Dʊgam Nyangnyang 12 - Dadiya NT

Kaa Nɔɔlɨ Jǝbɔ Sɔɔ Dʊʊgɔ

¹ Nǝngɔ ja kuwo kaa jǝ laatǝm kang a dʌbʌl kwamaɨ. Kaa nɔɔlɨ a kwab bʊtɔ gǝnɔ nǝn nu kwamagɔ, tɨm a dʌbʌl bwaala. Nǝngǝn nǝn dwang dul nɨ nǝn nyanyamɨtɨnɔ kʊb jeli yo a dul gǝnɨ.

² Nǝngǝn nǝn fʌl. Kum butotǝm gǝnɔ a laɨ, nǝngɔ a ga kwaalɨ butotǝmɨ.

³ Nǝngɔ ja kuwo kaa jǝ laatǝm kang a dʌbʌl kwamaɨ. Kaa gʌleng sɔɔ dʊʊ wo nǝn feli gǝn. Nǝngǝn nǝn dultɨnɔ nʌbʌl, jǝbɔ jumtɨnɔ kʊb, jǝbɔ dwang dulɔ nʌbʌl a dultɨn gǝnɔ gǝm.

⁴ Yǝga gǝnɔ a kʊlam nyanyamɨtɨnɔ win a mʊgɔ taal a dʌbʌl kwama a tal ji a tǝm. Nǝngɔ gʌleng sɔɔ dʊʊ nɨ a tɨ a kǝga nɔɔlɨ nɨ ji bɔɔla fʌl lɛɨ, sǝ a mɨm bʊla gɔ na ga butoi.

⁵ Nǝngɔ a bʌm bwɛ balɨɨ, wʊnɨ maa fɔlɔn bǝlǝntǝm nɨ lɛ gwam nǝn dwam kemʌni. Sǝla sɔɔ dʊʊgɔ a nya kwaan nɨ mɨm gǝn nɛɨ, nǝngɔ ja dem bʊla gɨɨ, ja gwi nǝn gɔ a dʌbʌl a daagɔ Kwaama woi jǝbɔ daa kotere fɔlɔn gǝnɔ.

⁶ Nǝngɔ nɔɔlɨ nɨ a mwal a dɔ mʊgɔ kuuli, a daagɔ Kwaama a fɛka gǝmɨ. N daa gɔ Kwaama dʌng gǝn lɛ woi, na kumɔ fʊlkʊblǝn win jǝbɔ fʊlkʊb yo jǝbɔ fʊltǝnukun (1,260).

⁷ Nǝngɔ kunɔ a gun a dʌbʌl kwamaɨ. Mikailu dʊʊ bwɛ twama Kwaamaɨ jǝbɔ bɛtɔ twama gǝnɔ jǝ ta kun nɛ jǝbɔ gʌleng sɔɔ dʊʊ nɨ. Nǝngɔ gʌleng sɔɔ dʊʊ nɨ jǝbɔ bɛtɔ twama gǝnɔ ta kunɔ lɛ jǝbɔ jii.

⁸ Mikailu jǝbɔ bɛtɔ twama gǝnɔ ja ja gʌleng sɔɔ dʊʊgɔ jǝbɔ bɛtɔ twama gǝnɔ kunɔ. Ja nya bɔ daa a dʌbʌl kwama.

⁹ Nǝngɔ ja mal gʌleng sɔɔ dʊʊ nɨ a tǝmɨ, sɔɔ dʊʊ nɨ galɨgǝn galɨɨ, nǝn gɔ Nǝ bwɨla nɨɨ, Mammɔ, nǝ swagtǝm yooli nɨ. Ja mal gǝn a yooli nɨ dakini jǝbɔ bɛtɔ twama gǝnɔ.

¹⁰ Nǝngɔ mǝ nyʊwa kaa diil nǝn kwaan a dʌbʌl kwama sʊwa lɛ gɔ, “Kǝngkǝnɨ, bʊʊtǝmɔ jǝbɔ kwaanɔ jǝbɔ fɔlɔn Kwaama bǝnɨ, jǝbɔ kwaan Kiristi gǝnɨ a yii! Jʊ a bwɨɨ ja mal nʊ nɨ tuwo kɛtǝlam bǝnɔ lɛɨ a yooli, nʊ nɨ tuwo ji lɛ a kǝga Kwaama bǝnɨ kum jǝbɔ kɔkɔɨ.

¹¹ Ja ku jelʌn a dul gǝn a gola tʊʊm Bɛ Gal nɨ, jǝbɔ nǝtǝm nyiyo nɨ ja sʊwaɨ, jʊ a bwɨɨ, ja swɨ jǝ nǝ kʊlɨtɨn jinɔ a yɔ nǝn a bwaa.

¹² A dul kɛl nɨ, bɛ jǝ́ maa fulotǝm nǝl, jǝ́ dʌbʌl kwamagɔ, jǝbɔ nǝbɔ yǝm a mʊgɔ gǝnɨ! N mwɛ jen, mɔ tǝm nɨ jǝbɔ wɨmagɔ, jʊ a bwɨɨ, mammɔ a gǝla a dul jen! A maa nabwɨl, jʊ a bwɨɨ, a nyǝm kumtɨn gǝnɔ ya dwama lɛ.”

¹³ Nǝn kwama gʌleng sɔɔ dʊʊ nɨ a kuwo ja ma gǝn a tǝmɨ, nǝngɔ a kʊwa a yɨ nɔɔlɨ nɨ gǝm a bʌ bwɛ balɨ nɨɨ.

¹⁴ Ja nǝ nɔɔlɨ nɨ bɨlǝntɨnɔ yo, a gʌleng gʌtʌbi, sǝ a gun a shu a daagɔ sɔɔ dʊʊ nɨ woi, sǝ a mwal a shu a dʌbʌl. A gun sǝ a shu a daagɔ ja fɛka gǝm a mʊgɔ kuuli, a daa nɨ jǝ dʌng gǝn nɛ wo jolɔ taal jǝbɔ bwaala nukuni.

¹⁵ Nǝngɔ gʌleng sɔɔ dʊʊ nɨ a kwi mwɛmɔ a nyiyo gǝn na tiyo a gul nɔɔlɨ nɨɨ sǝ a do gǝn a shu nǝn.

¹⁶ Tǝmɔ a tɨka nɔɔlɨ nɨɨ. Tǝmɔ a gaa nyiyo gǝnɔ. Nǝngɔ a nɔɔm mwɛ nɨ gʌleng sɔɔ dʊʊ nɨ a kwi a nyiyo gǝnɨ.

¹⁷ Nǝngɔ gʌleng sɔɔ dʊʊ nɨ a maa nabwɨl jǝbɔ nɔɔlɨ nɨɨ. Nǝngɔ a yɔ ya fɛka kun jǝbɔ tangǝn bɛtɔ nɔɔlɨ nɨɨ, nǝb nɨ kɨla diil Kwaamaɨ lɛɨ, nǝb nɨ a nǝ nyiyo a kɛl dul Yesui.

¹⁸ Nǝngɔ gʌleng sɔɔ dʊʊ nɨ a tɨ a dʌbʌl swiyoti wɨmaɨ.