Dʊgam Nyangnyang 18 - Dadiya NT

Kʌbotǝm Babilagɔ

¹ A bɨtǝnɨ, nǝngɔ mǝ kuwo kaa bwɛ twama Kwaamaɨ gǝla lɛ a dʌbʌl kwamaɨ, nǝn kwaan fɔlɔnɔ a lada nyɔ. Nyalǝm dʊʊlǝn gǝnɔ a dem yooligɔ gwam.

² Nǝngɔ a jo jangajǝl nǝn kwaan gɔ, “A kʌbo! Gʌleng Babilagɔ a kʌbo! A yǝlam lɔ nǝblaamɨ, jǝbɔ daa yɨm yʊwa bwɨlantɨnɔ, jǝbɔ lǝbɨtɨn nɨ a bʊm bɔ kuwotǝmɨ, jǝbɔ yʊwaltɨn nɨ n jǝ kɔtǝmɨ.

³ Gwam Bʌtʌbɔ ja maa bulon bwɨla jǝbɔ gɔ, maamɔ ga nǝ ji bʊgɛ ja nɔɔɨ. Fɔlɔlɔm yooligɔ ja maa bulon nǝn gɔ. Nǝb dʌbogɔ a yooli nɨɨ ja nya shilo jinɔ a gola miyotǝm kanjǝl nɨ bʊtɔ gǝnɔ swɨ lɛɨ.”

⁴ Nǝngɔ mǝ nyʊwa kaa diil a dʌbʌl kwama sʊwa lɛ gɔ: “Jǝ́ jelʌm a mʊgɔ gǝn, nǝbam mǝndɨ, kage bwɨlangkɛltɨn gǝnɔ a ta jem a bʊtɔ, kage gaalan bwɨla nɨ nya gǝn nɛɨ a nya jen.

⁵ Jʊ a bwɨɨ bwɨlangkɛltɨn gǝnɔ a yuu na tuli, a la dʌbʌl kwama. Kwaama a bʊʊla nǝn bwɨlangkɛl gǝnɔ.

⁶ Maa gǝm dǝngdǝng kanga ga maaɨ, ywa gǝn a laa laaɨ naagɔ yo a dul maajɨ bwɨlan gǝnɔ gǝm. Jǝ́ nǝ gǝn a nɔɔ gaalan naagɔ yo a mʊgɔ bɛ kʌshi gǝnɔ gǝm, kanga ga nǝm ji.

⁷ Gǝ gung dul gǝnɔ, gǝ nyʊwa lǝma lɛ. Jen tʌjen bɛ jǝ́ ywa gǝn nǝn gaalan jǝbɔ fitǝm nǝl sǝ a yɔ dǝngdǝng. Sʊwa lɛ a mʊgɔ nǝl gǝn gɔ, ‘Mǝ nɔɔfɔlɔ. Mǝ yǝm a dʌbʌl kotere fɔlɔn. Mǝ ke bɔ nɔɔkʊla, mɨsɔ mǝ ji wi bwaa lɛ.’ ”

⁸ A kɛl dul jʊ nɨ, gaalan bwɨla nɨ nya gǝn nɛɨ, gǝla gǝm kumɔ win: bwaagɔ, jǝbɔ fitǝm nǝlɔ, jǝbɔ jʊwanɔ. Jǝ twɨm gǝn twɨm nǝn kǝla, jʊ a bwɨɨ Tɛlalɔ Kwaama wʊnɨ maa gǝm borang lɛɨ, n Nǝ kwaan.

⁹ Fɔlɔlɔm yooli nɨ a maa bulon jǝbɔ yɨm nyʊwatǝm lǝma jǝbɔ gɨɨ, nǝn kwama ja kuwo yulʌn kǝla nɨ twɨm gǝn nɛɨ, jǝ ji ji wi nǝn fitǝm nǝl a dul gǝn.

¹⁰ Jǝ tɨ a kʊta kʊtaɨ, a kɛl dul nyʊwatǝm taal gaalan gǝnɔ. Jǝ sʊwa lɛ gɔ, “Mwɛ mʊn! Mwɛ mʊn, mɔ gʌleng tuulɔ nɨ! Gʌleng tuulɔ Babila, nǝ kwaan. Biyotǝm borang mʊnɔ a bɛ a dul mʊn, a ta bɔ bʊtɔ.”

¹¹ Nǝb dʌbo yooli nɨ jǝ ji gǝm wi lɛ, jǝ maa fitǝm nǝl lɛ, jʊ a bwɨɨ mɨ nʊ nɨ wo ten jim kanjǝl jinɔ lɛɨ.

¹² Mɨ nʊ nɨ wo ten jim kanjǝl nɨ lɛɨ: mʊn, jǝbɔ maalʊ, jǝbɔ tɛl bʊmǝntɨn, jǝbɔ luu luu, jǝbɔ lilin nyantɨn, jǝbɔ dwang felintɨn nɨ nǝn dɨngdɨng nyɨɨ, jǝbɔ siliki jǝbɔ alharini feli, jǝbɔ tɨya kunʌn nǝn dʌmʌn, jǝbɔ kanjǝl nungʌntɨn bwaanagɨɨ nǝn dʌmʌn, jǝbɔ kanjǝl nɨ ja swiyo nǝn tɨya nɨ kemʌn gǝnɔ a kwam nyɨɨ, jǝbɔ jʊtǝb nɨ ja fɛ nǝn kemʌn felii, jǝbɔ a kemʌn filii, jǝbɔ tatǝn nɨ yo nu lɛɨ.

