Dʊgam Nyangnyang 1 - Dadiya NT

Tǝltǝm Twama Yohanaɨ

¹ Langǝn bwangǝn nɨ gǝ sʊwa jʊ Kwaama a nǝ Yesu Kiristii, sǝ a sʊwa bɛtɔ jwaalɛn gǝnɔ jʊ nɨ bwɨ bwɨ mɨsɔ kʊta lɛ. Nǝngɔ Kiristi a twam bwɛ twama Kwaamaɨ sǝ a sʊwa bwɛ jwaalɛ gǝnɔ Yohana kɛl nɨɨ.

² Nǝngɔ Yohana a sʊwa gwam jʊtǝb nɨ a kuwoi. Wʊnɨ nǝn gɔ twamagɔ Yohana a sʊwa nǝbɨɨ. Twama nɨ a jel a daagɔ Kwaama woi, n jʊ Yesu Kiristi a sʊwaɨ, a maaɨ.

³ Bɛ bwiligɔ a ta tʌgo gwanggwang a nʊ nɨ kiyo kɛl kuwotǝmkǝga nɨ lɛɨ. Bɛ bwiligɔ a ta tʌgo gwanggwang a nǝb nɨ nyʊwa lɛɨ jǝbɔ nǝb nɨ kɨla mʊlalɨ nɨ lɛ a mʊgɔ gǝnɨ, jʊ a bwɨɨ kwamagɔ a dwama.

Yaltǝmɔ A Yɔ Nǝn A Mʊrkalɨ Nǝb Bwangtǝm Kwaamaɨ Nɨ A Daatɨnɔ Nʌbʌli

⁴ A daagɔ Yohana woi a yɔ nǝn a mʊrkalɨ nǝb bwangtǝm Kwaamaɨ nɨ daatɨnɔ nʌbʌl a tǝm Asiyaɨ. Bɛ lǝmagɔ jǝbɔ yɨm kwamɨgǝnɔ a ta tʌgo gwanggwang a daa jen woi, a daagɔ Kwaama woi, nʊ nɨ wo kǝngkɨɨ, nǝn gɔ galɨgǝnɨ, nǝn gɔ a kǝga nɨ, jǝbɔ daagɔ yʊwatɨnɔ nʌbʌl a kǝga kotere fɔlɔn gǝnɨ,

⁵ jǝbɔ daagɔ Yesu Kiristi woi, wʊnɨ n nǝ yiitǝm swatǝm yaa, nǝ nǝtǝm nyiyo bɨlǝngǝnɨ. Nǝn gɔ na win a guntǝm a bwaaɨ. Nǝn gɔ nʊ nɨ maa fɔlɔn nɛ a dul fɔlɔlɔm yooli nɨɨ, nʊ nɨ swɨ bǝn nɛɨ, a jǝg bǝn a mʊgɔ bwɨlangkɛltɨn bǝnɔ gǝm a gola tʊʊm gǝnɨ.

⁶ A dǝg bǝn bǝ yǝlam nǝb fɔlɔn jǝbɔ nǝbkǝlam sǝ bǝ maa Kwaama Tɛtɛ gɔ gǝm maajɨ. Bɛ dʊʊnɔ jǝbɔ kwaanɔ a ta tʌgo gwanggwang mɨ dɨltǝm wo. A daa nyɔ.

⁷ N wɔ bɛ lɛ a mʊgɔ lul. Nǝbɔ pʌd kuwo gǝn kuwo, gwam jǝbɔ nǝb nɨ a kul gǝn nǝn yaaɨ. Pʌd nyiyotɨn yooli nɨ tag jǝ ji ji wi a kɛl dul gǝn. Bɛ a yǝlam nyɔ! A daa nyɔ.

⁸ Tɛlalɔ Kwaama a sʊwa gɔ, “Nǝmǝ mǝ Alfaɨ. Nǝmǝ mǝ Omegaɨ.” Nǝn gɔ galɨgǝnɨ, nǝn gɔ kǝngkɨɨ, nǝn gɔ tag a kǝga nɨɨ, Nǝ Kwaan.

Dʊgam Nyangnyang Yohanaɨ A Dul Bʊla Nǝfilii

⁹ Nǝmǝ mǝ Yohana kɨla jen, fwalɨ yɨm jǝbɔ jen a mʊgɔ gaalan jǝbɔ fɔlɔn jǝbɔ kʊtǝm nǝl, a mʊgɔ Yesui. Mǝ na fʌlen a tɨbǝl tǝm nɨ a mʊgɔ wɨma nɨ jǝ jo lɛ gɔ Batamusaɨ. Mǝ na fʌlen a dul kɛl Kwaamaɨ jǝbɔ nǝtǝm nyiyo a kɛl dul Yesui.

