Maajɨ Bɛtɔ Twamagɨɨ 18 - Dadiya NT

Bulus A Korinti

¹ A gulɔ gǝm Bulus a bǝla Atinagɔ. A shu a Korinti.

² N daa nɨ a nya kaa bwɛ Yahuda woi, wʊnɨ jǝ jo lɛ gɔ Akilaɨ, n bwɛ tǝm Fantasɨ. Akila jǝbɔ nwala gɔ Bilkisu ja jel a tǝm Italiya, jʊ a bwɨɨ Kalaudiyas a ga diil gɔ Yahudawagɔ gwam ja bǝla Romagɔ. Nǝngɔ Bulus a yɔ a daa ji woi.

³ Maajɨ kang jinɔ win jǝbɔ a gǝnɔ, jǝ fɛ gushi. N kɛl dul jʊ nɨ a yɨ jǝbɔ jii. Jǝ maa maajɨgɔ lɛ dakini.

⁴ Nǝn Kum Fǝbtǝmɔ gwam Bulus gǝ gʊbka gʊbka jǝbɔ ji a kan mɛlalɨ. Swɨ lɛ a gʊ Yahudawagɔ jǝbɔ Bʌtʌbɔ sǝ ja nǝ bɨlǝngkɛl.

⁵ Kwama Sila jǝbɔ Timoti a jel a Makidoniya a bɛɨ, Bulus a nǝ dul gǝnɔ a kiyotǝm kɛl Kwaamaɨ. Sʊwa Yahudawagɔ lɛ gɔ Yesu nǝn gǝ nǝn Kiristii.

⁶ Jǝ bǝng gǝn nɛ, jǝ tuwola gǝn nɛ. N dul kɛl nɨ a fʌrʌm dwang gǝnɔ a sʊwa ji gɔ, “Bɛ tʊʊm jenɔ a yɨ a dul jen! Mǝ, mɨ mǝ nǝn bwɨlangkɛl. Jʊ a ta a dwiyeni, mǝ yi a daagɔ Bʌtʌbɔ woi.”

⁷ Nǝngɔ a gun a shu a lɔ kaa balɨ nɨ jǝ jo lɛ gɔ Titus Yustusi. N nǝ bǝlátǝm Kwaamaɨ. Lɔ gǝnɔ a kɔtʌgo a kan mɛlalɨgɔ gǝm.

⁸ Nǝngɔ Kiribus nǝ dʊʊ kan mɛlalɨgɔ, a nǝ bɨlǝngkɛl a daagɔ Tɛlalɔ woi, gɔ jǝbɔ nǝbɔ lɔ gɨɨ gwam. Kaam nǝbɔ Korintii a lada nyɔ ja nyʊwa kɛl Bulusi, ja nǝ bɨlǝngkɛl. Nǝngɔ ja yʊ ji mwɛ sagsagɨɨ.

⁹ Kaa di nǝn kum, Tɛlalɔ a nʊng Bulus a dʊgam nyangnyang gɔ, “Ka ń nyʊwa lɛ taal. Ya ń sʊwa kɛl Kwaamaɨ lɛ. Ka ń yɨ lɛ shig.

¹⁰ Mǝ na dakini jǝbɔ mɔ. Mɨ nʊ nɨ wo ya kang lɛ a maa mʊn kaa jǝlɨ, jʊ a bwɨɨ mǝ nǝn nǝbɔ a lada nyɔ a tuulɔ nɨ.”

¹¹ Bulus a yɨ wo jolɔ win jǝbɔ bwaala nukun. Mɛla jim kɛl Kwaamaɨ lɛ.

¹² Kwama nɨ Galiyo maam fɔlɔn tǝm Akaya lɛɨ, Yahudawagɔ a mʊrkam nyiyo ja gun tʌgo a Bulus gǝm. Nǝngɔ ja yɔ nǝn gɔ a kǝga nǝb borangɨɨ.

¹³ Nǝngɔ ja sʊwa gɔ, “Balɨ nɨ swɨ lɛ a dǝg nǝbɔ a bǝlá Kwaama a gola nɨ diilɔ a sʊwa gɔ ka ja maa lɛɨ.”

¹⁴ Bulus swɨ lɛ a sʊwa kɛlɨ, nǝngɔ Galiyo a sʊwa Yahudawagɔ gɔ, “Na na n kaa bwɨlangkɛl a maaɨ, na bwɨlangkɛl dʊʊnɨ, mǝ nyʊwa jen nyʊwa.

