Dʊgam Nyangnyang 17 - Dadiya NT

Nɔɔlɨ Kalalɨgɔ Jǝbɔ Yʊwal Bwɨlagɔ

¹ Nǝngɔ win a mʊgɔ bɛtɔ twama Kwaamaɨ nɨ nʌbʌl nǝn taasatɨnɔ nʌbʌli, a bɛ a daa mǝ woi, a sʊwa ɨ gɔ, “Bɛ, sǝ n nʊng ń biyotǝm borangɔ jǝ maa gʌleng nɔɔlɨ kalalɨ nɨ gǝm lɛɨ, wʊnɨ nǝn gɔ dalɨ tuulɔ nɨ ja mɔ a kɔtʌgo a daa nɨ mwɛtɨnɔ wo a ladaɨ.

² Fɔlɔlɔm yooligɔ maa bulon lɛ jǝbɔ gɔ. Nǝb yooligɔ a yǝlam na nǝb nɨ bʊgɛ maa lɛɨ, nǝn maatǝm kalalɨ jǝbɔ gɔ.”

³ Nǝngɔ bwɛ twama Kwaamaɨ a do i a mʊgɔ Yʊwa a shu nǝn mǝ a kuuli. Nǝngɔ mǝ kuwo kaa nɔɔlɨ a dʌbʌl kaa yʊwal bwɨla wʊnɨ a fo nǝn dɨngdɨng nyɨɨ. Bʊtɔ yʊwal bwɨla nɨɨ, n duntɨn kaltǝm dun Kwaamaɨ ja mʊlala a bʊtɔ gǝnɔ gǝm gwamɨ. Nǝngǝn nǝn dultɨnɔ nʌbʌl jǝbɔ jumtɨnɔ kʊb.

⁴ Nɔɔlɨ nɨ a dʊʊ dʊʊl nǝn dwang felʌng wʊnɨ a fo nǝn dɨngdɨng nyɨɨ. A dǝga kanjǝl mʊntɨn, jǝbɔ tɛl bʊmǝntɨn, jǝbɔ luu luutɨn. A ta bɛ kʌshi mʊnɔ a kang gǝn, wʊnɨ ga yii nǝn kanjǝl nɨ a bʊm bɔ kuwotǝmɨ, jǝbɔ kanjǝl kalalɨ bwɨlan gǝnɔ.

⁵ A tɛkǝga gǝnɔ gǝm jǝ mʊla dun nɨ ja yʊ yʊɨ gɔ, GɅLENG BABILA, NƐNƐ NƆƆTƏM KALALƗƗ JƏBƆ NƐNƐ BWƗLANG KANJƏL NƗ A YOOLII.

⁶ Nǝngɔ mǝ kuwo nɔɔlɨ nɨ tʊʊm nǝb sagsagɔ maa gǝn nɛɨ, jǝbɔ tʊʊm nǝb nɨ ja jʌbo a kɛl nǝtǝm nyiyo a dul Yesui. Nǝn kwama mǝ kuwom gǝnɨ, nǝngɔ mǝ ta kang a nyiyoi.

⁷ Bwɛ twama Kwaamaɨ a sʊwa ɨ gɔ, “N wɛ a bwɨ mʊ ta kang a nyiyoi? Mǝ wum mʊn wum guu nɔɔlɨ nɨ jǝbɔ yʊwal bwɨla nɨ a do nɔɔlɨ nɨ, yʊwal bwɨla nɨ nǝn dultɨnɔ nʌbʌl jǝbɔ jumtɨnɔ kʊbɨ.

⁸ Yʊwal bwɨla nɨ mʊ kuwoi, galɨgǝn wo, kǝngkɔ mɨ wo. Gwi gwi a bʊwa nɨ mɨ dɨltǝm woi, sǝ a yɔ a daa nɨ jǝ jʌm gǝn nɛɨ. Nǝbɔ yǝm a yooli nɨɨ, nǝb nɨ a tǝltǝm fwaltǝm yooligɔ gǝmɨ, ja mʊla bɔ duntɨn jinɔ a mʊgɔ langǝn bwangǝn kʊlɨ nɨɨ, jǝ ta ta kang a nyiyo a kuwotǝm yʊwal bwɨla nɨ, jʊ a bwɨɨ galɨgǝn wo, kǝngkɔ mɨ wo, yǝla bɛ bɛ.

