Dʊgam Nyangnyang 2 - Dadiya NT

Twamagɔ Shu Lɛ A Afisaɨ

¹ “Bɛ ń mʊla bwɛ twama Kwaamaɨ nɨ a mʊrkalɨ nǝb bwangtǝm Kwaamaɨ a Afisaɨ gǝm nyɔ, “Kɛl nɨ nǝn gɔ n twama nʊ nɨ a ta nyanyamɨtɨn nɨ nʌbʌl a kang jajǝng gǝnɨ, wʊnɨ yɔ yɔm lɛ tag a tɨbǝl daatɨn swatǝm fitila nɨ nʌbʌl na mʊnɨ.

² N nyǝm kanjǝlɔ mʊ maaɨ, maajɨ mʊnɔ jǝbɔ kʊtǝm nǝl mʊnɔ. N nyǝm mɨ mʊ kʊ nǝl lɛ nǝn nǝb bwɨlamɔ. Mʊ tɛl tɛl nǝb nɨ do dul jinɔ lɛ gɔ jǝ bɛtɔ twamaɨ, wʊnɨ mɨ nyɨɨ. Mʊ nya jǝ nǝb gabakɛl.

³ N nyǝm mʊ nǝn kʊtǝm nǝl, mʊ nǝ bwatǝm nǝl a gaalan a kɛl dul mɨ, mɨ gǝ lʊwa ń nɛ.

⁴ “Jʊ mʊ maa bɔ dǝngdǝngɨ n wɔ, ń mǝlam swɨkan nɨ mʊ maa nǝn tɨkǝgaɨ.

⁵ Bɛ ń fɛ ń bʊʊla nǝn dʊʊn mʊnɔ nǝn tɨkǝgaɨ, jǝbɔ yǝlatǝm nɨ nǝn gul mʊ maaɨ. Yǝla bǝla bwɨlangkɛl mʊnɔ. Yǝla maa maajɨ nɨ mʊ maa nǝn tɨkǝgaɨ. Na mʊ yǝla bɔ ń bǝla bwɨlangkɛl mʊnɨ, mǝ bɛ bɛ a daa mɔ woi sǝ n yem daa swatǝm fitilagɔ a daa mʊ woi.

⁶ A mʊnɔ ń maa dǝngdǝng mʊ kɔ maajɨ Nikolatawaɨ, wʊnɨ mǝ tǝmɨ mǝ kɔɨ.

⁷ “Pʌd nʊ nɨ nǝn lɔl nyʊwatǝmɨ, bɛ a nyʊwa jʊ nɨ Yʊwagɔ sʊwa daatɨn mʊrkalɨ nǝb bwangtǝm Kwaamaɨ nɨ lɛɨ. Pʌd nʊ nɨ a ku jelʌni, mǝ nǝ gǝn nǝ gola jatǝm tʊʊl tɨya kʊlɨ nɨ, wʊnɨ a mʊgɔ lɔ Kwaamaɨ a dʌbʌli.

Twamagɔ Shu Lɛ A Simirnaɨ

⁸ “Bɛ ń mʊla bwɛ twama Kwaamaɨ nɨ a mʊrkalɨ nǝb bwangtǝm Kwaamaɨ nɨ a Simirnaɨ gǝm nyɔ, “Kɛl nɨ nǝn gɔ n twama nʊ nɨ na Tɨkǝgaɨ jǝbɔ na Dɨltǝmɨ, wʊnɨ a bʊla a yǝla a gun nǝn kʊlɨɨ.

⁹ N nyǝm nyǝmɨ gaalanɔ mʊ nɔɔ lɛɨ, jǝbɔ bʊnǝn mʊnɔ, (a mʊnɔ n bɨlǝngǝn, mʊ nǝ shilo). N nyǝm kaamɨ kal dun mʊnɔ lɛ. Jǝ sʊwa lɛ gɔ jǝ Yahudawa, wʊnɨ jǝ ke bɔ Yahudawaɨ, n nǝbam Mammɨ.

