǝbɔ kangtɨn jinɔ. Ja fulo, ja maa fɔlɔn jǝbɔ Kiristi a yɔ nǝn jolɔ fʊlkʊblǝn. 5 Wʊnɨ nǝn gɔ guntǝm nǝn kʊlɨ a tɨkǝgaɨ. Tangǝn nǝb nɨ a bʊlalaɨ ja yǝla bɔ ja nya kʊlɨtɨn jinɔ, ja nya nǝn kwama nɨ jol fʊlkʊblǝnɔ a yii. 6 Nʊ nɨ a nya guntǝm nǝn tɨkǝgaɨ, n nǝ bwili, n nǝ sagsag. Bwaa na yogɔ mɨ nǝn kwaan a dul nǝb nɨɨ. Ja yǝlam nǝbkǝlam Kwaamaɨ jǝbɔ a Kiristii, sǝ ja maa fɔlɔn jǝbɔ gɔ a yɔ nǝn a jolɔ fʊlkʊblǝn. Kutʌm Jelʌn A Dul Mammɨ 7 Nǝn kwama nɨ jolɔ fʊlkʊblǝnɔ a dɨɨ, jǝ dem dem Mammɔ gǝm kang a lɔsomi. 8 Sǝ a jel ya swag Bʌtʌbɔ lɛ, nǝb nɨ a gol lɔtɨn nɨ naal a yooli nɨ, Gog jǝbɔ Magog. A mʊr ji sǝ ja ta kun. Ladatǝm jinɔ a maa na swiyoti wɨma. 9 Ja kwɨya tǝmɔ nǝn kwan, ja yii yooligɔ, ja kang daa yɨm nǝb sagsag Kwaamaɨ, jǝbɔ tuulɔ nɨ gǝ swɨ lɛɨ. Kǝlagɔ jel a dʌbʌl kwama sǝ a twɨm ji. 10 Mammɔ tǝgǝn nǝ swagtǝm jinɔ, jǝ mal gǝn a mʊgɔ gʌto kǝla nɨ twɨ lɛ a fo, a shii, wʊnɨ n daagɔ ja mǝlam yʊwal bwɨla nɨ jǝbɔ nǝkuwotǝmkǝga gabakɛlɔ woi. Jǝ nʊng ji gaalanɔ nɛ wo, kum jǝbɔ kɔkɔ mɨ dɨltǝm wo. Borang Dɨltǝmɔ 11 Nǝngɔ mǝ kuwo kaa gʌleng kotere fɔlɔn fulo jǝbɔ nʊ nɨ yǝm a dul gǝnɨ. Nǝngɔ tǝmɔ jǝbɔ dʌbʌlɔ ja mwalam a kǝga gǝnɨ, mɨ ji nǝn daa wo. 12 N kuwo bʌlʌn nǝb dʊʊmɨ jǝbɔ nǝb nɨ mɨ a nyiyo jǝlɨ, tɨlam a kǝga kotere fɔlɔnɔ gǝm. Langǝn bwangǝntɨnɔ a wumo wumoi. Kaa langǝn bwangǝnɔ a wumo wumoi wʊnɨ nǝn gɔ langǝn bwangǝn kʊlɨgɨɨ. Jǝ maa nǝb nɨ a bʊla bʊlaɨ gǝm borang a yɔ dǝngdǝng a jʊtǝb nɨ ja maaɨ, kanga ja mʊla a mʊgɔ langǝn bwangǝntɨnɔ gǝmɨ. 13 Nǝngɔ wɨmagɔ a nǝ bʌlʌntɨn nɨ a mʊgɔ gǝnɨ. Daa yamtǝm borangɔ a nǝ bʌlʌn nɨ a mʊgɔ gǝnɨ. Ja biyo jim borangɔ a yɔ dǝngdǝng jǝbɔ jʊtǝb nɨ ja maaɨ. 14 Bwaagɔ jǝbɔ daa yamtǝm borangɔ jǝ mal ji a mʊgɔ gʌto kǝla. Gʌto kǝla nɨ nǝn gɔ bwaa na yogɨɨ. 15 Nʊ nɨ ja mʊla bɔ dun gǝnɔ a mʊgɔ langǝn bwangǝn kʊlɨɨ, jǝ mam gǝn fʌlen a mʊgɔ gʌto kǝla. |
©️2024 Luke Initiative for Scripture Translation
The Seed Company