Dʊgam Nyangnyang 19 - Dadiya NT

Jǝ́ Bǝlá Kwaamagɔ A Dʌbʌl

¹ A bɨtǝnɨ, n nyʊwa kaa diil nǝn kwaan na mʊrkalɨ nǝbɨɨ a dʌbʌl kwama jǝ gaba kwaalɨgɔ lɛ, jǝ sʊwa lɛ gɔ, “Jǝ́ bǝlá Kwaamagɔ! Bʊʊtǝmɔ, jǝbɔ dʊʊnɔ, jǝbɔ kwaanɔ, bɛ a ta tʌgo gwanggwang a daagɔ Kwaama bǝnɔ woi.

² Jʊ a bwɨɨ bɨlǝngkɛlɔ jǝbɔ dǝngdǝngɔ n biyotǝm borang gǝn. A kwɛl a biyo biyoi gʌleng nɔɔlɨ kalalɨ nɨ gǝm borang, wʊnɨ a kal yooligɔ nǝn bulon gǝnɨ. Kwaama a mwɛ gǝn a kɛl dul tʊʊm jwaalɛb gǝnɔ ga jʌboi.”

³ Nǝngɔ ja yǝla ja ma bwaalɨ tagɨ gɔ, “Jǝ́ bǝlá Kwaamagɔ! Yulʌn kǝla nɨ jel lɛ a gʌleng tuulɔ nɨ, shu lɛ a dʌbʌl mɨ dɨltǝm wo.”

⁴ Nǝb dʊʊm nɨ fʊltiyo jeli naalɨ jǝbɔ kanjǝl nɨ naal nǝn kʊlɨɨ, ja jʊng jǝ bǝlá Kwaamagɔ lɛ, wʊnɨ yǝm a kotere fɔlɔnɨ. Jǝ sʊwa lɛ gɔ, “A daa nyɔ, Jǝ́ bǝlá Kwaamagɔ!”

⁵ Nǝngɔ kaa diil a jel a kotere fɔlɔnɔ gǝm a sʊwa gɔ, “Jǝ́ bǝlá Kwaama bǝnɔ, pʌd jenɔ jǝ́ jwaalɛb gǝnɔ, jen nɨ jǝ́ nyʊwa taal gǝnɔ lɛɨ, nǝbɔ mɨ a nyiyo jǝlɨ jǝbɔ nǝb dʊʊmɔ.”

Kangwaal Bɛ Galɔ

⁶ Nǝngɔ mǝ nyʊwa diil nɨ a maa na kʌm nǝbɨɨ, a maa na mwɛ nɨ a lada nyɔ jel lɛ gǝla lɛɨ, a maa na kunnyiyo mwɛla lɛɨ, sʊwa lɛ gɔ, “Jǝ́ bǝlá Kwaamagɔ! Jʊ a bwɨɨ Tɛlalɔ Kwaama bǝn Nǝ kwaan nǝn gɔ maa fɔlɔn nɛɨ.

⁷ Bɛ bǝ maa fulotǝm nǝl jǝbɔ nyʊwatǝm lǝma, jǝbɔ nǝtǝm dʊʊn! Jʊ a bwɨɨ bwatǝm naakan Bɛ Galɔ a bɛ. Nɔɔgwaalɨ gǝnɔ a kwɛl a fɛka fɛkaɨ.

⁸ Lilin nyanɔ a fulo fǝbfǝbɨ, ja nǝ gǝn sǝ ga dʊʊ.” (Lilin nyanɔ gǝ nʊng maatǝm maajɨ nyan a nǝb sagsagɨɨ.)

⁹ Nǝngɔ bwɛ twama Kwaamaɨ a sʊwa ɨ gɔ, “Mʊla jʊ nɨ: Bwiligɔ na a nǝb nɨ ja jo ji jatǝm jǝjalǝn kangwaal Bɛ Gal nɨɨ!” Nǝngɔ a sʊtǝn gɔ, “Kanjǝl nɨ nǝn gɔ kɛltɨn Kwaamaɨ, bɨlǝngǝn.”

¹⁰ Nyʊwatǝm jʊ nɨɨ, nǝngɔ mǝ jʊng a tǝm sǝ n maa gǝm bǝlátǝmɨ. Nǝngɔ a sʊwa ɨ gɔ, “Ka ń maa lɛ nyɔ! Mǝ bwɛ jwaalɛ na jen, jǝbɔ kɛtǝlam mʊnɔ, nǝb nɨ nǝ nyiyo lɛ a kɛl Yesui. Jǝ́ bǝlá Kwaamagɔ! Jʊ a bwɨɨ bɨlǝngkɛlɔ Yesu a nʊngɨ, nǝn gɔ a nǝ kwaan maatǝm maajɨ kuwotǝmkǝgagɨɨ.”