⁹ “N nʊ nɨ nǝn yʊlanɨ nyǝm jʊ nɨ lɛɨ. Dultɨn nɨ nʌbʌli n yemtɨn nʌbʌl, wʊnɨ nɔɔlɨ nɨ a yɨmɨ.

¹⁰ Dultɨn nɨ nʌbʌli n fɔlɔlɔm nʌbʌl tag. Nʊ a kʊm jin a bʊlala. Win wo a fɔlɔnɔ gǝm. Win a bɛ bɔ dɨn. Na a bɛɨ, mɨ nyǝmatǝm wo maa maa yɨm fɔlɔnɔ nǝn dǝm nyɔ.

¹¹ Yʊwal bwɨla nɨ wo galɨgǝnɨ, kǝngkɔ mɨ wo, nǝn gɔ fɔlɔ na naalǝbɔ a jel a mʊgɔ fɔlɔlɔm nɨ nʌbʌli, yɔ yɔ a daa nɨ jǝ jʌm gǝn nɛɨ.

¹² “Jumtɨn nɨ kʊb mʊ kuwoi, n fɔlɔlɔm kʊb, nǝb nɨ ja lǝga bɔ ja nǝ ji fɔlɔnɨ. Nǝn kwama jǝ nǝ ji kwaan maatǝm fɔlɔnɔ lɛ jǝbɔ yʊwal bwɨla nɨɨ, mɨsɔ la lɛ kumɔ win.

¹³ Fɔlɔlɔm nɨ kʊb nǝn bʊʊlalɨgɔ wini, jǝ nǝ nǝ yʊwal bwɨla nɨ kwaan jinɔ jǝbɔ fɔlɔn jinɔ.

¹⁴ Jǝ ta ta kun jǝbɔ Bɛ Gal nɨ. Bɛ Gal nɨ ja ji ja, jʊ a bwɨɨ nǝn gɔ Tɛlalɔ tɛlalɔtɨnɨ, nǝn gɔ Fɔlɔ fɔlɔlɔmɨ. Gɔ jǝbɔ nǝb nɨ jǝ dakinii, nǝji jǝ nǝb jotǝmɔ, jǝbɔ nǝb jǝgamtǝmɔ, jǝbɔ nǝb tatǝm swatǝm yaagɨɨ.”

¹⁵ Nǝngɔ bwɛ twama Kwaamaɨ a sʊwa ɨ gɔ, “Mwɛtɨn nɨ mʊ kuwoi, a daa nɨ nɔɔlɨ kalalɨ nɨ yǝm woi, n nǝb, jǝbɔ mʊrkalɨ nǝbɨɨ, jǝbɔ Bʌtʌbɔ jǝbɔ nyiyotɨnɔ.

¹⁶ Yʊwal bwɨla nɨ jǝbɔ jumtɨnɔ kʊb mʊ kuwoi, ji jǝbɔ yʊwal bwɨla nɨ jǝ kɔ kɔ nɔɔlɨ kalalɨ nɨ. Ja bǝla gǝn kʊnkʊn, jǝ wo wo nam gǝnɔ, sǝ ja twɨm gǝn nǝn kǝla.

¹⁷ Jʊ a bwɨɨ, Kwaama a dǝg ji ja maa jʊ gǝ swɨ lɛɨ, sǝ ja yǝla nǝn bʊʊlalɨ jinɔ win, sǝ ja nǝ yʊwal bwɨla nɨ fɔlɔn jinɔ ja maa fɔlɔnɔ, sǝ ba la nǝn kwama kɛl Kwaamaɨ yiim lɛɨ.

¹⁸ Nɔɔlɨ nɨ mʊ kuwoi, n gʌleng tuulɔ nɨ maa fɔlɔn nɛ a dul fɔlɔlɔm yooli nɨɨ.”