Dʊgam Nyangnyang 16 - Dadiya NT

Taasatɨn Nabwɨl Kwaamaɨ Nɨ Nʌbʌli

¹ Nǝngɔ mǝ nyʊwa kaa diil nǝn kwaan a mʊgɔ Kan Kwaamanɨ, sʊwa bɛtɔ twama Kwaamaɨ nɨ lɛ nʌbʌli gɔ, “Jǝ́ yɔ jǝ́ sʊtam taasatɨn nɨ nʌbʌl na nabwɨl Kwaamaɨ a yooli.”

² Nǝngɔ bwɛ twama Kwaamaɨ na tɨkǝgagɔ a yɔ ya sʊtam jʊ nɨ a mʊgɔ taasa gǝnɨ a dul yooligɔ gǝmɨ. Nǝngɔ kaam dɛɛbǝl bwɨlantɨn nǝtǝm gaalanɔ a jel a bʊtɔ nǝfitʌm nɨ nǝngǝn nǝn kwatɨ yʊwal bwɨla nɨɨ, n nǝbɔ a maa bǝlátǝm bawilom gǝnɨ.

³ Nǝngɔ bwɛ twama Kwaamaɨ na yogɔ a sʊtam jʊ nɨ a mʊgɔ taasa gǝnɨ a mʊgɔ wɨmaɨ. Nǝngɔ a yǝlam na tʊʊm nʊ nɨ a bʊla bʊlaɨ. Pʌd jʊ nɨ nǝn kʊlɨ a mʊgɔ wɨmaɨ a bʊla.

⁴ Nǝngɔ bwɛ twama Kwaamaɨ na taalɔ a sʊtam jʊ nɨ a mʊgɔ taasa gǝnɨ a mʊgɔ tiyotɨn jǝbɔ dɨyalɨ mwɛ. Nǝngɔ ja yǝlam tʊʊmɨ.

⁵ Nǝngɔ mǝ nyʊwa bwɛ twama Kwaamaɨ dʊʊ mwɛmɔ sʊwa lɛ gɔ, “Mʊ Nǝ Dǝngdǝng a mʊgɔ maatǝm borang nɨ. Mʊ Nǝ Sagsag. Mʊ nʊ nɨ kǝngkɨɨ, mʊ nʊ nɨ galɨgǝnɨ.

⁶ Nǝbɔ a tǝla tʊʊm nǝb sagsagɔ jǝbɔ a nǝbkuwotǝmkǝgagɨɨ, Ń nǝ ji tʊʊm sǝ ja nɔɔ, a dul jʊ a bʊm ja nyaɨ, a maajɨ bwɨlantɨn jinɔ gǝm.”

⁷ Nǝngɔ mǝ nyʊwa kaa diil a daa twɨtǝm yulʌn sʊwa lɛ gɔ, “Ɔɔ, Tɛlalɔ Kwaama Nǝ kwaan! Borang mʊnɔ n bɨlǝngǝn, n dǝngdǝng.”

⁸ Nǝngɔ bwɛ twama Kwaamaɨ na naalɔ a sʊtam jʊ nɨ a mʊgɔ taasa gǝnɨ a nu kwama. Ja jǝla nu kwamagɔ gǝm a twɨm nǝfitʌmɔ nǝn kǝla gǝnɔ.

⁹ Nǝngɔ shilotǝm bwɨlagɔ a twɨ nǝbɨɨ. A dǝg ji ja kal dun Kwaamaɨ sul, ja yǝla bɔ ja bǝla bwɨlangkɛltɨn jinɔ, ja nǝ gǝn bɔ dʊʊn, gǝ nɨ nǝngǝn nǝn fɔlɔn a dul gaalan bwɨlantɨn nɨɨ.

¹⁰ Nǝngɔ bwɛ twama Kwaamaɨ na nʊgɔ a sʊtam jʊ nɨ a mʊgɔ taasa gǝnɨ a dʌbʌl kotere fɔlɔn yʊwal bwɨla nɨ. Nǝngɔ fɔlɔn gǝnɔ a yǝlam a kumtojili. Nǝbɔ dumo bentɨn jinɔ lɛ, a kɛl dul gaalan nɨ.

