Dʊgam Nyangnyang 11 - Dadiya NT

Nǝb Nǝtǝm Nyiyogɔ Yo

¹ Nǝngɔ ja nɨ ɨ kaa fatɔ na dwam sʊwatǝmɨ. Nǝngɔ ja sʊwa ɨ gɔ, “Gun sʊwa Kan Kwaamanɔ jǝbɔ daa twɨtǝm yulʌnɔ. Kiyo nǝb nɨ bǝlá Kwaama lɛ a mʊgɔ gǝnɨ.

² Bɛ ka ń sʊwa lɛ talɨ yooli Kan Kwaamanɔ. Bǝla wo, jʊ a bwɨɨ ja kwɛl ja nǝ Bʌtʌbɔ. Jǝ falam falam tuulɔ sagsag nɨ bwaala fʊltǝnaal jeli yo.

³ Mǝ nǝ nǝ nǝb nǝtǝm nyiyo mǝndɨ nɨ yoi kwaan ja maa kuwotǝmkǝga, kumɔ fʊlkʊblǝn jǝbɔ fʊlkʊb yo jǝbɔ fʊltǝnukun (1,260), jǝ bwa dwang bʊnǝn a bʊtɔ jin.”

⁴ Nǝb nɨ yoi nǝn gɔ tɨya tʊʊl zaitun nɨ yoi, jǝbɔ daatɨn swatǝm fitila nɨ yoi, wʊnɨ tɨm a kǝga Tɛlalɔ yooli nɨ.

⁵ Na kaa nǝl swɨ lɛ a nyʊwa jimi, kǝlagɔ a jel a nyiyo ji, sǝ a deblam nǝb kiim jinɔ. Gwam nʊ nɨ swɨ lɛ a nyʊwa jimi, mɨ nyǝmatǝm wo jǝ jʌ gǝn jʌ.

⁶ Ji nǝn kwaan nɨ jǝ tɨ lɛ nǝn swiyotǝm mwɛ kwamaɨ, kage a swiyo mwɛ nǝn kwama nɨ jǝ maam kuwotǝmkǝga lɛɨ. Ji nǝn kwaan nɨ jǝ dǝg mwɛmɔ lɛ a yǝlam tʊʊmɨ. Ji nǝn kwaan nɨ jǝ mal yooli nɨ gǝm gaalanɔ lɛ ja swɨɨ nǝn kwama ja swɨ maatǝmɔ a nǝl jini.

⁷ Nǝn kwama ja dɨm nǝtǝm nyiyo jini, nǝngɔ kaa yʊwal bwɨla jel lɛ a bʊwa nɨ mɨ dɨltǝm woi, sǝ a ta kun jǝbɔ ji, a ja ji, a jʌbo ji.

⁸ Ja bǝla bʌlʌntɨn jinɔ a gola gʌleng tuulɔ nɨ a jelka Sadumagɔ nyɔ jǝbɔ Masarɨ, n daa nɨ ja kʊʊm Tɛlalɔ jini.

⁹ Nǝbɔ gwam, jǝbɔ nyiyotɨnɔ, jǝbɔ bǝlǝntǝmɔ ja dʌng bʌlʌntɨn jinɔ a la kumɔ taal jǝbɔ kwama yǝlalɨ, ja kɔ fʌltǝm jinɔ.

¹⁰ Nǝbɔ yooli nɨɨ, jǝ maa maa bǝlátǝm kɛl bwaa nǝb nǝtǝm nyiyo nɨ yoi. Jǝ yo yo ye dul, jǝ twamka twamka lǝmatɨn a dul nǝbkuwotǝmkǝga nɨ yoi, wʊnɨ a nǝ nǝbɔ yooli nɨ gaalanɨ.