¹⁰ Bɛ ka ń nyʊwa lɛ taal gaalan nɨ bɛ mʊn nɛɨ. N wɔ Mammɔ maa fɛkalɨ lɛ sǝ a tʊng kaam jenɔ a mʊgɔ lɔsomi sǝ a tɛl jen. Mʊ nyʊwa nyʊwa gaalan na kumɔ kʊb. Bɛ ń ta swatǝm yaa na jǝ jʌ ń jʌ ńi. Mǝ nǝ ń nǝ ń dwang dul kʊlɨ.

¹¹ “Nʊ nɨ nǝn lɔl nyʊwatǝmɨ, bɛ a nyʊwa jʊ nɨ Yʊwagɔ sʊwa daatɨn mʊrkalɨ nǝb bwangtǝm Kwaamaɨ lɛɨ. Nʊ nɨ a ku jelʌni, bwaa na yogɔ mɨsɔ nya kwaan nɛ a dul gǝn.

Twamagɔ Shu Lɛ A Birgamasɨ

¹² “Bɛ ń mʊla bwɛ twama Kwaamaɨ nɨ a mʊrkalɨ nǝb bwangtǝm Kwaamaɨ nɨ gǝm a Birgamasɨ gǝm nyɔ, “Kɛl nɨ nǝn gɔ n twama nʊ nɨ nǝn gulʌnɔ nyiyogɔ yo a ja jaɨ.

¹³ N nyǝm daagɔ mʊ yǝm woi, n daagɔ Mammɔ maam fɔlɔn nɛɨ sul, ń nǝ bɨlǝngkɛl a dun mɨ gǝm. Mʊ bǝla bɔ nǝtǝm bɨlǝngkɛl a daa mɨ woi, a joltɨn Antibasɨ nǝ tatǝm swatǝm yaa, nǝ nǝtǝm nyiyo a kɛl dul mɨ. Wʊnɨ ja jʌ a kʊm jeni, a daagɔ Mammɔ yǝm woi.

¹⁴ “Jʊ mʊ maa bɔ dǝngdǝngɨ n wɔ, kaamɨ wo a kʊm jen jǝ bwangtǝn mɛlalɨ Balamui, wʊnɨ a mɛla Balak gǝmɨ, a dǝg nǝbɔ Israilaɨ bwɨlangkɛl jatǝm jǝjalǝn nɨ ja tǝlam shomtɨnɔ gǝm twamaɨ, jǝbɔ maatǝm bulon tag.

¹⁵ A na nyɔ kaamɨ a kʊm jen n nǝb bwangtǝm mɛlalɨ Nikolatawaɨ.

¹⁶ Bɛ ń yǝla ń bǝla bwɨlangkɛl mʊnɔ. Na mɨ nyɨɨ, mǝ bɛ lɛ a daa mʊ woi kǝngkɔ, sǝ n ta kun jǝbɔ ji nǝn gulʌn nɨ a nyiyo mɨɨ.

¹⁷ “Nʊ nɨ nǝn lɔl nyʊwatǝmɨ, bɛ ga nyʊwa jʊ Yʊwagɔ sʊwa daatɨn mʊrkalɨ nǝb bwangtǝm Kwaamaɨ lɛɨ. Nʊ nɨ a ku jelʌni, mǝ nǝ gǝn nǝ wo a tangǝn manna nɨ ja yʊ yʊɨ, mǝ nǝ gǝn nǝ tɛl fulon tag jǝbɔ dun fɨ nɨ a mʊla mʊlaɨ a bʊtɔ tɛl nɨɨ. Mɨ nʊ nɨ wo a nyǝm dun nɨɨ, na ke bɔ nʊ nɨ a yo gǝnɨ.