¹¹ Ja tuwo Kwaama dʌbʌlɔ a kɛl dul gaalan jinɔ gǝm jǝbɔ bɔɔla dɛɛbǝl bwɨlantɨn jinɔ. Ja yǝla bɔ ja bǝla maajɨ bwɨlan jinɔ.

¹² Nǝngɔ bwɛ twama Kwaamaɨ na nukunɔ a sʊtam jʊ nɨ a mʊgɔ taasa gǝnɨ a dalɨ tiyo Yufiretisi. Nǝngɔ mwɛ gǝnɔ a gʊʊmɨ, sǝ a fɛka gola yabtǝm fɔlɔlɔm nɨ a twalɨ.

¹³ Nǝngɔ mǝ kuwo nǝblaam shilɔ taal ja jelka bɛfʊgʊntɨnɔ nyɔ. Jǝ jel lɛ a nyiyo gʌleng sɔɔ dʊʊ nɨ, jǝbɔ nyiyo yʊwal bwɨla nɨ, jǝbɔ nyiyo nǝkuwotǝmkǝga gabakɛl nɨ.

¹⁴ Jǝ yʊwa nǝblaamɔ maa kanjǝl laatǝm kang lɛɨ. N nǝblaam nɨ yɔ lɛ a daagɔ fɔlɔlɔm yooli nɨ pʌdi, sǝ ja mʊr ji a dul tatǝm kun a gʌleng kɔkɔ Kwaama Nǝ kwaanɨ.

¹⁵ “Jǝ́ nyʊwa! Mǝ bɛ lɛ na nǝkuu! Bwiligɔ na a nʊ nɨ yǝm nǝn fɛkalɨ, tɨm nǝn dwang dʊʊl gǝnɨ, kage a yɔ kʊnkʊn, a nyʊwa gunidul a talɨ.”

¹⁶ Nǝngɔ nǝblaamɔ a mʊr fɔlɔlɔmɔ daagɔ wini, a daa nɨ ja jo nǝn nyiyo Yahudawagɨɨ gɔ Armageddoni.

¹⁷ Nǝngɔ bwɛ twama Kwaamaɨ na nʌbʌlɔ a sʊtam jʊ nɨ a mʊgɔ taasa gǝnɨ a dʌbʌl kwamaɨ. Nǝngɔ ja nyʊwa kaa diil nǝn kwaan jel lɛ a daagɔ kotere fɔlɔnɔ woi a mʊgɔ Kan Kwaaman sʊwa lɛ gɔ, “A dɨɨ!”

¹⁸ Kwamagɔ beta lɛ, kunnyiyogɔ ga lɛ, diilɔ mwɛla lɛ, tǝmɔ mǝga lɛ, wʊnɨ ja maa bɔ woi, nǝn tǝltǝm fwaltǝm nǝfili fɔ a yooli nɨɨ. N gʌleng mǝgatǝm tǝm dangǝn.

¹⁹ Gʌleng tuulɔ nɨ a bel lɔngɔ taal. Tuulɔtɨn Bʌtʌbi a kʌbo. Nǝngɔ Kwaama a bʊʊla nǝn gʌleng Babilagɔ sǝ a dǝg ji ja nɔɔ gaalan nɨ jǝ nyǝm nabwɨl gǝnɔ lɛɨ.

²⁰ Pʌd talɨ tǝm nɨ a mʊgɔ wɨmaɨ a lɛlam. Daltɔ yemtɨnɔ gwam mɨ kuwotǝm jin wo.

²¹ Daltɔ tɛl kwaman nɨ a tuulo nyɨɨ, tuutǝm gǝnɔ win a la kilogɔ fʊltǝnʊɨ, a gǝla a dʌbʌl a tǝla a dul nǝbɨɨ, a dǝg nǝbɔ a tuwo Kwaama a kɛl dul gaalan bwɨla tɛl kwaman nɨ. Gaalan bwɨla nɨ ke bɔ jǝ kuwotǝm.