¹¹ Nǝn kwama kumɔ taal jǝbɔ kwama yǝlalɨ a shui, nǝngɔ fǝbǝm nɨ nǝ kʊlɨ lɛ a daagɔ Kwaama woi a dɔ jii. Nǝngɔ ja gun ja tɨ tɨɨ. Nǝngɔ taal bwɨlagɔ a ta nǝb nɨ a kuwo jii.

¹² Nǝngɔ nǝbkuwotǝmkǝga nɨ yoi ja nyʊwa kaa diil nǝn kwaan a dʌbʌl kwama sʊwa ji lɛ gɔ, “Jǝ́ gwi fɔ!” Nǝngɔ ja shu a dʌbʌl kwama a mʊgɔ luli. Nǝb kiim jinɔ kuwo ji lɛ.

¹³ Tʌgo a kang nǝngɔ a maa kaa gʌleng mǝgatǝm tǝmɨ. Nǝngɔ win a mʊgɔ kʊb na tuulɔ nɨ a kʌboi. Mǝgatǝm tǝm nɨ a bɛ nǝn bwaa nǝbɔ fʊlkʊblǝn nʌbʌl. Tangǝn nǝbɔ a nyʊwa taal nǝn bɨlǝngǝn. Jǝ nǝ Kwaama dʌbʌlɔ dʊʊlǝn nɛ.

¹⁴ Gaalan na yogɔ a shu. Gaalan na taalɔ a dǝg dul bɛ lɛ.

Jum Na Nʌbʌlɔ

¹⁵ Nǝngɔ bwɛ twama Kwaamaɨ na nʌbʌlɔ a guu jum gǝnɨ. Nǝngɔ ja nyʊwa kaam diiltɨn nǝn kwaan a dʌbʌl kwama sʊwa lɛ gɔ, “Fɔlɔn yooli nɨ a yǝlam fɔlɔn Tɛlalɔ bǝnɨ jǝbɔ a Kiristi gǝnɨ, nǝn gɔ maa fɔlɔn nɛ mɨ dɨltǝm woi.”

¹⁶ Nǝngɔ daltɔ dʊʊm nɨ fʊltiyo jeli naal yǝm a dʌbʌl kotere fɔlɔn jinɔ gǝm a kǝga Kwaamaɨ, ja gǝla ja jʊng a kǝga gǝn ja maa Kwaama gǝm bǝlátǝmɨ.

¹⁷ Jǝ sʊwa lɛ gɔ, “Nǝn buu mʊn kang, Tɛlalɔ Kwaama Nǝ kwaan, wʊnɨ nǝn gɔ kǝngkɨɨ, nǝn gɔ galɨgǝnɨ, jʊ a bwɨɨ, ń do kwaan mʊnɔ, ń tǝl maatǝm fɔlɔnɔ.

¹⁸ Bʌtʌbɔ a maa nabwɨl, Kalatǝm nǝl mʊnɔ a bɛ. Kwama maatǝm borang nǝb nɨ a bʊlala bʊlalaɨ a la. Jwaalɛb mʊnɔ, jǝbɔ nǝbkuwotǝmkǝga mʊnɔ, jǝbɔ nǝb sagsag mʊnɔ, jǝbɔ nǝb nyʊwatǝm taal dun mʊnɔ, nǝbɔ mɨ a nyiyo jǝlɨ, jǝbɔ nǝb dʊʊmɔ, kwama nyatǝm lǝma jinɔ a la. Kwama jʌbotǝm nǝbɔ jʌbom nǝb lɛ a yooli nɨɨ a la.”

¹⁹ Nǝngɔ ja wum Kan Kwaaman Kwaamaɨ wʊnɨ a dʌbʌl kwamaɨ. Ja kuwo kwaati swatǝm yaa gǝnɔ a mʊgɔ Kan Kwaamanɨ. Kwamagɔ beta lɛ, kunnyiyogɔ ga lɛ, diilɔ mwɛla lɛ, tǝmɔ mǝga lɛ, daltɔ tɛl kwamanɔ tǝla lɛ.