Dʊgam Nyangnyang 13 - Dadiya NT

Yʊwal Bwɨla Nɨ A Jel A Mʊgɔ Wɨmaɨ

¹ Nǝngɔ mǝ kuwo kaa yʊwal bwɨla jel lɛ a mʊgɔ wɨmaɨ. Nǝngǝn nǝn jumtɨnɔ kʊb, jǝbɔ dultɨnɔ nʌbʌl, jǝbɔ dwang dulɔ kʊb a jumtɨn gǝnɔ gǝm, jǝbɔ dun a dultɨn gǝnɔ gǝm wʊnɨ kal dun Kwaamaɨ lɛɨ.

² Yʊwal bwɨla nɨ mǝ kuwoi, a maamɔ namsʊgɔ. Naatɨn gǝnɔ a dʊʊla a jelka kaa naa nam nɨ jǝ jo lɛ gɔ beyarɨ. Nyiyo gǝnɔ a maamɔ nyiyo tulʌm. Gʌleng sɔɔ dʊʊ nɨ a nǝ gǝn kwaan gǝnɔ jǝbɔ kotere fɔlɔn gǝnɔ jǝbɔ daa maatǝm fɔlɔn.

³ Win a mʊgɔ dultɨn gǝnɔ gǝm maamɔ ja nyʊwa gǝm twɨla bwɨla, n twɨla bwɨla nɨ na jʌ gǝn nɛɨ. Nǝngɔ a gun a twɨla bwɨla nɨ gǝmɨ. Nǝbɔ yoolii gwam a ta kang a nyiyo, jǝ bwang yʊwal bwɨla nɨ gǝm lɛ.

⁴ Nǝbɔ a jʊng ja bǝlá gʌleng sɔɔ dʊʊ nɨ, jʊ a bwɨɨ nǝn gɔ a nǝ yʊwal bwɨla nɨ kwaan maatǝm fɔlɔnɨ. Nǝngɔ ja jʊng tag ja bǝlá yʊwal bwɨla nɨ jǝ sʊwa lɛ gɔ, “Nuwo a jelka yʊwal bwɨla nɨ? Nuwo dwal lɛ a ta kun jǝbɔ gɨɨ?”

⁵ Ja nǝ yʊwal bwɨla nɨ nyiyo sʊwatǝm kɛl, gungtǝm dul jǝbɔ kaltǝm dun Kwaamaɨ. Ja jǝla gǝm maatǝm fɔlɔn na bwaalatɨnɔ fʊltǝnaal jeli yo.

⁶ A wum nyiyo gǝnɔ a tǝl kaltǝm dun Kwaamaɨ sǝ a kal dun gǝnɔ jǝbɔ daa yɨm gǝnɔ jǝbɔ nǝb nɨ gwam yǝm a dʌbʌl kwamaɨ.

⁷ Ja jǝla gǝm tatǝm kun jǝbɔ nǝb sagsagɔ, a ja ji kun nɨ. Ja nǝ gǝn kwaan maatǝm fɔlɔn a dul nǝbɨɨ, jǝbɔ nyiyotɨn, jǝbɔ bǝlǝntǝmɔ gwam.

⁸ Nǝb nɨ yǝm gwam a yooli nɨɨ, jǝ jʊng jʊng ja maa yʊwal bwɨla nɨ gǝm bǝlátǝm, na ke bɔ nǝb nɨ a tǝltǝm yooli nɨ ja mʊla dun jinɔ a mʊgɔ langǝn bwangǝn kʊlɨ nɨɨ. Langǝn bwangǝn kʊlɨ nɨ na a Bɛ Gal nɨ ja biyoi.

⁹ Nʊ nɨ nǝn lɔl nyʊwatǝmɨ, bɛ ga nyʊwa.

¹⁰ Nʊ nɨ ja nʊng yǝlam bwɛ jwaalɛ lɛɨ, n daa jwaalɛn jǝ yɔ lɛ nǝn gɔ woi. Nʊ nɨ ja nʊng jǝ jʌ gǝn nǝn gulʌni, n gulʌn jǝ jʌ gǝn nɛ nǝnɨ. Jʊ nɨ gǝ nʊng gɔ nǝb sagsagɔ, bɛ ja kʊ nǝl gaalanɔ, bɛ ja ja kǝga nǝn tatǝm swatǝm yaagɔ.

Yʊwal Bwɨla Nɨ A Jel A Mʊgɔ Tǝmɨ

¹¹ Nǝngɔ mǝ kuwo kaa yʊwal bwɨla jel lɛ a mʊgɔ tǝmɨ. Nǝngǝn nǝn jumtɨnɔ yo maamɔ bɛ gal. Kɛl gǝnɔ maamɔ gʌleng sɔɔ dʊʊ.

¹² Maa fɔlɔn nɛ nǝn kwaan yʊwal bwɨla nɨ nǝn tɨkǝgaɨ a nyiyo gǝn. A dǝg yooli nɨ jǝbɔ nǝbɔ a mʊgɔ gǝnɨ ja maa yʊwal bwɨla tɨkǝgagɔ gǝm bǝlátǝm. Twɨla bwɨla gǝnɔ nɨ a kwɛl a bɨ.

¹³ Yʊwal bwɨla na yogɔ a maa gʌleng kanjǝl laatǝm kang. A dǝg kǝlagɔ a gǝla a dʌbʌl kwama ba tǝla a tǝm a kuwotǝm nu nǝbɨɨ.

¹⁴ A swag nǝb nɨ yǝm a yooli nɨɨ, nǝn maatǝm kanjǝl laatǝm kang nɨ ja jǝla gɔ ga maa a kǝga yʊwal bwɨla nɨɨ. A dǝg ji ja fɛ kaa bawilom a nyiyo yʊwal bwɨla nɨ, sǝ ja nǝ gǝn dʊʊn. Yʊwal bwɨla nɨ ja nyʊwa gǝm twɨla nǝn gulʌn sul, a bʊʊ.

¹⁵ Nǝngɔ ja nǝ yʊwal bwɨla na yogɔ kwaan sǝ a fǝ kʊlɨgɔ a bawilom yʊwal bwɨla nɨɨ. A maa nyɔ sǝ a dǝg bawilom nɨ a sʊwa kɛl, sǝ a jʌ nǝb nɨ a kɔ bǝlátǝm gǝnɨ.

¹⁶ A dǝg gɔ ja ka jim kwatɨ a kang jajǝng jinɔ gǝm, na mɨ nyɨɨ a tɛkǝga jinɔ gǝm. Nǝb nɨ jǝ ka jim kwatɨ lɛɨ, nǝbɔ mɨ a nyiyo jǝlɨ jǝbɔ dʊʊm, jǝbɔ nǝb shilo jǝbɔ nǝb bʊnǝn, jǝbɔ nǝb lɨyal jǝbɔ jwaalɛb.

¹⁷ A maa nyɔ sǝ mɨ nʊ nɨ wo miyo lɛ jǝbɔ tentǝmɨ, na mɨ gǝ nǝn kwatɨ nɨɨ, wʊnɨ nʊng dun yʊwal bwɨla nɨ lɛɨ, na mɨ nyɨɨ, lamba dun gǝnɔ.

¹⁸ Jʊ nɨ saa yʊlan nɛ. Na nʊ nɨ nǝn yʊlanɨ, bɛ a sʊwa lamba yʊwal bwɨla nɨ. N lamba nǝfilii. Lamba nɨ nǝn gɔ, fʊlkʊb nukun jǝbɔ fʊltǝnukun jeli nukun (666).