¹⁰ Nǝn di kɔkɔ bǝlátǝm Tɛlalɔɨ, mǝ na a mʊgɔ Yʊwa. Nǝngɔ mǝ nyʊwa kaa diil nǝn kwaan na guutǝm jum a gul mɨɨ.

¹¹ Sʊwa lɛ gɔ, “Mʊla jʊ mʊ kuwo a mʊgɔ langǝn bwangǝnɨ, sǝ ń twam mʊrkalɨ nǝb bwangtǝm Kwaamaɨ nɨ gǝm daatɨnɔ nʌbʌli, bǝ Afisa jǝbɔ Simirna jǝbɔ Birgamas jǝbɔ Tayatira jǝbɔ Sardisu jǝbɔ Filadalfiya jǝbɔ Lawudikiya.”

¹² Mǝ yǝla sǝ n kuwo diil nɨ sʊwa ɨ kɛl lɛɨ, yǝlatǝm mǝndɨ nǝngɔ mǝ kuwo daatɨn swatǝm fitila mʊntɨnɔ nʌbʌli.

¹³ A tɨbǝl daatɨn swatǝm fitila nɨɨ, n kuwo kaa nǝl na Bʊla Nǝfilii, tɨm nǝn bɛllɛ somi a gǝla a tal gǝm a twam naa. Kuli gǝnɔ tag nǝn dwang fɛl mʊn.

¹⁴ Dul gǝnɔ jǝbɔ yitʌn dulɔ a fulo nǝn fǝbfǝb nyɔ maamɔ fǝmǝn, a fulola maamɔ tɛl kwaman. Nutɨn gǝnɔ maamɔ ben kǝla.

¹⁵ Twam naatɨn gǝnɔ maamɔ mʊn nɨ ja twɨm twɨmɨ sǝ a fɛ a bʊmɨ, na nʊ nɨ ja fɛm fɛmɨ a kan kʊbǝlɨ. Diil gǝnɔ tag a maamɔ diil mwɛtɨn mwɛla lɛɨ.

¹⁶ A ta nyanyamɨtɨnɔ nʌbʌl a kang jajǝng gǝnɔ gǝm. A mʊgɔ nyiyo gǝn tag gulʌnɔ jel lɛ wo. Gulʌn nɨ nyiyo jalǝngɔ yo. Kǝga gǝnɔ beta lɛ na nu kwama a bwayǝlǝn gǝnɔ gǝm.

¹⁷ Nǝn kwama mǝ kuwo gǝnɨ, nǝngɔ mǝ yal a kǝga gǝn na bʌlʌni. Nǝngɔ a ya mɨ kang jajǝng gǝnɔ a duli, a sʊwa ɨ gɔ, “Ka ń nyʊwa lɛ taal. Nǝmǝ mǝ tǝltǝmɔ jǝbɔ dɨltǝmɨ.

¹⁸ Nǝmǝ tag nǝn kʊlɨɨ. Galɨgǝn n bʊla bʊlaɨ, n wɔ kǝngkɔ mǝ nǝn kʊlɨ mɨ dɨltǝm wo! Mǝ nǝn kwaan a dul bwaa jǝbɔ daa yamtǝm borangɔ.

¹⁹ “Bɛ ń mʊla kanjǝl nɨ mʊ kuwoi, jǝbɔ kanjǝl nɨ wo kǝngkɨɨ, jǝbɔ kanjǝl nɨ bɛ lɛ a kǝgaɨ.

²⁰ Kɛl nɨ ja yʊ na nyanyamɨtɨn nɨ nʌbʌl mʊ kuwo a mʊgɔ kang jajǝng mǝndɨ jǝbɔ daatɨn swatǝm fitila nɨ nʌbʌl na mʊntɨnɨ gǝ nʊng: Nyanyamɨtɨn nɨ nʌbʌli n bɛtɔ twama Kwaamaɨ nʌbʌl a mʊrkalɨ nǝb bwangtǝm Kwaamaɨ nɨ daatɨnɔ nʌbʌli. Daatɨn swatǝm fitila nɨ nʌbʌli n mʊrkalɨ nǝb bwangtǝm Kwaamaɨ nɨ daatɨnɔ nʌbʌli.”