Gwitǝm Tʊwa Fulogɔ

¹¹ Nǝngɔ mǝ kuwo dʌbʌlɔ a wumoi. Mǝ kuwo kaa tʊwa fuloi! Nǝ gwitǝm gǝnɔ jǝ jo gǝn gɔ Nǝ yiitǝm swatǝm yaa jǝbɔ Nǝ bɨlǝngkɛl. Gǝ biyo borang gǝnɔ dǝngdǝng, ta kun nyan nɛ.

¹² Nutɨn gǝnɔ a maa na ben kǝla. A dul gǝn dwang dul fɔlɔntɨnɔ wo a lada! Nǝngǝn nǝn kaa dun nɨ ja mʊla a bʊtɔ gǝnɨ, mɨ nʊ nɨ wo a nyǝmɨ, na ke bɔ gɨɨ.

¹³ Bɛllɛ nɨ a malɨ, ja fʊ nǝn tʊʊm. Dun gǝnɔ n Kɛl Kwaamaɨ.

¹⁴ Sʊwajaamtɨnɔ a dʌbʌl kwamaɨ bwang gǝm lɛ a dʌbʌl tʊwa fulontɨn. Ja dʊʊ dʊʊl nǝn lilin nyan a fulo nǝn fǝbfǝb nyɔ.

¹⁵ A mʊgɔ nyiyo gǝn kaa gulʌn nɨ a ja jaɨ jel lɛ wo, wʊnɨ kabam bǝlǝntǝmɔ lɛ nǝnɨ. Maa jim maa fɔlɔn nǝn dwam kemʌn. Falam falam tʊʊl fogfogigɔ, wʊnɨ nǝn gɔ nabwɨl Kwaamaɨ, Nǝ kwaan.

¹⁶ Ja mʊla kaa dun a bɛllɛ gǝnɔ gǝm jǝbɔ kulong gǝnɔ gɔ, “FƆLƆ FƆLƆLƆMƗ JƏBƆ TƐLALƆ TƐLALƆTƗNƗ.”

¹⁷ Nǝngɔ mǝ kuwo kaa bwɛ twama Kwaamaɨ tɨm a mʊgɔ nu kwamaɨ. Nǝngɔ a jo lǝbɨtɨnɔ pʌd wʊnɨ gun nɛ a dʌbʌli, nǝn diil nǝn kwaan a sʊwa gɔ, “Jǝ́ bɛ, jǝ́ mʊrka a daagɔ gʌleng kangwaal nɨ a Kwaamaɨ.

¹⁸ Jǝ́ bɛ jǝ́ wo nam fɔlɔlɔmɨ, jǝbɔ nam daltɔ dʊʊm sʊwajaamɔ, jǝbɔ nam nǝb kwaanɨ, jǝbɔ nam tʊwatɨnɔ, jǝbɔ nam nǝb gwitǝm jinɔ, jǝbɔ nam bwɛ lɨyalɔ jǝbɔ a bwɛ jwaalɛɨ, nǝbɔ mɨ a nyiyo jǝlɨ jǝbɔ nǝb dʊʊmɔ.”

¹⁹ Nǝngɔ mǝ kuwo yʊwal bwɨla nɨ jǝbɔ fɔlɔlɔm yooligɨɨ jǝbɔ sʊwajaamtɨn jinɔ ja mʊrkaɨ, sǝ jǝ ta kun jǝbɔ nʊ nɨ a dʌbʌl tʊwaɨ jǝbɔ sʊwajaamtɨn gǝnɔ.

²⁰ Nǝngɔ ja ta yʊwal bwɨla nɨ jǝbɔ nǝkuwotǝmkǝga gabakɛlɔ, wʊnɨ a maa jǝ laatǝm kang a nyiyo yʊwal bwɨla nɨ. N maatǝm jǝ laatǝm kang nɨ a swag nǝb nɨ nǝn kwatɨ yʊwal bwɨla nɨɨ, jǝbɔ nǝb nɨ a maa bawilom gǝnɔ gǝm bǝlátǝmɨ. Ja ta yʊwal bwɨla nɨ jǝbɔ nǝkuwotǝmkǝga gabakɛl nɨ, ja mal ji nǝn kʊlɨ a mʊgɔ gʌto kǝla jǝbɔ kǝla nɨ a fo, a shii.

²¹ Tangǝn jinɔ ja jʌbo ji nǝn gulʌn wʊnɨ a jel a mʊgɔ nyiyo nʊ nɨ yǝm a dʌbʌl tʊwaɨ. Gwam lǝbɨtɨnɔ a wo namtɨn jinɔ a lʊwa ji.