¹⁵ A kɛl nɨɨ n gʊbkatǝm kɛl a dul kɛltɨn, jǝbɔ duntɨn, jǝbɔ diil jeni. Jǝ́ fɛka kɛl nɨ nǝn kang jen. Mǝ mɨsɔ mǝ maa wɛl maatǝm borang lɛ a dul kanjǝl nɨ.”

¹⁶ Nǝngɔ a kaa ji a kan borangɨ.

¹⁷ Nǝngɔ gwam jinɔ ja ta Sastanisui, nǝ dʊʊ kan mɛlalɨgɔ. Ja bʊg gǝn a kǝga kan borangɨ. Galiyo a swa jim bɔ lɔl wo.

Bulus A Yǝla A Antakiya Nɨ A Suriyaɨ

¹⁸ A gul jʊ nɨ, nǝngɔ Bulus a sʊ kumtɨnɔ a lada a Korintii. Nǝngɔ a bǝla nǝb bwangtǝmɨ. A dɔ tɨyamwɛngɔ dakini jǝbɔ Bilkisu jǝbɔ Akila ja ta gola ja shu a Suriyaɨ. Ya jǝ gun nɛɨ, nǝngɔ Bulus a bʊtɨm dul gǝnɔ a Kankiriyaɨ, jʊ a bwɨɨ a do wɛɛlɨ.

¹⁹ Nǝn kwama ya ja la Afisaɨ, n daa gɔ Bulus a bǝla Bilkisu wo jǝbɔ Akilaɨ. Nǝngɔ a dɔ kan mɛlalɨgɨɨ, a maa gʊbkatǝm kɛl jǝbɔ Yahudawagɔ.

²⁰ Nǝngɔ ja kela gǝn gɔ a sʊ kumtɨn a daa ji woi. A jǝla bɔ.

²¹ Ya bǝla ji lɛɨ, nǝngɔ a sʊwa gɔ, “Mǝ yǝla mǝ bɛ bɛ a daa jen woi, na Kwaama a jǝlaɨ” Nǝngɔ a gun shu a Afisa a tɨyamwɛngɨ.

²² Ya gǝla a Kaisarɨ, nǝngɔ a gwi ya yal mʊrkalɨ nǝb bwangtǝm Kwaamaɨ a Urushalimaɨ. Nǝngɔ la a gǝla a Antakiyaɨ.

²³ A daa kum wo dǝm a Antakiyaɨ, nǝngɔ a gun a kɛla tǝm Galatiyagɔ jǝbɔ tǝm Firijiyagɨɨ. Bwangtǝn tuulɔtɨnɔ lɛ. Nǝ nǝb bwangtǝmɔ kʊtǝm nǝl lɛ.

Afolos A Kiyo Kɛl Kwaamaɨ A Afisa

²⁴ Kaa bwɛ Yahudaɨ dunɔ nǝn Afolos. A bɛ a Afisa. Gɔ n bwɛ tuulɔ Iskandariyaɨ. A nyǝm sʊwatǝm kɛl. A nyǝm mʊlalɨ kɛl Kwaamaɨ dangǝn.

²⁵ Ja mɛla gǝm a mʊgɔ gola Tɛlalɔɨ. Mɨ nǝn fiyel a mʊgɔ kɛl. Gǝ mɛla mɛla bɨlǝngkɛl nyangǝn a dul Yesui. A nyǝm yʊtǝm mwɛ sagsag Yohanaɨ kwaagɔ.

²⁶ Nǝngɔ a tǝl sʊwatǝm kɛl Kwaamaɨ nǝn kwaan gǝnɔ a kan mɛlalɨɨ. Bilkisu jǝbɔ Akila ja nyʊwa kɛl gǝnɨ, nǝngɔ ja gʊ gǝn a kelii. Nǝngɔ ja sʊ gǝm nyǝmtǝmɔ a gola Kwaamaɨ dangǝnɨ.

²⁷ Nǝn kwama Afolos swɨ lɛ ya dʌng tǝm Akayagɨɨ, nǝb bwangtǝmɔ a tɨka gǝn. Ja mʊla nǝb bwangtǝmɔ gǝm a Akayaɨ sǝ ja yo gǝn kangɔ yo. A la fʌleni, a yǝlam gʌleng nǝ tɨkalɨ a daagɔ nǝb bwangtǝmɔ woi, nǝb nɨ a gola lǝmaɨ, ja nǝ bɨlǝngkɛlɨ.

²⁸ A kʊwa Yahudawagɔ a kǝga nǝbɨɨ. Sʊwa ji lɛ nyangǝn a mʊgɔ mʊlalɨ kɛl Kwaamaɨ gɔ Yesu nǝn gɔ nǝn Kiristii.