Twamagɔ Shu Lɛ A Tayatiraɨ

¹⁸ “Bɛ ń mʊla bwɛ twama Kwaamaɨ nɨ a mʊrkalɨ nǝb bwangtǝm Kwaamaɨ gǝm a Tayatiraɨ gǝm nyɔ, “Kɛl nɨ nǝn gɔ n twama Bʊla Kwaamaɨ, nʊ nɨ nǝn nutɨnɔ na ben kǝlaɨ, nʊ nɨ naatɨnɔ a maa na kemʌn nɨ ja saal saalɨ.

¹⁹ N nyǝm maajɨ mʊnɔ, jǝbɔ swɨkan mʊnɔ, jǝbɔ nǝtǝm bɨlǝngkɛl mʊnɔ, jǝbɔ tɨkalɨ nǝbɨɨ, jǝbɔ kʊtǝm nǝl mʊnɔ. N nyǝm maajɨ mʊnɔ tag kǝngkɨɨ, a laa na tɨkǝgagɔ.

²⁰ “Jʊ mʊ maa bɔ dǝngdǝngɨ n wɔ. Ń kʊ nǝl nǝn Yezebel, nɔɔlɨ nɨ do dul gǝnɔ lɛ gɔ gǝ nǝkuwotǝmkǝgaɨ. Mɛla jwaalɛb mǝndɨ gǝm lɛ, swag ji lɛ gɔ ja maa bulon. Swag ji lɛ tag gɔ ja ja jǝjalǝn nɨ ja tǝlam shomtɨnɔ gǝm twamaɨ.

²¹ N nǝ gǝn gola sʊwatǝm ga yǝla ga bǝla bulon gǝnɔ, a kɔ.

²² N wɔ mǝ dǝg gǝn dǝg ga daa bɔɔla bwɨla. Nǝb nɨ a maa bulon jǝbɔ gɨɨ, mǝ ya jim ya gaalan bwɨla, na ja yǝla bɔ ja bǝla bwɨlangkɛl jinɔ ja maa jǝbɔ gɨɨ.

²³ Mǝ jʌbo jʌbo bɛtɔ lɔ gɨɨ, dɨsɔ daatɨn mʊrkalɨ nǝb bwangtǝm Kwaamaɨ ja nyǝm gɔ, nǝmǝ mǝ sǝb nǝlɔ lɛɨ jǝbɔ bʊʊlalɨ jini. Mǝ ywa ywa maajɨ jenɔ dǝngdǝng kanga jǝ́ maaɨ.

²⁴ “A dul tangǝn jeni, jen nɨ a Tayatiraɨ, mɨ jǝ́ bwangtǝn mɛlalɨ Yezebeli lɛɨ. Jǝ́ maa bɔ mɛlalɨ nǝn jʊ kaamɨ a jo gɔ kanjǝl nɨ a bwa bwaɨ a Mammɨ. Mǝ sʊwa jen nɛ, mɨsɔ mǝ ya jem kaa jǝ tuulo lɛ a dul jen.

²⁵ Bɛ jǝ́ ta jʊ jǝ́ nǝngǝnɨ gwanggwang, sǝ ba la nǝn kwama mǝ bɛm lɛɨ.

²⁶ “Nʊ nɨ a ku jelʌn, a kɨla diil mǝndɨ a yɔ nǝn a dɨltǝmɨ, mǝ nǝ gǝn nǝ fɔlɔn a dul Bʌtʌbi,

²⁷ “ ‘Nǝn gɔ maa fɔlɔn nɛ a dul jin nǝn dwam kemʌni, a wulola ji na gobʌl boli, mǝ nǝ gǝn nǝ fɔlɔn kanga tɛtɛ mɨ a nɨ ɨɨ.’

²⁸ “Mǝ nǝ gǝn nǝ tulkasi kumsʌlɔ.

²⁹ Nʊ nɨ nǝn lɔl nyʊwatǝmɨ, bɛ a nyʊwa jʊ nɨ Yʊwagɔ sʊwa daatɨn mʊrkalɨ nǝb bwangtǝm Kwaamaɨ lɛɨ.”