¹³ Mɨ nʊ nɨ wo ten jim kanjǝl nɨ lɛ tagɨ, kʌmbagɔ, jǝbɔ welewelegɔ, jǝbɔ kanjǝl twɨtǝm nɨ nǝn kunʌn lǝmɨɨ, jǝbɔ mʊng, jǝbɔ luban, jǝbɔ bʊgɛ, jǝbɔ nwang, jǝbɔ mim, jǝbɔ jaam, jǝbɔ nɛɛ, jǝbɔ kwamɨ, jǝbɔ tʊwa, jǝbɔ kʌntʌlʌntɨn tʊwa, jǝbɔ jwaalɛb, wʊnɨ n kʊlɨtɨn nǝfitʌmi.

¹⁴ Nǝb dʌbogɔ jǝ sʊwa gǝn gɔ, “Gwam kanjǝl bʊmǝntɨn nɨ mʊ ya nǝl lɛ woi, a shu. Kanjǝl nyʊwatǝm lǝma mʊnɔ jǝbɔ fɛtǝm bʊtɔ mʊnɔ ja lɛlam, mɨsɔ mʊ nya ji lɛ wo tag, a yɔ nǝn a dɨltǝmɔ gǝm!”

¹⁵ Nǝb dʌbo kanjǝgan nɨ ja nya shilogɔ a dul gǝnɨ, ja tɨ a kʊta jǝbɔ gɔ, jʊ a bwɨɨ jǝ nyʊwa taal lɛ kage ja mʊr ji tʌgo a mʊgɔ gaalan nɨ gǝ nɔɔ lɛɨ. Jǝ ji wi lɛ jǝbɔ fitǝm nǝl.

¹⁶ Jǝ ji lɛ gɔ, “ ‘N mwɛ gǝn! N mwɛ gǝn, gʌleng tuulɔ nɨ, a dʊʊ dʊʊl nǝn lilin nyanɨ, a fo nǝn dɨngdɨng nyɨɨ, jǝbɔ nusa mʊn a kwɨl gǝn, jǝbɔ tɛl bʊmǝntɨn, jǝbɔ luu luu nɨ a mʊgɔ wɨmaɨ!

¹⁷ A ta bɔ bʊtɔ shilo gǝnɔ gwam a kalam!’ “Nǝb tɨyamwɛngɔ jǝbɔ nǝb nɨ dɔ tɨyamwɛngɔ lɛɨ, jǝbɔ nǝb mǝgtǝmɔ, jǝbɔ nǝb nɨ maa dʌbo lɛ a mʊgɔ wɨmaɨ, ja tɨ a kʊta kʊtaɨ.

¹⁸ Nǝn kwama ja kuwo yulʌnɔ jel lɛ kanga twɨm gǝn nɛɨ, jǝ sʊwa lɛ gɔ, ‘Kaa tuulɔ wo na gʌleng tuulɔ nɨ ka?’

¹⁹ Jǝ bʌlto bʌlto a tǝm, jǝ ji wi lɛ, jǝ maa fitǝm nǝl lɛ, jǝ gaba kwaalɨgɔ lɛ, jǝ sʊwa lɛ gɔ, “N mwɛ mʊn! N mwɛ mʊn gʌleng tuulɔ nɨ, gʌleng tuulɔngɔ a daa nɨ nǝb tɨyamwɛngɔ a nyam shilo jini. N wɔ a ta bɔ bʊtɔ a kala!

²⁰ Jǝ́ maa fulotǝm nǝl a dul gǝn, jen nɨ jǝ́ yǝm a dʌbʌl kwamaɨ! Jǝ́ maa fulotǝm nǝl a dul gǝn, jǝ́ nǝb sagsagɔ jǝbɔ bɛtɔ twamagɔ, jǝbɔ nǝbkuwotǝmkǝgagɔ! Jʊ a bwɨɨ Kwaamagɔ a mwɛ Babilagɔ a dul jʊ nɨ ga maa jemi!”

²¹ Nǝngɔ kaa dalɨ bwɛ twama Kwaamaɨ a do kaa tɛl maa na dalɨ nɛl, a mal a mʊgɔ wɨmaɨ, sʊwa lɛ gɔ, “N kanga jǝ mam gʌleng tuulɔ Babilagɔ lɛɨ nǝn kwaanɨ. Mɨsɔ jǝ kuwo gǝn nɛ wo tag.

²² Nǝb gatǝm gǝlǝnggǝlǝngɔ jǝbɔ nǝb nafɨgɔ, jǝbɔ nǝb guutǝm jwalɔ, jǝbɔ nǝb guutǝm jumɔ, mɨsɔ jǝ nyʊwa lɛ a daa mʊ woi tag. Mɨsɔ jǝ kuwo kaa nǝ maatǝm maajɨ kang lɛ a daa mʊ woi tag. Diil kʊwatǝm nɛl mɨsɔ jǝ nyʊwa lɛ a daa mʊ woi tag.

²³ Fitila mɨsɔ sʊtǝn nyalǝm lɛ a daa mʊ woi tag. Mɨsɔ jǝ nyʊwa diil nʊ nɨ lɛ a naa nɔɔlɨ jǝbɔ nɔɔgwaalɨ a daa mʊ woi tag. Nǝb dʌbogɔ galɨgǝnɨ nǝji jǝ nǝb dʊʊm yooligɨɨ. N gola swagtǝm mʊn, Bʌtʌbɔ a lɛla golaɨ.

²⁴ N mʊgɔ Babila ja nya tʊʊm nǝbkuwotǝmkǝgagɨɨ, jǝbɔ a nǝb sagsagɨɨ, jǝbɔ nǝb nɨ ja jʌ pʌd a yooli nɨɨ.”