Dʊgam Nyangnyang 15 - Dadiya NT

Bɛtɔ Twama Kwaamaɨ Nʌbʌl Nǝn Gaalan Bwɨlantɨnɔ Nʌbʌl

¹ Nǝngɔ mǝ kuwo kaa jǝ nʊngtǝm a dʌbʌl kwamaɨ. A tɛɛna nyɔ. N jǝ tatǝm kang a nyiyo. Kanjǝl nɨ mǝ kuwoi n bɛtɔ twama Kwaamaɨ nɨ nʌbʌli, nǝn gaalan bwɨlantɨnɔ nʌbʌli. N gaalan bwɨlantɨnɔ a dɨltǝmɔ gǝmɨ, jʊ a bwɨɨ nabwɨl Kwaamaɨ a dɨl nǝn ji.

² Nǝngɔ mǝ kuwo kaa jǝl maamɔ wɨma bwaala, a shɛka nǝn kǝlaɨ. Nǝb nɨ a ku jelʌn a dul yʊwal bwɨla nɨɨ, jǝbɔ bawilom gǝnɔ, jǝbɔ lamba dun gǝnɨ, jǝ tɨlam a kʌng wɨma nɨ na a bwaalaɨ, nǝn gǝlǝnggǝlǝngtɨnɔ a kangtɨn jinɔ gǝm na bǝlátǝm Kwaamaɨ.

³ Jǝ ma nafɨ nɨ lɛ Musa bwɛ jwaalɛ Kwaamaɨ a maɨ, jǝbɔ nafɨ Bɛ Galɔ, “Maajɨtɨn mʊnɔ na a dʊʊntɨn, n jǝ tatǝm kang a nyiyo, Tɛlalɔ Kwaama Nǝ kwaan! Golantɨn mʊnɔ na dǝngdǝng, n bɨlǝngkɛl tag, Fɔlɔ bǝlǝntǝmɔ gwam.

⁴ Nuwo mɨsɔ nyʊwa taal mʊnɔ lɛɨ, Tɛlalɔ? Nuwo mɨsɔ dʊʊl dun mʊnɔ lɛɨ? Jʊ a bwɨɨ nǝmɔ win swar mʊ sagsagɨ. Bǝlǝntǝmɔ pʌd ba jǝ jʊng jʊng ja maa mʊn bǝlátǝm, jʊ a bwɨɨ maajɨ nyan mʊnɔ a nʊng.”

⁵ A gulɔ gǝmɨ, mǝ dʌngi, nǝngɔ mǝ kuwo Kan Kwaamanɔ a dʌbʌl kwamaɨ a wumo wumoi. Wʊnɨ nǝn gɔ n gushi Kwaamaɨ.

⁶ Nǝngɔ bɛtɔ twama Kwaamaɨ nɨ nʌbʌli nǝn gaalan bwɨlantɨn nɨ nʌbʌli, ja jel a mʊgɔ Kan Kwaaman. Jǝ tɨlam nǝn dwang dʊʊl lilin nɨ mɨ nǝn dutoi, wʊnɨ yo nu lɛɨ. Ja bwa dwang fɛl na mʊn a kulitɨn jinɔ gǝm.

⁷ Nǝngɔ kaa win a mʊgɔ kanjǝl nɨ naal nǝn kʊlɨɨ, a nǝ bɛtɔ twama Kwaamaɨ nʌbʌl taasatɨnɔ nʌbʌl na mʊnɨ. Taasatɨn nɨ nʌbʌli ja yii nǝn nabwɨl Kwaamaɨ, nʊ nɨ nǝn kʊlɨ mɨ dɨltǝm woi.

⁸ Nǝngɔ Kan Kwaamanɔ a yii nǝn yulʌn nɨ jel lɛ a dʊʊn gǝnɔ gǝmɨ jǝbɔ kwaan gǝnɨ. Mɨ nʊ nɨ mwɨ dɔtǝm Kan Kwaaman nɨ lɛɨ, na gaalan bwɨlantɨn nɨ nʌbʌl na bɛtɔ twama Kwaamaɨ nɨ nʌbʌli a dɨ bɨɨ.